E na Kaekai Au Tataro Iehova?

1-2. Bukin tera bwa ti kona n namakinna bwa e aki kaekai ara tataro Iehova?

“KAREKEA te kimwareirei ae korakora iroun Iehova, ao e na anganiko baika e tangiri nanom.” (TaiAre. 37:4) Ai tamaroara te berita aei! Ma ti riai ni kantaningaa Iehova bwa e na anganira n te tai ae waekoa bwaai ni kabane ake ti bubutiia? Bukin tera bwa ti riai n titirakinira anne? Iangoi katoto aikai. E tataro temanna te tari te aine ae akea buuna bwa e na kaea te Kuura Ibukia Taan Uarongorongoa te Tautaeka n Uea. Ma e a waakinako te ririki ao e tuai mani kakaoaki. Te tari te mwaane temanna e bubutiia Iehova bwa e na kamarurungnga man aorakina ae kamamaara rabwatana, bwa e aonga ni kona ni karaoa ae bati riki n te ekaretia. Ma e bon aki rikirake ni marurung. A tataro kaaro aika Kristian bwa e na teimatoa natiia i nanon te koaua. Ma e motikia natiia bwa e na katoka ana beku iroun Iehova.

² Tao ko bubutiia naba Iehova te bwai teuana, ma e tuai reke iroum. Ibukin anne ko a iangoia bwa e kaekai Iehova aia tataro tabemwaang ma tiaki am tataro. Ke tao ko a iangoia bwa iai te bwai ae kairua ae ko a tia ni karaoia. Anne ana namakin te tari te aine ae Janice.b E tataro neiei ma buuna bwa a kani beku n te Betaera. E taku neiei: “I kakoauaa bwa ti na boni beku n te Betaera n te tai ae waekoa.” E a waakinako te namwakaina ma te ririki, ao a bon tuai naba mani kaoaki taanga aikai. E taku Janice: “I nanokawaki ao I aki ota. I iangoia bwa ai tera ae I karaoia ae I karawawataa iai Iehova. E a rangi ni bati au tataro bwa ti na rin n te Betaera. E aera e tuai mani kaekaa au tataro?”

3. Tera ae ti na maroroakinna n te kaongora aei?

³ N tabetai ti a iango bwa e ongoraei ara tataro Iehova ke e aki. A tabeaianga naba ibukin anne tabeman mwaane aika kakaonimaki rimoa. (Iobi 30:20; TaiAre. 22:2; Aba. 1:2) Tera ae ko na kona ni kakoauaa raoi iai bwa e na boni kaekai am tataro Iehova? (TaiAre. 65:2) Ibukini kaekaan anne, ti na kaekai moa titiraki aikai: (1) Tera ae ti kona ni kantaningaia mairoun Iehova? (2) Tera ae e kantaningaia mairoura Iehova? (3) Bukin tera bwa ti riai ni bitii tabeua ara bubutii?

TERA AE TI KONA NI KANTANINGAIA MAIROUN IEHOVA?

4. Ni kaineti ma Ieremia 29:12, tera ae e berita iai Iehova bwa e na karaoia?

⁴ E berita Iehova bwa e na ongoraei ara tataro. (Wareka Ieremia 29:12.) E tangiriia taan taromauria aika kakaonimaki Atuara, ngaia are e na boni mutiakin aia tataro. (TaiAre. 10:17; 37:28) Ma e aki nanonaki iai bwa e nang bon anganganira naba bwaai ni kabane ake ti bubutii. Ti na bae n tataninga n uaa rokon te waaki ae boou ao a a tibwa reke bwaai tabeua ake ti bubutii.

5. Tera ae e rinanona naba Iehova ngkana e ongoraei ara tataro? Kabwarabwaraa.

⁵ E rinanoi naba ara bubutii Iehova ni kaineti ma ana kantaninga. (Ita. 55:8, 9) Teuana naba iteran ana kantaninga anne boni kaonan te aonnaba aei irouia mwaane ma aine aika katiteuanaaki ma te kimwareirei i aan ana tautaeka. Ma e taku Tatan bwa a na maiuraoi riki aomata ngkana a tautaekania i bon irouia. (KBwaai 3:1-5) E kariaia Iehova bwa a na tautaekania aomata i bon irouia, bwa e aonga n noraki kewen ana taeka te Riaboro. Angiini kangaanga aika ti kaaitarai ni boong aikai, a bon riki man aia tautaeka aomata. (TeMin. 8:9) Ti ataia ae e na bon aki kamaunai kangaanga aikai ni kabane Iehova n te tai moa aei. Bwa ngkana e karaoa anne, ao ane a na iangoia tabeman bwa e bon nakoraoi aia tautaeka aomata, ao e kona ni katoki kangaanga.

6. Bukin tera bwa ti riai ni kakoauaa ae e na boni karaoa ae tatangira ma n aki ribuaka Iehova n taai nako?

⁶ E kona Iehova ni kaekai ara bubutii n aanga aika kakaokoro. N te katoto, ngke e a rangi n aoraki te Uea are Etekia ao e a bubutiia Iehova bwa e na buokia ni kamarurungnga. E kaekaa Iehova ao e kamarurungnga. (2Uea 20:1-6) N te itera teuana, ngke e onnonia Iehova te abotoro Bauro bwa e na kanakoa “te bwai ni kateketeke n te rabwata” mairouna ae taekan aorakina, ao Iehova e bon aki kanakoa. (2Kor. 12:7-9) Iangoa naba aia katoto te abotoro Iakobo ao Betero. A kaaitara ma te kamateaki iroun te Uea are Erote. A tataro kaain te ekaretia ibukini Betero ao tao Iakobo naba. Ma e boni kamateaki Iakobo ao e kamaiuaki Betero n te aro ni kakai. (Mwa. 12:1-11) Ti kona ni kangai, ‘Bukin tera Iehova ngke e kamaiua Betero ao tiaki Iakobo?’ E aki taekinaki bukina n te Baibara.c Ma te bwai ae ti koaua raoi iai bwa e “aki kona n ribuaka” Iehova n arona nako. (TuaKau. 32:4) Ao ti ataia bwa a karekea akoaia Betero ma Iakobo iroun Iehova. (TeKao. 21:14) N tabetai e kona Iehova n aki kaekai ara tataro n aron are ti kantaningaia. Ma kioina ngkai ti kakoauaa raoi ae e aki toki ni kakaraoa te bwai ae tatangira ao n aki ribuaka Iehova, ti aki kona ni ngurengure n arona ni kaekai ara tataro.—Iobi 33:13.

7. Tera ae ti kataia n rarawa ni karaoia, ao bukin tera?

⁷ Ti kataia n rarawa ni kabotaua arora ma tabemwaang. N katoto, ti kona ni bubutiia Iehova bwa e na buokira n te itera teuana, ma e bon aki kaekaaki ara bubutii. Imwina riki ti a ongo bwa e tataro naba n aron anne temanna, ao e taraa n ae kaekaaki ana bubutii iroun Iehova. E riki anne nakon te tari te aine ae Anna. E tataro neiei bwa e na kamarurungaki buuna ae Matthew man aorakina ae te kaentia. N te tai naba anne ao iai uoman taari aine aika kara aika kabokorakora naba ma te kaentia. E kakorakoraa n tataro Anna ibukini Matthew ao ibukia naba taari aine aikai. E reke te marurung irouia taari aine aikai ma e bon toki maiuni Matthew. N te moantai, ao e iangoia Anna bwa a marurung taari aine aikai man ana ibuobuoki Iehova. Ma e aera ngkanne e a aki kaekaa ana tataro are e na marurung naba buuna? Ti bon aki kona n taekina bukini marurungia taari aine aikai. Ma te bwai ae ti ataia bwa e boni kona Iehova ni kamaunai raoi rawawatara ni kabane, ao e ingainga ni kani kautiia raoraona ake a a tia ni mate.—Iobi 14:15.

8. (a) Ni kaineti ma Itaia 43:2, e kangaa Iehova ni boutokaira? (b) E na kangaa te tataro ni buokira ngkana ti kaaitara ma kataaki aika kangaanga? (Nora te taamnei ae E Buokira te Tataro n Tokanikai.)

⁸ E na boutokaira Iehova n taai nako. Ngkai bon Tamara ae tatangira Iehova, e na bon aki kan norira ni maraki. (Ita. 63:9) Ma e ngae n anne e bon aki tuki rikini kataakira nako, aika a kona ni kabotauaki ma te karaanga ke te ai. (Wareka Itaia 43:2.) Ma e berita bwa e na buokira ngkana ti ‘rinanoni’ baikai. Ao e na aki kariaia kataakira bwa ti na rotakibuaka iai n aki toki. E anganira naba Iehova taamneina ae raoiroi ae mwaaka bwa e na buokira n nanomwaaka. (Ruka 11:13; IBir. 4:13) Ibukin anne, ti a kona ni kakoauaa raoi bwa e na bon anganira n taai nako te bae ti kainnanoia bwa ti aonga n nanomwaaka ao n teimatoa ni kakaonimaki nakon Iehova.d

TERA AE E KANTANINGAIA MAIROURA IEHOVA?

9. N aron ae oti n Iakobo 1:6, 7, bukin tera bwa ti riai ni kakoauaa ae e na boni buokira Iehova?

⁹ E kantaningaira Iehova bwa ti na onimakinna. (Ebera 11:6) N tabetai ao a kona n taraa n riao kataakira. Ti kona n ae ti a raraoma bwa e na buokira Iehova ke e na aki. Ma e karaui nanora te Baibara bwa ti kona “n tamwarakea te oo” ni mwaakan te Atua. (TaiAre. 18:29) Ngaia are n oneani mwin ae ti na katokanikaia raraomara, ti riai n tataro ma ara onimaki ae korakora bwa e na boni kaekai ara tataro Iehova.—Wareka Iakobo 1:6, 7.

10. Kabwarabwaraa bwa ti na kangaa ni mwakuria ara tataro.

¹⁰ E kantaningaira Iehova bwa ti na mwakuria ara tataro. N te katoto, tao e bubutiia Iehova te tari te mwaane temanna bwa e na buokia ni karekea angani motirawana man ana mwakuri, bwa e aonga ni kaea te bwabwaro. E na kangaa Iehova ni kaekaa te tataro anne? E kona n angan te tari anne te ninikoria ae kainnanoia bwa e aonga ni kawara ana tia kammwakuri. Ma e bon riai te tari anne ni mwakuria ana bubutii n arona ni kawara ana tia kammwakuri ao ni bubutiia. E na bae n okioki ni bubutii. E kona naba ni kaaibibita ana tei ma raona ni mwakuri temanna. Ao ngkana e kainnanoaki, e kona n tuatua bwa e na motirawa ao n aki kabooaki.

11. Bukin tera bwa ti riai n teimatoa n tataro ibukin tabeaiangara?

¹¹ E kantaningaira Iehova bwa ti na teimatoa n tataro nakoina ibukin tabeaiangara. (1Tet. 5:17) E kaotia Iesu bwa tabeua mai buakon ara bubutii a kona n aki kaekaaki n te tai ae waekoa. (Ruka 11:9) Ngaia are tai kabwaraa nanom! Kakorakorako ao teimatoa n tataro. (Ruka 18:1-7) Ngkana ti teimatoa n tataro ibukin te bwai teuana, ti kaotia iai nakon Iehova bwa e rangi ni kakawaki te baere ti tataro ibukina. Ti kaotia naba bwa ti onimakinna bwa e boni kona ni buokira.

BUKIN TERA BWA TI RIAI NI BITII TABEUA ARA BUBUTII?

12. (a) Tera te titiraki teuana ae ti riai n titirakinira iai ni kaineti ma ara bubutii, ao bukin tera? (b) Ti na kangaa n taraia raoi bwa e na oti karinean Iehova n ara tataro? (Nora te bwaoki ae “E Oti Karinean Iehova n Au Tataro?”)

¹² Ngkana e aki kaekaaki ara tataro, ti kona n titirakinira titiraki aika tenua. Te moan, ‘E eti te bae I tataro ibukina?’ N angiin te tai ti taku bwa ti ataa ae te kabanea n tamaroa ibukira. Mangaia a na bon aki buokira i nanon te tai ae maan baike ti bubutii. Ngkana ti tataro ibukin ara kangaanga teuana, e kona n ae iai riki angani kanakoraoan ara kangaanga anne irarikin are ti tataroia. Ao tao bwaai tabeua ake ti bubutii a aki boraoi ma nanon Iehova. (1Ioa. 5:14) N te katoto, iangoiia kaaro ake a taekinaki mai mwaina. A bubutiia Iehova bwa e na teimatoa natiia i nanon te koaua. E taraa n riai te bubutii anne. Ma e na bon aki taumatoaira Iehova bwa ti na beku ibukina. E tangirira ni kabane, n ikotaki naba ma natira, bwa ti na rineia bwa ti na taromauria. (TuaKau. 10:12, 13; 30:19, 20) Ngaia are a kona kaaro aikai ni bubutiia Iehova bwa e na buokiia n rota nanon natiia, bwa e aonga ni kairaki bwa e na tangira Iehova ao n riki bwa raoraona.—TaeRab. 22:6; IEbe. 6:4.

13. Ni kaineti ma Ebera 4:16, n ningai ae e na buokira iai Iehova? Kabwarabwaraa.

¹³ Te kauoua n titiraki, ‘E a boo ana tai Iehova ni kaekaa au bubutii?’ Ti bae n namakinna ae ti kainnanoa kaekaan ara tataro n te tai ae waekoa. Ma ni koauana, e ataa Iehova te tai ae te kabanea n tamaroa ae e na buokira iai. (Wareka Ebera 4:16.) Ngkana ti aki waekoa ni karekea kaekaan ara bubutii, ti kona n iangoia bwa ana kaeka Iehova bon ‘Tiaki.’ Ma e kona n ae kaekaira ni kangai, ‘Tiaki moa ngkai.’ N te katoto, iangoa te tari te mwaane are e tataroa kamarurungana man aorakina. Ngkana e a kamarurungnga naba Iehova n te aro ni kakai, e na kona Tatan ni bukina te tari arei bwa e teimatoa n ana beku iroun Iehova tii ibukina bwa e kamarurungaki. (Iobi 1:9-11; 2:4) Irarikin anne, e a tia Iehova ni bairea te tai are e na katoki iai aoraki n aekaia nako. (Ita. 33:24; TeKao. 21:3, 4) Mangkai moa ni karokoa te tai anne, ti aki kona ni kantaningaa kamarurungara n te aro ni kakai. Ngaia are e kona te tari arei ni butiia Iehova bwa e na anganna te korakora ao raun ana iango bwa e aonga n nanomwaaka i aan aorakina, ao n teimatoa ni beku iroun te Atua ma te kakaonimaki.—TaiAre. 29:11.

14. Tera reireiam man rongorongon Janice?

¹⁴ Iangoa rongorongon Janice are e tataro bwa e kani beku n te Betaera. Ai nimaua te ririki imwin ana tataro ao e a tibwa nora aron Iehova ni kaekaa ana tataro. E kangai neiei: “E kabongana te tai anne Iehova n reireinai ao ni kanakoraoa riki arou. I riai ni karikirakea riki onimakinana. I riai ni kanakoraoa riki au ukeuke n reirei. Ao I riai ni karikirakea riki te kimwareirei, ae e aki boboto i aoni baika riki nakoiu.” Imwina riki ao e a kaoaki Janice ma buuna bwa a na beku n te mwakuri ni mwamwananga. E ururing rikaaki Janice ao e taku: “E boni kaekai au tataro Iehova, ma n te aro ae I aki kantaningaia. I aki waekoa n nora aron tamaroan ana kaeka, ma I boni kakaitau n namakinan ana tangira ao ana akoi.”

15. Bukin tera bwa ti riai ni karababaa riki ara bubutii? (Nori naba taamnei.)

¹⁵ E kangai te katenua n titiraki, ‘I riai n tataro ibukin te bwai riki teuana?’ E ngae ngke e raoiroi tataroan te bwai ae tii teuana, ma ti boni kona n ataia ae e tangirira Iehova bwa ti na karababaa riki ara bubutii. Iangoa ana katoto te tari te aine are akea buuna are e tatataro ibukini kaean te Kuura Ibukia Taan Uarongorongoa te Tautaeka n Uea. E kani kaea te kuura aei bwa e aonga ni kona ni beku n te tabo ae e kainnanoaki riki iai te ibuobuoki. Ngaia are ngkai e tatataro neiei ibukini kaoana nakon te kuura aei, e kona naba ni bubutiia Iehova bwa e na buokia n nori riki itera ake e kona ni karababaa iai ana mwakuri ni minita. (Mwa. 16:9, 10) Ao e kona ni mwakuria ana tataro n arona n ongora iroun ana mataniwi n te aono ngkana iai te ekaretia ae uakaan ae kainnanoia riki bwaiania. Ke e kona ni kororeta nakon te aobiti n tararua ao n tuatua bwa ia te tabo ae a kainnanoaki riki iai taan uarongorongoa te Tautaeka n Uea.e

16. Tera ae ti kona ni kakoauaa?

¹⁶ N aron ae ti a tia n reiakinna, ti boni kona ni kakoauaa ae e na boni kaekai ara tataro Iehova n te aro ae tatangira ao n aki ribuaka. (TaiAre. 4:3; Ita. 30:18) N tabetai ti na bon aki karekea te kaeka are ti kantaningaia. Ma e na bon aki tarariaoi ara tataro Iehova. E rangi n tangirira. Ao e na bon aki kaaki taekara. (TaiAre. 9:10) Ngaia are teimatoa n “onimakinna n taai nako,” n arom ni bunra nanom nakoina rinanon te tataro.—TaiAre. 62:8.