Lé Kpẹ̀a E Lúùk Beè Emí

4 Tṍó e Jíízọ̀s ni diia múú lọ̀l, nyómá káí beè gbóó faaláẹ lọl Jọ́dàn kilma kele-kele ketõ̀ò ea di boo kpáà bàlà ól 2 mm̀ 40 dee, vaá Pọ́lọ́ Nyómá géè ẹ̀bmàe. Náa beè dé tọ́ọ̀ nú mm̀ gbò deeá, vaá tákóí beè gbóó táẹ́ ló tṍó e gbò deeá ni íná kùbmà. 3 Tṍóá, Pọ́lọ́ Nyómá à gbóó kọ́ nèe kọọ̀: “Be ọ̀ọ̀ sã́áná Bàrì, kììlà kpò demí naamá gyã́á.”* 4 Jíízọ̀s à aalá nèe kọọ̀: “Ba beè emí mm̀ Kpá Káí kọọ̀, ‘Níì áá gyã́á ní ea é sẹlẹ neń dùme nì.’”

5 Pọ́lọ́ Nyómá beè gbóó faaláẹ kilma boo gù vaá tú pọ́ì ńkpulu dẽè tṍó dòòmà bá dénè boǹ méné ea di boo kunukẽ̀í nèe. 6 Tṍóá, Pọ́lọ́ Nyómá à gbóó kọ́ nèe kọọ̀: “Nda é né ni dénè kpóó lẹ̀ẹ̀là belí nè ba ka boo béè kọ ba beè nèm, vaá m̀ ólò nè kọ̀láá neń ea léémám. 7 Vó à naa, dénè nuí é dú ńlo be ò ném fã̀ áá enè tóm.” 8 Jíízọ̀s à aalá nèe kọọ̀: “Ba beè emí mm̀ Kpá Káí kọọ̀, ‘Jìhóvà* ea dú o Bàrì ní eo é íè ge fã̀e, vaá áá ẹlẹ ní eo é sí tóm ea di káí nèe.’”

9 À gbóó faaláẹ kilma Jèrúselẹ̀m vaá túe ele kĩée ea palàge bọọ́ gãboo ea di ló tọọ̀ káíá, vaá kọ́ nèe kọọ̀: “Be ọ̀ọ̀ sã́áná Bàrì, pẹẹ aa kĩí dọ kẽ, 10 boo béè kọ ba beè emí mm̀ Kpá Káí kọọ̀, ‘À é lẹẹlà pá a gbò nyómá tóm kọ bà á kpènà ni, 11 vaá bà é tavẹ́ ni kọbé nóo dọọ̀ boo tọ́ọ̀ kà kpò dem.’” 12 Jíízọ̀s à aalá nèe kọọ̀: “Ba beè kọọ̀, ‘Nóo é íè ge ẹ̀bmà Jìhóvà* ea dú o Bàrì.’” 13 Tṍó e Pọ́lọ́ Nyómá ni tú dénè ẹ̀bmàá siimáé ló lọ̀l, a beè gbóó ààẹ́ ló àà dọ̀ọ̀mà dõona tṍó ea é kpáá leeé ló gè ẹ̀bmàe.

14 Tṍóá, nyómá káí beè gbóó faalá Jíízọ̀s òòma kẽ kilma Gálilì, vaá lé kpẹ̀a ea kilíé ló beè zààlà iná kọ̀láá kà dó ea di kuló kĩá. 15 Nagé, a beè gbóó dààmà togó gè noomà nu gbẹá mm̀ ba gbò tọ bõ̀ònaló fã̀, vaá dénè nen beè nvèèe ka ló.

16 Tṍóá, a beè gbóó àà kil Názarẹ̀t kĩée e ba beè bumáe gbẹá, vaá dì belí bé ea ólò naá Deè Bõ̀séi, a beè bã mm̀ tọ bõ̀ònaló fã̀ pá Júù vaá elá èla kọbé à bugìè Kpá Káí. 17 Ba beè gbóó tú úl kpá neǹ kọ́ọ̀ bùlà Bàrì Àìzáíà nèe. À gbóó kùùlà úl kpáá vaá mòn kĩée e ba beè emí kọọ̀: 18 “Nyómá Jìhóvà* dìḿ ló, boo béè kọ a beè sàm kọ ḿ vee lé kpẹ̀a nè gbò tãa. A beè lẹ̀ẹ̀làm kọ ḿ kọ́ nè gbò e bà di kèbá síí-sii kọ bà é dí pọ́ì, nè ge kọ́ nè gbò gímá dẽe kọ bà é mon nu, ne ge naa kọọ̀ gbò e bà di kèbá bíígá ló á di pọ́ì, 19 nè ge kọ́ tṍó e Jìhóvà* é tã́ànè dee bá pá a gbò.” 20 Tṍó ea bugi lọ̀l, à gbóó ulí úl kpáá òòmà nè neń ea ólò sí tóm tọ bõ̀ònaló fã̀a vaá ĩìtẽ́ kẽ. Vaá dénè nen ea di tọ bõ̀ònaló fã̀a beè gọ̀líé ló ẹ̀b. 21 Tṍóá, à gbóó kọ́ nè va kọọ̀: “Nieí ní e dọ̀ Kpá Káí eo géè dãiá ḿḿ-má ẽ́.”

22 Bà gbóó dààmà togó ló lé bel ea kilíé ló, vaá gbò lé-lé bel ea gé ló beè palàge bọọ́ vá ló, naa ní e bà bĩ́íná kọọ̀: “É kọọ̀ níí níì nvín Jósẹ̀f nì?” 23 À gbóó kọ́ nè va kọọ̀: “M̀ nyímà kọ ò é beè kọi neḿ mi kọọ̀, ‘Neǹ dóm biè, boà o bá. Naa nagé gbò nú e beè dã́ kọ o beè naa gbẹá Kàpánìòma gbẹá o boní.’” 24 Vó à naa, à gbóó kọ́ nè va kọọ̀: “M̀ lóò kà-kà bel nèi kọọ̀ gbò nen náa ólò nvèè ka ló neǹ kọ́ọ̀ bùlà Bàrì gbẹá a bon. 25 Dì belí nu dòòmà bá, gã́bug vaà tãa beè di Ízrẹẹ̀l mm̀ deè Èláíjàa tṍó e boo náa beè dọọ́ mm̀ taà gbáá nè ọ̀ọ̀lẹ̀ ẽ́, vaá kà agẹ bá kíi beè dọ boo kunukẽ̀a. 26 Sõò Bàrì náa beè lẹ̀ẹ̀là Èláíjà siimá ló tọ́ọ̀ kà vaà tãaá. Tãa vó, a beè lẹ̀ẹ̀làẹ siimá ló áá ene kà vaà tãa ea dú Zérẹfàt, ea di Sáídòn. 27 Nagé, à íe gã́bug gbò e kom̀ kulè beè di ló e ba beè di Ízrẹẹ̀l tṍó e neǹ kọ́ọ̀ bùlà Bàrì Èláíshà beè dìa. Sõò náa beè bó tọ́ọ̀ ọ̀và, áá Nèémàn ea dú Sírià ní ea beè bò e.” 28 Tṍó e dénè gbò e ba beè di tọ bõ̀ònaló fã̀ pá Júùa dã́ naa vó, bà gbóó nvèè súng. 29 Ba beè gbóó gbalá aa boo siíe kilma nvéè boná, vaá faaláẹ kilma boo gù e boná dì kọbé bà tã́ànìèe ba lọl kĩá naa ní ea é tú togó tib kẽ. 30 Sõò a beè kyã̀à tení vá gbàà àà.

31 A beè gbóó àà kil Kàpánìòm ea di Gálilì. À géè noomà va nú Deè Bõ̀séi, 32 vaá bé ea nóòmà nu naa beè palàge bọọ́ vá ló, boo béè kọ a beè ló bel belí neń e kpóó lẹ̀ẹ̀là bel di bá. 33 À íe ene kà gbálà e zọ di m ea beè di tọ bõ̀ònaló fã̀ pá Júù ea beè vulí kpã́ kọọ̀: 34 “Jíízọ̀s eo dúù Názarẹ̀t, éé ní eo gbĩ́ìí ló é? É kọọ̀ ò dúù ló gè kyọ̀i sĩ́? M̀ palàge nyimá kọọ̀ ọ̀ọ̀ Neń Ea Di Káí E Bàrì Beè Lẹ̀ẹ̀là.” 35 Sõò Jíízọ̀s beè kọ́ẹ bel kọọ̀: “Pĩi gã́ ni vaá ò aàẹ́ m.” Tṍó e zọá ni tóbví gbálàí sá kẽ gbẹá vá ke gbàà lọ̀l, a beè gbóó ààẹ́ m vaá náa beè nvèèe kom ló. 36 A beè palàge bọọ́ vá ló naa ní e bà kọ́ nè ene kọọ̀: “Ẹbvii bé ea moǹ bel íe kpóó naaà! Bã̀àna gbò zọ gbaníe tṍ ló vaá aa mm̀ gbò nen!” 37 Vaá kpẹ̀a ea kilíé ló beè gbóó zààlà iná dénè dó ea di kuló kĩá.

38 Tṍó ea aa tọ bõ̀ònaló fã̀a, à gbóó kil beè Sáímòn. Kà bá kpóó sìsã́ géè sí ló kà vaà Sáímòn, vaá ba beè bànie kọ á nvèè bá nèe. 39 À beè gbóó eláẹ́ kpàn vaá kọ́ bel sìsã́á. Sìsã́á à gbóó táẹ́ ló. Tẽ̀ènè tṍóá, à gbóó aa boo naa nu nè va.

40 Sõò tṍó e nàànì ni dọ, dénè gbò e kpáló ba nen géè zọ̀ vaá ba beè di kèbá kele-kele íb zọ̀ló beè faalá va domáé ló. A beè dẹlẹ bá boo buù ọ̀và vaá bó va. 41 Zọ beè aa mm̀ gã́bug ọ̀và vaá vulígi kpã́ kọọ̀: “Oloò Sã́áná Bàrì.” Sõò a beè kọ́ va bel. Náa beè zìgà kọ bà á ló bel, boo bée kọ ba beè nyimá kọọ̀ ẹ̀ẹ̀ Kráìst.

42 Tṍó e dee zilà, a beè gbóó àà kil kĩée ea é dú áá ẹ̀ẹ̀. Sõò gbòa beè dààmà togó gè gbĩ́e dọ̀ọ̀mà tṍó e bà moníe, vaá bà náa beè gbĩ́ kọ á aanàè vá ló àà. 43 Soò a beè kọ́ nè va kọọ̀: “M̀ é íè ge vee lé kpẹ̀a ea kil ló Boǹ Méné Bàrì inmá dõona kà gbò bon, boo béè kọ níà nú e Bàrì beè lẹ̀ẹ̀làm domá ló é.” 44 Vó à naa, à gbóó àà gé kọ́ kpẹ̀a mm̀ gbò tọ bõ̀ònaló fã̀ ea di Jùdíà.