Lé Kpẹ̀a E Jṍòn Beè Emí
14 “Ó gá zigai kọọ̀ nyíéi á tã̀àgã̀. Iei zìgà mm̀ Bàrì, vaá ò íe naigé zìgà mm̀ nda. 2 Gã́bug ketõ̀ò ge tõo di mm̀ tọọ̀ ńdáà Tẹ̀. Be náa beè dì naa vó, m̀ gáẹ̀ beè kọ́ nèi, boo béè kọọ̀ m̀ é aà gé kpoogè dee ló ketõ̀ò ge tõo sẹ̀ẹ̀i. 3 Nagé, be m̀ aà gé kpoogè dee ló ketõ̀ò ge tõo sẹ̀ẹ̀i, m̀ é kpáá òòà dù gé túi nvea ló, kọbé boolo di naigé kĩée e nda é di. 4 Ò nyímài deè kĩée e nda gé aà kìl.”
5 Tómòs à gbóó kọ́ nèe kọọ̀: “Nen Ea Íéi, beele née nyímà kĩée eo gé kil. À é náà và è nyímá deè e?”
6 Jíízọ̀s à gbóó aalá nèe kọọ̀: “Nda ní em dúù èèlè nè kà-kà bel nè dùm ẽ. Tọ́ọ̀ nen náa é láá iná ló Tẹ̀a e bè náa téní dú ló nda. 7 Be o beè nyimai ló nda, ò gáẹ̀ beè nyimai ló ńdáà Tẹ̀ nagé. Lọl kátogóí ààmà, o nyímaíe ló vaá o monííe.”
8 Fílìp à gbóó kọ́ nèe kọọ̀: “Nen Ea Íéi, dòbá Tẹ̀a nèi, mè níá é gbõomáí ló.”
9 Jíízọ̀s à gbóó kọọ̀: “Fílìp, bã̀àna tṍó em ni tú gã́bug tṍó tõ̀òmàí lóí, ò gáà nyimá gé ló nda? Kọ̀láá nen ea ni mon nda a mon Tẹ̀a. Éé ní ea náa ò kọọ̀, ‘Dòbá Tẹ̀a nèi’ ẽ́? 10 Olo nóo zigà kọọ̀ nda íè lé gbaa ló kilma ló Tẹ̀a, vaá Tẹ̀a à ié lé gbaa ló kilma ló nda? Gbò bel e nda lóò, ním lóò boo nà lóó, sõò Tẹ̀ ea íe lé gbaa ló kìlmàḿ lóá gé sí a tóm tení dú ló nda. 11 Zigai kọọ̀ nda íè lé gbaa ló kilma ló Tẹ̀a, vaá Tẹ̀a à ié lé gbaa ló kilma ló nda. Be nóo é zigai boo béè vó, zigai boo béè gbò tóm e nda gé sí. 12 M̀ lóò kà-kà bel nèi kọọ̀, kọ̀láá nen ea kilsĩ́ gè iém zìgà m é sí nágé gbò tóm e nda gé síí, vaá à é sí tóm ea el níí, boo béè kọọ̀ m̀ é aà nyoone ńdáà Tẹ̀. 13 Nagé, m̀ é náa kọ̀láá kà nú eo bĩ́ìnàì boo nà bée, kọbé bà nveè ká ló Tẹ̀a tení dú ló a Sã́áná. 14 Kọ̀láá kà nú eo bĩ́ìnàì boo nà bée, m̀ é náa.
15 “Be ò vuleḿ mi, ò é sẹlẹi nà log. 16 M̀ é ban ńdáà Tẹ̀, vaá à é néi dõona kà neǹ nvèè bá* ea é díí ló dọ̀ọ̀mà dè-dè, 17 ea dú nyómá kà-kà bel, e pá bàlà boo náa é láá ié, boo béè kọọ̀ bà náa mònmà dẽe àbèè ge nyimá ló. Boolo nyímàì ló, boo béè kọ à dìí ló lee vaá à dìí m. 18 Nda ním é sọ́i bá gbẹẹ́ kẽ.* M̀ é oòa kẽ dúí ló. 19 Pọ́ì ńkem̀ tṍó aa ló kátogóí, pá bàlà boo náa é mon nám, sõò boolo é moním mi, boo béè kọ nda di dùm vaá boolo é dií dùm. 20 Tṍóá, ò é gbóó nyimai kọọ̀ nda íè kà lé gbaa ló kilma ló ńdáà Tẹ̀, vaá boolo ò iei kà lé gbaa ló kilmaí ló nda, vaá nda íè kà lé gbaa ló kilma ló boólo. 21 Kọ̀láá nen ea tú nà log vaá gbàntṍ ló ní ea vulèm ẽ́. Vaá ńdáà Tẹ̀ é vulè kọ̀láá nen ea vulèm, vaá nda é vulèe vaá tú nà lóó tẹlẹ bàlà kẽ nèe.”
22 Júdàs, (níì Júdàs Ìskáriọ̀t nì) à gbóó kọ́ nèe kọọ̀: “Nen Ea Íéi, éé ní ea náa váá ò é tú o lóó tẹlẹ bàlà kẽ nè beele, sõò nóo tẹ́lẹ̀ bàlà kẽ nè pá bàlà boo é?”
23 Jíízọ̀s à aalá nèe kọọ̀: “Kọ̀láá nen ea vulèm é gban tṍ ló bel em lóò, vaá ńdáà Tẹ̀ é vulèe, vaá ńdáà Tẹ̀ nè nda é dúé ló, vaá tõoé ló. 24 Kọ̀láá nen e bè náa vulèm náa é gban tṍ ló nà bel. Bel eo dã́ì e nda gé lóá níì ńda nì, sõò à aa bá Tẹ̀ ea beè lẹ̀ẹ̀làm.
25 “M̀ lóò gbò belí nèi tṍó em di-díí lóí. 26 Sõò nyómá káí, ea dú neǹ nvèè bá, e ńdáà Tẹ̀ é lẹẹlà boo nà bée é nóòmài dénè nu vaá kẽeí nyíe kọ̀láá kà nú em beè kọ́ nèi. 27 Nda túù fẹ́ẹ́-fẹẹ̀ ló gbẹẹí ló. M̀ neèi fẹ́ẹ́-fẹẹ̀ ló ea aa bá nda. Ním neè belí bé e pá bàlà boo ólò nè naa. Ó gá zigai kọọ̀ nyíéi á tã̀àgã̀ àbèè ge ié kéné ló pọ̀. 28 O beè dãi kọ nda beè kọ́ nèi kọọ̀, ‘M̀ é aà vaá m̀ é beè òòa kẽ dúí ló.’ Be o beè vuleḿ mi, nyíéi gáẹ̀ ẹẹ kọ m̀ gé aà nyoone nà Tẹ̀, boo béè kọọ̀ Tẹ̀a bọọ èl nda. 29 Kátogóá, m tú tṍó gbẹẹ́ sĩ́ kọ́ nèi besĩ́ à kálá naaá, kọbé tṍó ea é nááá, ò zigai. 30 Ním é zọ nài loá ná gbele tõ̀ò bel, boo béè kọọ̀ nen ea gé bẹl bàlà booí gé dú, vaá náa íém kói ló. 31 Sõò kọbé pá bàlà boo nyímá kọ nda vulè Tẹ̀a, m̀ é náa gbõ̀ònà nú ea beè kọ ḿ naa. Aalíí boo, mè èé aa kĩí àà.