Lé Kpẹ̀a E Jṍòn Beè Emí

1 Moǹ Belá beè dì lọl dààà togó, vaá Moǹ Belá beè di ló Bàrì, vaá Moǹ Belá be beè bàrì. 2 A beè di ló Bàrì lọl dààà togó. 3 Bàrì beè dèm kọ̀láá kà nu tenmáé bá. Náa íe nú e Bàrì beè dèm e náa beè tenmáé bá.

4 Dùm beè dì tení dúé ló, vaá dùmá dú ẹ́ẹ́ dee nèà gbò nen. 5 Vaá ẹ́ẹ́ deeá gé mo tení gbàà kùkùù gín, sõò gíní náa láà kọ̀l bá boo.

6 À íe ene kà gbálà e Bàrì beè lẹ̀ẹ̀là, e a bée beè kọ̀là Jṍòn. 7 Gbálàí beè dú ló gè kọ́ kpẹ̀a ea kil ló ẹ́ẹ́ deeá, kọbé kọ̀láá íb nen láá di boo nú ea kọ́ vaá ié zìgà. 8 Ẹlẹ níì ẹ́ẹ́ deeá nì, sõò a beè dù gé sí neǹ ditõ̀ò kilma ló ẹ́ẹ́ deeá.

9 Lèlà sĩ́ ẹ́ẹ́ dee ea é náa kọọ̀ dénè nen á mòn ẹ́ẹ́ dee é beè gé dú bàlà booí. 10 A beè di bàlà booí, vaá Bàrì beè dèm bàlà booí tení dúé ló, sõò bàlà booí náa beè nyimáe ló. 11 A beè iná ba bon, sõò pá ba bon náa beè túe. 12 Sõò a beè naa kọọ̀ kọ̀láá gbò e bà túe á ié nèà deè ge dú gbò nvín Bàrì, boo béè kọ bà íe zìgà mm̀ a bée. 13 Bà náa beè mèà aa gbàà tẹ̀ nè kà àbèè aa mm̀ bùlà e nen íe, sõò ba beè mèà aa bá Bàrì.

14 Moǹ Belá beè gbóó mèà dú nen vaá tõoí zẹ̀ẹ̀. E beè gbóó mòn ka ea dúé ló, íb ka e áá kà nvín ea di bá a tẹ̀ ní ea ólò láá ié é. Bàrì beè palàge iée sàn nyíe ló vaá à ólò ló kà-kà bel dénè tṍó. 15 (Jṍòn beè sí neǹ ditõ̀ò kìlmàé ló vaá vee kọọ̀: “Níì nen em beè kọ́ nú ea kil lóá kọọ̀, ‘Nen ea é dúm nvée a gyám sĩ́, boo béè kọọ̀ a beè dì besĩ́ì nda à kalá mèà.’”) 16 A beè ié sàn nyíe ló dénè bẹ̀ì, boo béè kọọ̀ a sàn nyíe palàge bọọ. 17 Bàrì beè nè Logá tenmá bá Mózìs, sõò a beè naa kọ é ié sàn nyíe nè kà-kà bel tení dú ló Jíízọ̀s Kráìst. 18 Tọ́ọ̀ nen gáà mòn Bàrì, áá bàrì ea dú áá kà sã́áná ea di kpàn Tẹ̀a ní ea beè baatẽ́ íb nen ea dú nèi ẽ́.

19 Tṍó e pá Júù beè lẹ̀ẹ̀là gbò vààla gyọ́ọ nè pá Lívaì lọl Jèrúselẹ̀m kọ bà á gé bĩiná Jṍòn kọọ̀: “Oloò mée ẽ́?” 20 Náa beè gbààga boo gè aalá, tãa vó, a beè kọọ̀: “Nda níì Kráìst nì.” 21 Bà bĩináe kọọ̀: “Beè vó, é kọọ̀ oloò Èláíjà?” À aalá kọọ̀: “Nda níì ẹ̀ẹ̀ nì.” Bà bĩiná nágé kọọ̀, “É kọọ̀ oloò Neǹ Kọ́ọ̀ Bùlà Bàrì?” À aalá naa: “Ẽ́èe!” 22 Bà gbóó bĩináe kọọ̀: “Oloò mée ẽ́? Kọ́ nèi kọbé è láá tú ààla má gbò e ba beè lẹ̀ẹ̀lài. Kọ́ nú eo dúù nèi.” 23 À gbóó kọ́ nè va kọọ̀: “Ndaà nen ea di boo kpáà bàlà ól ea gé vee kọọ̀, ‘Naanii kọọ̀ èèlè Jìhóvà* á lèlà’ dì belí bé e neǹ kọ́ọ̀ bùlà Bàrì Àìzáíà beè kọ́ naaá.” 24 Pá Fárìsíì ní e ba beè lẹ̀ẹ̀là gbòí é. 25 Bà gbóó bĩináe kọọ̀: “Beè vó, éé ní ea náa ò tú gbò nen diilé múú e olo níì Kráìst àbèè Èláíjà àbèè Neǹ Kọ́ọ̀ Bùlà Bàrì nì ẽ?” 26 Jṍòn à aalá nè va kọọ̀: “Nda túùi diilé múú. Sõò à íe nen ea dìí zẹ̀ẹ̀ e nóo nyímàìe ló, 27 ea gé dú nvéè nda, vaá ním sim̀ tùlà ge taalá díí ea di boo a kpá kátọ.” 28 Gbò nuí beè naaá gbẹá Bẹ́tanì ea di sábá Jọ́dàn kĩée e Jṍòn géè tú gbò nen diilé múú gbẹá á.

29 Deé ea bẽene, à gbóó mòn Jíízọ̀s ea gé kyãà dúé ló. À gbóó kọọ̀: “Ẹbvii, neenii nvín naanà ból Bàrì ea é tú náàkyọ̀ lọl bàlà booí! 30 Níì nen em beè ló bel kilma lóá kọọ̀: ‘Neń ea gé dúm nvée a gyám sĩ́, boo béè kọọ̀ a beè dì besĩ́ì nda à kalá mèà.’ 31 Kọbèè nda ním beè nyimáe ló, sõò nú ea náa vaá m beè dù gé tú gbò nen diilé múú dú bé ea é náa pá Ízrẹẹ̀l nyímáe ló.” 32 Jṍòn beè si nágé neǹ ditõ̀ò kìlmàé ló kọọ̀: “M beè mòn nyómá káí ea meà belí kú-kuú kẽ ea aa káála vaá eláẹ́ boo. 33 Kọbèè nda ním beè nyimáe ló, sõò Neń ea beè lẹ̀ẹ̀làm kọ ḿ tú gbò nen diilé múú beè kọ́ nèm kọọ̀: ‘Kọ̀láá nen eo monì kọọ̀ nyómá káí élaẹ́ boo vaá zoogè ló gbẹá, ní ea dú nen ea é tú gbò nen diilé múú tení du ló nyómá káí é.’ 34 M mon vaá sí neǹ ditõ̀ò ló kọọ̀ není ní ea dú Sã́áná Bàrì e.”

35 Nagé, Jṍòn beè di élá ló bàà nen e bà ólò nyoonée nvée, 36 vaá tṍó e Jṍòn mon Jíízọ̀s ea gé kyãà tení, à gbóó kọọ̀: “Neenii nvín naanà ból Bàrìí!” 37 Tṍó e bàà nen e bà ólò nyoonée nvéeá dã́ tṍó ea gé kọ́ naa vó, bà gbóó nyoone nvéè Jíízọ̀s. 38 Tṍóá, Jíízọ̀s à gbóó ẹ̀à nvée vaá mòn va e bà gé biiàẹ́ nvée. À gbóó bĩiná va kọọ̀: “Éé ní eo gé gbĩ́i ẽ́?” Bà aalá nèe kọọ̀: “Rábaì (ea tõó dọ̀ “Neǹ Dòbá” tṍó e bà tab), ãèe ní eo ólò tõo ẽ́?” 39 À gbóó kọ́ nè va kọọ̀: “Dui mè ò é monii.” Bà gbóó nyoonée àà gé ẹ̀b kĩée ea ólò tõo vaá zọ̀ẹ tõó kĩá deeá. Tṍóá beè láá dú boo ténì tóm* ló èlà. 40 Enè nen ea beè dã́ nú e Jṍòn beè kọ̀a vaá bììa nvéè Jíízọ̀s dú Ándrù ea dú vígà Sáímòn Pítà. 41 A beè gbóó le-le àà sí ló a vígà Sáímòn gé kọ́ nèe kọọ̀: “Beele e mon Mèsáíà” (ea tõó dọ̀ “Kráìst” tṍó e bà tab). 42 À gbóó faaláẹ siimá ló Jíízọ̀s. Tṍó e Jíízọ̀s moníe, à gbóó kọ́ nèe kọọ̀: “Oloò Sáímòn nvín Jṍòn. Ò é kọlà Sífàs” (ea tõó dọ̀ “Pítà” tṍó e bà tab).

43 Deé ea bẽene e Jíízọ̀s géè gbĩ́ gè kil Gálilì, à gbóó mòn Fílìp vaá kọ́ nèe kọọ̀: “Dù gé nyooném nvée.” 44 Fílìp dú Bẹ̀tsáídà, ea dú boǹ bà Ándrù nè Pítà. 45 Fílìp à gbóó mòn Nàtániẹ̀l vaá kọ́ nèe kọọ̀: “Beele e mon Jíízọ̀s, nvín Jósẹ̀f, ea dú Názarẹ̀t, ea dú nen e Log Mózìs nè Gbò Kọ́ọ̀ Bùlà Bàrì beè kọ́ nu ea kil lóá.” 46 Sõò Nàtániẹ̀l à kọ́ nèe kọọ̀: “É kọọ̀ à íe lé nu ea é láá aa Názarẹ̀t?” Fílìp à gbóó kọ́ nèe kọọ̀: “Dù gé ẹ̀b.” 47 Jíízọ̀s à gbóó mòn Nàtániẹ̀l ea gé kyãà dù vaá kọ́ kìlmàé ló kọọ̀: “Ẹbvii, níì kà lèlà sĩ́ neǹ Ízrẹẹ̀l e tọ́ọ̀ kà kẹ̀lẹ̀ á géè m.” 48 Nàtániẹ̀l à gbóó bĩináe kọọ̀: “À náà và ò nyimám ló é?” Jíízọ̀s à aalá nèe kọọ̀: “Besĩ́ì Fílìp à kalá kolí ni tṍó eo beè di kè kẽè té fíìga, nda beè mòn ni.” 49 Nàtániẹ̀l à gbóó kọ́ nèe kọọ̀: “Neǹ Dòbá, oloò Sã́ánà Bàrì, olo ní eo dúù Méné pá Ízrẹẹ̀l ẹ.” 50 Jíízọ̀s à bĩináe kọọ̀: “É kọ ò zigà boo béè kọ m̀ kọ́ọ̀ nè ni kọọ̀ m beè mòn ní kè kẽè té fíìg? Ò é mon nú ea bọọ èl vóí.” 51 À gbóó kpáá kọ́ nèe kọọ̀: “M̀ lóò kà-kà bel nèi kọọ̀: Ò é monii káála ea é kuuà nè gbò nyómá tóm e bà gé aa káála dú ló Sã́áná nená vaá òòa kẽ àà.”