Aron Iehova ni Buokira n Nanomwaaka

1. Bukin tera bwa ti kainnanoa te nanomwaaka, ao tera te ibuobuoki ae ti karekea? (1 Betero 5:10)

A KAINNANOA te nanomwaaka ana aomata Iehova ni kabaneani boong aika kangaanga aikai. Tabeman a taonaki n te aoraki ae wenemaan. Ake tabemwaang a karawawataaki ni buan ae tangiraki irouia. Ao iai naba aika a teimatoa ni kakaitaraaki irouia aia utu ke kaain te tautaeka. (Mat. 10:​18, 36, 37) Ma n aki ongei kangaanga aika ko kaaitarai, kakoauaa raoi ae e kona Iehova ni buokiko n nanomwaaka.​—Wareka 1 Betero 5:10.

2. E reke mai ia ara konabwai n nanomwaaka ngkai Kristian ngaira?

² Te nanomwaaka bon te konabwai ni botumwaaka ao ni kateimatoa te kantaninga, e ngae ngkana ko kaaitara ma kangaanga, bwainikirinaki, kataaki, ke kariri. E aki reke te konabwai n nanomwaaka ngkai Kristian ngaira man oini korakorara, ma e reke mairoun Iehova are ngaia ae kona n anganira te “korakora ae riaoni korakoraia aomata.” (2Kor. 4:7) N te kaongora aei, ao ti na maroroakini baika aua aika e katauraoi Iehova aika a na buokira n nanomwaaka. Ti na noria naba bwa tera arora ni kona ni kamanenai baikai.

TE TATARO

3. Bukin tera ngkai ti kona n taekina te tataro bwa te bwai n reitaki ae kamimi?

³ E a tia Iehova ni katauraoa te bwaintituaraoi ae kamimi ae kona ni buokira n nanomwaaka. E katauraoia ibukira bwa ti aonga ni kona n reitaki ma ngaia e ngae ngke taani bure ngaira. (Ebera 4:16) Iangoa aei: Ti kona n tataro nakon Iehova n taai ake ti kainnanoia iai ao ibukini bwaai ni kabane. E kona n ongo iroura n taetae nako ao man taabo aika kakaokoro, e ngae ngkana ti tionako ke ti karabuutinaki. (Iona 2:​1, 2; Mwa. 16:​25, 26) Ngkana ti a rangi n raraoma ao ti a aki ataia bwa tera ae ti na taekinna, e boni kona n ota Iehova n te bae ti kan taekinna. (IRom 8:​26, 27) Ni koauana, te tataro bon bwai n reitaki ae kamimi!

4. Bukin tera ngkai ti kona n taekinna ae ara tataro ibukin te nanomwaaka e boraoi ma nanon Iehova?

⁴ E karaui nanora Iehova n ana Taeka bwa “ngkana ti bubutiia te bwai teuana ae boraoi ma nanona ao e bon ongo iroura.” (1Ioa. 5:14) Ti kona ni bubutiia Iehova buokara bwa ti na nanomwaaka? Eng! Karaoan anne e boraoi ma nanona. Bukin tera ngkai ti kona n taekina anne? Ngkana ti nanomwaaka i aani kataaki, ti a karekea iai angan Iehova ni kaekaa Tatan te Riaboro are te tia kakanikoa. (TaeRab. 27:11) Irarikin anne, e taekinna te Baibara bwa e ingainga Iehova ni “kaota korakorana ibukia te koraki ake a tabwanin raoi nanoia nakoina.” (2Rong. 16:9) Ngaia are ti kona ni kakoauaa ae iai mwaakan Iehova ao nanona ni kani buokira n nanomwaaka.​—Ita. 30:18; 41:10; Ruka 11:13.

5. E na kangaa te tataro n anganira te rau n ara iango? (Itaia 26:3)

⁵ E taekinaki n te Baibara bwa ngkana ti kakorakoraira n tataro ibukin tabeaiangara, ao “te rau are mairoun te Atua ae riaon aia iango aomata, e na kawakin [nanora] ma [ara] iango.” (IBir. 4:7) Iangoa ae nanonaki n anne. Aomata ake a aki beku iroun Iehova a kaaitara ma kangaanga, ao a kona ni katai aanga aika bati ni karekea raun aia iango. N te katoto, tabeman a kananoi aia iango n aanga tabeua bwa a aonga ni bua baike a iaiangoi, n ikotaki naba ma tabeaiangaia. Ma karaoan anne e karuanikaia aia onimaki. (Kabotaua ma Mataio 12:​43-45.) Irarikina, e raoiroi riki te rau are e katauraoia Iehova ngkana ti tataroia, nakon te rau are e reke man aeka ni waaki akanne. Ngkana ti tataro nakon Iehova, ti a kaotia iai bwa ti mwiokoira ni koaua irouna ao e anganira te “rau ae teimatoa.” (Wareka Itaia 26:3.) Te anga teuana ae karaoa iai anne Iehova, man arona ni buokira bwa ti na ururingi koaua aika karaunano ake ti reiakin man ana Taeka. A rau ara iango ao nanora mani koaua akanne ibukina bwa ti ataia ae e tabeakinira Iehova ao e tangirira bwa ti na rau.​—TaiAre. 62:​1, 2.

6. Ko na kangaa ni kamanena raoi te tataro? (Nora naba te taamnei.)

⁶ Te bae ko kona ni karaoia. “Kaaki rawawatam i aon Iehova” ao tataro ibukin te rau ngkai ko nanomwaaka i aani kataakin am onimaki. (TaiAre. 55:22) Tataroa naba te wanawana ae ko kainnanoia bwa ko aonga ni kaitaraa am kangaanga. (TaeRab. 2:​10, 11) Ao ngkana ko kakorakorako n tataro ni bubutii te nanomwaaka, tai mwaninga ni katituaraoi. (IBir. 4:6) Iangoi aanga aika e kateimatoako iai Iehova n am tai ni kataaki ao kaitaua ibukin ana boutoka. Tai kariaia kataakim bwa e na rabuni kakabwaia ake ko a kamani karekei.​—TaiAre. 16:​5, 6.

ANA TAEKA TE ATUA

7. E na kangaa te ukeuke n te Baibara ni buokira n nanomwaaka?

⁷ E a tia Iehova n anganira ana Taeka ae e na buokira n nanomwaaka. A bati kiibu man te Baibara aika karaui nanora ibukin ana boutoka Iehova. Iangoa te katoto teuana. E kangai Mataio 6:8: “E a kaman atai baika kam kainnanoi Tamami, imwain ae kam butiia.” E taekin taeka aikai Iesu ao tii ngaia ae e kinaa riki Iehova. Ngaia are ti aki riai n nanououa n aron Iehova n tabeakini kainnanora ngkai ti kaaitara ma kangaanga. A bati aeka ni berita akanne n te Baibara aika kona ni kakorakoraa nanora n nanomwaaka.​—TaiAre. 94:19.

8. (a) Taekina teuana te boto n reirei man te Baibara ae kona ni buokira n nanomwaaka. (b) Tera ae kona ni buokira bwa ti na uringi booto n reirei man te Baibara ngkana ti a kainnanoi?

⁸ Ti kona ni buokaki n nanomwaaka ni booto n reirei man te Baibara. Ti kona ni karekea mai iai te wanawana ae manena ae e na buokira ni karaoi motinnano aika raraoi. (TaeRab. 2:​6, 7) N te katoto, ti kaungaaki n te Baibara bwa ti na angan te bong ma kanoana, ao ti na aki rangi n raraoma ibukin ningabong bwa tera ae e na riki ke ae e na aki riki. (Mat. 6:34) Ngkana anuara te wawareware n te Baibara ao kakananoan ara iango iai, ti na kona ni kai uringi booto n reirei aika ti kainnanoi ngkana ti a kainnanoi.

9. A kangaa rongorongo ake n te Baibara ni kakorakoraa onimakinan ana ibuobuoki Iehova?

⁹ Iai naba n te Baibara rongorongo aika koaua ibukia aomata ake a onimakina Iehova ao a karekea ana boutoka. (Ebera 11:​32-34; Iak. 5:17) Ngkana ti iaiangoi rongorongo akanne, ti a kakorakoraa iai onimakinan ae Iehova bon “ara tabo ni kamanomano . . . ao korakorara, ti kai karekea buokara n taai nako mairouna n tain te rawawata.” (TaiAre. 46:1) Ngkana ti iaiangoa aia kakaonimaki ana toro Iehova n taai ake rimoa, ti a kairaki iai bwa ti na kakairi n aia onimaki ao n nanomwaakaia.​—Iak. 5:​10, 11.

10. Ko na kangaa ni kamanena raoi Ana Taeka te Atua?

¹⁰ Te bae ko kona ni karaoia. Wareka te Baibara ni katoabong, ao korei kiibu aika ko kunei bwa a ibuobuoki. A bati naba aika a noria bwa warekan te kibu n te bong bon te anga ae uaana ni moanakini kanoan am bong ma te kibu ae kaunganano man te Baibara. E nora koauan anne te tari te aine ae Mariea ngke e reke irouia ana karo te kaentia. Tera ae buoka neiei n nanomwaaka ngke e tabeakinia ana karo n namwakaina ake imwaini mateia? E taku neiei, “Ni katoa ingabong N na riai ni wareka te kibu man Neneran te Baibara ni Katoabong ao ni kananoa au iango iai. I buokaki n te babaire aei bwa N na iaiangoa te kibu teuana man te Baibara ae e na buokai ni kaatuua au iango n te bae kakawaki riki nakoiu ao nakon au kangaanga are I rinanona.”​—TaiAre. 61:2.

RAORA N TE ONIMAKI

11. Bukin tera ngkai e kaunganano ataakin ae ti aki tiku n tii ngaira ngkai ti nanomwaaka i aani kataaki?

¹¹ E katauraoa Iehova te botaki n itaritari ni Kristian ni buokira iai n nanomwaaka. Ataakin ae “a a tabe n rinanoni maraki aika tii te arona [tarira] nako ni kabutaa te aonnaba” e karaui nanora ae ti aki tiku n tii ngaira. (1Bet. 5:9) Ti kona ni kakoauaa ae n aki ongei baika ti kaaitarai, a a tia naba ni kaaitarai tabemwaang ao n nanomwaaka iai. Nanon anne bwa ti kona naba n nanomwaaka!​—Mwa. 14:22.

12. A na kangaa ni buokira raora n te onimaki, ao tera ae ti kona ni karaoia ibukia? (2 I-Korinto 1:​3, 4)

¹² A kona raora n te onimaki ni kaungaira bwa ti na nanomwaaka. E nora koauan anne te abotoro Bauro. E aki toki ni kaota ana kakaitau nakoia naake a buokia ngke e kabureaki, ao e mwanewei araia. A kabebetea Bauro, a kaungaa, ao a katauraoi baike e kainnanoi. (IBir. 2:​25, 29, 30; IKoro. 4:​10, 11) Anne naba ae ti kona n noria n ara bong aikai. Ngkana ti kainnanoa buokara n nanomwaaka, a tatauraoi tarira ni buokira, ao ngkana a kainnanoa buokaia, ti tauraoi ibukia.​—Wareka 2 I-Korinto 1:​3, 4.

13. Tera ae buoka te tari te aine ae Maya n nanomwaaka?

¹³ E rangi ni kaungaaki te tari te aine i Rutia ae Maya n ara botaki n itaritari. E karaoaki te kakaae n ana auti neiei n 2020, ao imwina riki e kateaki n te boowi ibukin tibwaan ana onimaki nakoia tabemwaang. E taku Maya, “N te tai are I rangi n namakina iai te bwarannano, a tarebooniai taari ao a kororeta nakoiu ni kaota raoi aia tangira. I teimatoa n ataia ae iai au utu ae bubura aika tatangira. Ma I a nora riki koauan aei n 2020.”

14. Ti na kangaa ni kakabwaiaaki man aia boutoka raora n te onimaki ngkai ti nanomwaaka? (Nora naba te taamnei.)

¹⁴ Te bae ko kona ni karaoia. Kabanea am tai ma tarim ni Kristian ngkai ko nanomwaaka i aan te kataaki. Tai tabwara ni bubutiia unimwaane buokam. A kona n riki bwa “te tabo ni katantan man te ang, ao te tabo ni kamanomano man te karau ae korakora.” (Ita. 32:2) Ururingnga, ae a nanomwaaka naba tarim ni Kristian i aani kangaanga. Ngaia are karaoan te mwakuri n akoi nakon temanna ae kainnanoa buokana, e na buokiko bwa ko na teimatoa ni kukurei ao n nanomwaaka i aani kataakim.​—Mwa. 20:35.

ARA KANTANINGA

15. E kangaa te kantaninga ni buoka Iesu ao ti kangaa ni buokaki n ara kantaninga? (Ebera 12:2)

¹⁵ E a tia Iehova n anganira te kantaninga ae nene ae e na buokira n nanomwaaka. (IRom 15:13) Uringa aron te kantaninga ni buoka Iesu n nanomwaaka n te bong ae rangi ni kangaanga ni maiuna i aon te aba. (Wareka Ebera 12:2.) E ataia Iesu ae ana kakaonimaki e na boutokaa kaitiakan taekan aran Iehova. E ingainga naba Iesu ni manga okira Tamana ao ni beku ma tarina imwina riki n te Tautaeka n Uea i karawa. N aron naba anne, ara kantaninga ibukin te maiu are aki toki n ana aonnaba ae boou te Atua, e na buokira n nanomwaaka i aani kataaki nako ake ti rinanoi n ana aonnaba Tatan.

16. E kangaa te kantaninga ni buoka te tari te aine temanna n nanomwaaka, ao tera reireiam man ana taeka?

¹⁶ Iangoa aron te kantaninga ibukin te Tautaeka n Uea ni buoka te tari te aine i Rutia ae Alla, are e kabureaki buuna n tataningaa kaboowiana. E taku Alla ngke e riki aei: “Tataroakinan te kantaninga ibukin taai aika a na roko ao kananoan au iango iai, e kateimatoaai bwa N na aki kabwaraa nanou. I ataia ae tiaki aei tokira. E na bon tokanikai Iehova ao ngaira naba.”

17. Ti na kangaa ni kaota ara kakaitau ibukin ara kantaninga man te Baibara? (Nora naba te taamnei.)

¹⁷ Te bae ko kona ni karaoia. Karekea am tai n iaiangoa te tai ae tamaroa ae imwaira ae e a tia ni katauraoia Iehova. Iangoiko bwa ko mena n ana aonnaba ae boou te Atua ao kataamneia n am iango kakabwaia aika ko nang karekei. A na taraa ngkanne ni “kai toki . . . ao a bebete” kataakira aika ngkai. (2Kor. 4:17) Kabanea naba am konaa n tibwaa am onimaki nakoia tabemwaang. Kataamneia bwa e na tera aroia ni kaaitarai kangaanga n ana aonnaba Tatan n akean ataakin ana kantaninga te Atua ibukin taai aika a na roko. Ko kona ni karina i nanoia kan ongoraeakinan te kantaninga ibukin te Tautaeka n Uea n te maroro naba ae uarereke.

18. E aera bwa ti kona n onimakin ana berita Iehova?

¹⁸ E kangai Iobi nakon Iehova imwin tokanikaina n nanomwaaka i aani kataakina aika bati: “I a ataia ngkai bwa ko boni kona ni karaoi bwaai ni kabane, ao akea te bae ko iangoa karaoana ae e na aki konaaki iroum.” (Iobi 42:2) E ataia Iobi ae akea te bwai teuana ae e kona n tuka kakororaoan ana kantaninga Iehova. E kona te koaua anne ni kakorakoraira ngkai ti nanomwaaka. N te katoto, iangoia bwa iai te aine ae aoraki ae bwara nanona ibukina bwa a bati taokita aika a aki kona ni kamarurungnga. Ma ngke e kunea te kangaanga te taokita ae mwaatai ao n onimakinaki ao e kabwarabwaraa arona ni bwainnaorakia neiei, e a namakina iai te kukurei neiei e ngae ngke e na maan aroni bwainnaorakiana. E a kona ngkai n nanomwaaka, n ataakin ae iai te kantaninga ae e na marurung. N aron naba anne, e buokira n nanomwaaka onimakinan ara kantaninga ibukin te Bwaretaiti ae e na roko.

19. Tera ae ti kainnanoia bwa ti aonga n nanomwaaka?

¹⁹ N aron ae ti a tia n noria, e buokira Iehova n nanomwaaka i aani kataakira rinanon te tataro, ana Taeka, raora n te onimaki, ao ara kantaninga. Ngkana ti kamanenai raoi baika katauraoaki aikai, e na boni buokira Iehova n ara kangaanga nako ake ti kaaitarai ni karokoa te bong are e nang akea iai kangaanga ake n ana aonnaba Tatan.​—IBir. 4:13.