Tóm Gbò E Jíízọ̀s Beè Lẹ̀ẹ̀là
5 Sõò ene kà gbálà ea kọlà Ànànáíàs nè a va ea kọlà Sàfáírà beè oo kunukẽ̀. 2 Sõò a beè zọ̀ a va bilá ló vaá gṍ sìgà kpègè lọl ló. À gbóó tú ní ea sígá ló má gbò e Jíízọ̀s lẹẹlàa. 3 Sõò Pítà beè kọọ̀: “Ànànáíàs, éé ní ea náa ò sọ̀tọ́ deè kọọ̀ Sétàn á tú ni kpọọmá kyáá bel nè nyómá káí, boo tṍó eo beè gṍ sìgà kpègè ea dú ló kunukẽ̀ eo beè ooá ẹ́? 4 Aẹ̀ bèè ńlóò kunukẽ̀ tṍó eo gáà beè oo, vaá tṍó eo ni óo, kpègè ea dú ló dú nágé ńlo. Éé ní ea náa ò bugi togó boo gè labví láb naa vó é? Ò kpọ́ọ̀ kyáá bel nè Bàrì, níì nen nì.” 5 Tṍó e Ànànáíàs dã́ naa vó, à gbóó dọ kẽ vaá ù. Vaá pọ̀ beè palàge sii kọ̀láá nen ea dã́ nú ea kil ló. 6 Tṍóá, gbò nvín ãa gbálà à gbóó aa boo tú kàn kọ̀lmàe, vaá dàlàẹ ààmà gé lì.
7 Tṍó e nú ea é láá dú taà kà ávà ni téní, a va à gbóó dù, sõò náa nyímá nú ea beè naaá. 8 Pítà à gbóó kọ́ nèe kọọ̀: “Kọ́ nèm, é kọ níà dénè kpègè e pálaa bọ̀ì beè oolii kunukẽ̀á ló é?” A va à naa, “Ẽei, níà kpègè e beè oo ló é.” 9 Pítà à gbóó bĩináe kọọ̀: “Éé ní ea náa pálaa bọ̀ì ò bilai ló gè ẹbmai kpóó e nyómá káí Jìhóvà* íe é? Pãane tṍ! Mè ò é dã́ moǹ ká tọọ̀ gbò e bà géè lì o dóm e ba ni íná nùtọí, vaá bà é dalà nàgé olo ààmà.” 10 Tẽ̀ènè tṍóá, à gbóó dọ kẽ vaá ù. Tṍó e gbò nvín ãa gbálàa bã́ tọá vaá mòn a íí, bà gbóó dàlàẹ ààmà gé li kpàn a dóm. 11 Vó à naa, pọ̀ beè gbóó palàge sii zivèkà bõ̀ònatõ̀ò Kráìst ea di Jèrúselẹ̀m nè kọ̀láá gbò e bà dã́ nú ea kil ló.
12 Nagé, gbò e Jíízọ̀s lẹẹlàa beè kilsĩ́ gè sí gã́bug tóm dũ̀ùnè vaá naagi nu bọ̀ọ̀ló gbẹá zẹ̀ẹ̀ gbòa, vaá dénè ọ̀và beè olòó gbá bõoná Ke Kọ̀ọ̀lọ̀ Sólomòn. 13 Mm̀ kà-kà, gbò e bà náa íe õ̀òa bùlà náa beè láá ié agẹ ló gè zọ̀ va gbaaá ló. Sõò gbò nen géè ló lé bel ea kil vá ló. 14 Ní ea bọọ èl vó, gbò gbálà nè gbò bia e bà íe zìgà mm̀ Nen Ea Íéi beè kilsĩ́ gè palàge bọọ dọ ló. 15 Ba beè faalá nágé gbò e kpáló va náa dú lé domá boo pọ̀b èèlè vaá tú va maamé boo vái nè búl, kọbé tṍó e Pítà é téní, kói* ea dúé ló láá tùlà sìgà ọ̀va. 16 Nagé, gã́bug gbò e bà aa gbò boń ea di kuló Jèrúselẹ̀m beè kilsĩ́ gè dàlàgì gbò e kpáló va zọ nè gbò e zọ di m domá, vaá dénè ọ̀và beè boá.
17 Sõò pọ̀b neǹ vààla gyọ́ọ bií ló dénè gbò e ba beè dìé ló e bà dṹùnà pá Sádùsíì beè gbóó aa boo, vaá ba beè palàge bẹ́ nyíe. 18 Ba gbóó sii gbò e Jíízọ̀s lẹẹlàa vaá tú va nvee tọọ̀ kpọ́gọ́lọ́. 19 Sõò tṍó e dee ni bílá, nyómá tóm Jìhóvà* beè kùùlà nùtọọ̀ tọọ̀ kpọ́gọ́lọ́á vaá tú va tẹlẹ kèdẹi. À gbóó kọ́ nèva kọọ̀: 20 “Aalii gé elaí mm̀ tọọ̀ káí vaá ò kilíí sĩ́ gè kọi nú ea kil ló dùm nei gbò nen.” 21 Tṍó e bà dã́ belí lọ̀l, bà gbóó bã mm̀ tọọ̀ káíá deé ea bẽene, vaá dààmà togó gè noomà nu.
Tṍó e pọ̀b neǹ vààla gyọ́ọ nè gbò e ba beè dìé ló dú, bà gbóó kolí gbò e bà ólò beelá bel gbẹá Pọ̀b Tọ Bèèlaá nè dénè gbò kàneǹ pá Ízrẹẹ̀l bõonè. Bà gbóó lẹ̀ẹ̀là gbò kùdẽe ló kọ bà á sí tọọ̀ kpọ́gọ́lọ́á gé tú gbò e Jíízọ̀s lẹẹlàa domá. 22 Sõò tṍó e gbò kùdẽe lóá iná kĩá, bà náa beè mòn vá tọọ̀ kpọ́gọ́lọ́á, bà gbóó òòà gé kọ́ nèva 23 kọọ̀: “È monì kọọ̀ nùtọọ̀ tọọ̀ kpọ́gọ́lọ́á di ííá vaá gbò kùdẽe ló di élá gã́ nùtọ. Sõò tṍó e kuulà, née monì tọ́ọ̀ nen m.” 24 Tṍó e nen ea di togó tọọ̀ káíá nè gbò togó vààla gyọ́ọ dã́ belí, bà gbóó palàge degíli boo béè nú ea é láá sìlà aa mm̀ nú ea náááí. 25 Sõò enè nen beè dù gé kọ́ nèva kọọ̀: “Ẹbvii! Gbò eo beè siilii nveeníí tọọ̀ kpọ́gọ́lọ́á di élá mm̀ tọọ̀ káí e bà gé nóòmà nuù gbò nen.” 26 Tṍóá, nen ea di togó gbò kùdẽe ló tọọ̀ káíá nè pá a gbò beè gbóó àà gé sií va domá, sõò bà náa beè naamà bá kpóó, boo béè kọ pọ̀ beè sií va kọọ̀ gbò nen é tóbmàè va dem.
27 Bà gbóó tú va ele kèsĩ́ gbò e bà ólò beelá bel gbẹá Pọ̀b Tọ Bèèlaá. Tṍóá, pọ̀b neǹ vààla gyọ́ọá beè gbóó ló bel nèva 28 kọọ̀: “E beè palàge ãanéi kọ ó gá tui béeí noomanai nuù tọ́ọ̀ nen, sõò ẹbvii, o túi bọọ nòòmànù mm-meí zivèkà Jèrúselẹ̀m, vaá beelai fulii gè naanii kọọ̀ míì gbálàí á di ból beele.” 29 Pítà nè nagbò e Jíízọ̀s lẹẹlàa à gbóó kọ́ nèva kọọ̀: “Beele é íè ge gbàntṍ ló Bàrì dì belí nen ea gé bẹl èlmà nen. 30 Bàrì beélè gbò nómá tẹ̀ beè kẽee Jíízọ̀s, eo beè fẹi tení dú ló gè tuíe kaí kú téá. 31 Bàrì beè dàlàẹ́ boo naamá Pọ̀b Neǹ Tùle nè Neǹ Dùùlà, vaá túe sẹ̀ẹ̀a boo bá lè kọbé pá Ízrẹẹ̀l láá ọgá ló ba pọ́lọ́, naa ní e Bàrì é ia ló nèva. 32 Beele beè mònmà dẽe vaá nyómá káí e Bàrì beè nè gbò e bà gbaníe tṍ ló dì belí nen ea gé bẹl beè nvèè bá nèi kọ é sí neǹ ditõ̀ò kilma ló gbò nuí.”
33 Tṍó e bà dã́ gbò belí, súng à gbóó palàge bã̀ va naa ní e bà gbóó gbĩ́ gè fẹ́ va. 34 Sõò enè neǹ Fárìsíì, ea béè kọlà Gàmélìẹ̀l, ea ólò noomà Log vaá gbò nen ólò nvèèe ka ló beè gbóó elá èla mm̀ Pọ̀b Tọ Bèèlaá vaá kọ bà á zẹ́ẹ́ tú va tẹlẹ kèdẹi. 35 Tṍóá, à gbóó kọ́ nèva kọọ̀: “Booló pá Ízrẹẹ̀l, iei ọ̀ẹ̀ dẽe ea kil ló nú eo gbĩ́ gè naanii gbòí. 36 Dì belí nu dòòmà bá, besĩ́ à kalá dọ̀ kátogóí, Tìódọ̀s beè aa kẽ vaá kọọ̀, ẹlẹẹ̀ pọ̀b nen, vaá nú ea é láá dú 400 nen beè bììàẹ́ nvée. Sõò tṍó e bà fẹ́ẹ, dénè gbò e bà géè bììàẹ́ nvéeá beè teelá zààlà vaá nú e bà géè noo náa beè ié ná togó. 37 Tṍó e níá ni téní, Júdàs ea dú Gálilì beè àà nàgé kẽ tṍó e bà géè nvèè béeá, vaá kõ̀ònà gbò nen nvea nvée. Ba beè fẹ náe gé vaá dénè gbò e bà géè bììàẹ́ nvée à teá zààlà. 38 Vó à naa, kátogóí, m̀ kọ́ọ̀ nèi kọọ̀, ó gá tãagẽi gbòí, aalíí vá ló. Boo béè kọ beè nú e bà gé noo àbèè tóm e bà gé síí aa bá nen, kùbmà é beè bã ló. 39 Sõò be à aa bá Bàrì, nóo é láá kubvíí va. Tãa vó, à é dú kọ ò gé béi Bàrì.” 40 Bà gbóó tú dùùlà bá deè tṍ ea né vaá, vaá kọ bà á kolí gbò e Jíízọ̀s lẹẹlàa domá. Bà gbóó bòm va, vaá nèva log kọ bà á kùb ge tú béè Jíízọ̀s loomá bel nè gbò nen. Bà gbóó sọ̀va bá kọ bà á àà.
41 Tṍó e bà aa kèsĩ́ gbò e bà ólò beelá bel gbẹá Pọ̀b Tọ Bèèlaá, nyíé va beè gbóó ẹẹ, boo béè kọ Bàrì ẹb kọọ̀ bà bọ́ẹ̀ ló gè mòn tã̀àgã̀ boo béè Jíízọ̀s. 42 Vaá ba beè kilsĩ́ gè olòó noomà nu vaá vee lé kpẹ̀a ea kil ló Kráìst Jíízọ̀s kọ̀láá dee gbẹá mm̀ tọọ̀ káí nè aa tọ dọ tọ, vaá lóó va náa beè ọọ.