Tóm Gbò E Jíízọ̀s Beè Lẹ̀ẹ̀là
15 Sìgà gbò e bà ólò nyoone nvéè Jíízọ̀s e bà aa Jùdíà beè gbóó dú, vaá dààmà togó noomà pá vígà kọọ̀: “Be nóo kooàì dì belí bé e Log Mózìs kọ́ naa, nóo é duuai.” 2 Sõò tṍó e Pọ́ọ̀l nè Bánabàs náa zigà vaá zọ̀ va dula boo belí gã́bug tṍó, bà gbóó noo kọọ̀ Pọ́ọ̀l nè Bánabàs, bií ló sìgà nagbòa á àà sí Jèrúselẹ̀m ló gbò e Jíízọ̀s lẹẹlà nè gbò kànen boo béè belí.
3 Tṍó e pá vígà e bà aa bõ̀ònatõ̀ò ni túlè va tẹlẹ deèsĩ́, bà gbóó tení Fìnísìà nè Sàmérìà àà, vaá kọ́ bé e gbò e bà aa dõona kà dó ni dú gé fã̀ Bàrì naa, vaá níí beè palàge ẹẹlẹ̀ nyíè dénè pá vígà. 4 Tṍó e bà íná Jèrúselẹ̀m, gbò e bà di bõ̀ònatõ̀ò ea di kĩá bií ló gbò e Jíízọ̀s lẹẹlà nè gbò kànen beè tú kà lé bá tuumá va, vaá Pọ́ọ̀l nè Bánabàs beè gbóó nootẽ́ nèva gã́bug tóm e Bàrì ni túè va siimàè. 5 Sõò sìgà gbò e bà dṹùnà pá Fárìsíì e ba ni íé zìgà mm̀ Jíízọ̀s beè gbóó aa boo elá èla vaá kọọ̀: “À dú bíi kọ bà á koo gbò e bè níì pá Júù nì, e ba ni íé zìgà mm̀ Jíízọ̀s vaá kọ́ nèva kọ bà á sẹlẹ Log Mózìs.”
6 Vó à naa, gbò e Jíízọ̀s lẹẹlà nè gbò kànen beè gbóó bõoná vaá ẹ̀b mm̀ belí. 7 Tṍó e ba ni palàge loá bel boo mm̀ gã́bug tṍó, Pítà à gbóó elá èla vaá kọ́ nèva kọọ̀: “Pá vígà, ò palàge nyimai kọọ̀ mm̀ gbò tṍó ea kil nvéeá, Bàrì beè sà nda lọ̀líí zẹ̀ẹ̀ kọbé gbò dó àla dã́ lé kpẹ̀a vaá ié zìgà mm̀ Jíízọ̀s tení dú ló nda. 8 Vaá Bàrì ea ólò nyimá nú ea di nyíè nen beè sí neǹ ditõ̀ò kìlmà vá ló tení dú ló gè nèva nyómá káí, dì belí bé ea beè nè nàgé beele naaá. 9 Vaá náa beè sẹlẹ tọ́ọ̀ kà kele zẹ̀ẹ̀ beele nè baala, sõò a beè õ̀ònà ba nyíe tení dú ló zìgà e bà íe. 10 Beè vó, éé ní ea náa ò gé ẹbmai Bàrì tení dú ló gè tui nyèè tò e beele àbèè bẹẹ gbò nómá tẹ̀ náa beè láá toolá toolei gbò e bè níì pá Júù nì, e ba ni dẹlẹ nyíé boo Jíízọ̀s e? 11 Sõò beele íè zìgà kọọ̀ Bàrì a duulà beele tení dú ló sàn nyíe ea aa bá Jíízọ̀s, ea dú Nen Ea Íéi, vaá níà bé ea ni duulà nàgé baala naa ẽ́.”
12 Tṍóá, dénè gbòa à gbóó pĩigã́, vaá pãane tṍ ló Bánabàs nè Pọ́ọ̀l tṍó e bà gé nootẽ́ gã́bug tóm dũ̀ùnè e Bàrì ni túè va siimá gbẹá zẹ̀ẹ̀ gbò dó àla. 13 Tṍó e ba ni ló bel lọ̀l, Jém̀z à gbóó kọọ̀: “Pá vígà, pãaneḿ mi tṍ ló. 14 Símiòn a palàge nootẽ́ nú ea kil ló túá tṍó e Bàrì gé kiilà bùlà kpee gbò e bà aa dõona kà dó, vaá sà gbò e bà é zigà a bée. 15 Vaá níí gbááá ló bel e Gbò Kọ́ọ̀ Bùlà Bàrì beè kọ̀, dì belí bé e ba beè emí naa kọọ̀: 16 ‘Tṍó e gbò nuí ni nááá lọ̀l, nda é oòa kẽ dù gé tìb tọ kàn Dévìd ea beè dọ̀a. Nda é tib gbò kĩée ea beè kyọ̀à ea di ló, vaá òòmà sẹlẹ bé ea beè dì naa, 17 kọbé nagbò e bà sígáá bií ló gbò e bà aa kọ̀láá kà dó e ńdáà bée ni kóla va ló láá fã̀ Jìhóvà* lọa mm̀ dénè ba nyíe. Níà nú e Jìhóvà* ea gé náa gbò nuí kọ́ ẹ́. 18 A beè naa kọ bà á nyimá gbò nuí tã́gíní kpã́á dee.’ 19 Vó à naa, náa dú nà bùlà ge tãagẽ gbò e bà gé aa mm̀ gbò dó àla dù gé fã̀ Bàrì, 20 sõò à dú nà bùlà kọ é emí kpá má va kọ bà á kpòòlà lóó lọl ló gbò nú ea kil ló gè fã̀ ńbàlì e bà náàmà bá, kúnàgã̀,* nú e ba beè ììlà òò, nè mii. 21 Lọ̀l gé tṍó ea kil nvéeá, à íe gbò e ba beè olòó kọ́ nú ea di mm̀ kpá Mózìs aa bon dọ bon, boo béè kọ bà ólò bugi nú ea beè emí tẹlẹ bàlà kẽ gbẹá mm̀ gbò tọ bõ̀ònaló fã̀ pá Júù buù deè bõ̀séi.”
22 Tṍóá, gbò e Jíízọ̀s lẹẹlà ne gbò kànen, bií ló dénè gbò e bà di mm̀ bõ̀ònatõ̀ò beè gbóó beeláfùl ge lẹ̀ẹ̀là gbò e ba beè sà lọa zẹ̀ẹ̀ bií ló Pọ́ọ̀l nè Bánabàs siimá Ántiọ̀k, vaá Júdàs e bà ólò kolíe Básabàs nè Sáílàs, e ba beè ié gã́bug dọ̀ tóm mm̀ bõ̀ònatõ̀òa beè di ló gbò e ba beè lẹ̀ẹ̀là siimá. 23 Ba beè emí vaá lẹ̀ẹ̀là tenmá vá bá kọọ̀:
“Gbò e Jíízọ̀s lẹẹlà nè gbò kànen e bà dú pá bọọ vígà, kanà moǹ booló pá vígà eo aalìì gbò dó àla, eo dií Ántiọ̀k, Sírià, nè Sìlísìà. 24 Tã́gíní bé e dã́à kọọ̀ sìgà gbò e bà aa ló beele beè ló bel ea tãagẽ́i vaá gbĩ́ gè nyaaná bé eo bugìì togó naa, náa kal ló béè kọọ̀ née beè lẹ̀ẹ̀là va tómá, 25 è gbóò beeláfùl ge lẹ̀ẹ̀là gbò e beè sà, bií ló Bánabàs nè Pọ́ọ̀l e vulè mái. 26 Pálaa gbòí dú gbò e ba beè beeláfùl ge tú dénè ba dùm siimá tóm nè Nen Ea Íéi, ea dú Jíízọ̀s Kráìst. 27 Vó à naa, è lẹẹlà Júdàs nè Sáílàs, kọbé bà tú gã́ kọọmá nágé tẽ̀ènè kà nuí nèi. 28 Boo béè kọ náa tan nyómá káí nè beele gè tú dõona kà gbò nyèè tò toolèi daalá lọl ló gbò nú ea dú bíií, ea dú gè kọọ̀: 29 ó kilíí sĩ́ gè kpoolai lóó lọlíí ló nú e ba beè vaamá gyọ́ọ nè gbò ńbàlì e bà náàmà bá, mii, nú e ba beè ììlà òò, nè kúnàgã̀.* Be ò ọ́ẹi dẽe vaá kpoolai lóó lọlíí ló gbò nuí, ò é kilíí sĩ́. Á leèi!”
30 Tṍó e ba ni lẹẹlà gbòa ààmà, bà gbóó àà iná Ántiọ̀k vaá kolí dénè gbò e bà ólò nyoone nvéè Jíízọ̀s bõonè, vaá tú kpá lẹ̀ẹ̀la tómá nèva. 31 Tṍó e bà bugi, nyíé va à gbóó palàge ẹẹ ló íb sìà kpóó ló e bà né va. 32 Boo béè kọọ̀ Júdàs nè Sáílàs beè du nágé gbò kọ́ọ̀ bùlà Bàrì, ba beè siè kpóó ló vaá nvèè bá nè pá vígà tení dú ló gè ló gã́bug bel nèva. 33 Tṍó e ba ni tú sìgà tṍó tõ̀òma kĩá, vaá bà é gé àà nyoone gbò e ba beè lẹ̀ẹ̀là va domáá, pá vígà à gbóó kọ́ nèva kọ bà á agẹlẹ ló kyã̀à. 34* —— 35 Sõò Pọ́ọ̀l nè Bánabàs, bií ló gã́bug dõona gbò beè gbẹá Ántiọ̀k noomà nu vaá vee lé kpẹ̀a ea kil ló moǹ bel Jìhóvà.*
36 Tṍó e sìgà dee ni téní, Pọ́ọ̀l beè gbóó kọ́ nè Bánabàs kọọ̀: “Naa mè é ooà gé kãa pá vígà e bà di kọ̀láá kà boń e beè vee moǹ bel Jìhóvà* gbẹáá, kọbé è ẹb bé e bà dì naa.” 37 Bánabàs beè beeláfùl ge faalá Jṍòn, e bà ólò kolíe Máàka bììa ló. 38 Sõò náa beè leemá Pọ́ọ̀l kọ á nyoonèè va, boo béè kọọ̀ a beè àà vá ló àà gbẹá Pàmfílìà vaá náa beè zọ̀ nà va vee lé kpẹ̀a. 39 Vó beè naa kọ bà á kaná naa ní e ní ea dì téní ńlẹ. Bánabàs beè gbóó faalá Máàk nvee mm̀ faà sĩ́ múú kilma Sáíprọ̀s. 40 Tṍó e pá vígà ni tãàgã ló Jìhóvà* kọ á ẹ̀b nú ea kil ló Pọ́ọ̀l lọ̀l, Pọ́ọ̀l à gbóó sà Sáílàs vaá faaláẹ ààmà. 41 A beè tení Sìríà nè Sìlísìà vaá siè kpóó ló gbò bõ̀ònatõ̀ò ea di kĩá.