Tóm Gbò E Jíízọ̀s Beè Lẹ̀ẹ̀là
6 Mm̀ gbò deeá, tṍó e gbò nyòòne nvée Kráìst dì e bà gé bọọ dọ ló, pá Júù e bà ólò ló Gríìk beè gbóó dààmà togó nè kpẹ̀a kilma ló pá Júù e bà ólò ló Híbrù, boo béè kọ bà ẹb ba gbò vaà tãa tẹlẹ kẽ tṍó e bà gé dõo nú e bà ólò dõó buù deeá. 2 Vó à naa, Òb Nè Bàà Nená à gbóó kolí dénè gbò nyòòne nvéeá bõonè vaá kọ́ nèva kọọ̀: “Náa lelà kọ beele é aa ló gè ló moǹ bel Bàrì gé dõo gyã́á. 3 Vó à naa, e pá vígà, sai àlàbà kà gbò gbálà e bà íe lé bée e bà dìí zẹ̀ẹ̀, e bà nyímá nu vaá nyómá káí Bàrì à dì vá ló, kọbé è tú va sẹlẹ́ togó nakà tómí. 4 Sõò beele é kilsĩ́ gè tã̀àgã ló Bàrì vaá noomà moǹ bel Bàrì.” 5 Bel e bà ló beè leemá dénè gbòa, vaá ba beè gbóó sà Stívìn, ea dú nen ea ié zìgà vaá nyómá káí Bàrì à dìé ló, bií ló Fílìp, Prọ́korọ̀s, Nàìkénò, Táímòn, Pámenàs, nè Nìkòléọ̀s ea dú Ántiọ̀k, ea ólò fã̀ Bàrì pá Júù. 6 Bà gbóó faalá va siimá ló gbò e Jíízọ̀s lẹẹlàa. Tṍó e ba ni tãagã̀ va ló Bàrì boo lọ̀l, bà gbóó dẹlẹ́ va bá ból.
7 Lọl tṍóá ààmà, moǹ bel Bàrì beè gbóó kilsĩ́ gè zààlà, naa ní e gã́bug gbò nyòòne nvée e bà di Jèrúselẹ̀m beè kpáá palàge bọọ dọ ló, vaá gã́bug gbò vààla gyọ́ọ beè gbóó dààmà togó gè ié zìgà mm̀ Jíízọ̀s.
8 Boo béè kọ Bàrì beè di ló Stívìn, a beè nèe kpóó ea síímá gã́bug tóm dũ̀ùnè vaá naagi nu bọ̀ọ̀ló gbẹá zẹ̀ẹ̀ gbòa. 9 Sõò, sìgà gbò e bà ólò sí Bõ̀ònaló Fã̀ e bà kólíe Bõ̀ònaló Fã̀ Gbò E Bà Di Pọ́ì, bií ló sìgà gbò e bà aa Sàìrínì, Àlẹ̀kzándrìà, Sìlísìà, nè Ésìà beè gbóó dù gé zọ̀ Stívìn tàlà bel. 10 Sõò bà náa beè láá èlie bá boo béè kọọ̀ nyìmànù ea íe nè nyómá káí ea beè dìé ló beè naa kọ á ló bel èl va bá. 11 Tṍóá, ba beè gbóó gũá gé kọ́ nè gbò nen kọ bà á kọọ̀: “E beè dã́ tṍó ea gé ló bel ea zógè kọ à on Bàrì nè Mózìs.” 12 Bà gbóó ló bel ea nveè súng gbò nen, bií ló gbò kàneǹ pá Júù nè gbò émì kpá. Bà gbóó aa boo vaá tú bá kpóó siimáe tṍó e náa beè nè dẽe, vaá faaláẹ kilma Pọ̀b Tọ Bèèlaà Pá Júù. 13 Bà gbóó tú gbò e bà é kpọ́ẹ kyáá bel ló domá. Gbò e bà dómáá beè gbóó kọọ̀: “Gbálàí gáà kùb ge ló bel uú boo tọọ̀ káíí nè Log Mózìs. 14 Dì belí nu dòòmà bá, e beè dã́ tṍó ea kọ́ọ̀ Jíízọ̀s ea dú Názarẹ̀t é kṹúná tọọ̀ káíí vaá nyaaná nàànù kunukẽ̀ e Mózìs beè gbẹẹ́ kẽ sẹ̀ẹ̀i.”
15 Boo tṍó e dénè gbò e ba di Pọ̀b Tọ Bèèlaá gé ẹbvíe, bà gbóó mòn kọọ̀ sĩ́e bélí sĩ́ nyómá tóm.