Kariaia te Tangira Bwa E na Kairiko Bwa Ko na Teimatoa n Uarongorongo!

1. Tera ae ti reiakinna n te botaki ae katoa ririki ibukin 2023?

TI KAREKEI kaetan otara i aon ara koaua tabeua n te botaki ae katoa ririki ibukin 2023,a ao ti ongoraei naba iai katanoata aika kakukurei ibukin ara mwakuri ni minita. N te katoto, ti reiakinna ae iai tabeman aika e na reke aia anga n raonia ana aomata Iehova imwin naba kamaunaani Baburon ae Kakannato. Ti reiakinna naba ae man Nobembwa 2023, ao a nang aki manga ribootina mwin aia mwakuri ni kabane n te mwakuri ni minita taan uarongorongoa te Tautaeka n Uea. E a kauarerekea riki kakawakin ara mwakuri ni minita bitaki aikai nakon are mai imwaina? E bon aki!

2. Bukin tera bwa e a kaumakaki riki ara mwakuri ni minita ni katoabong? (Mareko 13:10)

² E a kaumakaki riki ngkai ara mwakuri ni minita ni katoabong. Bukin tera? Ibukina bwa e a kimototo te tai. Iangoa te baere e a kaman taekinna Iesu ibukin te mwakuri n uarongorongo ni kabaneani boong. (Wareka Mareko 13:10.) Ni kaineti ma ana rongorongo Mataio, ao e taekinna iai Iesu bwa e na tataekinaki te rongorongo ae raoiroi n te aonnaba ni kabutaa imwain rokon “te toki.” (Mat. 24:14) E kaineti te taeka anne ma tokin raoi ana waaki Tatan ae buakaka ae ngkai. E a tia Iehova n namata “te bong ma te aoa” ibukini baika a nang waekoa n riki. (Mat. 24:36; 25:13; Mwa. 1:7) Ti a uakaan riki ma te tai anne ni katoaa banen te bong teuana ma teuana. (IRom 13:11) Ma ngkai moa, ti riai n teimatoa n uarongorongo ni karokoa rokon te toki.

3. Tera ae e kairira bwa ti na uarongorongo?

³ Ngkana ti kaatuua iangoan ara mwakuri ni minita, ti riai n iaiangoa te titiraki ae kakawaki aei: Bukin tera ngkai ti tataekina te rongorongo ae raoiroi? Ibukina bwa e kairira te tangira bwa ti na uarongorongo. Baika ti karaoi n te mwakuri n uarongorongo e oti iai bwa ti tangira te rongorongo ae raoiroi, ti tangiriia aomata, ao ae kakawaki riki, ti tangira Iehova ao arana. Ti na rinanoni baikai teuana imwin teuana.

TI UARONGORONGO IBUKINA BWA TI TANGIRA TE RONGORONGO AE RAOIROI

4. Tera arora ngke ti kaongoaki te rongorongo ae raoiroi?

⁴ Ko kona n uringa am namakin ngke ko kaongoaki rongorongo tabeua aika kakukurei, tao e a tibwa bung kaain am utu temanna, ke iai temanna ae karekea am mwakuri ae ko rangi ni kainnanoia raoi? Ko boni bae n ingainga ni kan taekina te rongorongo anne nakoia am utu ke raoraom. Anne naba ae riki nakoim ngke ko kaongoaki te rongorongo ae te kabanea n tamaroa ae te rongorongo ae raoiroi ibukin Ana Tautaeka n Uea te Atua?

5. Tera am namakin ngke ko moan reiakina te koaua man Ana Taeka te Atua? (Nori naba taamnei.)

⁵ Iangoa am namakin ngke ko moan reiakina te koaua man Ana Taeka te Atua. Ko a ataia ae e tangiriko Tamam are i karawa, e tangiriko bwa ko na kaaina ana utu aika taan taromauria, e berita bwa e na katoka te maraki ao te rawawata, ao ko kona ni manga noriia aika tangiraki iroum ake a mate ngkana a kautaki n te aonnaba ae boou, ao a a bati riki. (Mareko 10:29, 30; Ioa. 5:28, 29; IRom 8:38, 39; TeKao. 21:3, 4) E rotaki nanom ni koaua akanne. (Ruka 24:32) Ko tangiri baike ko reiakini, ao ko a aki kona n taui iroum koaua aika kakawaki akanne!—Kabotaua ma Ieremia 20:9.

6. Tera reireiam man rongorongon Ernest ao Rose?

⁶ Iangoa te rongorongo aei. E mate taman te tari te mwaane ae Ernestb ngke tao tebwina ana ririki. E taku Ernest: “I iango ni kangai: ‘E a mena ngkai i karawa? Ke e a bua ao n aki manga maiu?’ I boni bakantang irouia ataei tabeman ake iai aia karo.” E katoabong Ernest ni kawara te ruanimate, e katorobubua i rarikin ruanimaten tamana ao n tataro ni kangai: “Taiaoka te Atua, I kan ataia bwa e a mena ia tamau.” Tao 17 te ririki imwini maten tamana, ao e a kaotaki nakoina aron te reirei n te Baibara, ao e butimwaeia. E rangi n anaaki nanona ngke e reiakinna ae akea te bwai ae a namakinna aomata aika mate, kaanga aron ae a matunako, ao e berita te Baibara taekan te mangauti n te tai ae e na roko. (TeMin. 9:5, 10; Mwa. 24:15) N tokina, e a kunei kaekaan ana titiraki ake e tabeaianga iai n te tai ae rangi ni maan! E rangi ni kukurei Ernest n taiani koaua man te Baibara ake e reiakin. E raonna n reirei buuna ae Rose, ao e tangira naba neiei te baere e reiakinna. A bwabetitoaki n 1978. A ingainga n tibwai aia koaua aika kakawaki aikai nakoia aia utu, raoraoia, ao tabeman riki ake a kan ongora. Ibukin anne, e raka i aon 70 aomata ake a buokaki iroun Ernest ao Rose bwa a na rikirake nakon te bwabetito.

7. Tera ae e na riki ngkana e nene raoi i nanora tangiran te koaua man te Baibara? (Ruka 6:45)

⁷ E teretere bwa ti aki kona ni kainabwabu ngkana e nene raoi i nanora tangiran te koaua man te Baibara. (Wareka Ruka 6:45.) Titeboo raoi ara namakin ma taan rimwin Iesu ake n te moan tienture ake a kangai: “Ti aki kona ngaira ni katoka tataekinani baike ti nori ma n ongo.” (Mwa. 4:20) Ti rangi n tangira te koaua n te aro ae ti a kan tibwaia nakoia aomata aika bati.

TI UARONGORONGO IBUKINA BWA TI TANGIRIIA AOMATA

8. Tera ae kairira bwa ti na karokoa te rongorongo ae raoiroi irouia aomata? (Nora te bwaoki ae “Tangiriia Aomata—Karekeia Taan Rimwini Kristo.”) (Nora naba te taamnei.)

⁸ Ti tangiriia aomata n aron Iehova ao Natina. (TaeRab. 8:31; Ioa. 3:16) Ti rangi n nanoangaiia te koraki aika “akea ataakin te Atua” irouia ao aika “akea [aia] kantaninga.” (IEbe. 2:12) Kaanga ai aron ae a a bwabwa ni kangaangan te maiu aei, ao iai iroura te bwai ni kamaiu ae a kainnanoia, ae te rongorongo ae raoiroi ibukin Ana Tautaeka n Uea te Atua. Ti kairaki n tangiraia ao nanoangaaia te koraki aikai bwa ti na kabanea ara konaa ni karokoa te rongorongo ae raoiroi irouia. E kona te rongorongo ae kakawaki anne ni karekea te kantaninga nakoia, ni buokiia bwa a na karekea te maiu ae te kabanea n tamaroa ngkai, ao n angania te kantaninga ibukin “te maiu ni koaua,” ae te maiu are aki toki n ana aonnaba ae boou te Atua.—1Tim. 6:19.

9. Tera te kauring ae ti tataekinna ibukin taai aika imwaira, ao bukin tera? (Etekiera 33:7, 8)

⁹ Ti kairaki naba n tangiraia aomata bwa ti na kauringia taekan ae e a kaan roko tokin te waaki ae buakaka ae ngkai i aon te aba. (Wareka Etekiera 33:7, 8.) Ti nanoangaiia aomata ao ara utu aika tiaki kaain te onimaki. A bati aika bon waakinaanako aroni maiuia n akea ataakin rokon “te rawawata ae korakora ae tuai ni kaoti mangke e moani karikaki te aonnaba ni karokoa ngkai, ao e na aki manga kaoti rimwi.” (Mat. 24:21) Ti tangiria bwa a na ataa te bae e na riki n tain te motikitaeka anne ae a na kamaunaaki Aaro aika kewe ao imwina e na kamaunaaki te waaki ae buakaka ni kabane n Aremaketon. (TeKao. 16:14, 16; 17:16, 17; 19:11, 19, 20) Ti tataro bwa a na bati aomata aika a na ongo te kauring aei ao n raonira ngkai n te taromauri ae itiaki. Ma tera aroia te koraki aika aki kan ongo te kauring n te tai aei, n ikotaki naba ma ara utu aika tangiraki iroura?

10. Bukin tera bwa e kaumakaki ae ti na teimatoa n tataekina te kauring?

¹⁰ N aron ae kabwarabwaraaki n te kaongora are mai mwaina, e boni bae n nanon Iehova bwa e na kamaiuia aomata aika bitaki nanoia ngkana a nora kamaunaani Baburon ae Kakannato. Ngkana ngaia anne, e a kaumakaki riki ngkai bwa ti na teimatoa n tataekina te kauring anne. Iangoa aei: Te bae ti taekinna nakoia ngkai, e kona n reke iai te bae a na ururingnga imwina riki. (Kabotaua ma Etekiera 33:33.) Tao a na bae n uringa te kauring are a ongo iroura ao ni kairaki iai bwa a na raonira n te taromauri ae itiaki imwain ae a oimwi. N aron te tia tararuaiia buure i Biribi are e bitaki nanona imwin “[rokon] te mwaeiei ae korakora,” a kona naba tabeman aika a aki kan ongora ngkai, ni manga bitaki nanoia imwini kamaunaani Baburon ae Kakannato.—Mwa. 16:25-34.

TI UARONGORONGO IBUKINA BWA TI TANGIRA IEHOVA AO ARANA

11. Ti na kangaa n angan Iehova te neboaki, te karineaki ma te mwaaka? (Te Kaotioti 4:11) (Nori naba taamnei.)

¹¹ Bukina ae te kabanea ni kakawaki ngkai ti tataekina te rongorongo ae raoiroi, bwa ti tangira Iehova ae te Atua ao arana ae tabu. Ti iangoa ara mwakuri ni minita bwa te anga ae ti karaoiroa iai te Atua ae ti tangiria. (Wareka Te Kaotioti 4:11.) Ti kakoauaa raoi ae e bon riai n anganaki Iehova ae te Atua te neboaki, te karineaki ma te mwaaka irouia taan taromauria aika kakaonimaki ni koaua. Ti anganna te neboaki ma te karineaki ngkana ti kaotia nakoia aomata te bwai ni kakoaua ae kona n onimakinaki bwa e “karikii bwaai ni kabane” ao ti bae irouna ibukina bwa e karikira. Ti anganna te mwaaka ae taekani korakorara, ngkana ti kamanena ara tai, korakorara, ao kaubwaira n uataboa te mwakuri ni minita n aron ara kabanea ni konaa. (Mat. 6:33; Ruka 13:24; IKoro. 3:23) Ni kauarerekeana, ti tangiria n tataekina taekan te Atua ae ti tangiria. Ti kairaki naba bwa ti na tataekina arana nakoia tabemwaang ao tera ae nanonaki iai. Bukin tera?

12. Ti na kangaa ni katabua aran Iehova n ara mwakuri ni minita?

¹² Ti kairaki n tangiran Iehova bwa ti na katabua arana. (Mat. 6:9) Ti kani kaitiaka arana mani kabuakakaana are e reke n ana kewe Tatan. (KBwaai 3:1-5; Iobi 2:4; Ioa. 8:44) N ara mwakuri ni minita, ti ingainga n tei ibukin Atuara n tataekina te koaua ibukina nakoia aomata nako ake a kan ongora. Ti tangiriia aomata bwa a na ataia ae aroarona ae rianako riki bon te tangira, ao e raoiroi ao n riai ana waaki ni kairiri, ao e na waekoa ana Tautaeka n Uea ni katoka te rawawata ni kabane ao ni karokoa te rau ao te kukurei nakoia aomata. (TaiAre. 37:10, 11, 29; 1Ioa. 4:8) Ngkana ti kaitiaka taekan Iehova n ara mwakuri ni minita, ti a katabua iai arana. E reke naba raun nanora n ataakin ae ti maiuakina arara. N te aro raa?

13. Bukin tera ti kamoamoa ngkai ti aranaki bwa Ana Tia Kakoaua Iehova? (Itaia 43:10-12)

¹³ E rineira Iehova bwa ti na riki bwa ana “tia kakoaua.” (Wareka Itaia 43:10-12.) Tabeua te ririki n nako ao e koreaki aei n ana reta te Rabwata n Tautaeka: “Te tibwanga ae moan te tamaroa ae ti karekea, bon rikira bwa temanna Ana Tia Kakoaua Iehova.” Bukin tera? Iangoa te kaikonaki aei. Ngkana ko kainnanoa temanna ae e na riki bwa te tia kakoaua ibukim n te kaboowi, ko na bon rinea te aomata ae ko kinaa ao ko onimakinna, ae te aomata ae raoiroi taekana ao e kona n onimakinaki ana taeka ni kakoaua. Ngkai e rineira Iehova bwa ana tia Kakoaua, e kaotia iai bwa e kinaira raoi ao e onimakinira bwa ti na taekina te koaua ae bon tii ngaia te Atua ae koaua. Ti rangi ni kakabwaiaaki ngkai ti riki bwa ana tia Kakoaua ao ti kamanenai aanga nako ni kaotiota iai arana ao ni kaaitarai keewe aika bati aika taekinaki ibukina. Ni karaoan anne, ti a maiuakina iai ae boraoi ma te ara ae ti kamoamoa n uouotia, ae Ana Tia Kakoaua Iehova!—TaiAre. 83:18; IRom 10:13-15.

TI NA TEIMATOA N UARONGORONGO NI KAROKOA TE TOKI

14. Tera te kantaninga ae kakukurei ae mena imwaira?

¹⁴ Ai kakukureira te kantaninga ae mena imwaira! Man ana kakabwaia Iehova, ti kantaningaia bwa ti na noriia aomata aika bati riki ni butimwaea te koaua imwaini moanakin te rawawata ae korakora. Ti kimwareirei n ataakin ae n tain naba te rawawata ae korakora, ae te tai ae rangi ni kangaanga irouia aomata, ao ti na noriia naba aomata ni kitana ana waaki Tatan ae e a kaan toki aei ao n raonira ni karaoiroa Iehova!—Mwa. 13:48.

15-16. Tera ae ti na teimatoa ni karaoia, ao ni karokoa n ningai?

¹⁵ Ma ngkai moa, iai te mwakuri ae ti na karaoia. Iai mwiokoara ae kakawaki ae ti na aki manga karaoia riki imwina, ae tataekinan te rongorongo ae raoiroi ibukin Ana Tautaeka n Uea te Atua ni kabutaa te aonnaba. Ma ti riai naba n teimatoa ni kakauringia aomata taekan te bae e nang waekoa n riki. A riai aomata n ataia ae e a kaan roko tokin te waaki ae buakaka ae ngkai. Ao ngkana e a roko te tai ni motikitaeka anne, a na ataia iai ae te rongorongo are ti tataekinna e bon roko mairoun Iehova ae te Atua.—Etek. 38:23.

¹⁶ Tera ngkanne ae ti riai ni motinnanoia bwa ti na karaoia? Ti kairaki n te tangira, ae tangiran te rongorongo ae raoiroi, tangiraia aomata, ao ae kakawaki riki, tangiran Iehova ae te Atua ao arana, bwa ti na teimatoa n uarongorongo ma te ingaingannano, ao te umaki ni karokoa e kangai Iehova, “E a tau!”