Lé Kpẹ̀a E Máátìù Beè Emí

27 Tṍó e dee zilà, dénè gbò togó vààla gyọ́ọ nè gbò kàneǹ pá Júù beè gbóó bilá ló kọbé bà fẹ́ẹ̀ Jíízọ̀s. 2 Tṍó e bà bọ́bvíe lọ̀l, bà gbóó faaláẹ ààmà gé túe nè Páílèt, ea géè bẹ̀l Jùdíà.

3 Tṍó e Júdàs ea beè tení ló Jíízọ̀s nvee bá gbò ọ́bvá mon kọ baa béélá bel bẽèe, à gbóó ọgá vaá òòma kẽè 30 kà kpègè e ba beè naamà ẹ́ẹ́ kpéá má gbò togó vààla gyọ́ọ nè gbò kàneǹ pá Júù, 4 vaá kọ́ nè va kọọ̀: “M̀ síì pọ́lọ́ ló gè tení ló neń e bè náa sí tọ́ọ̀ kà pọ́lọ́ nvee bá ú.” Bà aalá nèe kọọ̀: “Níá náa kuù beéle. Níà áá ńlóò bel!” 5 À gbóó tobví kpègè e ba beè naamà ẹ́ẹ́ kpéá tẹlẹ mm̀ tọọ̀ káíá vaá àà gé nvèà díí òò. 6 Sõò gbò togó vààla gyọ́ọá beè tú kpègèa vaá kọọ̀: “Náa dú lé gè tú kpègèí tẹlẹ kĩée e ólò sẹlẹ kpègè ea di tọọ̀ káí, boo béè kọọ̀ níà kpègè mii.” 7 Tṍó e bà bílá ló lọ̀l, bà gbóó tú kpègèa zalmá kunukẽ̀ lọl bá neǹ dèm bã́, naamá kĩée e bà é ólòó lì gbò kyáà. 8 Vó à naa, ba beè gbóó kolí kĩá kolíe Kunukẽ̀ Mii tẹlẹ̀ nieí. 9 Tṍóá, bel e Bàrì beè kọ́ tenmá gã́ neǹ kọ́ọ̀ bùlà Bàrì Jèrèmáíàa beè gbóó mm-má, ea kọọ̀: “Ba beè tú 30 kà kpègè e ba beè naamà ẹ́ẹ́ kpé, ea dú kpègè e sìgà pá Ízrẹẹ̀l beè oo gbálàa lóá, 10 zalmá kunukẽ̀ bá neǹ dèm bã́, dì belí bé e Jìhóvà* beè kọ́ nèm naaá.”

11 Jíízọ̀s beè gbóó elá kèsĩ́ Páílèt, vaá Páílèt à gbóó bĩináe kọọ̀: “É kọọ̀ olo ní eo dúù Méné pá Júù e?” Jíízọ̀s à aalá nèe kọọ̀: “Olo ní eo gé kọ́á.” 12 Sõò náa beè ló tọ́ọ̀ bel tẹlẹ dẽè bel e gbò togó vààla gyọ́ọ nè gbò kàneǹ pá Júù géè ló uué boo á. 13 Tṍóá, Páílèt à gbóó bĩináe kọọ̀: “Nóò dã́à gbò bel e bà gé ló uu ní booí?” 14 Sõò a beè palàge bọọ́ ló Páílèt, boo béè kọọ̀ náa beè aalá tọ́ọ̀ kà bel tẹlẹ dẽe.

15 Kọ̀láá tṍó nàànù ténì zelí, Méné Páílèt ólò tú enè nen ea tan gbò nen kọ á sọ̀bá lọl tọọ̀ kpọ́gọ́lọ́. 16 Tṍóá, à íe ene kà agẹ bá pọ́lọ́ nen ea beè di tọọ̀ kpọ́gọ́lọ́ ea bée kọlà Bàrábàs. 17 Tṍó e bà di bṍónáá, Páílèt à gbóó bĩiná va kọọ̀: “Mée ní eo gbĩ́ì kọ ḿ sọ̀bá nèi ẽ́, Bàrábàs sẹ̀ Jíízọ̀s e bà ólò kolí náe gé Kráìsta ẹ?” 18 Boo béè kọọ̀ Páílèt beè nyimá kọọ̀ bẹẹ nyíe ní ea beè naa kọ bà á siíe domá ẽ́. 19 Nagé, tṍó ea di ĩ́ìtẽ́ boo a kpòté bèèla bel, a va beè lẹ̀ẹ̀là tóm máe, vaá kọ́ nèe kọọ̀: “Ó gá naa tọ́ọ̀ kà nuù gbálà e bè náa sí tọ́ọ̀ kà pọ́lọ́í, boo béè kọọ̀ m beè mòn gã́bug tã̀àgã̀ gbẹá gyáálá bílá deeá boo béè gbálàí.” 20 Sõò gbò togó vààla gyọ́ọ nè gbò kàneǹ pá Júùa beè kilsĩ́ gè kọ́ nè gbòa kọ bà á kọ́ nè Páílèt kọ á sọ̀bá Bàrábàs, sõò á fẹ́ Jíízọ̀s. 21 Páílèt à bĩiná va kọọ̀: “Mée ea di gbàà pálaa ọ̀và ní eo gbĩ́ì kọ ḿ sọ̀bá nèi ẽ́.” Bà aalá kọọ̀: “Bàrábàs.” 22 Páílèt à gbóó kpáá bĩiná va kọọ̀: “Vaá ḿ naa éé Jíízọ̀s e bà ólò kolí náe gé Kráìsta ẹ?” Bà gbóó kpáá kilsĩ́ gè vulí kpã́ kọọ̀: “Túe ká kú té!” 23 À gbóó bĩiná va kọọ̀: “Ló éé? Mókà pọ́lọ́ ní ea sí é?” Sõò ba beè kilsĩ́ gè kpáá palàge vulí kpã́ kọọ̀: “Túe ká kú té!”

24 Tṍó e Páílèt mon kọọ̀ dénè a pììgà náa dọ tọ́ọ̀ kà bélè, tãa vó, à bélí e tã̀àgã̀ é gé bã̀, à gbóó tú múú lomá báẹ gbẹá kèsĩ́ dénè gbòa, vaá kọọ̀: “Miì gbálàí á gé ból nda. Boólo ní eo é tóolai kọ̀láá kà tã̀àgã̀ ea dú ló é.” 25 Tṍóá, dénè gbòa à gbóó kọ́ nèe kọọ̀: “A mii á di ból beele nè bẹẹ gbò nvín.” 26 À gbóó sọ̀bá Bàrábàs nè va, sõò a beè tú Jíízọ̀s nè gbò bé kọ bà á bòmie vaá túe ká kú té.

27 Gbò bé Páílèt beè gbóó tú Jíízọ̀s kilma mm̀ beè Páílèt, vaá dénè ọ̀và à gbóó bõonáé ló. 28 Bà gbóó lọ̀lie kọ̀là ló ló, vaá tú mii-miì pọ̀b kọ̀là ló nvèèé ló. 29 Bà gbóó ììlà gẹ́l suu naamá pẹ̀gẹ̀lẹ̀ uué ból, vaá tú kpóó té nvèèé bá lè. Bà gbóó kumíe dúnù ke gbàà vaá nvèèmàe lẹ́ kọọ̀: “Kànà mòn kól, e oló Méné pá Júù!” 30 Bà gbóó tumíe múú kyáá ló vaá tú kpóó téá lọ̀líé bá olòó sáẹ́ togó. 31 Dee deè nvée, tṍó e ba ni nveemàe lẹ́ lọ̀l, bà gbóó tú kọ̀là lóá lọ̀líé ló, vaá tú a pọ̀b kọ̀là ló nvèèé ló vaá faaláẹ ààmà kọbé bà túe ká kú té.

32 Boo tṍó e bà gé aàa, bà gbóó mòn ene kà gbálà ea kọlà Sáímòn ea dú Sàìrínì. Bà gbóó tú bá kpóó siimáe kọ á dàlà té tã̀àgã̀ Jíízọ̀s. 33 Tṍó e bà ínà kĩée ea kọlà Gọ́lgọtà, ea tõó dọ̀ Ketõ̀ò Kóó Togó, 34 bà gbóó nèe míí e ba beè tú noǹ nu pìgmà, sõò tṍó ea daa gã́ ló, náa beè zìgà ge õ̀. 35 Tṍó e bà túe ká kú té lọ̀l, bà gbóó uuá ńnóm boo béè ge dõ̀ònà a pọ̀b kọ̀là ló, 36 vaá ĩìtẽ́ kĩá kùe dẽe ló. 37 Ba beè emí nágé bel e ba beè lóé lóá sẹlẹ́ẹ́ boo togó kọọ̀: “Níì Jíízọ̀s ea dú Méné pá Júù.”

38 Ba beè tú bàà kà neǹ zib ká kú té ea dìé kpàn. Ba beè tú enè nen káẹ́ boo bá lè, bà tú enè nen káẹ́ boo bá kie. 39 Gbò e bà gé téní èèlè beè ló pọ́lọ́ bel uué boo vaá kigele togó 40 kọọ̀: “Oló eo beè kọ ò é kṹùnàè tọọ̀ káí vaá tìb lọ̀l mm̀ taà dee, dùùlà o bá! Be ọ̀ọ̀ sã́áná Bàrì, aa boo té tã̀àgã̀í dọ kunukẽ̀!” 41 Mm̀ tẽ̀ènè sĩ́deèá, gbò togó vààla gyọ́ọ bií ló gbò émì kpá, nè gbò kàneǹ pá Júù beè nvèèmàe lẹ́ vaá kọọ̀: 42 “A beè dùùlà dõona gbò, sõò náa láà dùùlà a bá! Ẹ̀ẹ̀ Méné pá Ízrẹẹ̀l, á gbóó aa boo té tã̀àgã̀í dọ kẽ, mè èé gbóó zìgàẹ́ ló. 43 A beè dẹlẹ nyíé boo Bàrì. Bàrì á gbóó dùùlàẹ be à íée bíi ló, boo béè kọ a beè kọọ̀, ‘Ndaà Sã́áná Bàrì.’” 44 Kọbèè gbò zib e ba beè ká kú té gbẹáẹ́ kpàna géè nvèèmàe lẹ́.

45 Zivèkà dóá beè gbóó kuu gín lọl òb nè bàà tóm tẹlẹ taà tóm* boo fèèbe. 46 Tṍó ea ni dú gbán taà tóm* boo fèèbe, Jíízọ̀s à gbóó kòòlà kpã́ kọọ̀: “Ẹ́lì, Ẹ́lì, lámá sàbàktánì?” ea tõó dọ̀, “Nà Bàrì, nà Bàrì, éé ní ea náa ò sọ̀m bá gbẹẹ́ kẽ ẽ́?” 47 Tṍó e sìgà gbò e ba beè di élá kĩá dã́ naa vó, bà gbóó kọọ̀: “Gbálàí gé kólí Èláíjà.” 48 Tẽ̀ènè tṍóá, enè ọ̀và à gbóó teelá àà gé tú sàpó diilé mm̀ agẹ míí vaá nvee dáà té nèe kọ á õ̀. 49 Sõò dénè nagbòa beè kọ́ nèe kọọ̀: “Ààẹ́ ló! Èé ẹb beè Èláíjà é dú gé dùùlàẹ.” 50 Jíízọ̀s à gbóó kpáá kòòlà kpã́ vaá à gbóó ù.

51 Tṍóá, kàn e ba beè fùlmà mm̀ tọọ̀ káíá* beè gbóó bààlà bàà báà aa gbàn deè dọ kunukẽ̀. Kunukẽ̀ beè zùgà vaá dem à bàgà. 52 Vaá gbò kóló dem e ba beè lì neń m beè kùùà, naa ní e íí gbò e bà di káí e ba beè li m beè kpọlá ààgi m, 53 vaá gã́bug nen beè mòn va. (Tṍó e Jíízọ̀s kẽeà aa ke mà ú, gbò e ba beè àà sí gbàà gbò kóló demá beè òòa kẽ kil boǹ káí.)* 54 Sõò tṍó e neǹ togó gbò bé nè gbò e ba beè dìé ló e bà géè kùdẽe ló Jíízọ̀s mon zùgà kunukẽ̀ nè gbò nú ea nááá, pọ̀ beè gbóó palàge sií va, naa ní e bà kọ́ọ̀: “Kà-kà gé, aẹ̀ bèè Sã́áná Bàrì.”

55 Gã́bug gbò bia e ba beè nyoone Jíízọ̀s aa Gálilì kọbé bà nveè bá nèe beè elá kpã́á ẹ̀b bé e nu gé nááá naa. 56 Mérì ea dú Màgdálà nè Mérì ea dú kà Jém̀z nè Jósìs nè vaà* Zẹ́bidì beè dì vá ló.

57 Tṍó ea é gé dú ló èlà, ene kà neǹ méné ea bée kọlà Jósẹ̀f, ea dú Àrìmàtíà, ea beè du nágé enè neń ea ólò nyoone nvéè Jíízọ̀s beè gbóó dù. 58 Gbálàí beè sí ló Páílèt gé bànie kọ á neèe íí Jíízọ̀s. Tṍóá, Páílèt à gbóó kọ́ nè va kọ bà á tú nèe. 59 Jósẹ̀f à gbóó tú ííá ààmà vaá tú õ̀òa dẽè lé báà kàn kọ̀lmàe. 60 À gbóó túe maamé mm̀ a kóló dem* ea ã́àa tòg. Tṍó ea ni kpọ́lẹ̀ báà dem uú gã́ lọ̀l, à gbóó àà. 61 Sõò Mérì ea dú Màgdálà nè nakà Mérìa beè kilsĩ́ gè ĩìtẽ́ ló bànà úá.

62 Deé ea bẽene, ea dú Deè Ge Kpoogá Dee Ló Nyòòmà Deè Bõ̀séi, gbò togó vààla gyọ́ọ nè pá Fárìsíì beè gbóó bõoná kèsĩ́ Páílèt, 63 vaá kọọ̀: “Tẹ́ẹ̀, è kẽèa boo kọọ̀ tṍó e gbálà kyáá belá beè di dùm, a beè kọọ̀, ‘Tṍó e taà dee ni téní, m̀ é kẽeà aa kemà ú.’ 64 Boo béè vó, lẹ̀ẹ̀là gbò nen kọ bà á gé kùdẽe ló a bànà ú dọ̀ọ̀mà tṍó e taà dee é téní, kọbé pá a gbò nyòòne nvée náa sí gé zìb a íí vaá kọ́ nè gbò nen kọọ̀, ‘A beè kẽ̀èà aa kemà ú!’ Be bà náa vó, nakà kyáá belí é aga bá èl ńtúá kàa.” 65 Páílèt à gbóó kọ́ nè va kọọ̀: “Tui gbò kùdẽe ló vaá ò aalii gé kpenai kọ̀láá bé eo nyímàì kọ ò é láá kpenai naa.” 66 Vó à naa, ba beè gbóó àà gé kùdẽe ló bànà úá tení du ló gè tú báà dem muuné nu vaá tú gbò kùdẽe ló sẹlẹ́ ló.