Lé Kpẹ̀a E Jṍòn Beè Emí
5 Tṍó e níí nááá lọ̀l, Jíízọ̀s beè gbóó àà kil Jèrúselẹ̀m tṍó e sẹ̀lẹ̀nù pá Júù ni lée. 2 À íe bànà e múú ólò di m e bà ólò kolíe Bẹ̀tzétà mm̀ dém bel Híbrù, ea di ló gbànsĩ́ ea kọlà Gbànsĩ́ Naanà Ból ea di Jèrúselẹ̀m, vaá à íe vòò kà ke kọ̀ọ̀lọ̀. 3 Gã́bug gbo e kpáló va zọ, gbò gímá dẽe, gbò kọ̀và, nè gbò e bá nè tọ́ va ọọ beè olòó ma ke kọ̀ọ̀lọ̀a. 4 —— 5 Sõò ene kà gbálà ea ni tú 38 gbáá tõ̀òma kèbá zọ̀ló beè di kĩá. 6 Tṍó e Jíízọ̀s mon kọọ̀ gbálàí di ma kĩá vaá nyimá kọọ̀ a tú gã́bug gbáá tõ̀òma kèbá zọ̀ló, à gbóó bĩináe kọọ̀: “É kọ ò gbĩ́ì ge boá?” 7 Gbálà e kpálóe gé zọá à aalá nèe kọọ̀: “Tẹ́ẹ̀, ním íè tọ́ọ̀ nen ea é túm tẹlẹ mm̀ múúí tṍó ea gé bũugã̀. Tṍó em gbĩ́ gè bã m, dõona nèn ólò gyààm sĩ́ kẽ.” 8 Jíízọ̀s à gbóó kọ́ nèe kọọ̀: “Aa boo, tú o búl, vaá ò kyãà.” 9 Kpáló gbálàa à gbóó valí tẽ̀ènè tṍóá. À gbóó tú a búl vaá dààmà togó gè kyã̀à.
Deeá beè dú Deè Bõ̀séi. 10 Pá Júù à gbóó kọ́ nè gbálà e Jíízọ̀s bóeá kọọ̀: “Nieíì Deè Bõ̀séi, vaá log náa ténmá kọ ó faalá búl.” 11 Sõò à kọ́ nè va kọọ̀: “Nen ea beè bóm ã́, ní ea beè kọ́ nèm kọọ̀, ‘Tú o búl vaá ò kyãà’ ẽ.” 12 Bà gbóó bĩináe kọọ̀: “Mée ní ea beè kọ́ nè ni kọ ó ‘tú o búl vaá ò kyãà’ ẽ?” 13 Sõò gbálà e Jíízọ̀s beè bòa náa beè nyimá ló nen ea beè bóe, boo béè kọọ̀ Jíízọ̀s beè sọọá bã gbàà gã́bug gbò e ba beè di kĩá.
14 Tṍó e nuí nááá lọ̀l, Jíízọ̀s beè mònie gbẹá tọọ̀ káíá vaá kọ́ nèe kọọ̀: “Ẹ̀b! Kpáló ni a válí, ó gá si ná pọ́lọ́, kọbé nú ea dú pọ́lọ́ èl vó náa nááa ní ló.” 15 Gbálàa à gbóó àà gé kọ́ nè pá Júù kọọ̀ Jíízọ̀s ní ea beè boèe é. 16 Boo béè vó, pá Júù à gbóó dààmà togó gè biigè ló Jíízọ̀s, boo béè kọ à náa gbò nuí Deè Bõ̀séi. 17 Sõò a beè kọ́ nè va kọọ̀: “Ńdáà Tẹ̀ dì ea gé sí tóm dọ̀ kátogóí, vaá nda dì em gé sí nágé tóm.” 18 Boo béè vó, pá Júù à gbóó kpáá gbĩ́ kọ̀láá sĩ́deè ge fẹẹmáe boo béè kọọ̀ baala túúmá kọ à dọ log Deè Bõ̀séi, nè ge kọọ̀ à náa nágé kọọ̀ gbò nen á bugi togó kọọ̀ Bàrì nè ẹ̀ẹ̀ kunàè ló, boo béè kọ à kọ́ọ̀ Bàrì dúè a Tẹ̀.
19 Vó à naa, Jíízọ̀s à gbóó aalá nè va kọọ̀: “M̀ lóò kà-kà bel nèi kọọ̀ nda Sã́áná ním é láá naa tọ́ọ̀ kà nú boo nà lóó, sõò áá nú em monì kọọ̀ Tẹ̀a gé náa ní e nda ólò naa ẽ́. Boo béè kọọ̀ kọ̀láá kà nú e Ẹlẹ náa, ní e nda ólò naa nagé é. 20 Tẹ̀a palàge vùlè a Sã́áná vaá zogèe kọ̀láá kà nú e Ẹlẹ ólò naa, vaá à é do bá tóm ea palàgé bọọ èl níí nèe kọbé à palàge bọọí ló. 21 Dì belí bé e Tẹ̀a ólò kẽee gbò e ba beè ù vaá naa kọ bà á di dùm naaá, níà bé e nda é náa kọọ̀ kọ̀láá nen ea taním á di dùm naa ẽ́. 22 Tẹ̀a náa é béélá bel ló tọ́ọ̀ nen, boo béè kọọ̀ a tú tóm gè beelá bel nvee bá a Sã́áná, 23 kọbé kọ̀láá nen nveè ka ló Sã́ánáá belí bé e bà nveè ka ló Tẹ̀a naa. Kọ̀láá nen e bè náa nveè ka ló Sã́ánáá náa nveè ka ló Tẹ̀ ea beè lẹ̀ẹ̀làẹ. 24 M̀ lóò kà-kà bel nèi kọọ̀ kọ̀láá nen ea dã́ gbò bel em gé kọ́ nèií, vaá ziga ló nen ea beè lẹ̀ẹ̀làm é íe dùm e bè náa tá. Bà náa é béélá náe bel ló, sõò à é bélí nen ea kẽeà aa kemà ú vaá tõó dùm.
25 “M̀ lóò kà-kà bel nèi kọọ̀ tṍó gé dú, vaá a lée, tṍó e gbò e ba beè ù é dã́ moǹ Sã́áná Bàrì, vaá gbò e ba beè pãanée tṍ ló é íe dùm. 26 Boo béè kọọ̀ dì belí bé e Tẹ̀a íe dùm ea dìé m naaá, níà bé ea ni náa nagé kọọ̀ Sã́áná nená á ié dùm ea dìé m naa ẽ́. 27 Vaá a née kpóó gè beemá bel, boo béè kọọ̀ ẹlẹ ní ea dú Sã́áná nená ẽ́. 28 Níí á gá bọọí ló, boo béè kọọ̀ tṍó gé dú e kọ̀láá gbò e bà di mm̀ bànà ú kẽ̀èa boo é dã́e mon 29 vaá aa m. Gbò e ba beè naa lé é kẽeà aa kemà ú vaá ié dùm, sõò gbò e ba beè naa nú ea dú pọ́lọ́ é kẽeà aa kemà ú bã ba bèèla bel. 30 Ním é láá naa tọ́ọ̀ kà nu boo nà lóó. M̀ ólò beelá bel ló gbò nen dẹ̀ẹ̀a boo nú e Tẹ̀a beè kọ́ nèm. M̀ ólò beelá bel mm̀ lé lab dògò, boo béè kọ ním ólò naa nú ea léémám, sõò nú ea léémá Tẹ̀ ea beè lẹ̀ẹ̀làm ã́, ní em ólò naa ẽ́.
31 Beè áá nda kọ́ nú ea kil ló nà bá nè gbò nen, bà náa é ziga nú em kọ́ọ̀. 32 À íe dõona nèn ea ólò kọ́ nu ea kilím ló nè gbò nen, vaá m̀ nyímà kọọ̀ nú ea kọ́ kìlmàḿ ló dú kà-kà. 33 O beè lẹẹlai gbò nen siimaí ló Jṍòn, vaá à ló kà-kà bel ea kilím ló nè va. 34 Náa kal ló béè vó, ním íè bíi ló nen ea é kọ́ nu ea kilím ló nè gbò nen, sõò m̀ lóò gbò belí nèi kọbé ò íei dùm. 35 Gbálàa beè dì belí té sã́ ea bẹ́ vaá ẹẹlẹ̀ kẽ. A beè tànii gè ṍ kààgà gbẹá kè ẹ́ẹ́ dee ea aàẹ́ ló. Sõò tàní náa beè bĩéí m. 36 M̀ íè nú ea é sí neǹ ditõ̀ò kìlmàḿ ló nè gbò nen ea bọọ èl ní e Jṍòn beè sí kìlmàḿ ló, boo béè kọọ̀ tóm e ńdáà Tẹ̀ beè nèm kọ ḿ sì ní em gé síá, vaá tómí sí neǹ ditõ̀ò kọọ̀ Tẹ̀a ní ea beè lẹ̀ẹ̀làm ẽ́. 37 Vaá Tẹ̀ ea beè lẹ̀ẹ̀làm a ló bel ea kilím ló. Ò gáà monííe àbèè ge dãíe mon tọ́ọ̀ dee, 38 vaá a mon bel á géi m, boo béè kọọ̀ nóò zigàì ló nen ea beè lẹ̀ẹ̀là.
39 Ò dì eo gé bugii Kpá Káí boo béè kọ ò doomàì kọọ̀ ò é íei dùm e bè náa tá tení dú ló vó, vaá Kpá Káíá ní ea sí neǹ ditõ̀ò kilma ló nda ẹ́. 40 Vaá nóo gbĩ́ì ge dum mí ló kọbé ò íei dùm. 41 Ním ólò tú ka ea aa bá nen, 42 sõò m̀ palàge nyimá kọọ̀ nóo vulèì Bàrì. 43 Nda beè dú boo béè ńdáà Tẹ̀, sõò nóo túm̀ mi. Be à íe nen ea dú boo áá ńlẹ́ẹ̀ béè, ò é túi nakà nen. 44 Éé ní ea é gbóó láá naa kọ ó zigai nú em kọ́ọ̀, boo tṍó eo gé túi ka ea aa bá ene, vaá nóo gbĩ́ì ka ea aa bá áá kà-kà Bàrì e? 45 Ó gá iei bùlà kọọ̀ m̀ é kọ́ nè Tẹ̀a kọ ò síì pọ́lọ́, boo béè kọọ̀ nú e Mózìs eo dẹlẹ̀ì nyíé booá beè emí ní ea kọ́ ò síì pọ́lọ́ ẹ́. 46 Mm̀ kà-kà, be o beè zigai ló Mózìs, ò é zigai nú ea kil ló nda, boo béè kọọ̀ a beè emí nú ea kilím ló. 47 Sõò be nóo zigàì ló nú ea beè emí, éé ní ea é náa kọ ó zigai ló nú e nda kọ́ọ̀ ẹ?”