Lé Kpẹ̀a E Lúùk Beè Emí

1 M̀ monì kọọ̀ gã́bug nen a piiga boo gè emí gbò nú ea beè naaá, vaá è mòn kọ à dú kà-kà, 2 boo béè kọọ̀ nú e ba beè emí gbááá ló gbò nú e beè dã́ lọl gã́ gbò e ba beè ditõ̀ò nè gbò e bà géè vee moǹ bel Bàrì. 3 Tṍó em ni gbĩ́tẽ́ ló dénè nu lọl dààà togó vaá mòn kọ à dú kà-kà, m beè gbóó beelá nágé fùl ge emí gbõ̀ònà bé ea beè naaá naa má ni, e gbele méné Tìófilọ̀s, 4 kọbé ò palàge nyimá kọọ̀ gbò nú e ba beè noomà ni dú kà-kà.

5 Tṍó e méné Hẹ́rọ̀d* ea géè bẹ̀l Jùdíà beè dì, à íe ene kà neǹ vààla gyọ́ọ ea bée kọlà Zèkàráíà, ea beè dũunà gbò vààla gyọ́ọ e bà ólò kolí va Àbáíjà. A va beè dú mana-manaà Éròn, vaá a bée beè kọ̀là Èlízabẹ̀t. 6 Pálaa ọ̀và beè dú gbò lé lab dògò kèsĩ́ Bàrì, vaá bà náa beè ié kọ̀bèl boo béè kọ ba beè tõó boo log nè nòòkúu ea aa bá Jìhóvà.* 7 Sõò bà náa beè ié tọ́ọ̀ kà nvín, boo béè kọọ̀ Èlízabẹ̀t beè dĩi, vaá pálaa ọ̀và a dú kàneń mm̀ dee.

8 Kátogóí, à géè sí a tóm dì belí neǹ vààla gyọ́ọ gbẹá kèsĩ́ Bàrì, boo béè kọọ̀ pá ńlẹ́ẹ̀ gbò beè di boo tóm. 9 Dì belí bé e gbò vààla gyọ́ọ ólò naa naa, a beè gbóó lee tṍó e ẹlẹ gáẹ̀ bã ketõ̀ò káí ea di ló tọọ̀ káí Jìhóvà* mùn ínseǹs. 10 Vaá gã́bug nen beè di kèdẹi e bà géè tã̀àgã ló Bàrì tṍó e bà gé mùn ínseǹsa. 11 Nyómá tóm Jìhóvà* beè gbóó sìlàẹ́ ló vaá elá boo bá lè ea di ló gbàni e bà ólò mùn ínseǹs sẹlẹ́ booá. 12 Sõò tṍó e Zèkàráíà moníe, à gbóó ié tã̀àgã̀ bùlà vaá pọ̀ beè palàge siíe. 13 Sõò nyómá tómá beè kọ́ nèe kọọ̀: “Pọ̀ á gá sií ni e Zèkàráíà, boo béè kọọ̀ Bàrì a dã́ o tã̀àgã ló. O vaà Èlízabẹ̀t é man nvín págbálà, vaá ò é kólíe Jṍòn. 14 Ò é ṍ kààgà vaá ié ẹ́ẹ́-ẹẹ̀ nyíe, vaá gã́bug nen é ṍ kààgà boo béè kọ à meà. 15 Boo béè kọọ̀ Jìhóvà* é palàge nvèèe ka ló, sõò náa é ṍ tọ́ọ̀ kà míí àbèè míí ea ólò tení dẽè nen, vaá nyómá káí Bàrì é díé ló bã̀àna tṍó ea gáà mèà. 16 Vaá à é náa kọọ̀ gã́bug pá Ízrẹẹ̀l á òòà nyoone Jìhóvà* ea dú ba Bàrì. 17 Nagé, à é tú íb kpóó nè nyómá e Èláíjà beè ié siimá tóm nè Bàrì. À é náa kọọ̀ nyíè gbò tẹ̀ á belí níí gbò pá nvín, vaá naa kọọ̀ gbò lọ̀l togó kèbá á labví láb e nyìmànù di m, vaá naa nú ea lelà kọbé à íe gbò e bà é dí kpènà ló gè fã̀ Jìhóvà.”*

18 Zèkàráíà à gbóó kọ́ nè nyómá tómá kọọ̀: “À é náa va m̀ láá àgala boo é? Boo béè kọ m ána vaá ńdáà va a ána nagé.” 19 Nyómá tómá à gbóó kọ́ nèe kọọ̀: “Ndaà Gébriẹ̀l vaá m̀ ólò di kèsĩ́ Bàrì. A beè lẹ̀ẹ̀làm kọ ḿ kọ́ nakà lé kpẹ̀aí nè ni. 20 Sõò gã́ ni é bólá vaá nóo é láá lo ná bel dọ̀ọ̀mà deé e gbò nuí é nááá, boo béè kọ nóo zigà bel em lóò ea é íè ge naaá tṍó e Bàrì beè íbá ló.” 21 Dénè tṍóá, gbò nen géè elá bànà Zèkàráíà, vaá a beè palàge bọọ́ vá ló boo béè kọ náa beè vàlẹ̀ bá aa ketõ̀ò káíá dù. 22 Tṍó ea dọ́ bàlà kẽ, náa beè láá lo ná bel. Bà gbóó nyimá kọọ̀ à mon nú ea gáà mon tọ́ọ̀ dee gbẹá ketõ̀ò káíá. À gbóó kilsĩ́ gè tú bá loomá bel nè va boo béè kọ náa beè láá tú gã́ loomá ná bel. 23 Tṍó e deé ea ólò siimá tóm tọọ̀ kái ni égá, à gbóó àà kil be.

24 Tṍó e sìgà dee ni téní, Èlízabẹ̀t beè gbóó niiná gbàà, vaá náa beè aa tọ mm̀ vòò ẽ́. À géè olòó kọọ̀: 25 “Níì nú e Jìhóvà* náa nèm ẽ́, à kẽeàḿ boo kọbé gbò nen náa nveemà nàm lẹ́.”

26 Tṍó ea ni dú ọ̀ọ̀lẹ̀ ẽ́ aa ló tṍó ea beè niiná gbàà, Bàrì beè gbóó lẹ̀ẹ̀là nyómá tóm ea kọlà Gébriẹ̀l siimá Názarẹ̀t ea di Gálilì, 27 kọ á sí ló ene kà pábia ea gáà si ló págbálà ea beè zìgà kọ à é íàẹ̀ Jósẹ̀f ea aa tọọ̀ Dévìd, vaá béè pábiaá beè kọ̀là Mérì. 28 Nyómá tómá à gbóó bã tọ vaá kọ́ nèe kọọ̀: “Kànà mòn kól, Bàrì palàge ié ni sàn nyíe ló. Jìhóvà* dì ní ló.” 29 Sõò gbò bel ea lóí beè palàge tãagẽ́e naa ní ea gbĩ́ gè nyimá nú e kànà mòn kolí tõó dọ̀. 30 Nyómá tómá à gbóó kọ́ nèe kọọ̀: “Pọ̀ á gá sií ni e Mérì, boo béè kọọ̀ Bàrì a íé ni sàn nyíe ló. 31 Ẹ̀b! Ò é nííná gbàà vaá màn nvín págbálà, vaá ò é kólíe Jíízọ̀s. 32 À é palàge ié kpóó vaá bà é kólíe Sã́áná Neń Ea Bọọ Lọ̀l Vaá À Lee, vaá Jìhóvà* Bàrì é née kpòté méné Dévìd ea dú a tẹ̀. 33 À é bẹl boo pá tọọ̀ Jékọ̀b dọ̀ọ̀mà dè-dè, vaá kùbmà náa é bã́ ló a Boǹ Méné.”

34 Sõò Mérì beè kọ́ nè nyómá tómá kọọ̀: “À é náà và níí láá valí em gáà si ló págbálà ẹ?” 35 Nyómá tómá à aalá nèe kọọ̀: “Nyómá káí Bàrì é dọ́ ní boo, vaá kpóó Neń Ea Bọọ Lọ̀l Vaá À Lee é úua ní boo. Níà nú ea náa nvín ea é meàí é kọlà neń ea di káí nè Sã́áná Bàrì e. 36 Ẹ̀b! Èlízabẹ̀t ea dú o dúà ló a nííná nágé gbàà mm̀ a deè kànen, vaá à é man nvín págbálà. Ọ̀ọ̀lẹ̀ ẽ́ a téní aa ló tṍó e pábia e bà ólò kọ à dĩ́ií beè niiná gbàà. 37 Boo béè kọ náa íe nú e Bàrì kọ́ e bè náa é láá naa.” 38 Mérì à gbóó kọọ̀: “Ẹ̀b! Ndaà gyóòlo Jìhóvà!* Á naaám ló dì belí bé eo kọ́ọ̀ naaá.” Tṍóá, nyómá tómá à gbóó ààẹ́ ló àà.

39 Pọ́ì ńkem̀ tṍó aa ló tṍóá, Mérì beè gbóó gbalá àà sí ene kà bon ea di Júdà, ea di deè boo gù. 40 À gbóó bã tọọ̀ Zèkàráíà, vaá kànà moǹ Èlízabẹ̀t. 41 Tṍó e Èlízabẹ̀t dã́ kànà mòn kól ea aa gã́ Mérì, nvín ea dìé gbàà beè gbóó pẹgi, vaá nyómá káí Bàrì à gbóó dọ boo Èlízabẹ̀t 42 naa ní ea vúlí kpã́ kọọ̀: “Tã́áná dee bá á dì ní ló gbàà gbò pábia, vaá tã́áná dee bà á di ló nvín ea dì ní gbàà! 43 Éé ní ea náa nda à ié nakà nèà deèí é, kọọ̀ kà Neń Ea Íém á dù gé kãám ẽ́? 44 Ẹ̀b! Nvín ea dìḿ gbàà pẹ́gi boo béè ẹ́ẹ́-ẹẹ̀ nyíe tṍó em dã́à o kànà mòn kól. 45 Ẹ́ẹ́-ẹẹ̀ nyíe á dì nàgé ló pábia ea zigà, boo béè kọọ̀ kọ̀láá kà nú e Jìhóvà* beè kọ́ nèe é nááá.”

46 Mérì à gbóó kọọ̀: “M̀ túù nà dùm* lèèmà Jìhóvà,* 47 vaá nyíém náa é láá aa ló gè ẹẹ́ ló Bàrì ea dú nà neǹ dùùlà, 48 boo béè kọ à kẽèa boo a gyóòlo pábia ea kil kẽ. Ẹ̀b! Lọl kátogóí ààmà, kọ̀láá nen é kólím neǹ ẹ́ẹ́ nyíe, 49 boo béè kọọ̀ Neń ea íe kpóó a náa gã́bug nu nèm, vaá a bée di káí, 50 vaá à ólò ié sàn nyíe ló gbò e bà sííáẹ pọ̀ ló aa kúúlí dọ kúúlí. 51 A tú a bá siimá gbele-gbele tóm. A zaali nòònù gbò dàlà kpáló boo. 52 A tú gbò e kpóó di bá lọl boo kpòté méné, vaá dàlà gbò e bà kil kẽ nè boo. 53 A náa kọ gbàà gbò e tákói gé tá ló á m-má, vaá naa kọọ̀ gbò e ba beè ié gyọ́ á kyààmà kóló bá àà. 54 À nveè bá nè Ízrẹẹ̀l ea dú a gyóòlo, boo béè kọ à kẽèa boo nú ea beè zìgà, 55 dì belí bé ea beè kọ́ nè bẹẹ gbò nómá tẹ̀ naa. A beè zìgà kọ à é íèè sàn nyíe ló Ébràhám̀ nè mana-mana ea aàẹ́ m dọ̀ọ̀mà dè-dè.” 56 Mérì beè tú nú ea é láá dú taà ẽ́ tõ̀òmàé ló besĩ́ à kalá òòa kẽ kil be.

57 Tṍó e Èlízabẹ̀t é man nvín beè gbóó lee, vaá a beè màn págbálà. 58 Vaá pá a kè gyṍó nè pá a dúà ló beè dã́ kọọ̀ Jìhóvà* a íée sàn nyíe ló. Bà gbóó zọ̀ẹ ṍ kààgà. 59 Tṍó ea ni dú aatáà dee e bà é gé koo nvíná, bà géè gbĩ́ gè tú béè a tẹ̀ ea kọlà Zèkàráíà kolíé ló. 60 Sõò a kà beè kọọ̀: “Ẽ́èe! A bée é kọlà Jṍòn.” 61 Tṍóá, bà gbóó kọ́ nèe kọọ̀: “Tọ́ọ̀ kà pá o dúà ló náa kọlà nakà béeí.” 62 Bà gbóó tú bá bĩimá a tẹ̀ bée ea gbĩ́ gè nèe. 63 À gbóó kọ bà á domà báà té vaá a beè emí boo kọọ̀: “Jṍòn ní ea dú a bée é.” À gbóó palàge bọọ́ ló dénè nen. 64 Tẽ̀ènè tṍóá, nú ea géè siíe démá beè gbóó ààẹ́ ló, naa ní ea gbóó dààmà togó gè ló bel vaá lèèlà Bàrì. 65 Pọ̀ beè sii dénè neń ea di ba gyṍó, vaá dénè gbò e bà di Jùdíà beè ló bel kilma ló nú ea náááí. 66 Vaá kọ̀láá neń ea dã́ beè tú nvea nyíe vaá kọọ̀: “Éé ní e ńkem̀ nvíní é dú tṍó ea é bọọ ẹ́?” Boo béè kọọ̀ Jìhóvà* beè dìé ló.

67 Tṍóá, nyómá káí Bàrì beè gbóó dọ boo Zèkàráíà ea dú a tẹ̀ naa ní ea kọ́ bùlà Bàrì kọọ̀: 68 “Lèèlà á dì nè Jìhóvà,* ea dú Bàrì pá Ízrẹẹ̀l, boo béè kọ a kiilà bùlà kpee pá a gbò vaá dùùlà va. 69 A náa kọ é ié koò dùùà* lọl tọọ̀ Dévìd ea dú a gyóòlo. 70 Níí gbááá ló nú ea beè kọ́ tenmá gã́ pá a gbò kọ́ọ̀ bùlà Bàrì e ba beè di deè kéléá 71 kọ à é duulàẹ̀i lọl bá bẹẹ gbò ọ́b nè gbò e bà ọ́bvíi, 72 vaá à é ḿm̀-mè bel ea beè ló nè bẹẹ gbò nómá tẹ̀a vaá ié va sàn nyíe ló, vaá à é kẽèa boo agẹ bá zíl ea beè ziláá, 73 ea dú zíl ea beè zilá nè Ébràhám̀, ea dú bẹẹ nómá tẹ̀ 74 kọọ̀ tṍó ea ni duulàẹ̀i lọl bá bẹẹ gbò ọ́b, à é gbóó neèi nèà deè ge tú agẹ ló siimá tóm ea di káí neèe 75 mm̀ bọ́ọ̀ló dẹ̀lẹ̀ nyíé boo nè lé lab dògò dénè dee mm̀ bẹẹ dùm. 76 Sõò kilma ló olo, e nvín, bà é kólí ni neǹ kọ́ọ̀ bùlà Bàrì Neń Ea Bọọ Lọ̀l Vaá À Lee, boo béè kọọ̀ ò é gyásĩ́ Jìhóvà* vaá kpoogè dee ló gbò a èèlè, 77 nè ge naa kọ pá a gbò á nyimá kọ à é duulàẹ̀ va tení dú ló gè ia ló ba pọ́lọ́ nè va, 78 boo béè sàn nyíe ea aa bá bẹẹ Bàrì. Sàn nyíeí é náa kọ é mòn ẹ́ẹ́ dee ea aa bá bẹẹ Bàrì, ea é móí boo belí zìlà dee. 79 À é mó boo gbò e bà di mm̀ kùkùù gín nè gbò e bà di kĩée e ú kọl bá boo, vaá tulèí boo èèlè fẹ́ẹ́-fẹẹ̀ ló.”

80 Nvíná beè gbóó bọọ vaá aga ló mm̀ ge fã̀ Bàrì. A beè kilsĩ́ gè tõó boo kpáà bàlà ól dọ̀ọ̀mà tṍó ea dọ́ bàlà kẽ vaá tú a lóó zogè pá Ízrẹẹ̀l.