Kataneiaia Natim Bwa A na Riki Bwa Minita
1. Tera ae a kaumakaki iai kaaro aika Kristian bwa a na karaoia n Taian Areru 148:12, 13?
1 E kaoia rooro n rikirake Iehova bwa a na kamoamoaa. (TaiAre. 148:12, 13) Mangaia are a karaoa ae bati riki kaaro aika Kristian nakon reiakinaia natiia ana koaua te Baibara ao ana tua te Atua ni kaineti ma te aroaro ni maiu ae riai. A reiakinia naba natiia bwa a na riki bwa minita ibukin te rongorongo ae raoiroi. E na kanga ni karikirakeaki karaoan aei?
2. A na kanga n anaaki nanoia naati man aia katoto kaaro ae raoiroi?
2 Te Katoto ae Raoiroi: E tuangia raona aika mwaane aika 300 te tia Motikitaeka ae Kiteon ni kangai: “Taraai ni kakairi i rou.” (MotiTae. 7:17) A matakuakinia aia karo ataei ao a kakairi irouia. E ngae ngke e a rangi ni kua te karo temanna ae e kangaina ni mwakuri, e a kairiia natina nakon te mwakuri ni minita ngke e oki ni mwakuri ni moaningabongin te Kaonobong n oneani mwin are e na matu. Akea te taeka ae e taekinna ma e reireinia natina bwa a na moanibwaia te mwakuri ni minita. (Mat. 6:33) A nora kimwareireim natim ni karaoi iteran nako te taromauri aika kakaokoro, n aron te tataro, te wareware n te Baibara, te anga kaeka ao te uarongorongo? Ni koauana, ko aki kona n riki bwa te banna ni katoto ngkoe ae kororaoi. Ma e na kona riki n anaaki nanoia natim ao ni kakairi n am kakorakora n reiakinaia taromaurian Iehova, ngkana a nora arom n tataningamarau n toro irouna.—TuaKau. 6:6, 7; IRom 2:21, 22.
3. Baikara tiia aika buoka te rikirake n te onimaki ae a riai kaaro ni buokiia iai natiia bwa a na katei ao n roko iai?
3 Tiia Aika Buoka Rikirakem: A aki kua kaaro n reireinia natiia aroia n nakonako, n taetae, n oneia, ao a bati riki. A na tei imwaia ataei tiia aika boou ngkana a roko ni mwaneka aika kakawaki i nanon rikirakeia. Ngkana boni Kristian kaaro, a na buokiia naba natiia ni katei ao n roko n tiaia n te onimaki ni kaineti ma aia ririki ni maiu ao aia konabwai. (1Kor. 9:26) Ko reireinia natim bwa a na anga aia kaeka man oin aia taeka ao a na katauraoi oin aia kabwarabwara n te Kuura ni Kataneiai Ibukia Taan Uarongorongo? (TaiAre. 35:18) Ko kataneiaia natim bwa a na uataboa iteran nako te mwakuri ni minita? Ko katea imwaia te tia ibukin te bwabetito ao kabwaninan aia tai n te mwakuri ni minita? Ko buokiia bwa a na itamwaomwao ma taan uarongorongo aika kimwareirei ma n ingaingannano, bwa a aonga ni kaungaaki iai?—TaeRab. 13:20.
4. A na kanga ni kakabwaiaaki ataei mairouia aia karo ake a moana kataneiaakia n te mwakuri ni minita man uarerekeia?
4 E taekina ae kangai te tia areru: “Te Atua, Ko reireiai ma ngke te tei ngai; ao I kakarakin am makuri aika kamimi ni karokoa te bong aei.” (TaiAre. 71:17) Moana kataneiaakia natim man uarerekeia bwa a aonga n riki bwa minita. E na boni kakabwaiaia ngkana a ikawai, te onimaki ni koaua are ko buokiia bwa a na rikirake iai!—TaeRab. 22:6.