Kpá E Pọ́ọ̀l Beè Lẹ̀ẹ̀là Má Pá Róm̀
14 Tui lé bá tuumai nen e lóó a zìgà ọọ, sõò ó gá beelaíe bel ló dẹ̀ẹ̀a boo nú e gbò nen íe kele-kele bùlà kilma ló. 2 Nen ea íe agẹ zìgà ólò dé kọ̀láá íb nu, sõò nen e lóó a zìgà ọọ ólò taa áá pà sãa vaá dé súú té. 3 Nen ea dé á gá ẹ̀b nen e bè náa dé tẹlẹ kẽ, vaá nen e bè náa dé á gá beelá bel ló nen ea dé, boo béè kọọ̀ Bàrì beè tú bàà bá tuumáe. 4 Oloò mée eo é béélá bel ló gyóòloò dõona nèn ẽ́? Be à élá èla, níà bel a tẹ̀ íe. Be à dọ, níà bel a tẹ̀ íe. Mm̀ kà-kà, à é élá èla boo béè kọọ̀ Jìhóvà é láá naa kọ á elá èla.
5 Nen é láá ẹ̀b kọọ̀ enè dee bọọ èl dõona dè. Dõona nèn ẹb kọọ̀ dénè dee kunà. Buù nen á palàge àgala boo bé e ẹlẹ ẹb naa. 6 Nen ea nveè ka ló enè íb dee, náa vó boo béè ge nvèè ka ló Jìhóvà. Nagé, nen ea dé, dé boo béè ge nvèè ka ló Jìhóvà, boo béè kọ à ṍá Bàrì zaa. Vaá nen e bè náa dé, náa dé boo béè ge nvèè ka ló Jìhóvà, sõò à ṍá nágé Bàrì zaa. 7 Mm̀ kà-kà, tọ́ọ̀ nen ea dìí zẹ̀ẹ̀ náa ólò tõó dùm nèà áá a bá, vaá tọ́ọ̀ nen náa ólò ú nèà áá a bá. 8 Be è di dùm, è dì nè Jìhóvà, vaá be è úù, è úù nè Jìhóvà. Vó à naa, be è di dùm àbèè è úù, è dì nè Jìhóvà. 9 Níà nú ea náa Kráìst beè ù vaá à kpáá tõó dùm ẽ, kọbé à dú Nen Ea Íe gbò e ba beè ù nè gbò e bà di dùm.
10 Sõò éé ní ea náa ò beelá bel ló o vígà ẹ? Àbèè kọọ̀, éé ní ea náa ò ẹ̀b o vígà tẹlẹ kẽ ẽ́? Boo béè kọọ̀ dénè bẹ̀ì é élá kèsĩ́ kpòté bèèla bel Bàrì. 11 Boo béè kọọ̀ ba beè emí kọọ̀, “Jìhóvà kọ́ọ̀, ‘Beè nda dì gé dùm, dénè nen é kúmí dúnú kẽ nèm, vaá dénè nen é tú ba gã́ kọọmá kọọ̀ ndaà Bàrì.’” 12 Vó à naa, Bàrì é béélá bel ló buù bẹ̀ì dẹ̀ẹ̀a boo bé e lábvì láb naa.
13 Boo béè vó, naanii mè née é béélá ná bel ló ene, tãa vó, èé bééláfùl kọ née é náa nú ea é náa kọọ̀ dõona kà vígà á dọ̀ àbèè nú ea é kpegàẹ́ deè. 14 Dì bélí nen em gé nyoone nvéè Kráìst, nda nyímà vaá àgala boo kọọ̀ náa íe nú e bè á gé õ̀òa. Áá tṍó e nen ẹb kọọ̀ nú á gé õ̀òa, ní e nuá náa õoà kilma kĩée e ẹlẹ dì e. 15 Be ò náa nú ea bẽ́émá o vígà boo béè íb gyã́á eo déè, nóo gé náa na nú ea zógè kọ ò vulèe. Ó gá zìgà kọọ̀ o vígà e Kráìst beè ú booá á dọ̀ boo béè íb gyã́á eo déè. 16 Vó à naa, ó gá zigai kọ bà á kọọ̀ gbò lé nú eo gé náanii dú pọ́lọ́. 17 Boo béè kọọ̀ níì ge dé nu nè ge ṍ nu ní ea é náa kọọ̀ nen á bã mm̀ Boǹ Méné Bàrìe nì, tãa vó, gè dú neǹ lé lab dògò, gè zọ̀ dõona gbò dia mm̀ fẹ́ẹ́-fẹẹ̀ ló,* nè ẹ́ẹ́-ẹẹ̀ nyíe e nyómá káí náa kọọ̀ nen á ié ní ea é náa kọọ̀ nen á bã m ẽ́. 18 Boo béè kọọ̀ Bàrì é ténmà kọ̀láá nen ea sí tóm nè Kráìst mm̀ na sĩ́deèí, vaá nyíè gbò nen é ẹ́ẹẹ́ ló.
19 Vó à naa, naa nii mè èé kilsĩ́ gè naa gbò nú ea é náa kọọ̀ fẹ́ẹ́-fẹẹ̀ ló á dì, nè gbò nú ea é síè kpóó ló ene. 20 Kubvii gè dií boo béè gyã́á vaá kyọgalai tóm e Bàrì beè sì. Mm̀ kà-kà, dénè nu di õ̀òa, sõò à é dú pọ́lọ́ be nen dé nú ea é náa kọ dõona nèn á dọ̀. 21 À é dú lé be nóo baà nom àbèè ge ṍ míí àbèè ge naa ene kà nú ea é náa kọọ̀ o vígà á dọ̀. 22 Zìgà eo íè á di gbà-gbá olo nè Bàrì. Ẹ́ẹ́-ẹẹ̀ nyíe á di ló nen e bè náa bẽ́gẽ̀ bel a bá boo béè nú ea beè beeláfùl ge naa. 23 Sõò be à íe bàà-bàà bùlà vaá à dè, bel bẽ́èe, boo béè kọ náa dé boo béè zìgà ea íe. Mm̀ kà-kà, kọ̀láá kà nú e nen náa e bè náa dẹẹa boo zìgà dú náàkyọ̀.