Lé Kpẹ̀a E Jṍòn Beè Emí

2 Ní ea égè taà dee, à íe ílà dóm nè va ea beè sẹ̀ẹ̀a ene kà bon ea kọlà Kénà, ea di Gálilì, vaá kà Jíízọ̀s beè di kĩá. 2 Ba beè kolí nágé Jíízọ̀s nè pá a gbò nyòòne nvée siimá kè ílà dóm nè va á.

3 Tṍó e míí é gé tà, kà Jíízọ̀s beè gbóó kọ́ nèe kọọ̀: “Míí á gé na va bá.” 4 Jíízọ̀s à kọ́ nèe kọọ̀: “Pábia, éé ní ea kuu olo nè nda ea di ló é? Ńdáà tṍó gáà lee.” 5 A kà à gbóó kọ́ nè gbò e bà géè tenmà gyã́á nè mííá kọọ̀: “Naanii kọ̀láá kà nú ea kọ́ nèi.” 6 Dì belí bé e nàà nù kunukẽ̀ pá Júù ténmá naa, ba beè sẹlẹ ọ̀ọ̀lẹ̀ kà káná múú kĩá kọbé ba láá logá bá besĩ́ bà kálá dé gyã́á. Bàà tóm àbèè taà tóm nu gè dòòmà múú-múú nu* ní ea ólò m-má mm̀ buù kà ẹ. 7 Jíízọ̀s à gbóó kọ́ nè va kọọ̀: “Tõi múú mm̀ gbò káná múúí.” Bà gbóó tṍ múú m inmági gbṍó gã́. 8 À gbóó kọ́ nè va kọọ̀: “Ivii sìgà mai nen ea di togó sẹ̀lẹ̀nù ílà dóm nè vaí.” Bà gbóó naa vó. 9 Tṍó e nen ea di togó sẹ̀lẹ̀nù ílà dóm nè vaá daa gã́ ló múú e Jíízọ̀s beè kììlà naamá mííá, náa kal ló béè kọọ̀ náa nyímá kĩée e ba beè lọ̀l (sõò gbò e bà géè tenmà gyã́á nè míí e ba beè ivi múúá máeá nyímá), à gbóó kolí dóm vaá, 10 vaá kọ́ nèe kọọ̀: “Kọ̀láá nen ólò zẹ́ẹ́ tú lé míí nè gbò nen vaá tṍó e ba ni ṍ vaá à tení vá dẽe, bà gbóó tú ọ̀ọ̀là gã́ míí nè va. Sõò olo gbóò kùmà lé míí sẹ̀ẹ̀ kátogóí.” 11 Jíízọ̀s beè sí tómí gbẹá boǹ Kénà, ea di Gálilì, naamá dààmà togó gbò a tóm dũ̀ùnè, naa ní e ka ea dúé ló dọ́ bàlà kẽ, vaá gbò e bà ólò nyoonée nvée beè iée zìgà m.

12 Tṍó e nuí nááá lọ̀l, ẹlẹ nè a kà nè pá a vígà págbálà nè gbò e bà ólò nyoonée nvée beè gbóó àà kil Kàpánìòm, sõò bà náa beè tõó kĩá gã́bug dee.

13 Tṍó e tṍó e pá Júù ólò sẹlẹ Nàànù Ténì Zelí ni íná kuló, Jíízọ̀s à gbóó àà kil Jèrúselẹ̀m. 14 À gbóó iná boo beè tọọ̀ káíá vaá mòn gbò e bà gé óo námà, naanà ból nè kú-kuú kẽ, nè gbò nyáànà kpègè e ba di ĩ́ìtẽ́ boo ba kpòté. 15 Tṍó ea ni lo pyób-pyób díí lọ̀l, à gbóó kpó gbò e bà géè oo naanà ból nè námàa lọl boo beè tọọ̀ káíá. À gbóó èèlà kpègè gbò e bà géè nyaaná kpègèa, vaá tãa bá ba tébòl uú kẽ. 16 À gbóó kọ́ nè gbò e bà géè oo kú-kuú kẽá kọọ̀: “Tui gbò nuí lọlíí kĩí! Kubvii gè tui tọọ̀ ńdáà Tẹ̀ naamai kèki!” 17 Gbò e bà ólò nyoonée nvée à gbóó kẽ̀èa boo kọ ba beè emí mm̀ Kpá Káí kọọ̀: “Bẹ̀à sã́ bùlà ea kil ló o tọ é dém lọl kẽ.”

18 Vó à naa, pá Júù à gbóó bĩináe kọọ̀: “Mókà tóm dũ̀ùnè ní eo é láá sí nèi kọbé à zógè kọọ̀ ò íè kpóó gè naamá gbò nuí ẽ́?” 19 Jíízọ̀s à aalá nè va kọọ̀: “Kũunai tọọ̀ káíí uulíí kẽ, mè nda é tib lọ̀l mm̀ taà dee.” 20 Pá Júù à kọ́ nèe kọọ̀: “46 gbáá ní e ba beè tìbmà tọọ̀ káíí é. É kọọ̀ olo é láá tú áá taà dee tìbmà lọ̀l?” 21 Sõò tọọ̀ káí e Jíízọ̀s géè ló bel kilma ló dú a nom̀ kpáló. 22 Tṍó e Bàrì kẽée lọl kemà ú, gbò e bà ólò nyoonée nvée à gbóó kẽ̀èa boo kọ a beè olòó ló belí. Bà gbóó ziga ló nu e Kpá Kái kọ́ nè nú e Jíízọ̀s beè kọ̀.

23 Tṍó ea beè di kè Nàànù Ténì Zelí gbẹá Jèrúselẹ̀m, gã́bug nen beè ié zìgà mm̀ a bée tṍó e bà mon gbò tóm dũ̀ùnè ea gé sí. 24 Sõò Jíízọ̀s náa beè dẹlẹ́ va nyíé boo, boo béè kọ à nyímá ló nu e bà dú, 25 vaá náa beè ié bíi ló nen ea é kọ́ nú ea kil ló dõona gbò nèe, boo béè kọọ̀ ẹlẹ nyímá nú ea di bùlà nen.