Lé Kpẹ̀a E Máátìù Beè Emí

24 Tṍó e Jíízọ̀s géè aa boo beè tọọ̀ káíá àà, gbò e bà ólò nyoonée nvée beè gbóó dúé ló, vaá dòbá gbò tọ ea di boo beè tọọ̀ káíá nèe. 2 À gbóó kọ́ nè va kọọ̀: “Ò monìì gé dénè tọí? M̀ lóò kà-kà bel nèi kọọ̀, tọ́ọ̀ kà kpò dem náa é sígá èla e bà náa é kúmí uú kẽ.”

3 Boo tṍó ea di ĩ́ìtẽ́ boo Gù Ólìv, pá a gbò nyòòne nvée beè gbóó dúé ló kĩée e áá ẹ̀ẹ̀ dì, vaá kọ́ nèe kọọ̀: “Kọ́ nèi, mó tṍó ní e gbò nuí é nááá ẽ́, vaá éé ní ea dú kpíi ea é zógè tṍó eo ni ooà dù nè kùbmà nvéè bàlà booí é?”

4 Jíízọ̀s à kọ́ nè va kọọ̀: “Ọẹi dẽe kọbé tọ́ọ̀ nen náa dagẹ̀i, 5 boo béè kọọ̀ gã́bug nen é dú boo ńdáà béè vaá kọọ̀ ‘nda ní em dúù Kráìst e,’ vaá bà é dagẹ̀ gã́bug nen. 6 Ò é dã́i kòvà bé gím ea aa kuló nè kpẹ̀a bé gím ea aa kpã́á. Sõò pọ̀ á gá siíi, boo béè kọọ̀ gbò nuí é íè ge naaá, sõò à gáà lee tṍó e kùbmà é dú.

7 “Boo béè kọọ̀ dó é bé dó, vaá boǹ méné bé boǹ méné, vaá kíi nè zùgà kunukẽ̀ é nááá kele-kele ketõ̀ò. 8 Dénè nuí dú dààà togó mòn tã̀àgã̀, di belí tṍó e gbàà nvín zọ pábia.

9 “Gbò nen é túi nvee bá gbò e bà é bíìgèi ló vaá fẹ́i, vaá dénè dó é ọ́bvíi boo béè ńdáà bée. 10 Tṍóá, gã́bug nen é dọ ààḿ nvée. Bà é téní ló ene nvee bá ọ́b vaá ọbví ene. 11 Gã́bug gbò e bà kpọ́ kyáá kọọ̀ baalaà gbò kọ́ọ̀ bùlà Bàrì é di, vaá bà é dagẹ̀ gã́bug nen. 12 Boo béè kọọ̀ pọ́lọ́ é kpáá palàge zoogá, vulè e gã́bug nen beè ié é ọb tọ́ọ. 13 Sõò neń ea ĩimà tẹlẹ ke kùbmà ní ea é duuà ẹ. 14 Bà é vee lé kpẹ̀a ea kil ló Boǹ Méné Bàrì inmá dénè ketõ̀ò ea di bàlà booí, naa ní ea é sí neǹ ditõ̀ò nè dénè dó. Tṍóá, kùbmà é gbóó bã ló bàlà booí.

15 “Vó à naa, tṍó eo monìì nuù kẹ́ẹ ea ólò kyọ̀sĩ́ nu, ea élá ketõ̀ò káíá di belí bé e neǹ kọ́ọ̀ bùlà Bàrì Dániẹ̀l beè kọ́ naaá (neń ea gé bugi á tú tàvẹ̀nù bùgmà). 16 Tṍó ea nááá naa vó, gbò e bà di Jùdíà á gbóó dààmà togó gè teelá kil deè boo gù. 17 Neń ea di boo a tọ á gá dọ̀ na kẽ kọ à é bãè tọ gé túè nu, 18 vaá nen ea di bàlà ól á gá si ná be gé tú a pọ̀b kọ̀là ló. 19 Pọ́lọ́ múú kyáá á di ló gbò e nvín di gbàà nè gbò e bà gé ne má nvín mm̀ gbò tṍóá! 20 Kilíí sĩ́ gè tãagãi ló Bàrì kọọ̀ tṍó eo é téelai á gá dú tṍó tọ́ọ àbèè Deè Bõ̀séi, 21 boo béè kọọ̀ pọ̀b kpo tã̀àgã̀ ea é nááá tṍóá gáà naaá tã́gíní tṍó e bàlà booí beè dààà togó, vaá náa é kpáá naaá tṍó ea ni nááá lọ̀l. 22 Mm̀ kà-kà, beè Bàrì náa ful gã́bug deeá naamá ńkpulu, tọ́ọ̀ nen náa é duuà. Sõò boo béè gbò ea beè sàa, à é ful gã́bug deeá naamá ńkpulu.

23 “Tṍóá, beè nen kọ́ nèi kọọ̀: ‘Ẹbvii! Kráìst di kĩí,’ àbèè kọọ̀, ‘À di kĩí-ìla!’ ó gá zigai. 24 Boo béè kọọ̀ gbò e bà kpọ́ kyáá kọọ̀ baalaà Kráìst nè gbò e bà kpọ́ kyáá kọọ̀ baalaà gbò kọ́ọ̀ bùlà Bàrì é beè dù, vaá bà é sí gbele-gbele tóm dũ̀ùnè boo béè ge kẹlẹ gbò nen. Vaá be à válí, bà é kẹlẹ bã̀àna gbò e Bàrì beè sà. 25 Ẹbvii! M̀ túù tṍó gbẹẹ́ sĩ́ ãanéi. 26 Vó à naa, beè gbò nen kọ́ nèi kọọ̀, ‘Ẹbvii! À di boo bàlà ól,’ ó gá sii; ‘Ẹbvii! À di mm̀ àn,’ ó gá zigai. 27 Boo béè kọọ̀, dì belí bé e éném dee ólò naa éném aa deè báà nàànì kil dọ̀ọ̀mà tẽ́ nàànì naaá, níà bé ea é meà naa tṍó e Sã́áná nen é ooà dù* e. 28 Kọ̀láá kĩée e íí nu dì, ní e gò* ólò bõoná ẽ́.

29 “Áá bé e tã̀àgã̀a ni nááá mm̀ gbò tṍóá lọ̀l, nàànì é gbóó kuu gín, ẽ́ náa é ne nà a ẹ́ẹ́ dee, gyã́à káála é kalà aa sĩ́ dee, vaá gbò nu ea di sĩ́ káála é zugà. 30 Tṍóá, kpíi ea zógè kọọ̀ Sã́áná nen é gé dù é gbóó sila sĩ́ káála, vaá dénè tẽ́gã ea di boo kunukẽ̀í é gbóó bã̀àgã̀. Bà é mon Sã́áná nená ea di boo bù dee ea gé dú, vaá à é fáálá kpóó nè ka domá. 31 À é lẹẹlà pá a gbò nyómá tóm kọ bà á uuli agẹ moǹ koò, vaá bà é bṍònè ló gbò ea beè sà lọl ténì gá ea di ló bàlà booí, lọl kĩée e káála daaà togó àà tẹlẹ kĩée ea íná elá.

32 “Noi nu lọlíí ló té fíìg: Kọ̀láá tṍó eo monìì kọ a gbónó a tẹg vaá kpáá sí pà sãa, ò ólò gbóó nyimai kọọ̀ tṍó e nu ólò dùm a íná kuló. 33 Mm̀ tẽ̀ènè sĩ́deèá, tṍó eo monìì dénè gbò nuí, gbóó nyimai kọọ̀ Sã́áná nená a íná kuló. 34 Nda lóò kà-kà bel nèi kọọ̀, nakà kúúlíí náa é téní tà tṍó e dénè nuí é nááá. 35 Káála nè kunukẽ̀ é téní tà, sõò gbò bel e nda lóò é di dọ̀ọ̀mà dè-dè.

36 “Kilma ló deeá nè tṍóá, tọ́ọ̀ nen náa nyímá, bã̀àna gbò nyómá tóm e bà di káála àbèè nda Sã́áná, sõò áá ńdáà Tẹ̀ ní ea nyímá ẽ́. 37 Boo béè kọọ̀, dì belí bé e deè Nóà beè dì naaá, níà bé ea é meà naa tṍó e nda Sã́áná nen é ooà dù* e. 38 Boo béè kọọ̀ besĩ́ tù múúá à kalá dù, gbò nen géè dè vaá õ̀, gbò gbálà géè ilí va, vaá gbò bia íá dóm, dọ̀ọ̀mà deé e Nóà bã́ mm̀ faàa. 39 Bà náa beè nvèè kpíi ló dọ̀ọ̀mà tṍó e múúá dú vaá tú dénè ọ̀và lọ̀l. Níà bé ea é meà nàgé naa tṍó e nda Sã́áná nen é ooà dù* e. 40 Tṍóá, bàà kà págbálà é dí boo bàlà ól, vaá Bàrì tú enè nen gbẹẹ enè nen. 41 Bàà kà pábia é di e bà gé gbẽ nu, vaá Bàrì tú enè nen gbẹẹ enè nen. 42 Vó à naa, kilíí sĩ́ gè kuai dẽe ló boo béè kọọ̀ nóo nyímàì kà lèlà dee e Neń Ea Íéi é dú.

43 “Nyimai kọọ̀: Beè tẹ̀ íè tọ beè nyimá kà lèlà tṍó e neǹ zib é dú bílá dee, à gáẹ̀ beè kilsĩ́ gè kùà dẽe ló kọbé neǹ zib náa baa a tọ bã m. 44 Vó à naa, boólo di nai gé kpènà ló boo béè kọọ̀ Sã́áná nen é dú kà lèlà tṍó e nóo beè ẹbmai dẽe.

45 “Mée ní ea dú gyóòlo ea bọ́ló dẹ̀lẹ̀ nyíé boo vaá nyimá nu, e a tẹ̀ tọ beè íe bá ló kọ á tõó togó pá a gyóòlo vaá nè va gyã́á kà lèlà tṍó ea bọ́ló é? 46 Nyíè gyóòloá á ẹẹ be a tẹ̀ tọ dú vaá mòn kọ à gé náa vó! 47 M̀ lóò kà-kà bel nèi kọọ̀, à é túe sẹlẹ́ togó dénè a gyọ́.

48 “Sõò beè gyóòloá dú pọ́lọ́ vaá gbóó kọ́ mm̀ a nyíe kọọ̀, ‘Ńdáà tẹ̀ tọ pee tṍó,’ 49 vaá dààmà togó gè bòm nagbò gyóòloá, vaá zọ̀ gbò õ̀ míí tẽeá dẽe dé nu vaá ṍ míí, 50 tẹ̀ tọọ̀ gyóòloá é dú dee nè tṍó e náa beè nè dẽe. 51 À é née kà agẹ bá kpọ̀té vaá túe sẹlẹ́ kĩée e gbò bààsĩ́ dì. Kĩá ní ea é tõo tò vaá taa dáa ẹ́.