Lé Kpẹ̀a E Lúùk Beè Emí

5 À íe tṍó ea beè di élá gã́ pène Gènésẹrẹ̀t,* vaá gbò nen géè àng kẽ bììmàe boo tṍó e bà gé pãane tṍ ló moǹ bel Bàrì. 2 À gbóó mòn bàà kà faà sĩ́ múú e bà kọọla gã́ pèneá, sõò gbò síì dọọ̀ e ba beè di m beè aa m gé logí ba gbṍò. 3 À gbóó bã mm̀ ene kà faà sĩ́ múúá, vaá Sáímòn ní ea beè ié níá ẽ́. À gbóó kọ́ nèe kọ á tãa bá tẹlẹ sĩ́ múú pọ́ì ńkem. À gbóó ĩìtẽ́ kẽ vaá dààmà togó gè noomà nuù gbòa gbẹá mm̀ faà sĩ́ múúá. 4 Tṍó ea ló bel nè gbòa lọ̀l, à gbóó kọ́ nè Sáímòn kọọ̀: “Ọví kil kĩée ea bọọ́ kètẽ́ vaá ò gbóó tobví o gbṍò.” 5 Sáímòn à kọ́ nèe kọọ̀: “Neǹ Dòbá, e beè tú zivèkà bílá deeá kpoomá dọọ̀, vaá née síì tọ́ọ̀ nu, sõò tã́gíní bé eo kọ́ọ̀ vóá, m̀ é tóbví.” 6 Tṍó e bà náa vó, bà gbóó sii kà gã́bug gyã́à naa ní e ba gbṍò daamà togó gè bààlà. 7 Bà gbóó tú bá kolmá gbò e ba beè di mm̀ dõona kà faà sĩ́ múú kọ bà á dù gé nveenìè bá neè va. Bà gbóó dù naa ní e bà tú gyã́à m-me mm̀ pálaa kà faàa, vaá pálaa kà faàa à gbóó dààmà togó gè dii. 8 Tṍó e Sáímòn Pítà mon naa vó, à gbóó dọ̀ kumí dúnú ke gbàà Jíízọ̀s vaá kọọ̀: “Tení ààḿ ló, e Neń Ea Íém, boo béè kọọ̀ ndaà neǹ náàkyọ̀.” 9 A beè kọ́ vó boo béè kọọ̀ gã́bug gyã́à e bà síi beè palàge bọọ́ ló Pítà nè gbò e ba beè dìé ló, 10 vaá níà bé ea beè bọọ nagé ló Jém̀z nè Jṍòn e bà dú pá nvín Zẹ́bidì e bà géè zọ̀ Sáímòn kpó dọọ̀a naa ẽ́. Jíízọ̀s à gbóó kọ́ nè Sáímòn kọọ̀: “Pọ̀ á gá sií ni. Lọl kátogóí ààmà, ò é síi gbò nen gbẹẹ́ di dùm.” 11 Vó à naa, bà gbóó ọví faà sĩ́ múúá kọ̀ọ̀la boo kpò vaá sọ̀bá dénè nu gbẹẹ́ kẽ nyoonée.

12 Dõona tṍó e Jíízọ̀s beè di ene kà gbò pọ̀b boná, ene kà gbálà e kom̀ kulè di ḿ-maé ló beè mònie, à gbóó dọ̀ kumí sĩ́ kẽ nèe vaá bànie kọọ̀: “Neń Ea Íém, be à dú o bùlà, ò é láá naa kọ ḿ boá.” 13 Jíízọ̀s à gbóó nììnà bá daaẹ́ ló vaá kọọ̀: “M̀ gbĩ́ì kọ ó boá.” Tẽ̀ènè tṍóá, kom̀ kulèa beè gbóó táẹ́ ló. 14 À gbóó kọ́ nè gbálàa kọọ̀: “Ó gá kọ́ nè tọ́ọ̀ nen, sõò àà gé tú o lóó zogè neǹ vààla gyọ́ọ, vaá ò tú o dõ̀ònù e Log Mózìs kọ́á nèe, kọbé bà nyímá kọ o õoà.” 15 Kpẹ̀a ea kilíé ló beè kilsĩ́ gè zààlà vaá gã́bug nen beè bõonáé ló kọbé bà pãanée tṍ ló vaá ié bóa. 16 Sõò, gã́bug tṍó à ólò àà kil kĩée ea é dú áá ẹ̀ẹ̀ gé tã̀àgã ló Bàrì.

17 Enè deé e Jíízọ̀s géè noomà nu, pá Fárìsíì nè gbò nóòmà log e bà aa dénè bon ea di Gálilì nè Jùdíà nè Jèrúselẹ̀m beè di ĩ́ìtẽ́ kĩá, vaá Jìhóvà* beè nèe kpóó gè boomá gbò nen. 18 À íe gbò e ba beè dàlà ene kà gbálà e báàsĩ́e ọọ* nvee boo váì kpàì domá, vaá bà géè pììgà bé e bà é náa vaá túe inmá ke gbàà Jíízọ̀s. 19 Sõò bà náa beè láá túe nvee mm̀ tọá boo béè gã́bug nen ea beè di kĩá. Vó beè naa kọ bà á dẽe bã boo tọá vaá túe tenmá kĩée e ba beè sòòlà tẹlẹ gbàà gbò e bà di lèlà sĩ́ Jíízọ̀s. 20 Tṍó ea mon bé e bà íe zìgà naa, à gbóó kọọ̀: “Gbálàí, m ia ló o pọ́lọ́ nè ni.” 21 Tṍóá, gbò émì kpá nè pá Fárìsíì à gbóó dààmà togó gè bugi togó kọọ̀: “Níì mée ea gé on Bàrìí é? Mée ní ea é láá ia ló pọ́lọ́ daalá lọl ló Bàrì e?” 22 Sõò boo béè kọọ̀ Jíízọ̀s nyímá nú ea dì vá bùlà, à gbóó kọ́ nè va kọọ̀: “Éé ní ea náa vaá ò gé bugii togó naanii vóí é? 23 Mókà ea di gbàà ní ea válí é, é kọọ̀ ge kọọ̀, ‘M ia ló o pọ́lọ́ nè ni,’ sẹ̀ ge kọọ̀, ‘Aa boo kyã̀à ẽ’? 24 Sõò kọbé ò nyímai kọọ̀ Sã́áná nená íe kpóó gè ia ló pọ́lọ́ nè gbò nen—” à gbóó kọ́ nè neń e báàsĩ́e ọọá kọọ̀: “Aa boo, tú o váì kpàì vaá ò aà kil be.” 25 À gbóó aa boo elá èla gbẹá vá kèsĩ́, tú nú ea beè di ma booá, vaá olòó lèèlà Bàrì boo tṍó ea gé kil be. 26 A beè palàge bọọ́ ló dénè nen vaá siimà va pọ̀ naa ní e bà daamà togó gè lèèlà Bàrì vaá kọọ̀: “Beéle e mon nu bọ̀ọ̀ló nieí!”

27 Tṍó e níí nááá lọ̀l, a beè àà vaá mòn enè neǹ lọ̀l kpègè gbáá ea bée kọlà Lívaì, ea di ĩ́ìtẽ́ tọ gbò lọ̀l kpègè gbáá. À gbóó kọ́ nèe kọọ̀: “Dù gé nyooném nvée.” 28 À gbóó sọ̀bá dénè nu gbẹẹ́ kẽ vaá aa boo nyoonée. 29 Tṍóá, Lívaì à gbóó bùl gã́bug gyã́á kolmá kyáà Jíízọ̀s gbẹá a tọ, vaá gã́bug gbò lọ̀l kpègè gbáá nè dõona gbò beè dì vá ló e bà géè dé gyã́á. 30 Pá Fárìsíì nè ba gbò émì kpá beè gbóó nuumi bel vaá kọ́ nè pá a gbò nyòòne nvée kọọ̀: “Éé ní ea náa vaá ò zọi gbò lọ̀l kpègè gbáá nè gbò náàkyọ̀ deai gyã́á vaá õai míí ẽ́?” 31 Jíízọ̀s à aalá nè va kọọ̀: “Gbò válá ló náa íe bíi ló neǹ dóm biè, sõò gbò e lóó va zọ̀ ní e bà íée bíi ló é. 32 Ním beè dú ló gè kolí gbò lé lab dògò, sõò m beè dú ló gè kolí gbò náàkyọ̀ kọbé bà ọ́gá aa ló ba pọ́lọ́.”

33 Bà gbóó kọ́ nèe kọọ̀: “Gbò nyòòne nvéè Jṍòn ólò ká gã́ gã́bug tṍó vaá tã̀àgã ló Bàrì, vaá níà bé e gbò e bà ólò nyoone nvéè pá Fárìsíì ólò naa nagé é, sõò pá o gbò nyòòne nvée gé dé vaá õ̀.” 34 Jíízọ̀s à kọ́ nè va kọọ̀: “Nóo é láá naanii kọọ̀ pá kóò neń ea gé ílí va á ká gã́ boo tṍó e neń ea gé ílí vaá dì vá ló, sẹ̀ ò é láá naanii ẽ́? 35 Sõò tṍó gé dú e bà é tú neń ea gé ílí vaá lọ̀l vá ló ààmà. Tṍóá, bà é gbóó ká gã́.”

36 A beè lo nágé dõona kà bel dòòle ló nè va kọọ̀: “Tọ́ọ̀ nen náa ólò fùl báà lọl dẽè ãa kọ̀là ló gbá dẽè nómá kọ̀là ló. Be à náa vó, ãa báà nuá ólò zọ̀ọ̀là ńnómáá, vaá ãa báà nuá náa ólò gbaaá ló nómá kọ̀là lóá. 37 Nagé, tọ́ọ̀ nen náa ólò tú ãa míí tṍ mm̀ nómá bẹ̀lẹ̀ míí e bà tú kpá nom naamá. Be à náa vó, ãa mííá é pómè bẹ̀lẹ̀a vaá mííá eèa kẽ, vaá bẹ̀lẹ̀ e bà tú kpá nom naamáá é gbóó kyọ̀à. 38 Sõò bà ólò iè ge tú ãa míí tṍ mm̀ ãa bẹ̀lẹ̀ míí e bà tú kpá nom naamá. 39 Tọ́ọ̀ neń ea ni ṍ nómá míí náa ólò gbĩ́ gè ṍ ń-ãa boo béè kọọ̀ à é kọ́ọ̀, ‘Nómá mííá dú lé.’”