Titiraki Mairouia Taani Wareware
E mwaneweaki n te Baibara taekani booki aika “ana boki Iatia” ao “te boki are Ana Buaka nako Iehova.” (Iotua 10:13; Warekaia Iteraera 21:14) Ma a aki botaki booki aikai ma booki aika kamatoaaki bwa kanoan te Baibara. Te koaua bwa a a bon tia ni bua koroboki aika aongkoa a kairaki koreaia aikai rinanon te taamnei?
Bon akea bukina ae ti na kona ni kakoauaa iai bwa a kairaki koreani booki aikai rinanon te taamnei ao rimwi a a manga bua. A mwanewei naba koroboki tabeua taani korea te Baibara ake a kairaki rinanon te taamnei. Tabeua mai buakoni koroboki akanne tao boni kanoan naba te Baibara ake a kabwarabwaraaki n taeka tabeua aika a aki rangi ni mataata nakoia taani wareware ni boong aikai. N te katoto, n 1 Rongorongo 29:29 ao a taekinaki iai taeka tabeua n aron ‘ana taeka Tamuera are te tia matairiki,’ ‘ana taeka Natan are te burabeti,’ ao ‘ana taeka Kata are te tia matairiki.’ Rongorongo aika tenua aikai a kona n nanonaki iai booki aika ti atai ngkai n araia ae 1 ao 2 Tamuera, ke tao te boki ae Taani Motiki-Taeka.
N te itera teuana, a kona n taekinaki arani booki tabeua aika a kuri n titeboo araia ma booki tabeua n te Baibara, ma e ngae n anne bon tiaki kanoan te Baibara koroboki aikai. Tao ti kona ni katereterea aei n iangoani booki rimoa aika aua aika: “te boki are rongorongoia uean Iuta,” “te boki are taekaia uean Iuta ma Iteraera,” “te boki are taekaia aia uea Iteraera,” ao “te boki are taekaia aia uea Iteraera ma I-Iuta.” E ngae ngke a kuri n titeboo arani booki aikai ma booki ake n te Baibara aika ti atai n aron 1 Uea ao 2 Uea, ma a bon aki kairaki koreaia rinanon te taamnei ao a bon aki naba kuneaki i buakoni booki aika kamatoaaki bwa kanoan te Baibara. (1 Uea 14:29; 2 Rongorongo 16:11; 20:34; 27:7) Taraan ae koroboki aikai bon tii rongorongon rimoa ake a tia ni kamani koreaki imwaini koreani mwakoro n te Baibara aika a koreaki iroun te burabeti are Ieremia ao Etira.
E koaua ae taani korea te Baibara tabeman a mwanewei ke a neneri rongorongon rimoa ake iai n te tai arei, ma e ngae n anne a bon aki kairaki koreaia rinanon te taamnei rongorongo aikai. E mwaneweaki naba te koroboki teuana ae “bokin rongorongoia uean nako Miria ma Botia” n Etita 10:2. N aron naba anne, ngke e katauraoi Ruka imwaini korean ana Euangkerio, ao e “ukoukori bwaai ni kabane mai moana.” E kona n nanonna n aei bwa e neneri raoi rongorongo ake iai n te tai anne kioina ngkai e bon tabwanin raoi irouna kateirikian Iesu n aron ae ti kona ni warekia n ana Euangkerio. (Ruka 1:3; 3:23-38) E ngae ngke a aki kairaki rinanon te taamnei koreani koroboki ake e karekei mai iai ana rongorongo Ruka, ma te Euangkerio are e koreia e boni kairaki koreana rinanon te taamnei. Ao e bon teimatoa naba ni manena te Euangkerio anne ibukira.
Ni kaineti ngkanne ma booki ake uoua ake a mwaneweaki n te titiraki aika “ana boki Iatia” ao “te boki are Ana Buaka nako Iehova” a a taraa n ae bon tii taiani koroboki n taai akekei aika a aki kairaki koreaia rinanon te taamnei. Ngaia anne bukina ae e aki kariaia iai Iehova bwa a na kawakinaki. Baika koreaki n te Baibara ni kaineti ma booki aika uoua aikai, e a kairiia taan rabakau n te Baibara bwa a na kakoauaa ae booki aikai bon tii reitan taiani kario ke anene ake a kaineti ma aia itabarara tibun Iteraera ma aia kairiribai. (2 Tamuera 1:17-27) E taekinna teuana te encyclopedia ibukin te Baibara bwa kanoani booki aika uoua aikai bon tii “reitan aia kario ao aia anene taan ototo aika kinaaki i Iteraera rimoa ake a teimatoa ni kawakin aia kario ao aia anene kaain Iteraera.” Iai naba koroboki tabeua aika a aki kairaki koreaia rinanon te taamnei ake a korei mwaane tabeman ake e kamanenaia te Atua bwa burabeti ke taani matairiki aika e aki kariaia bwa a na rin i buakon te Koroboki ae Tabu aika “manena nakon te reirei, ao nakoni kaotan ana buakaka te aomata nako ina, ao nakoni manga-kaetana” n taai aikai.—2 Timoteo 3:16; 2 Rongorongo 9:29; 12:15; 13:22.
E ngae ngke e koaua bwa iai tabeua booki aika mwaneweaki taekaia n te Baibara ao a riki bwa bwaai n ibuobuoki ni korean te Baibara, ma ti aki riai n iangoiia bwa a kairaki koreaia rinanon te taamnei. Ma e a tia Iehova ae te Atua ni kawakini koroboki nako aika kanoaia bon “ana taeka Atuara” aika a “na tei matoa . . . n aki toki.” (Itaia 40:8) Eng, baike e rinei Iehova bwa a na karinaki naba i buakoni booki ake n te Baibara ake 66 ae iai iroura ngkai boni baika ti kainnanoi bwa ti aonga ni kona ni ‘kabaneaki ni kataeaki nangira nakoni mwakuri aika raraoi ni bane.’—2 Timoteo 3:16, 17.