E tatangiria Iehova ni kaota kukureina irouia ake e tangiriia. E kaotaki n te Baibara taai aika uoua ake E tuanga iai Iesu ae boni ngaia Natina ae E tangiria ao E kakatonga irouna. (Mt 3:17; 17:5) Ko kan ongo naba bwanaan Iehova ni karaua nanom bwa e boni kukurei iroum? E aki taetae nakoira Iehova mai karawa, ma e taetae nakoira rinanon te Baibara. Ti kona n ongo bwanaan Iehova ae e kukurei iroura ngkana ti wareki ana taeka Iesu ake n taian Euangkerio. E kaotiotii aroaron Tamana Iesu n te aro ae kororaoi. Ngaia are ngkana ti wareki ana taeka Iesu ni kaota kukureina irouia taan rimwina aika kakaonimaki e ngae ngke a aki kororaoi, ti kona naba iai ni kataamneia Iehova n taekin taeka akanne nakoira. (Io 15:​9, 15) Ngkana a riki kataaki tiaki nanona bwa e aikoa kukurei iroura te Atua. Ma e a reke iai ara tai ni kaota tangiran te Atua ae korakora ao onimakinana.​—Iak 1:12. w24.03 28 ¶10-11

Ngkana te karo ngkoe, buokiia natim ni katauraoa aia kaeka ae botau ma aia ririki ni maiu. N tabetai ao a maroroakinaki baika kakawaki n te reirei teuana n aron te kangaanga n te mare, ke te aroaro ni maiu ae riai ma e na boni bae naba n iai teuana ke uoua te barakirabe ae kona te teei n anga iai ana kaeka. Buokiia naba natim bwa a na ota bwa e aera ngkai a kona n aki rineaki n te tai are a katei iai baia. Kabwarabwaraan aei nakoia, a kona iai n aki bwara nanoia ngkana aki rineaki ma a rineaki tabemwaang. (1Ti 6:18) Ti bane ni kona ni katauraoi ara kaeka aika kateimatoa te aba ae kamoamoaaki iai Iehova, ao a na kaungaaki naba iai raora ni Kristian. (TNR 25:11) E ngae ngke ti kona n taekina teutana te baere ti a tia n rinanona ma ti riai n rarawa ni kabatiaa taekinara. (TNR 27:2; 2Ko 10:18) N onean mwin anne, ti kakorakoraira ni kaatuua ara kaeka i aon Iehova, ana Taeka ao ai ana aomata.​—Kao 4:11. w23.04 24-25 ¶17-18

E rangi ni kakawaki te tangira ibukira bwa ti aonga n teimatoa n taratara ao ni kawanawanaira. (Mt 22:​37-39) Tangiran te Atua iroura e na buokira n nanomwaaka n uarongorongo n aki ongei kangaanga aika ti na boo ma ngaai. (2Ti 1:​7, 8) Ibukina bwa e raababanako ara tangira nakoia naba naake e kaokoro ara onimaki ma ngaiia, ti a teimatoa n uarongorongo, i aon naba te tareboon ke n te kororeta. Ti teimatoa ni kantaningaia bwa n te bong teuana ao a na manga bitaki aomata ao ni karaoa ae eti. (Etk 18:​27, 28) Tangiraia raora n aomata e nanonia naba raora ni Kristian. Ti kaotiota te tangira anne n arora ‘ni kaungaira i marenara ao ni kateimatoaira.’ (1Te 5:11) N aroia tautia aika boutokaiia i marenaia n tain te buaka, ti ikaungaunga naba i marenara. Ti na bon aki kani kammaraka tarira ma mwaanera, ke ni kabooa mwin te buakaka n te buakaka. (1Te 5:​13, 15) Ti kaotiota naba ara tangira n arora ni karineia taari mwaane ake a kairiri n te ekaretia.​—1Te 5:12. w23.06 10 ¶6; 11 ¶10-11