59 NU GÈ NÒ
Òó Láá Bọ́ló Dẹ̀lẹ̀ Nyíé Boo Kèbá Bíígá Ló
Pọ́ì ńkem̀ tṍó àla, dénè gbò e bà gé nyoone nvéè Kráìst é kpee sĩ́ ló bíígá ló nè nàà uú boo. É kọọ̀ à bọ́ló kọ níá á siimài pọ̀?
1. Éé ní ea náa vaá èé ẹbmà dẽe kọọ̀ gbò nen é bíìgèi ló é?
Kpá Káí kọ́ọ̀: “Bàé bíìgè ló kọ̀láá nen ea gbĩ́ gè zọ̀ Kráìst Jíízọ̀s gbaaá ló vaá fã̀ Bàrì mm̀ a dùm.” (2 Tímotì 3:12) Ba beè biigè ló Jíízọ̀s boo béè kọọ̀ náa beè dũunà bàlà boò Sétàn. Beele née dṹùnà nàgé bàlà booí, vóà naa, náa bọọí ló tṍó e gbò e bà gé bẹl nè gbò bõ̀ònaló fã̀ bíìgèi ló.—Jọ́ọ̀n 15:18, 19.
2. Mósĩ́ deè ní eé láá kpoogá dee ló nyòòmà bíígá ló é?
À dú bíi kọ é kpáá palàge dẹlẹ nyíé boo Jìhóvà kátogóí. Noo tṍó nyòòmà ge tã̀àgã ló Bàrì nè ge bugi Kpá Káí buù dee. Olòó sí nònù. Ge naa gbò nuí é náa kọ ó ié kói gè ĩ̀ìmà kọ̀láá kà bíígá ló eo kpeè sĩ́ ló, kọbèè à gá náa vaá pá bọọ tọ ní e bà gé bíìgè ni ló é. Neǹ tóm Pọ́ọ̀l e ba beè bọ̀ọ̀gẹ̀ biigèe ló beè emí kọọ̀: “Dõò [‘Jìhóvà,’ NW] dú nà neǹ nvèè bá, pọ̀ náa é síím.”—Híbrù 13:6.
Èé láá ié nágé agẹló tení dú ló gè olòó kọ́ kpẹ̀a. Ge kọ́ kpẹ̀a ólò noomài kọ é dẹlẹ nyíé boo Jìhóvà nè ge bé èlbá gè siiá pọ̀ ló nen. (Próvẹẹ̀b 29:25) Be ò íe agẹló gè kọọmá kpẹ̀a kátogóí, òé palàge íe agẹló gè olòó kọ́ kpẹ̀a bã̀àna tṍó e kpóó ea gé bẹl kub bẹẹ tóm.—1 Tẹ̀sàlónaikà 2:2.
3. Mósĩ́ deè ní e gè ĩ̀ìmà bíígá ló ólò dọ̀ bélè nèi ẽ́?
À dú kà kà kọọ̀ bíígá ló náa ólò kpèí ló, sõò be è láá ĩ̀ìmà bíígá ló, àé agẹlẹ ló bẹẹ zìgà. Àé náa kọ é kpáá tõo bã ló Jìhóvà boo béè kọọ̀ è monì bé ea nveè bá nèi naa tṍó ea beè tõoí ló kọọ̀ née íè nà kói. (Bugi Jém̀z 1:2-4.) Nyíè Jìhóvà ólò bììlà tṍó e gé mon tã̀àgã̀, sõò nyíée ólò ẹẹ tṍó e láà ĩ̀ìmà. Kpá Káí kọ́ọ̀: “Tṍó eo monìì tã̀àgã̀ boo lé nu eo beè naanii vaá ò ĩimai, níé é léémá Bàrì.” (1 Pítà 2:20) Kpẽ́ e Jìhóvà é ne kọ̀láá nen ea ĩimà tẹlẹ kùbmà dú dùm e bè náa tá mm̀ bàlà boo e dénè nen é fã Jìhóvà vaá tọ́ọ̀ nen náa é bíìgènà va ló.—Máátìù 24:13.
KPÁÁ NÓ BỌ̀Ọ̀VẸ̀
Nyimá nú ea náa vaá àé láá valí kọ é kilsĩ́ gè bọ́ló dẹ̀lẹ̀ nyíé boo kilma ló Jìhóvà tṍó e gbò nen bíìgèi ló nè kpẽ́ e Jìhóvà é néi.
4. Òó láá ĩ̀ìmà bíígá ló ea aa bá pá bọọ tọ
Jíízọ̀s beè nyimá kọọ̀ sìgà pá bẹẹ tọ náa é nveè sãa kúm bẹẹ béèlàfùl ge fã̀ Jìhóvà. Bugi Máátìù 10:34-36, vaá ò gbóó aalai nakà bíbví:
Éé ní e pá tọ é láá naa tṍó e enè nen ea dṹùnà va bééláfùl ge fã̀ Jìhóvà ẹ?
Ge mòn nu dòòmà bá ea zógè níí, bìlà VÍDIÒÍ, vaá ò gbóó aalai bíb ea nyoone.
Éé ní eo é náa beè o vígà àbèè o kóò gbĩ́ gè òòmà ni lọl ló gè fã̀ Jìhóvà ẹ?
Bugi Psalm 27:10 nè Máàk 10:29, 30. Tṍó eo ni bugi buù kà dọ̀ Kpá Káíí lọ̀l, ò gbóó aalai nakà bíbví:
Mósĩ́ deè ní e nakà zìgànùí é nveè bá nè ni beè pá bọọ tọ àbèè pá o kóò bíìgè ni ló é?
5. Kilsĩ́ gè fã̀ Jìhóvà kèbá bíígá ló
À ólò bĩiná agẹló gè láá kilsĩ́ gè fã̀ Jìhóvà tṍó e gbò nen gbĩ́ gè òòmài lọl ló gè naa vó. Bìlà VÍDIÒÍ, vaá ò gbóó aalai bíb ea nyoone.
Mósĩ́ deè ní e gbò nu dòòmà bá ea di mm̀ vídiòá síè ni kpóó ló é?
Bugi Tóm 5:27-29 nè Híbrù 10:24, 25. Tṍó eo ni bugi buù kà dọ̀ Kpá Káíí lọ̀l, ò gbóó aalai nakà bíbví:
Éé ní ea náa vaá à dú bíi kọ é kilsĩ́ gè fã̀ Jìhóvà kọbèè bà kọ é gá kọná kpẹ̀a àbèè ge siná nònù ẽ?
6. Jìhóvà é nveè bá nè ni kọ ó láá ĩ̀ìmà
Gbò Neǹ Ditõ̀ò Jìhóvà e bà aa kele-kele dó, gbò pá nvín, nè gbò kànen, a kilsĩ́ gè fã̀ Jìhóvà mm̀ bọ́ọ̀ló dẹ̀lẹ̀ nyíé boo bã̀àna tṍó e bà bíìgè va ló. Kọbé ò nyímá nú ea beè nvèè bá nèva, bìlà VÍDIÒÍ, vaá ò gbóó aalai bíb ea nyoone.
Éé ní ea beè nvèè bá nè pá vígà mm̀ vídiòá kọ bàá láá ĩ̀ìmà ẽ?
Bugi Róm̀ 8:35, 37-39 nè Fílipaì 4:13. Tṍó eo ni bugi buù kà dọ̀ Kpá Káíí lọ̀l, ò gbóó aalai nakà bíbví:
Mósĩ́ deè ní e dọ̀ Kpá Káíí náa kọ ó àgala boo kọọ̀ òó láá ĩ̀ìmà kọ̀láá íb tã̀àgã̀ ẽ?
Bugi Máátìù 5:10-12, vaá ò gbóó aalai nakà bíbví:
Éé ní ea náa vaá òó láá kilsĩ́ gè ié ẹ́ẹ́ nyíe kèbá bíígá ló é?
Gã́bug gãà gbò níí Jìhóvà a láá ĩ̀ìmà bíígá ló. Olo é láá naa nagé vó!
SÌGÀ GBÒ KỌ́Ọ̀: “Nda ním é láá ĩ̀ìmà bíígá ló.”
Mókà gbò dọ̀ Kpá Káí ní ea é láá nvèè bá nèva kọ bàá ié agẹló é?
NÚ E NI NÓ
Jìhóvà ólò nvèè ka ló bẹẹ pììgà ge sí tóm nèe bã̀àna tṍó e bà gé bíìgèi ló. Èé láá ĩ̀ìmà tení dú ló a nvèè bá!
Ge Òòa Boo
Éé ní ea náa vaá à bọ́ló kọọ̀ gbò e bà gé nyoone nvéè Kráìst á ẹ̀bmà dẽe kọọ̀ gbò nen é bíìgèè va ló é?
Éé ní eo é láá naa kátogóí mm̀ ge kpoogá dee ló nyòòmà bíígá ló é?
Éé ní ea é láá nvèè bá nè ni kọ ó àgala boo kọọ̀ òó láá kilsĩ́ gè sí tóm nè Jìhóvà kèbá kọ̀láá kà ẹ̀bmà ẽ?
KPÁÁ GBĨ́ TẼ́ LÓ
Ẹ̀b bé e ene kà nvín ãa gbálà baatẽ́ bé e Jìhóvà beè nveenìè bá neèe kọ á láá ĩ̀ìmàè naa tṍó e ba beè siilìèe nvee tọọ̀ kpọ́gọ́lọ́ boo béè kọọ̀ à tõonìè kele.
Ẹ̀b nú ea beè nvèè bá nè ene kà dóm nè va kọ bàá láá kilsĩ́ gè bọ́ló dẹ̀lẹ̀ nyíé boo kilma ló Jìhóvà kèbá bíígá ló.
Nyimá bé eo é láá ié agẹló kèbá bíígá ló naa.
“Kpoogá Dee Ló Kátogóí Nyòòmà Bíígá Ló” (Kpá Tọ Kùdẽe Ló, July 2019)
Móbá ní ea bọ́ló kọ é ẹ̀bmà nàà uú boo ea aa bá pá tọ ẹ́, vaá mósĩ́ deè ní eé láá zọ̀ pá bẹẹ tọ dia mm̀ fẹ́ẹ́-fẹẹ̀ ló vaá kilsĩ́ gè bọ́ló dẹ̀lẹ̀ nyíé boo kilma ló Jìhóvà ẹ?
“The Truth Brings, ‘Not Peace, But a Sword’” (Kpá Tọ Kùdẽe Ló, October 2017)