Kpá E Pọ́ọ̀l Beè Lẹ̀ẹ̀là Má Pá Róm̀
13 Kọ̀láá nen á tõó kè kẽè gbò e bà gé bẹl, boo béè kọọ̀ tọ́ọ̀ nen náa é láá bẹ̀l e Bàrì náa sọtọ́ deè. Bàrì ní ea beè sọ̀tọ́ deè kọọ̀ gbò e bà gé bẹl á bẹ̀l ẹ. 2 Vó à naa, kọ̀láá nen ea bé uú boo gbò e bà gé bẹl bé uú boo nòònù Bàrì, vaá gbò e bà náa vó é tú bèèla bel tẹẹá boo ba bá. 3 Boo béè kọọ̀ gbò e bà gé bẹl dú nu pọ̀ nèà gbò e bà gé sí pọ́lọ́, níì gbò e bà gé náa lé nì. Be nóò gbĩ́ gè siiá pọ̀ ló gbò e bà gé bẹl, kilsĩ́ gè naa nú ea dú lé, mè bà é leelà ni, 4 boo béè kọọ̀ bà dú gbò e Bàrì gé tú siimá tóm boo béè nú ea é lée ní ló. Sõò pọ̀ á sií ni be ò gé náa nú ea dú pọ́lọ́, boo béè kọọ̀ Bàrì beè nè va kpóó gè nèèmà kpọ̀té gbò e bà náa nú ea dú pọ́lọ́. Bà dú gbò e Bàrì gé tú siimá tóm mm̀ ge nèèmà kpọ̀té gbò e bà sí pọ́lọ́.
5 À íe nú ea é náa kọ ó tõoníí vá kè kẽ, níì áá boo béè kpọ̀té e bà é tẹ́lẹ̀í boo nì, sõò kọbé bọọ bug náa bẽ́gẽ̀i bel. 6 Níà nú ea náa ò gé kpénai gé kpègè gbáá ẹ́, boo béè kọọ̀ bà dú gbò e Bàrì gé tú va siimá tóm ea é dọ bélè nè gbò nen, vaá bà gé sí gbò tómí lee. 7 Tui nú ea kuu buù nen neíe: kpẽi kpègà gbáá nei nen ea bĩ́íná kpègè gbáá, kpẽi kpègè e gbò e bà gé bẹl kọ́ ó kpẽi, siiai pọ̀ ló nen ea gbĩ́ kọ ó siiaíe pọ̀ ló, nveenii ka ló nen ea gbĩ́ kọ ó nveenììe ka ló.
8 Ó gá siilii kom bá tọ́ọ̀ nen daalá lọl ló gè vùlè ene, boo béè kọọ̀ kọ̀láá nen ea vulè nen náa nú e log kọ́. 9 Boo béè kọọ̀ log kọ́ọ̀, “Nóo é íè ge gbẹẹ o va àbèè o dóm kuná gã̀, nóo é íè ge fẹ́ nen, nóo é íè ge zìb nu, nóo é íè ge ié bẹẹ súú dẽe,” vaá kọ̀láá kà dõona kà log ea kpáá dì bãaa mm̀ ní ea kọ́ọ̀: “Ò é íè ge vùlè o nen dì belí bé eo vulè o bá naa.” 10 Nen ea íe vulè náa ólò sí pọ́lọ́ a nen. Vó à naa, vulè ní ea ḿm̀-mè logá ẹ́.
11 Naanii gbò nuí boo béè kọọ̀ a lée tṍó ea bọ́ló kọ ó kẽeai aalíí dáá, boo béè kọọ̀ bẹẹ dùùà a íná kuló kátogóí èlmà tṍó e beè dààmà togó gè nyoone nvéè Jíízọ̀s a. 12 Tṍó a íná kpã́á, vaá dee é gé zìlà. Vó à naa, naanii mè èé aa ló kọ̀láá kà tóm ea kuu kùkuù gín vaá è nveà nuù bé ẹ́ẹ́ dee. 13 Naanii mè èé tõó dùm ea õoà dì belí bé e gbò nen ólò tõó dùm naa ẹ́ẹ́ èlà. Née é tõó dùm ge dé bìlà, ge ṍ míí tẽeá dẽe, ge kuná gã̀, ge lọ̀à kẹ́ẹ ló sí pọ́lọ́, ge kaná kàna, nè ge bẹ́ nyíe. 14 Sõò labvii láb belii Nen Ea Íéi, ea dú Jíízọ̀s Kráìst, vaá ó gá noonii gè naanii nú e bọọ nom̀ kpáló gbĩ́.