Lé Kpẹ̀a E Máátìù Beè Emí

15 Pá Fárìsíì nè gbò émì kpá beè aa Jèrúselẹ̀m sí ló Jíízọ̀s gé bĩináe kọọ̀: 2 “Éé ní ea náa vaá pá o gbò nyòòne nvée náa ólò tõó boo nàànù kunukẽ̀ gbò nómá tẹ̀ ẹ? Dì belí nu dòòmà bá, bà náa ólò logá bá* besĩ́ bà kálá dé gyã́á.”

3 Jíízọ̀s à aalá nè va kọọ̀: “Éé ní ea náa vaá nóo tõonìì boo log Bàrì boo béè bọọ nàànù kunukẽ̀ ẽ? 4 Dì belí nu dòòmà bá, Bàrì beè kọọ̀, ‘Nvèè ka ló o tẹ̀ nè o kà,’ ‘vaá kọ̀láá nen ea ló pọ́lọ́ bel nè a tẹ̀ àbèè a kà, bà á fẹ́ẹ.’ 5 Sõò boólo kọ́ì kọọ̀: ‘Kọ̀láá neń ea kọ́ nè a tẹ̀ àbèè a kà kọọ̀: “M beè tú kọ̀láá kà nu em íè ea gáẹ̀ láá dọ̀ bélè nè ni naamá dõ̀ònù em neè Bàrì,” 6 náa é dú ná bíi kọ á nvèè ka ló a tẹ̀.’ Vó à naa, boolo dií boo béè bọọ nàànù kunukẽ vaá lọlii ka ló moǹ bel Bàrì. 7 Booló gbò bààsĩ́, neǹ kọ́ọ̀ bùlà Bàrì Àìzáíà beè palàge kọ́ nu ea kilíí ló kọọ̀: 8 ‘Gbòí tú ba bũunu nvèèmàm ka ló, sõò ba nyíe di kpã́á ààḿ ló. 9 Bà gé fám mm̀ zọ̀là pọ́ì, boo béè kọọ̀ bà nóòmà dòbá nuù nen kọ níà log Bàrì.’” 10 À gbóó kolí dénè gbòa nvea ló vaá kọ́ nè va kọọ̀: “Pãanei tṍ vaá ò dã́i ból ló kọọ̀: 11 Níì nú e nen dé ní ea ólò kyọ̀ẹẹ́ nì, sõò bel ea ló ní ea ólò kyọ̀ẹ ẹ́.”

12 Tṍóá, gbò e bà ólò nyoonée nvée à gbóó dù gé kọ́ nèe kọọ̀: “Ò nyímà gé kọọ̀ bel eo lóòá kyẽ́ pá Fárìsíì?” 13 À aalá nè va kọọ̀: “À é dú gè bùùlà kọ̀láá kà té e ńdáà Tẹ̀ ea di káála náa beè fò. 14 Aalíí vá ló. Níà gbò tùle e dẽé va gímí. Beè neǹ gímá dẽe túlè neǹ gímá dẽe, pálaa ọ̀và é dọ́ bànà.” 15 Pítà à kọ́ nèe kọọ̀: “Baatẽ́ nèi nú e nu dòòle lóí tõó dọ̀.” 16 À aalá kọọ̀: “Naa kọ boólo gáà danai gé ból ló? 17 Boolo nóo nyímàì kọọ̀, kọ̀láá kà nú e nen dé ólò dọ gbàà nen vaá à sí tẹlẹ kẽ? 18 Sõò kọ̀láá kà bel e nen ló aàẹ́ nyíe, vaá níà gbò nú ea ólò kyọ̀ nen ẽ́. 19 Boo béè kọọ̀, mm̀ nyíè nen ní e pọ́lọ́ bug togó ólò ààẹ. Dì belí gè fẹ́ nen, ge gbẹẹ va àbèè dóm kuná gã̀, dùm kúnagã̀,* ge zìb nu, ge elá kyáá neǹ ditõ̀ò, nè ge òn Bàrì. 20 Gbò nuí ní ea ólò kyọ̀ nen ẽ́, sõò ge kọ nen náa lógá bá besĩ́ à kálá dé gyã́á náa ólò kyọ̀ nen.”

21 Tṍó e Jíízọ̀s aa kĩá, à gbóó àà kil bálásĩ́ Táíà nè Sáídòn. 22 Vaá ene kà ńnváá Fìnísìà ea ólò di kĩá beè gbóó dù gé tóé ló kọọ̀: “Neń Ea Íém, Nvín Dévìd, iém sàn nyíe ló. Zọ di mm̀ ńdáà nvín pábia ea gé palàge tãagẽ́e.” 23 Sõò náa beè ló tọ́ọ̀ kà bel nèe. Vó à naa, pá a gbò nyòòne nvée beè gbóó kọ́ nèe kọọ̀: “Kpóe ààmà, boo béè kọọ̀ à ólòó tó bììàí nvée.” 24 Jíízọ̀s à aalá nè va kọọ̀: “Ba beè lẹ̀ẹ̀làm kọ ḿ sí ló áá pá Ízrẹẹ̀l, e bà bélí naanà ból ea pe.” 25 Sõò ńnvááá beè gbóó dù gé kumíe dúnú ke gbàà vaá kọọ̀: “Neń Ea Íém, nvèè bá nèm!” 26 Jíízọ̀s à aalá kọọ̀: “Náa lelà ge tú gyã́á ea kuu gbò pá nvín nè gbò nvín gbógó.” 27 Ńnvááá à aalá kọọ̀: “Ẽei, e Neń Ea Íém, sõò gbò nvín gbógó ólò dé sã́gã́-sã́gã́ gyã́á ea kalà aa boo tébòl ba tẹ̀ íe.” 28 Jíízọ̀s à gbóó kọ́ nèe kọọ̀: “Pábia, ò palàge ié zìgà. O bùlà á naaá.” Vaá a nvín pábia beè gbóó boá lèlà tṍóá.

29 Tṍó e Jíízọ̀s aa kĩá, à gbóó kil kpàn Pène Gálilì, vaá a beè kyã̀à kil boo gù ea di kĩá gé ĩìtẽ́. 30 Gã́bug nen beè dúé ló. Ba beè faalá gi gbò e bo di ló, gbò kọ̀và, gbò gímá dẽe, gbò bólá gã́, nè gã́bug dõona gbò domáé ló, vaá a beè bó dénè ọ̀và. 31 A beè bọọ ló gbòa tṍó e bà mon kọọ̀ gbò e bo di ló gé bóá, gbò bólá gã́ gé ló bel, gbò kọ̀và gé kyãà, vaá gbò gímá dẽe gé mon nu. Bà gbóó lèèlà Bàrì pá Ízrẹẹ̀l.

32 Jíízọ̀s à gbóó kolí pá a gbò nyòòne nvée nvea ló vaá kọ́ nè va kọọ̀: “Gbòí dúm ńsàn nyíe, boo béè kọọ̀ baa tú taà dee tõ̀òmàḿ ló vaá bà gáà de tọ́ọ̀ nu. Ním gbĩ́ì kọ bà á tú tákói ààmà, boo béè kọọ̀, bà é láá gbààà gbẹá èèlè.” 33 Náa kal ló béè vó, pá a gbò nyòòne nvée beè kọ́ nèe kọọ̀: “È di kpã́á aa ló bon, ãàe ní eé láá ié gã́bug gyã́á ea é gbõomá ló gã́bug gbòí lọ̀l ẹ?” 34 Jíízọ̀s à gbóó bĩiná va kọọ̀: “Kuù kpò fétúlú ní ea dìí báẹ́?” Bà aalá nèe kọọ̀: “Àlàbà kpò fétúlú nè sìgà ńkem̀ paà gyã́à.” 35 Tṍó ea ni kọ́ nè gbòá kọ bà á ĩìtẽ́ kunukẽ̀ lọ̀l, 36 à gbóó tú àlàbà kpò fétúlú nè gyã́àa, vaá tṍó ea ni ṍá Bàrì zaá boo lọ̀l, à gbóó baagi vaá tú nè pá a gbò nyòòne nvée, vaá pá a gbò nyòòne nvée à gbóó tú nè gbòa. 37 Dénè ọ̀và beè dè vaá à m-má va. Ba beè bõonè ló ní ea sígá ló vaá à m-má mm̀ àlàbà kà pọ̀bkà kùn. 38 Dénè gbò e ba beè dè beè toolá 4,000 gbò gbálà, e bè á gé ló gbò pábia nè gbò pá nvín. 39 Tṍó ea ni lẹẹlà gbòa ààmà, à gbóó bã mm̀ faà sĩ́ múú kil bálásĩ́ Mágadàn.