“Ngkana E Kona Ni Karaoia Kingsley, I Kona Naba!”

IMWINI bobooan angan Kingsley, e a waakina ana moani wareware n te Baibara n Te Kuura ni Kataneiai Ibukia Taan Uarongorongo. E karaui n atongi taeka ni kabane ao ni katiribwarei raoi. Ma taninga moa! E aera ngkai e aki taraa ana Baibara?

E mataki Kingsley ao e maeka i Sri Lanka. E bonotaninga naba ao e tangira te kaa ae kokokaki ibukini mwamwanangana. Ma e kangaa teuaei n reiakina Iehova ao n tau ni kaaina te Kuura? N na kabwarabwaraa.

E anaaki nanou ngke I moani kaitiboo ma Kingsley, n arona ni bwarua te koaua man te Baibara. E a tia n reirei n te Baibara ma taani Kakoaua tabeman ao e a boni mane ana boki ae te Knowledge That Leads to Everlasting Life ae katoton te boki ibukia mataki.a E kariaia ae N na reitaanako ana reirei, ma ti aitara ma kangaanga aika uoua.

Te moan, e maeka teuaei ma tabeman riki n aia auti kaara ao mwauku. Ibukin te kakarongoa i tinaniku ao bonokauni Kingsley, I riai n taetae ni kabaibati riki. Ni koauana, a a kona kaain te auti anne n ongo ara reirei ni katoa wiki!

Te kauoua, e kona ni wareware ao n tii uringi reirei tabeua aika boou ni katoaa te reirei. Ibukin anne, e a katauraoi n te aro bwa e na uaana riki ara reirei. E a kamani wareka te kaongora are ti na reirei iai ao ni kaokioka warekana, e nori kiibu n aia Baibara mataki ao imwina e iaiangoi kaekaan titiraki mai iai. E kakoauaaki bwa e rangi n uaana te anga aei. E kabwari i aon te burangketi ngkana ti reirei, e ororea aontano ni waena ma te kukurei ao n taekin reireiana n te bwanaa ae baibati. N te tai ae aki maan, tia reirei uoua te tai n te wiki ao ni kabanea uoua te aoa ni katoa reirei.

KAEANI BOBOTAKI AO TE ANGA KAEKA

E ingainga Kingsley ni kakaaei bobotaki n te Tabo n Taromauri ma e aki bebete karaoana. E kainnanoa buokana n toka ao n teirake man ana kaa ae kokokaki nakon te kaa ao te Tabo n Taromauri. Ma a bati kaain te ekaretia ake a uateinna ao a iangoia bwa e kakawaki karaoan aei. N taai ni bobotaki ao e kaaki i rarikin taningana te tibika ae e kona ni kakauongo iai ao e anga naba ana taeka!

Imwin te reirei n te tai ae maan, e a iangoia bwa e na karina arana n te Kuura. Uoua te wiki imwain ana moani wareware n te Baibara, I titirakinna bwa e a tia ni kataneiai ke e tuai. E taku ma te aki nanokokoraki: “Eng, Tariu, I a tia ni kataneiai tao 30 te tai.” I kamoamoaa n ana kekeiaki ao I butiia bwa N na ongora. E kauka ana Baibara, e katokai tabonibaina i aoni manin te koroboki n aia taetae mataki ao e a wareware. E ngae n anne, I noria bwa a aki kakammwakuri tabonibaina i aon te koroboki are a bon riai mataki ni kakaraoia. E a tia ni kamatenikuna kananoan te Baibara ni kabane!

A bon tiinako rannimatau n te baere I aki kakoauaa. I titirakinna bwa e kangaa n uringi ni kabane imwin ana kataneiai n tii 30 te tai. E taku: “Tiaki ngaia anne, I boni kakataneiai tao 30 te tai ni katoabong.” E riaon teuana namwakaina maanin Kingsley n tetekateka i aon ana burangketi ao ni kaokioka warekan te kibu ni karokoa e matenikuna.

Imwin anne, e a anga ana moani wareware n te Tabo n Taromauri. Ngke e a moti ao a a uboubo ma te roko n nano kaain te ekaretia ao a tang angiina n noran ana kakorakora ataein te kuura ae boou aei. E bubutii temanna te tia uarongorongo are e a tia n aki kaaina te kuura ibukin te nakonnano bwa e na manga karinaki arana. Bukin tera? E taku neiei: “Ngkana e kona ni karaoia Kingsley, I kona naba!”

E a katabua maiuna Kingsley nakon Iehova ao ni bwabetitoaki n Tebetembwa 6, 2008 imwin ana reirei n te Baibara n te maan ae tenua te ririki. Bon te tia Kakoaua ae kakaonimaki ni karokoa matena ni Mei 13, 2014, ao e kakoauaa bwa e na waakina kakaonimakina ni beku ma korakorana ni kabane ao marurungina ae kororaoi n te Bwaretaiti i aon te aba. (Ita. 35:5, 6)—Ana rongorongo Paul McManus.