Lé Kpẹ̀a E Lúùk Beè Emí

2 Mm̀ gbò deeá, Sízà Ọ̀gọ́stọ̀s beè tenmà log kọọ̀ kọ̀láá neń ea di bàlà booí á sì gé nvèè bée. 2 (Níí ní ea dú túá tṍó e ba beè nvèè bée tṍó e Kùìrínìùs géè bẹ̀l Sírià ẹ.) 3 Vaá kọ̀láá nen beè àà sí a bon gé nvèè bée. 4 Jósẹ̀f beè àà nàgé Názarẹ̀t ea di Gálilì kil boǹ Dévìd, e bà ólò kolí náe gé Bẹ́tlìhém̀ ea di Jùdíà, boo béè kọ à dṹùnà pá tọọ̀ Dévìd. 5 A vaà Mérì nè ẹ̀ẹ̀ beè gbá sì gé nvèè bée, vaá tṍóá à é gé màn nvín. 6 Tṍó e bà di kĩá, tṍó ea é man nvín beè gbóó lee. 7 A beè gbóó màn a túá kà nvín págbálà, vaá tú kàn kọ̀lmàe maamé mm̀ bũ̀ e nom ólò taa kṍ m, boo béè kọọ̀ tọ́ọ̀ ketõ̀ò ge tõo náa beè di na kĩée e gbò kyáà ólò tõo.

8 A beè ié nágé gbò kùdẽe ló naanà ból e ba beè di boo bàlà ól ea di bálásĩ́ kĩá e bà géè kùdẽe ló ba naanà ból bílá dee. 9 Mm̀ bùló, nyómá tóm Jìhóvà* beè gbóó sìlà vá ló, vaá ẹ́ẹ́ dee ea aa bá Jìhóvà* beè mò beeá vá ló, naa ní e pọ̀ palàge sií va. 10 Sõò nyómá tómá à gbóó kọ́ nè va kọọ̀: “Pọ̀ á gá siíi. Ẹbvii! M̀ íè lé kpẹ̀a em é kọ́ nèi ea é ẹ́ẹ̀lẹ̀ nyíè kọ̀láá nen. 11 Boo béè kọọ̀ nieí, bọọ neǹ dùùlà ea dú Kráìst nè Nen Ea Íéi meà gbẹá boǹ Dévìd. 12 Nee nú ea é náa vaá ò nyímaíe lóí: Ò é monii ene kà ãa nvín e bà tú kàn kọ̀lmàe maamé mm̀ bũ̀ e nom ólò taa kṍ m.” 13 Mm̀ bùló, gã́bug nyómá tóm beè gbóó gbaaá ló nakà nyómá tómá vaá lèèlà Bàrì kọọ̀: 14 “Lèèlà á dì nè Bàrì ea di káála, vaá ẹ́ẹ́-ẹẹ̀ nyíe á di ló gbò e Bàrì ténmà va e bà di boo kunukẽ̀í.”

15 Tṍó e gbò nyómá tómá ni aà kil káála, gbò e bà ólò kùdẽe ló naanà bólá beè gbóó kọ́ nè ene kọọ̀: “Naanii mè èé piìga boo gè sí Bẹ́tlìhém̀ gé ẹ̀b nú ea nááá, e Jìhóvà* ni náa kọ é nyimáí.” 16 Bà gbóó gbẹá boo àà vaá mòn Mérì nè Jósẹ̀f, nè ńkem̀ nvíná ea di ma mm̀ bũ̀ e nom ólò taa kṍ m ã́. 17 Tṍó e bà mon naa vó, bà gbóó kọ́ nú e nyómá tómá beè kọ́ nè va ea kil ló ńkem̀ nvíná. 18 Vaá a beè palàge bọọ́ ló kọ̀láá nen ea dã́ nú e gbò kùdẽe ló naanà bólá kọ́ nè vaá. 19 Sõò Mérì beè tú dénè belá sẹ̀ẹ̀a bùlà vaá bugi togó boo nú ea tõó dọ̀. 20 Tṍóá, gbò e bà ólò kùdẽe ló naanà bólá beè gbóó òòa kẽ, vaá dààmà togó gè tú ka nè lèèlà nè Bàrì boo béè nú e ba beè dã̀ vaá baa monmà dẽe, boo béè kọ à nááá gbõ̀ònà bé e ba beè kọ́ nè va naa.

21 Tṍó e aatáà dee ni téní ea ni lée tṍó e bà é gé koóe, ba beè gbóó kolíe Jíízọ̀s ea dú bée e nyómá tómá beè kọ bà é kólíe besĩ́ì Mérì à kalá niiná gbààa.

22 Nagé, tṍó ea ni lée gè sẹlẹ sẹ̀lẹ̀nù ea é náa kọ bà á di õ̀òa dì belí bé e Log Mózìs kọ́ naa, ba beè gbóó túe kilma Jèrúselẹ̀m kọbé bà túe zogè Jìhóvà,* 23 dì belí bé e Log Jìhóvà* kọ́ naa kọọ̀: “Kọ̀láá kà túà kà nvín págbálà é íè ge di káí nè Jìhóvà.”* 24 Ba beè nè vààla gyọ́ọ dì belí bé e Log Jìhóvà* kọ́ naa. Logá beè kọọ̀: “Tui bàà kà kú-kuú kẽ àbèè bàà kà píjìn vaamai gyọ́ọ.”

25 Ẹ̀b! À íe ene kà gbálà ea beè di Jèrúselẹ̀m e a bée kọlà Símiòn. À beè dú neǹ lé lab dògò vaá à géè tú gè fã̀ Bàrì kolmá nu. À géè elá bànà tṍó e Bàrì é nveè bá nè pá Ízrẹẹ̀l, vaá nyómá káí beè dìé ló. 26 Gbáló vó, nyómá káí beè naa kọ á nyimá kọọ̀ náa é ú dọ̀ọ̀mà tṍó ea é mon Kráìst e Jìhóvà* beè sàa. 27 Nyómá káí beè gbóó faaláẹ domá tọọ̀ káíá, vaá tṍó e tẹ̀ nè kà Jíízọ̀s dalàẹ domá kọbé bà náa nú e Log kọ́ bà á naa, 28 a beè gbóó dàlà nvíná sẹ̀ẹ̀a bá vaá lèèlà Bàrì kọọ̀: 29 “Nen Ea Íém Eo Bọọ Lọ̀l Vaá À Lee, kátogóí o gyóòlo é gbóó láá ú mm̀ fẹ́ẹ́-fẹẹ̀ ló dì belí bé eo beè kọ́ naa, 30 boo béè kọọ̀ m mon neń eo é téní dú ló dùùlà gbò nen, 31 eo lẹẹlà domá kọbé dénè nen moníe. 32 À dú ẹ́ẹ́ dee ea é náa kọọ̀ kọ̀láá kà dó á mòn nu vaá dú ka nèà Ízrẹẹ̀l ea dú pá o gbò.” 33 Nú ea kọ́ kilma ló nvíní beè palàge bọọ́ ló a tẹ̀ nè a kà. 34 Nagé, Símiòn beè tãanè va deè bá vaá kọ́ nè Mérì ea dú kà nvíná kọọ̀: “Ẹ̀b! Ba beè sà nvíní kọbé à náa kọọ̀ gã́bug nen ea di Ízrẹẹ̀l á dọ̀ nè ge naa kọọ̀ gã́bug ọ̀và á aa boo, vaá à é dú neń e bà é ólòó ló bel uué boo tṍó e bà moníe 35 (vaá oló Mérì é mon tã̀àgã̀ belí e bà tú kpóó gẹ̀ tìbmà ni nyíe), kọbé à tú nú ea di nyíè gã́bug nen tẹlẹ bàlà kẽ.”

36 À íe ene kà ńnváá ea ólò kọ́ bùlà Bàrì. A bée kọlà Ánà ea dú nvín Fẹ́nùẹ̀l, ea aa gãà Áshà. Ńnvááí a dú kànen vaá áá àlàbà gbáá ní e a dóm nè ẹ̀ẹ̀ beè tõ̀òà tṍó e bà ílá lọ̀l ẹ. 37 A dóm beè ù vaá ẹlẹ a tóólá 84 gbáá. À ólò di tọọ̀ káí lee ea gé sí tóm nè Bàrì ẹ́ẹ́ èlà nè bílá dee. À ólò ka nágé gã́, tã̀àgã ló Bàrì vaá kọ́ dénè nú ea dìé bùlà. 38 Tṍóá, a beè gbóó kyã̀à bã̀ vá ló, vaá dààmà togó gè lèèlà Bàrì vaá kọ́ nú ea kil ló nvíná nè dénè gbò e bà géè elá bànà tṍó e Jèrúselẹ̀m é íe dùùà.

39 Tṍó e Jósẹ̀f nè Mérì ni náa kọ̀láá kà nú e Log Jìhóvà* beè kọ bà á naa lọ̀l, bà gbóó òòà kil ba boǹ Názarẹ̀t, ea di Gálilì. 40 Ãa nvíná beè kilsĩ́ gè bọọ vaá aga ló. A beè nyimá nu vaá nyíè Bàrì beè kilsĩ́ gè ẹẹẹ́ ló.

41 A beè dú lóó nuù a tẹ̀ nè a kà ge sí Jèrúselẹ̀m buù gbáá ló Nàànù Ténì Zelí. 42 Tṍó ea ni tóólá 12 gbáá, ba beè gbóó àà sí Jèrúselẹ̀m di belí bé e bà ólò naa naa tṍó Nàànù Ténì Zelí. 43 Tṍó e deè Nàànù Ténì Zelíá ni íná kùbmà vaá bà gé oòa kẽ, Jíízọ̀s beè gbẹá Jèrúselẹ̀m, vaá a tẹ̀ nè a kà náa beè nyimá. 44 Ba beè dòòmà kọ à di gbàà gbò e bà gé gbá ààa, naa ní e bà tú enè dee kyã̀àmà besĩ́ bà kalá dààmà togó gè gbĩ́e gbàà pá ba dúà ló nè gbò e bà nyímá ló. 45 Sõò tṍó e bà náa moníe, bà gbóó òòà kil Jèrúselẹ̀m gé tú ọ̀ẹ̀ dẽe gbĩimáe. 46 Tṍó e taà dee ni téní, bà gbóó mòníé mm̀ tọọ̀ káí ea di ĩ́ìtẽ́ zẹ̀ẹ̀ gbò dòbá ea gé pãané va tṍ ló vaá bĩinágí va bíb. 47 Sõò bé ea dã́ ból ló nu nè bé ea áálá bel naa beè palàge bọọ́ ló dénè gbò e bà géè pãanée tṍ ló. 48 A beè palàge bọọ́ ló a tẹ̀ nè a kà tṍó e bà moníe naa ní e a kà bĩ́ínáe kọọ̀: “Nvín, éé ní ea náa ò naái vóí é? O tẹ̀ nè nda a palàge mòn tã̀àgã̀ boo béè ge gbĩ́ ni.” 49 Sõò, a beè kọ́ nè va kọọ̀: “Éé ní ea náa ò gbiḿ mi ẽ́? Nóo nyímàì kọọ̀ m̀ íè gè di tọọ̀ ńdáà Tẹ̀?” 50 Sõò bà náa beè dã́ ból ló nú ea géè kọ́ nè va.

51 Tṍóá, a beè gbóó nyooné va òòà kil Názarẹ̀t, vaá kilsĩ́ gè gbàn va tṍ ló. Vaá a kà beè tú dénè belí sẹ̀ẹ̀a bùlà. 52 Jíízọ̀s beè kilsĩ́ gè bọọ, nyimá nu, vaá nyíè Bàrì nè gbò nen beè ẹẹẹ́ ló.