Lé Kpẹ̀a E Máátìù Beè Emí
17 Tṍó e ọ̀ọ̀lẹ̀ dee ni téní, Jíízọ̀s beè faalá Pítà, Jém̀z, nè a vígà Jṍòn kilma boo gù ea palàge bọọ́ gãboo. 2 Vaá à gbóó nyaaá gbẹá vá kèsĩ́; sĩ́e beè mò belí nàànì, vaá a pọ̀b kọ̀là ló à mò belí ẹ́ẹ́ dee. 3 Tṍóá, Mózìs nè Èláíjà beè gbóó sìlà vá ló vaá zọ̀ Jíízọ̀s loá bel. 4 Pítà à gbóó kọ́ nè Jíízọ̀s kọọ̀: “Neń Ea Íém, à dú lé kọ è di kĩí, be à é léémá ni, m̀ é tib taà kà pẹ́ẹ̀ kĩí, ene kà á dú ńlo, ene kà dú níí Mózìs, vaá ene kà dú níí Èláíjà.” 5 Tṍó ea dì ea gé ló belá, bù dee ea ẹ́ẹ vaá mò beè gbóó kọ̀lva bá boo, vaá mon à gbóó sìlà aa gbàà bù deeá kọọ̀: “Níì nà nvín em vulè, nyíém palàge ẹẹẹ́ ló, gbanííe tṍ ló.” 6 Tṍó e pá a gbò nyòòne nvée dã́ moní, pọ̀ beè palàge sií va naa ní e bà dọ vaá kumí sĩ́ kẽ. 7 Jíízọ̀s à gbóó kyã̀à nyooné va, vaá daá va bá ló, à gbóó kọ́ nè va kọọ̀: “Aalíí boo. Pọ̀ á gá siíi.” 8 Tṍó e bà dalà sĩ́ boo, áá Jíízọ̀s ní e ba beè mòn ẽ. 9 Tṍó e bà gé aa boo gùa kil kunukẽ̀, Jíízọ̀s beè gbóó ãané va kọọ̀: “Ó gá kọi nú eo monììá nei tọ́ọ̀ nen dọ̀ọ̀mà tṍó e Sã́áná nená é kẽeà aa kemà ú.”
10 Sõò pá a gbò nyòòne nvée beè bĩináe kọọ̀: “Éé ní ea náa gbò émì kpá à kọọ̀ Èláíjà ní ea é íè ge zẹ́ẹ́ dù e?” 11 À aalá nè va kọọ̀: “À dú kà-kà kọọ̀ Èláíjà é dú, vaá à é oomà dénè nu sẹlẹ́ a dọ̀. 12 Náa kal ló béè vó, m̀ kọ́ọ̀ nèi kọọ̀ Èláíjà beè dù vaá bà náa beè nyimáe ló, sõò ba beè tú kọ̀láá kà nu ea léémá va naamáe. Níà bé e Sã́áná nená é mon nagé tã̀àgã̀ gbẹá vá bá naa ẽ́.” 13 Tṍóá, pá a gbò nyòòne nvée à gbóó dã́ ból ló kọọ̀ à géè ló bel ea kil ló Jṍòn Neǹ Dììlè Nen Múú.
14 Tṍó e bà kyãà iná ló gã́bug gbò e ba beè di kĩá, ene kà gbálà beè dù gé kumíe dúnú ke gbàà, vaá kọọ̀: 15 “Neń Ea Íém, ié sàn nyíe ló ńdáà nvín págbálà, boo béè kọọ̀ kpálóé gé palàge zọ̀, gọ́í ólò siíe, vaá gã́bug tṍó à ólò tobvíe tẹlẹ dáà sã́ nè mm̀ múú. 16 M beè túe siimá ló pá o gbò nyòòne nvée, sõò bà náa beè láá bó e.” 17 Jíízọ̀s à aalá kọọ̀: “Boolo eo dúì gbò e bè nóo íèì zìgà vaá ò dui gbò pọ́lọ́, begè dẽè tṍó ea tõò vàẹ ní em é diimàí ló é? Begè dẽè tṍó ea tõò vàẹ ní em é kilsĩ́ gè ĩ̀ìmà bọọ lábvẹ́? Tuíe domai.” 18 Jíízọ̀s à gbóó kọ́ bel zọá naa ní ea aàẹ́ m, nvíná à gbóó boá kà lèlà tṍóá. 19 Tṍóá, pá a gbò nyòòne nvée à gbóó dú ló Jíízọ̀s kĩée e áá ẹ̀ẹ̀ dì gé bĩináe kọọ̀: “Éé ní ea náa beele née beè láá kpó zọá lọ̀líé m ẽ́?” 20 À aalá nè va kọọ̀: “Boo béè kọọ̀ ò íèì ńkem̀ zìgà. M̀ lóò kà-kà bel nèi kọọ̀, be ò íei zìgà ea tõò súú móstàd, ò é kọ́i nei gùí kọọ̀, ‘Kyã̀à aa kĩí kil kĩí-ìla,’ vaá à é kyãà, náa íe nú e bè nóo é láá naanii.” 21* ——
22 Tṍó e ba beè di bṍóná Gálilì, Jíízọ̀s beè kọ́ nè pá a gbò nyòòne nvée kọọ̀: “Bà é téní ló Sã́áná nená nvee bá gbò ọ́b, 23 vaá bà é fẹ́ẹ, sõò à é kẽeà ní ea égè taà dee.” Belí beè palàge biilé va nyíe.
24 Tṍó e bà íná Kàpánìòm, gbò e bà ólò lọ̀l kpègè* gbáá ea kuu tọọ̀ káíá beè gbóó sí ló Pítà gé bĩináe kọọ̀: “Bọọ neǹ dòbá ólò kpẽ gé kpègè gbáá ea kuu tọọ̀ káíí?” 25 À aalá naa: “Ẽei.” Sõò tṍó ea bã́ toá, Jíízọ̀s à gbóó gyàsĩ́ bĩináe kọọ̀: “Ńlóò bùlà kọ́ vàẹ, e Sáímòn ẽ? Mée ní ea ólò kpẽ́ kpègè boo gyọ́ ea gbĩ́ gè oo àbèè ge zalí àbèè ge kpẽ́ kpègè gbáá nè gbò méné e bà gé bẹl ẹ́? É kọọ̀ nvín gbò e bà gé bẹl sẹ̀ pọ́ì dõona gbò e?” 26 Tṍó e Sáímòn áálá nèe kọọ̀: “Pọ́ì dõona gbò ní e bà ólò kpẽ̀ ẽ,” Jíízọ̀s à gbóó aalá nèe kọọ̀: “Beè vó, náa dú bíi kọọ̀ pá a nvín á kpẽ́ kpègè gbáá. 27 Sõò kọbé née náa nu ea é nveè va súng, àà sí dọọ̀ gé tẹlẹ̀ kọ̀vẹ, vaá ò ãanà gã́ túá kà gyã́à eo síì, mè ò é mon kpègè e bà náàmà ẹ́ẹ́ kpé,* tù vaá ò kpẽ́émá ńlo nè ńda.”