Tóm Gbò E Jíízọ̀s Beè Lẹ̀ẹ̀là

21 Tṍó e ni kọ́ nèva kọ bà á agẹlẹ ló lọ̀l, náa kal ló béè kọ náa beè valíí ló gè àà vá ló àà, e beè gbóó tení sĩ́ múú le-le kil Kọ́ọ̀s. Deé ea bẽene, è kil Róòds, vaá tṍó e aà kĩá, è gbóó kil Pátàrà. 2 Tṍó e monì mìàlo ea gé kil Fìnísìà, è gbóó bã m àà. 3 Tṍó e ni monmà dẽè kpò kunukẽ̀ Sáíprọ̀s, e beè gbóó tú kĩá gbẹẹ́ boo bá kie vaá maaá tení Sìríà kil Táíà, ea dú kĩée e mìàloá géè kil kọbé bà ṍá gyọ́ lọl m. 4 E beè gbĩ́ gbò nyòòne nvée vaá mòn va, è gbóó tõó kĩá àlàbà dee. Sõò boo béè nú e nyómá káí ni náa kọ bà á nyimá, ba beè kilsĩ́ gè kọ́ nè Pọ́ọ̀l kọ á gá iná Jèrúselẹ̀m. 5 Tṍó e deé e beè noo gè tõ̀òma kĩá ni égá, e beè gbóó àà. Sõò dénè ọ̀và, bií ló gbò bia nè gbò pá nvín beè tulèi dọ̀ọ̀mà tṍó e ínà nvéè boná. È gbóó kumí dúnú kẽ boo sãa ea di gã́ múúá tã̀àgã ló Bàrì 6 vaá kọ́ nè ene kọ ene á naa vó. Tṍóá, è gbóó bã mm̀ mìàloá. Baala à gbóó òòà kil ba gbò be.

7 E beè gbóó tení sĩ́ múú aa Táíà iná Tọ̀lèméíàs. E beè kànà moǹ pá vígà e bà di kĩá vaá tú enè dee tõ̀òmà vá ló. 8 Deé ea bẽene, e beè aa kĩá kil Sìzàríà vaá bã tọọ̀ Fílìp ea ólò kọ́ kpẹ̀a, ea dṹùnà àlàbà nená. E beè gbóó tõoé ló. 9 Gbálàí íe ténì kà nvín pábia e bà gáà ia dóm* e bà ólò kọ́ bùlà Bàrì. 10 Sõò tṍó e ni tú sìgà dee tõ̀òma kĩá, enè neǹ kọ́ọ̀ bùlà Bàrì ea kọlà Ágabọ̀s beè gbóó aa Jùdíà dù. 11 A beè dúí ló gé tú kpá láá e Pọ́ọ̀l ólò bọá tõ̀ò tẽ́ bọá kpóó tọ́ nè báẹ vaá kọọ̀: “Nyómá káí kọọ̀, ‘Níà bé e pá Júù e bà di Jèrúselẹ̀m é bọ́bví kọ̀láá nen ea íe kpá lááí naa ẽ́, vaá bà é túe nvee bá pá dõona kà dó.’” 12 Tṍó e dã́à belí, beele nè gbò e bà di kĩá beè gbóó dààmà togó gè bànie kọ á gá àà kil Jèrúselẹ̀m. 13 Pọ́ọ̀l à gbóó kọọ̀: “Éé ní ea náa ò gé tói vaá gbĩi gè ọọvẹ́m mi ló é? Palàge nyimai kọọ̀, m̀ di kpènà ló gè kọ bà á bọbvím nè ge u nágé gbẹá Jèrúselẹ̀m boo béè Nen Ea Íéi, ea dú Jíízọ̀s.” 14 Tṍó e bè náa zigà, e beè gbóó aa ló gè bànie vaá kọọ̀: “Bùlà Jìhóvà* á naaá.”

15 Tṍó e gbò nuí ni nááá lọ̀l, e beè gbóó kpoogá dee ló vaá dààmà togó gè àà kil Jèrúselẹ̀m. 16 Sìgà gbò nyòòne nvéè Jíízọ̀s e bà dú Sìzàríà beè nyoonéi nagé, vaá ba beè faalái siimá ló Mànésàn ea dú Sáíprọ̀s, ea dṹùnà túá gbò e ba beè nyoone nvéè Jíízọ̀s e beè kọ èé tõó a tọá. 17 Tṍó e ínà Jèrúselẹ̀m, pá vígà beè palàge zààvàí ló. 18 Sõò deé ea bẽene, Pọ́ọ̀l beè nyoonéi sí ló Jém̀z, vaá dénè gbò kànen beè di kĩá. 19 A beè kànà va mon vaá dààmà togó gè nootẽ́ dénè nú e Bàrì ni náa nè gbò e bà di dó àla tení dú ló a sìtóm kọ̀ kpẹ̀a.

20 Tṍó e bà dã́ naa vó, bà gbóó dààmà togó gè lèèlà Bàrì, sõò ba beè kọ́ nèe kọọ̀: “Vígà, gã́bug tõ̀ò gbò e ba ni nyoone nvéè Jíízọ̀s di zẹ̀ẹ̀ pá Júù, vaá dénè ọ̀và ólò tú bẹ̀à sã́ bùlà naamá nú e Log kọ́. 21 Sõò ba beè dã́ nú ea kil ní ló kọ ò géè noomà dénè pá Júù e bà di gbò dó àla kọ bà á aa ló gè sẹlẹ Log Mózìs, vaá bà á gá koo ba gbò nvín àbèè ge naa nàànù kunukẽ̀. 22 Éé ní eé náa kilma ló é? Boo béè kọọ̀ bà é íè ge dã̀ kọ o íná kĩí. 23 Vó à naa, naa nú e kọ́ọ̀ nè ni: À íe ténì nen e bà di kĩí e ba beè zilá zíl nè Bàrì. 24 Tú gbòí bììa ló vaá ò õonai bọọ lóó, kpẽ́ va kpègè boo kọbé bà láá kpọá gyáa. Tṍóá, dénè nen é gbóó nyimá kọọ̀ gbò bel e bà géè dã́ kìlmà ní lóá níì kà-kà nì, sõò ò dì eo gé náa nú ea lelà vaá naa nú e Log kọ́. 25 Sõò kilma ló gbò e ba ni dú gbò e bà gé nyoone nvéè Jíízọ̀s e bà di gbò dó àla, e beè emí nú ea dú bẹẹ béèlàfùl má va, kọ bà á kpòòlà lóó lọl ló nú e ba beè vaamá gyọ́ọ nè gbò ńbàlì e bà naamà bá, mii, nú e ba beè ììlà òò, nè kúnàgã̀.”

26 Deé ea bẽene, Pọ́ọ̀l nè gbòí beè gbóó àà gé õ̀ònà ba lóó, vaá a beè gbóó àà kil mm̀ tọọ̀ káí gé kọ́ deé e gè õ̀ònà ba lóó é íná kùbmà, kọbé neǹ vààla gyọ́ọ láá vaalá gyọ́ọ boo buù ọ̀và kà lèlà deeá.

27 Tṍó e àlàbà deeá é gé iná kùbmà, pá Júù e bà aa Ésìà beè gbóó mònie gbẹá mm̀ tọọ̀ káíá vaá ló bel kyọ̀ọ̀mà nyíè dénè gbò e bà di kĩá, naa ní e bà sííe 28 vaá vulí kpã́ kọọ̀: “Pá Ízrẹẹ̀l, duièé! Gbálàí ní ea gé nóòmà nuù kọ̀láá gbò e bà di kọ̀láá ketõ̀ò kọ bà á naa uú boo pá bẹẹ gbò, bẹẹ Log, nè tọọ̀ káíí é. Ní ea bọọ èlmà vó dú gè kọọ̀, à tú bã̀àna pá Gríìs nvee mm̀ tọọ̀ káíí vaá kyọ̀gàlà kĩée ea di káíí.” 29 Boo béè kọ ba beè mòn Trọ́fimòs ea dú Ẹ́fẹsọ̀s ea dìé ló gbẹá boná, bà gbóó tuumá kọọ̀ Pọ́ọ̀l beè túe nvee mm̀ tọọ̀ káíá. 30 Zivèkà boná beè bũ̀ùgã̀ vaá gbò nen beè teelá nyoone Pọ́ọ̀l gé siíe dùùlà lọl boo beè tọọ̀ káíá, vaá gbẹá boo kùb gbò nùtọ ea di ló. 31 Tṍó e bà gé gbĩ́ gè fẹ́ẹ, pọ̀b neǹ bé beè gbóó dã́ kọọ̀ tã̀àgã̀ bã́ dénè ketõ̀ò ea di Jèrúselẹ̀m. 32 Tẽ̀ènè tṍóá, à gbóó tú gbò bé nè gbò e bà dì vá togó vaá teelá nyooné va. Tṍó e bà mon pọ̀b neǹ bé nè gbò béá, bà gbóó aa ló gè bòm Pọ́ọ̀l.

33 Tṍóá, pọ̀b neǹ béá à gbóó kyã̀à iná vá ló vaá siíe, vaá kọ bà á tú bàà kà gẹ́l kpọ́gọ́lọ́ bọbmáe. Tṍóá, à gbóó bĩiná íb nen ea dú nè nú ea beè naa. 34 Sõò gbò e bà di kĩá beè gbóó dààmà togó gè vulí kpã́ vaá logági kele-kele bel. Boo béè vó, à gbóó kọ bà á faaláẹ domá kĩée e gbò bé ólò tõo, boo béè kọọ̀ kòvà e bà géè nvèè beè naa kọ á gá láá dã́ tọ́ọ̀ kà nú e bà kọ́ à náa. 35 Sõò gbò béá beè dàlàẹ nè boo tṍó e bà gé dẽ́e kil kĩée e gbò béá ólò tõo, boo béè kọ gbòa géè gbĩ́ gè síe pọ́lọ́, 36 vaá gã́bug nen géè bììàẹ nvée, vaá vulí kpã́ kọọ̀: “Fẹíe!”

37 Tṍó e bà é gé bã kĩée e gbò béá ólò tõo, Pọ́ọ̀l à gbóó bĩiná pọ̀b neǹ béá kọọ̀: “É kọ m̀ é láá ló bel nè ni?” Pọ̀b neǹ béá à bĩináe kọọ̀: “Naa kọ ò ólò ló Gríìk? 38 É kọ olo níì neǹ Íjìpt ea beè dààmà togó gè tú gbò nen beemá gbò e bà gé bẹl tṍó ea kil nvéeá vaá faalá 4,000 gbò gbálà e bà fáálá dágà kilma boo kpáà bàlà ólá nì?” 39 Tṍóá, Pọ́ọ̀l à gbóó kọọ̀: “Ndaà neǹ Júù em beè mèà gbẹá Tásọ̀s, ea di Sìlísìà, ea dú boń e gbò nen palàge nyimá ló. Sóo-sóo, sọ̀m tọ́ deè kọ ḿ ló bel nè gbòí.” 40 Tṍó ea ni sọ́ẹ tọ deè, Pọ́ọ̀l à gbóó elá kĩée e bà ólò dẽe teníá, vaá tú bá loomá bel nè gbòa kọ bà á pĩigã́. Tṍó e ba ni pĩigã́, à gbóó tú dém bel Híbrù loomá bel nèva kọọ̀: