Lé Kpẹ̀a E Máátìù Beè Emí

25 “Boǹ Méné Bàrì dì belí òb kà nvín pá nyáá* e bà tú ba té sã́, vaá àà gé elá bànà págbálà ea é gé ilí va. 2 Vòò ọ̀và beè dú ból vaá vòò ọ̀và à nyimá nu. 3 Gbò e bà dú gbò bólá beè faalá té sã́, sõò bà náa beè faalá nóo,* 4 sõò gbò e bà nyímá nuá beè faalá nóo bií ló ba té sã́. 5 Boo béè kọọ̀ nen ea é ílí vaá náa beè vàlẹ̀ bá dù, dáá beè gbóó bã dẽè dénè ọ̀và, naa ní e bà dáa. 6 Tṍó ea ni dú taa tóm dáá, bà gbóó dã́ moǹ neń ea vúlí kpã́ kọọ̀: ‘Neń ea é ílí vaá a dú! Dọí kèdẹi gé zọíe nyoonai.’ 7 Òb kà nvín pá nyááá beè gbóó aa boo vaá kpènà ló gè kpáá tṍ nóo mm̀ ba té sã́. 8 Gbò e bà dú bólá à gbóó kọ́ nè gbò e bà nyímá nuá kọọ̀, ‘Dõonii sìgà bọọ nóo nei beele, boo béè kọọ̀ beélè sã́ é gé gimí.’ 9 Gbò e bà nyímá nuá à aalá nè va kọọ̀: ‘Née bulà kọ à é gbõomá ló dénè bẹ̀ì. Aalii sií ló gbò e bà ólò oo gé zalii ńboólo.’ 10 Boo tṍó e bà di èèlè e bà gé aà gé zalí nóo ã́, neń ea é ílí vaá beè gbóó dù. Gbò nvín pá nyáá e ba beè di kpènà lóá beè gbóó zọ̀ẹ bã tọ e bà é tõo ilá dóm nè vaá, vaá ba beè gbóó kùb nùtọ. 11 Tṍó e tṍó téní, nakà vòò kà nvín pá nyááá beè gbóó dù, vaá kọọ̀, ‘Tẹ́ẹ̀, Tẹ́ẹ̀, kùùlà nèi!’ 12 À aalá nè va kọọ̀, ‘M̀ lóò kà-kà bel nèi kọọ̀, ním nyímài ló.’

13 “Vó à naa, kilíí sĩ́ gè kuai dẽe ló, boo béè kọọ̀ nóo nyímàì deeá àbèè tṍóá.

14 “Boo béè kọọ̀ à dì belí ene kà gbálà ea gbĩ́ gè sí kyẽè, ea kólí pá a gyóòlo vaá tú gbò nu ea íe nvèè vá bá kọ bà á ẹ̀b nú ea kil ló. 15 A beè tú vòò kà tálẹǹt* nè enè nen, à tú bàà kà tálẹǹt nè na nená, à tú ene kà tálẹǹt nè nàgé dõona nèn. A beè nè buù ọ̀va dẹẹa boo bé e bà é láá siimá tóm naa, vaá gbóó àà sí kyẽè. 16 Tẽ̀ènè tṍóá, neń ea beè nè vòò kà tálẹǹta beè gbóó àà gé tú ńlẹ ùlmà ki, naa ní ea íe dõona kà vòò kà tálẹǹt gbàà. 17 Mm̀ tẽ̀ènè sĩ́deèá, neń ea beè nè bàà kà tálẹǹta beè ié nágé dõona kà bàà kà tálẹǹt gbàà. 18 Sõò gyóòlo ea beè nè ene kà tálẹǹta beè àà gé ùb bànà vaá tú kpègè e a tẹ̀ tọ beè nèeá gṍ m.

19 “Tṍó e gã́bug tṍó ni téní, tẹ̀ tọá beè gbóó dù vaá kọ́ nè gbò gyóòloá kọ bà á nè kpẹ̀a bé e ba beè tú kpègèa siimá tóm naa. 20 Neń ea beè nè vòò kà tálẹǹta beè gbóó faalá dõona kà vòò kà tálẹǹt bií ló domá, vaá kọọ̀, ‘Tẹ̀ tọ, o beè nèm vòò kà tálẹǹt. Ẹ̀b, m̀ íè dõona kà vòò kà tálẹǹt gbàà.’ 21 A tẹ̀ tọ à gbóó kọ́ nèe kọọ̀: ‘Ò láà naa, ọ̀ọ̀ lé gyóòlo eo bọ́ọ̀ló dẹ̀lẹ̀ nyíé boo. Ò bọ́ọ̀ló dẹ̀lẹ̀ nyíé boo mm̀ ńkem̀ nu, m̀ é tú ni sẹlẹ́ togó gã́bug nu. Dù gé zọ̀ o tẹ̀ tọ ié zààvà.’ 22 Neń ea beè nè bàà kà tálẹǹta beè du nágé vaá kọọ̀, ‘Tẹ̀ tọ, o beè nèm bàà kà tálẹǹt. Ẹ̀b, m̀ íè dõona kà bàà kà tálẹǹt gbàà.’ 23 A tẹ̀ tọ à gbóó kọ́ nèe kọọ̀: ‘Ò láà naa, ọ̀ọ̀ lé gyóòlo eo bọ́ọ̀ló dẹ̀lẹ̀ nyíé boo. Ò bọ́ọ̀ló dẹ̀lẹ̀ nyíé boo mm̀ ńkem̀ nu, m̀ é tú ni sẹlẹ́ togó gã́bug nu. Dù gé zọ̀ o tẹ̀ tọ ié zààvà.’

24 “Dee deè nvée, gyóòlo ea beè nè ene kà tálẹǹta beè gbóó dù, vaá kọọ̀: ‘Tẹ̀ tọ, m̀ nyímà kọọ̀ ọ̀ọ̀ kà tàvàlà nen, ò ólò bùùlà nu kĩée e nóo beè fò, vaá ò ólò õá súú-súú gyã́á e dõona gbò ní e ba beè sà sál lọl gbàà ẹ. 25 Vó beè naa kọọ̀ pọ̀ á siím naa ní em aà gé tú o kpègè li mm̀ kunukẽ̀. Nee o kpègèí.’ 26 A tẹ̀ tọ à kọ́ nèe kọọ̀: ‘Ọ̀ọ̀ kà pọ́lọ́ gyóòlo, vaá ò dúù kpọ̀lọ̀. O beè nyimá kọọ̀ m̀ ólò bùùlà nu lọl kĩée e ním beè fó nu, vaá bõonè ló súú-súú gyã́á e dõona gbò ní e ba beè sà sál lọl gbàà ẹ? 27 Beè vó, ò gáẹ̀ beè tú nà kpègè nvee bá gbò e bà ólò kpoogè dee ló kpègè, naa ní e tṍó em é dú, m̀ gáẹ̀ beè tú bií ló nvín ea é dọ́ boo.

28 “‘Vó à naa, tú kpègèá lọ̀líé bá nè neń ea íe òb kà tálẹǹta. 29 Boo béè kọọ̀, bà é kpáá tẹlẹ ló nè kọ̀láá nen ea íe, kọbé à íe zivè tõ̀ò. Sõò neń e bè náa íe, bà é tú bã̀àna ńkem ea dìé bá lọ̀líé bá. 30 Vaá ò tóbvii gyóòlo e bè á gé ló tọ́ọ̀ nuí tẹlẹí mm̀ kùkùù gín kèdẹi. Kĩá ní ea é tõo tò vaá taa dáa ẹ́.’

31 “Tṍó e Sã́áná nená é fáálá a ka nè dénè gbò nyómá tóm domá, à é gbóó ĩìtẽ́ boo a kpòté méné e ka di ló á. 32 Bà é tú dénè dó bõonèé kèsĩ́, vaá à é tú va dõ̀òmà bàà gbò, dì belí bé e neǹ kùdẽe ló naanà ból ólò kpòòlà naanà ból lọl gbàà kà ból naa ã́. 33 À é tú gbò naanà ból sẹẹa boo bá lè vaá tú gbò kà ból sẹẹa boo bá kie.

34 “Tṍóá, Ménéá é gbóó kọ́ nè gbò e bà dìé boo bá lè kọọ̀: ‘Dui, e boólo e ńdáà Tẹ̀ beè tãanè dee bá, dui gé bãí mm̀ Boǹ Méné ea beè kpoogè dee ló sẹ̀ẹ̀i lọ̀l gé dààà togó bàlà booí. 35 Boo béè kọọ̀ tákói beè tám ló vaá ò neḿ mi nu kọ ḿ dè, òòm à ká kpáá vaá ò neḿ mi nu gè õ̀. M beè dúí ló dì belí neǹ kyáà vaá ò tui bàà bá tuumaḿ mi. 36 Kọ̀là ló beè sàvà tám ló vaá ò neḿ mi nu gè nvèà. Kpálóm beè zọ̀ vaá ò ẹbvii nú ea kilím ló. M beè di tọọ̀ kpọ́gọ́lọ́ vaá ò kãaním mi.’ 37 Tṍóá, gbò lé lab dògò é gbóó bĩináe kọọ̀: ‘Neń Ea Íéi, mó tṍó ní e beè mòn kọọ̀ tákói tá ní ló vaá è nè ni nu gè dè e, vaá mó tṍó ní e beè mòn kọọ̀ òò ni ká kpáá vaá è nè ni nu gè õ̀ ẽ? 38 Mó tṍó ní eo beè dúí ló dì belí neǹ kyáà vaá è tú bàà bá tuumá ni ẽ́, vaá mó tṍó ní e bè nóo beè ié nu gè nvèà vaá è nè ni kọ̀là ló é? 39 Mó tṍó ní e beè mòn kọọ̀ kpáló ni zọ àbèè kọ ò di tọọ̀ kpọ́gọ́lọ́ vaá è kãá ni ẽ́?’ 40 Ménéá é gbóó aalá nè va kọọ̀, ‘M̀ lóò kà-kà bel nèi kọọ̀, boo béè kọ ò beè naanii vó nei enè nen ea kil kẽ ea di zẹ̀ẹ̀ pá ńdáà vígàí, ò náà nàì gé nei nda.’

41 “Tṍóá, à é gbóó kọ́ nè gbò e bà dìé boo bá kie kọọ̀: ‘Bàrì beè beelá bel bẽèi, tenii aalím mí sĩ́ kilíí dáà sã́ e bè náa é gímí, e ba beè kpoogè dee ló sẹ̀ẹ̀ Pọ́lọ́ Nyómá nè pá a gbò nyómá tóm. 42 Boo béè kọọ̀ tákói beè tám ló, sõò nóo beè neḿ mi tọ́ọ̀ kà nu gè dè. Òòm beè ká kpáá, sõò nóo beè neḿ mi tọ́ọ̀ kà nu gè õ̀. 43 M beè dúí ló dì belí neǹ kyáà, sõò nóo beè tui bàà bá tuumaḿ mi. Kọ̀là ló beè sàvà tám ló, sõò nóo beè neḿ mi nu gè nvèà. Kpálóm beè zọ̀ vaá bà siím tẹlẹ tọọ̀ kpọ́gọ́lọ́, sõò nóo beè ẹbvii nú ea kilím ló.’ 44 Tṍóá, ba é gbóó bĩináe kọọ̀: ‘Neń Ea Íéi, mó tṍó ní e beè mòn kọọ̀ tákói tá ní ló àbèè kọọ̀ òò ni ká kpáá àbèè tṍó eo beè dúí ló dì belí neǹ kyáà àbèè tṍó e kọ̀là ló beè sàvà tá ní ló àbèè tṍó e kpáló ni beè zọ̀ àbèè tṍó e ba beè sií ni tẹlẹ tọọ̀ kpọ́gọ́lọ́, vaá née nveè bá nè ni ẽ́?’ 45 Tṍóá, à é gbóó aalá nè va kọọ̀: ‘M̀ lóò kà-kà bel nèi kọọ̀, boo béè kọ nóo beè nveenii bá nei tọ́ọ̀ nen ea di zẹ̀ẹ̀ gbò e bà kil kẽí, nóo nveè nàì gé bá nei nda.’ 46 Bà é kyọsĩ́* nagbòí dọ̀ọ̀mà dè-dè, sõò gbò lé lab dògò é íe dùm e bè náa tá.”