Lé Kpẹ̀a E Jṍòn Beè Emí

4 Tṍó e Nen Ea Íéi nyímá kọọ̀ pá Fárìsíì a dã́ kọọ̀ a kólìè gã́bug gbò nyòòne nvée vaá tú va diilé múú èl Jṍòn— 2 náa kal ló béè kọọ̀ níì Jíízọ̀s ní ea géè tú va diilé múúé nì, sõò pá a gbò nyòòne nvée ní e bà géè naaé— 3 à gbóó aa Jùdíà vaá kpáá kil Gálilì. 4 Sõò a beè dú bíi kọ á tení Sàmérìà. 5 Vó à naa, a beè gbóó iná ene kà bon ea kọlà Sáíkà, ea di Sàmérìà, ea di kpàn ól e Jékọ̀b beè nè a nvín Jósẹ̀f. 6 Kàsĩ́, bànà múú Jékọ̀b beè di kĩá. Jíízọ̀s beè gbóó ĩìtẽ́ ló bànà múúá, boo béè kọọ̀ kyẽèa beè naa kọọ̀ lóóe á ọọ. Tṍóá beè láá dú boo òb nè bàà tóm* fèèbe.

7 Ene kà ńnváá Sàmérìà beè dú ló gè tàb múú. Jíízọ̀s à gbóó kọ́ nèe kọọ̀: “Dõo múú gè õ̀ nèm.” 8 (Tṍóá, gbò e bà ólò nyoonée nvée beè àà sí zẹ̀ẹ̀ tọ gé zalí gyã́á.) 9 Ńnváá Sàmérìàa à gbóó bĩináe kọọ̀: “Éé ní ea náa oló neǹ Júù ò bàn múú bá nda em dúù Sàmérìà ẹ?” (Boo béè kọ pá Júù náa ólò zọ̀ pá Sàmérìà naaá tọ́ọ̀ kà nu.) 10 Jíízọ̀s à aalá nèe kọọ̀: “Be o beè nyimá nú e Bàrì é láá nè pọ́ì, nè íb nen ea gé bań ni múú báí, ò gáẹ̀ beè bĩináe vaá à gáẹ̀ beè nè ni múú dùm.” 11 Ńnvááá à kọ́ nèe kọọ̀: “Tẹ́ẹ̀, nóo íè nu gè tàbmà múú vaá bànà múúí bọọ́ kètẽ́. Ãàe ní eo é lọl nakà múú dùmí ẽ́? 12 É kọ olo bọọ̀ èl beélè nómá tẹ̀ Jékọ̀b ea beè ùb bànà múúí, vaá ẹlẹ bií ló pá a nvín, nè gbò a nom à ṍ múú ea dú m?” 13 Jíízọ̀s à aalá nèe kọọ̀: “Kọ̀láá nen ea ṍ nakà múúí, múú é kpáá tànie. 14 Múú náa é tan na kọ̀láá nen ea ṍ múú e nda é née, tãa vó múú e nda é néeá é ólòó bú teníé m vaá naa kọ á ié dùm e bè náa tá.” 15 Ńnvááá à kọ́ nèe kọọ̀: “Tẹ́ẹ̀, nèm nakà múúí kọbé múú náa tań nám àbèè kọ ḿ kpáá olòó dú kĩí gé tàb múú.”

16 Jíízọ̀s à kọ́ nèe kọọ̀: “Àà gé kolí o dóm vaá ò dúí kĩí.” 17 Ńnvááá à kọ́ nèe kọọ̀: “Ním íè dóm.” Jíízọ̀s à kọ́ nèe kọọ̀: “Ò lóò kà-kà bel tṍó eo kọ́ọ̀, ‘Ním íè dóm.’ 18 Boo béè kọọ̀ vòò nen eo ni íá, vaá nen eo di ló kátogóí níì o dóm nì. Ò lóò kà-kà bel.” 19 Ńnvááá à gbóó kọ́ nèe kọọ̀: “Tẹ́ẹ̀, m̀ monì kọọ̀ ọ̀ọ̀ neǹ kọ́ọ̀ bùlà Bàrì. 20 Beélè gbò nómá tẹ̀ beè olòó tõó boo gùí fã̀ Bàrì, sõò boolo kọ́ì kọọ̀ Jèrúselẹ̀m ní ea dú kĩée e gbò nen é íè ge tõo fã̀ Bàrì e.” 21 Jíízọ̀s à kọ́ nèe kọọ̀: “Zìgà nú em gé kọ́í e pábia. Tṍó gé dú e gbò nen náa é beè tu ná boo gùí àbèè Jèrúselẹ̀m naamá ketõ̀ò ge tõo fã̀ Bàrì. 22 Boolo nóo nyímàì ló nú eo gé fãi. Sõò beele nyímà ló nú e beele gé fã, boo béè kọọ̀ dùùà beè dààà togó dú ló pá Júù. 23 Kọ̀láá bé ea dì naa, tṍó gé dú, vaá níà kátogóí, tṍó e kà-kà gbò e bà gé nè fã̀ Tẹ̀a é fã́e mm̀ nyómá nè mm̀ kà-kà, boo béè kọọ̀ níà íb gbò e Tẹ̀a gé gbĩ́ kọ bà á fãàe ẽ́. 24 Bàrì dú nyómá vaá gbò e bà gé fã́e é íè ge fã̀e mm̀ nyómá nè mm̀ kà-kà.” 25 Ńnvááá à kọ́ nèe kọọ̀: “M̀ nyímà kọọ̀ Mèsáíà e bà kólíe Kráìst é dú. Tṍó ea é dú, à é kọ́ dénè nu tẹlẹ bàlà kẽ nèi.” 26 Jíízọ̀s à kọ́ nèe kọọ̀: “Níà nda em gé ló bel nè nií.”

27 Tṍóá, gbò e bà ólò nyoonée nvée à gbóó dù vaá a beè palàge bọọ́ vá ló kọ à géè zọ̀ pábia loá bel. Sõò tọ́ọ̀ ọ̀và náa beè kọọ̀: “Éé ní eo gé gbĩ́ ẽ́?” àbèè kọọ̀: “Éé ní ea náa ò gé zọ pábia loá bel é?” 28 Ńnvááá à gbóó tú a káná múú gbẹẹ́ kĩá àà bã mm̀ bon gé kọ́ nè gbò nen kọọ̀: 29 “Dui gé ẹbvii ene kà gbálà ea kọ́ kọ̀láá kà nú em beè naa nèm. É kọọ̀ není náa é dú Kráìst?” 30 Gbò nen à gbóó kònà aa boná dú ló Jíízọ̀s.

31 Dénè tṍóá, gbò e bà ólò nyoonée nvée géè kọ́ nèe kọọ̀: “Neǹ Dòbá, dé nuà.” 32 Sõò a beè kọ́ nè va kọọ̀: “Nda íè gyã́á gè dè e boolo nóo nyímàì ló.” 33 Tṍóá, gbò e bà ólò nyoonée nvée à gbóó kọ́ nè ene kọọ̀: “Tọ́ọ̀ nen gáà tu gyã́á máe, sẹ̀ à íe nen ea beè tú gyã́á máe ẽ́?” 34 Jíízọ̀s à gbóó kọ́ nè va kọọ̀: “Ńdáà gyã́á dú gè naa bùlà nen ea beè lẹ̀ẹ̀làm nè ge sí a tóm lọl dẽe. 35 O beè kọi kọọ̀ à sígè ténì ẽ́ à lée tṍó gè bùùlà nu. Ẹbvii! M̀ kọ́ọ̀ nèi kọọ̀: Dalai dẽé boo vaá ò ẹbvii boo bàlà ól, mè ò é monii kọọ̀ nu a lée gè bùùlà. 36 Neǹ bùùlà nù dì ea gé íe a kpẽ́ vaá à dì ea gé bṍònè ló gbò ból súú ea dú gbò e bà é íe dùm e bè náa tá. Vó à naa, neǹ fò nù nè neǹ bùùlà nù é láá gbá ié zààvà. 37 Vó ní ea náa bel e bà ólò ló kọọ̀: Enè nen beè fò vaá dõona neǹ à bùùlà à dú kà-kà ẹ. 38 M beè lẹ̀ẹ̀lài kọ ó gé buulai nú e nóo beè sii tóm ló. Dõona gbò ní e ba beè sí tóm ló é, vaá boolo o íei bélè lọlíí ló tóm e ba beè sì.”

39 Gã́bug pá Sàmérìà e bà aa bonà beè iée zìgà m boo béè nú e ńnvááá beè kọ́ nè vaá kọọ̀: “À kọ́ kọ̀láá kà nú em beè naa nèm.” 40 Vó à naa, tṍó e pá Sàmérìà ínaé ló, bà gbóó kọ́ nèe kọ á tõonìè vá ló, vaá a beè tõó kĩá bàà dee. 41 Vó beè naa kọọ̀ gã́bug dõona gbò á iée zìgà m boo béè nú ea kọ́. 42 Bà gbóó kọ́ nè ńnvááá kọọ̀: “Bẹẹ ge iée zìgà m náa dẹẹ̀a na boo áá nú e olo beè kọ̀, boo béè kọọ̀ beele e dã́àmà tṍ vaá e nyímá kọ à dú kà-kà kọọ̀ gbálàí ní ea dú nen ea é duulà bàlà boo é.”

43 Tṍó e bàà dee ni téní, Jíízọ̀s à gbóó aa kĩá kil Gálilì. 44 A beè kọọ̀, bà náa ólò nvèè ka ló neǹ kọ́ọ̀ bùlà Bàrì gbẹá a bon. 45 Vó à naa, tṍó ea íná Gálilì, pá Gálilì beè palàge zààvàẹ́ ló boo béè kọ ba beè mòn dénè nú ea beè naa gbẹá kè sẹ̀lẹ̀nù ea beè sẹẹa Jèrúselẹ̀ma, boo béè kọọ̀ baala beè si nágé kè sẹ̀lẹ̀nùa.*

46 A beè gbóó kpáá òòà kil Kénà, ea di Gálilì, ea dú kĩée ea beè tõo kììlà múú naamá míí gbẹá á. À íe ene kà gbálà ea ólò sí tóm tọọ̀ méné e kpáló a nvín géè zọ̀ gbẹá Kàpánìom. 47 Tṍó e gbálàí dã́ kọọ̀ Jíízọ̀s a aa Jùdíà iná Gálilì, à gbóó àà síé ló gé bànie kọ á dù gé boè a nvín págbálà, boo béè kọọ̀ kpálóé géè palàge zọ̀ belí ea é ú. 48 Jíízọ̀s à kọ́ nèe kọọ̀: “Be ò gáà monii tóm dũ̀ùnè nè nu bọ̀ọ̀ló, nóo ólò zigai.” 49 Nen ea ólò sí tóm tọọ̀ ménéá à gbóó kọ́ nèe kọọ̀: “Nen Ea Íém, vàlẹ̀ bá dù besĩ́ ńdáà ńkem̀ nvín kálá ù.” 50 Jíízọ̀s à kọ́ nèe kọọ̀: “Àà, mè kpáló o nvín a válí.” Gbálàa beè ziga ló bel e Jíízọ̀s kọ́ nèeá, vaá à gbóó àà. 51 Tṍó ea di èèlè ea gé aà, pá a gyóòlo à gbóó zọ̀ẹ nyòònà, vaá kọ́ nèe kọọ̀ kpáló a nvín a válí. 52 À gbóó bĩiná va tṍó e kpáló a nvín beè valí. Bà aalá nèe kọọ̀: “Sìsã́á beè táẹ́ ló gbán boo enè tóm fèèbeè sṍóeá.” 53 Tẹ̀ nvíná à gbóó nyimá kọọ̀ níà kà lèlà tṍó e Jíízọ̀s beè kọẹ̀ neèeá kọọ̀: “Kpáló o nvín a válí.” Vó beè naa kọọ̀ ẹlẹ nè dénè pá a tọ á ié zìgà mm̀ Jíízọ̀s. 54 Níí ní ea égè bàà kà tóm dũ̀ùnè e Jíízọ̀s beè sì tṍó ea aa Jùdíà iná Gálilì e.