Gbò Ketõ̀ò E Bà Kólí Nyòòmà Dùm Nè Kpá Bõ̀ònaló Sìtóm Kọ̀ Kpẹ̀a
© 2022 Christian Congregation of Jehovah’s Witnesses
JANUARY 2-8
GBÒ GYỌ́ EA DI MM̀ MOǸ BEL BÀRÌ | 2 KÍǸG 22-23
“Éé Ní Ea Náa À Bọ́ló Gè Kìlmà Kpá Ló Kẽ Ẽ́?”
w00 9/15 29-30
Jìhóvà Beè Ié Sàn Nyíe Ló Jòsáíà Boo Béè Kọọ̀ À Kilmà Kpá Ló Kẽ
Gbò e bà géè sí tóm ló tọọ̀ káíá beè tú agẹ bá siimá tóm lọl tã́gíní boo lọ̀ọ̀le. Nyíè Jòsáíà beè ẹẹ́ ló Jìhóvà boo béè tóm e gbòí géè sí boo gbò kiẽ́e e sìgà pá a gbò nómá tẹ̀ e ba beè dú gbò pọ́lọ́á beè kyọ̀ ea di ló tọọ̀ káí Bàrì. Boo tṍó e tómá gé kilsĩ́, Shéfàn beè domà kpẹ̀a. Mókà kpẹ̀a ẹ́? A beè faalá úl kpá! A beè kọọ̀ Pọ̀b Neǹ Vààla Gyọ́ọ̀ Hìlkáíà beè mòn “kpá log Jìhóvàí ea dú bá Mózìs.” (2 Krónikòl 34:12-18) Nyíée beè palàge ẹẹ ló gè mòn kà lèlàsĩ́ kpá Log e Mózìs beè emíí!
A beè tàn Jòsáíà ge dã́ kọ̀láá kà bel ea di mm̀ kpáá. Tṍó e Shéfàn gé bugi kpáá, ménéá beè gbĩ́ gè nyimá bé e buù kà logá síá tóm kilmàè ló ẹlẹ nè gbòa naa. A beè palàge ié lèèma ló bé e logá nveè kà mm̀ kà kà fã̀, vaá kọ́ nú ea kil ló kyọ̀àsĩ́ nè síí sii ea é dọ́ vá boo be bà bã́ mm̀ kyáá fã̀ naa. Tṍó ea mon kọọ̀ bà gáà naanìè dénè nú e log Bàrì kọ́, Jòsáíà beè baa a kọ̀là ló vaá nè log Hìlkáíà, Shéfàn, nè dõòna gbò kọọ̀: ‘Bĩinai lọlíí bá Jìhóvà ea kil ló nú e gbò moǹ bel ea di mm̀ kpáí kọ́; boo béè kọọ̀ Jìhóvà a palàge bã̀i súng ló, boo béè kọọ̀ bẹẹ gbò nómá tẹ̀ náa beè naa nú e gbò moǹ bel ea di mm̀ kpáí kọ́.’—2 Kíǹg 22:11-13; 2 Krónikòl 34:19-21.
w00 9/15 30 ¶2
Jìhóvà Beè Ié Sàn Nyíe Ló Jòsáíà Boo Béè Kọọ̀ À Kilmà Kpá Ló Kẽ
Gbò e Jòsáíà beè lẹ̀ẹ̀làa beè sí ló pábià neǹ kọ́ọ̀ bùlà Bàrì gbẹá Jèrúsalẹ̀m vaá faalá kpẹ̀a domá. Húldà beè kọ́ nè va gbò bel e Jìhóvà beè kọ́ nè ẹlẹ, ea zógè kọọ̀ gbò kyọ̀àsĩ́ ea di mm̀ kpá e bà ã́àa mòna é dọ́ boo dó ea ooà aa ló gè fã̀ Bàrìí. Jòsáíà náa é monmà dẽè kyọ̀àsĩ́í boo béè bé ea kilmà kpá ló kẽ nè Jìhóvà naa. Àé nyoone pá a gbò nómá tẹ̀, vaá tú fẹ́ẹ́-fẹẹ̀ ló bã̀àma mm̀ bànà ú.—2 Kíǹg 22:14-20; 2 Krónikòl 34:22-28.
Gbò Lé Nu Ea Di Mm̀ Kpá Káí
w01 4/15 26 ¶3-4
Òó Láá Naa Nú Ea Dú Lé Náa Kal Ló Béè Bé E Ba Beè Bumá Ni Naa
Náa kal ló béè kọọ̀ ba beè bumá Jòsáíà mm̀ tọ́ e bà náa géè fã̀ Bàrì, a beè kilsĩ́ gè naa nú ea léémá Jìhóvà. A bẹ̀l beè palàge dú lé naa ní e Kpá Káí kọ́ọ̀: “Tọ́ọ̀ kà méné e ba beè bẹ̀l besĩ́ì ẹlẹ á kálá bẹ̀l náa beè tú dénè ba nyíe nè dénè ba bùlà nè dénè ba kpóó fã̀àmà Bàrì dẹ̀ẹ̀a boo log Mózìs belí ẹlẹ; àbèè kọọ̀ à íe nen ea beè láá naa vó tṍó e ẹlẹ ni bẹ̀l lọ̀l.”—2 Kíǹg 23:19-25.
Jòsáíà beè zogè kà lé nu dòòmà bá sẹ̀ẹ̀ gbò e ba beè tení bá pọ́lọ́ búma aa kẽ! Éé ní e beele é láá nó lọl ló a nu dòòmà bá ẹ́? Éé ní ea beè nvèè bá nè Jòsáíà kọ á nè lé béèlàfùl vaá tõó boo é?
JANUARY 9-15
GBÒ GYỌ́ EA DI MM̀ MOǸ BEL BÀRÌ | 2 KÍǸG 24-25
“Kilsĩ́ Gè Zogè Kọ Ò Nyímàè Íb Tṍó E Dì”
w01 2/15 12 ¶2
Deè Bèèla Bel Jìhóvà A Íná Kuló!
2 Tọ́ọ̀ kà bàà-bàà bùlà á gé ló kọọ̀ gbò kọ́ọ̀ bùlà Bàrì e Zèfànáíà beè kọ̀ beè kẽ́eé nyíè nvín ãà Jòsáíà kọ à dú bíi gè kyọ̀sĩ́ fã̀ e bè náa õoà lọl Júdà. Sõò, láb e ménéí beè labví tení dú ló gè kyọ̀sĩ́ kyáá fã̀ lọl boo kunukẽ̀a náa beè lọl dénè pọ́lọ́ zẹ̀ẹ̀ gbòa, àbèè ge lọ̀l pọ́lọ́ a nómá tẹ̀ Méné Mánasà ea “beè èèlà miì gã́bug gbò sàn gbẹá Jerúsalẹ̀ma.” (2 Kíǹg 24:3, 4; 2 Krónikòl 34:3) Vóá naa, deè bèèla bel Jìhóvà é íè ge dù.
w07 3/15 11 ¶10
Ge Kọ́ Kà Ea Di Mm̀ Kpá Jèrèmáíà
Mm̀ gbáá 607 B.C.E. ní ea dú 11 gbáá e Méné Zèdìkáíà ni bẹlmà ẽ. Méné Nèbúkadnezà ea géè bẹ̀l Bábilọn beè kọ bàá kpẽá tení ló Jèrúsalẹ̀m mm̀ 18 ẽ́ ea kil nvéeá. Ní ea égè àlàbà deè ló vòò ẽ́ mm̀ ní ea égè 19 gbáá e Nèbúkanezà ni bẹlmà, Nèbùzáradàn ea dú togó boo gbò kùdẽe ló beè ‘dù,’ àbèè kọọ̀ a beè iná Jèrúsalẹ̀m. (2 Kíǹg 25:8) Be à sẹlẹ a beè aa kiẽ́e e bà ólò bõoná ea di nvéè gbọọ̀ boná, Nèbùzáradàn beè gbĩ́tẽ́ ló nú ea kil ló dìtõ̀òa vaá noo láb ea é lábví. Tṍó e taà dee ni téní, ní ea égè òb dee ló ẽ́á, a beè ‘dù’ àbèè ge bã Jèrúsalẹ̀m. Vaá tẹlẹ̀ sã́ ló boná.—Jèrèmáíà 52:12, 13.
Gbò Lé Nu Ea Di Mm̀ Kpá Káí
w05 8/1 12 ¶1
Ge Kọ́ Kà Ea Di Mm̀ Bàà Kà Kpá Kíǹg
24:3, 4. Boo bée bé e Mánasà ni eelà gã́bug mii naa, Jìhóvà “náa beè gbĩ́ gè iá ló nè” pá Júdà. Bàrì ólò nvèè ka ló miì gbò sàn. Èé láá àgala boo kọọ̀ Jìhóvà é kpẽ́ miì gbò sàn tení dú ló gè èèlà miì gbò e ba beè èèlà miiá.—Psalm 37:9-11; 145:20.
JANUARY 16-22
GBÒ GYỌ́ EA DI MM̀ MOǸ BEL BÀRÌ | 1 KRÓNIKÒL 1-3
“Kpá Káí Dú Kpá Ea Kọ́ Kà Lèlà Nú Ea Beè Naaá, Níì Pọ́ì Nú E Nen Doomà Dẽe Ló Kọ̀ Nì”
w09 9/1 14 ¶1
É Kọọ̀ Ádàm Nè Íìv Beè Dú Lèlà Sĩ́ Gbò Nen E Ba Beè Dì?
Dì belí nu dòòmà bá, zẹ́ẹ́ bugi togó boo gbò nómá tẹ̀ e bà dú Júù e ba bée ẽ́á mm̀ Túá Kà Kpá Krónikòl 1 tẹlẹ 9 togó nè kpá Lúùk 3 togó. Kpá Krónikòl kọ́ nú ea bọ́ló gè nvèè kpíí ló ea kil ló 48 kúúlí vaá kpá Lúùk à kọ́ nú ea kil ló 75 kúúlí. Kpá Lúùk kọ́ nú ea kil ló kúúlí e Jíízọ̀s Kráìst meà àà, vaá kpá Krónikòl à kọ́ nú ea kil ló kúúlí e gbò méné nè gbò vààla gyọ́ọ̀ pá Ízràẹ̀l aà dù. Pálàa kà kpáí kol béè gbò ea bọ́ló gè nvèè kpíí ló, dì belí Sólomòn, Dévìd, Jékọ̀b, Áízìk, Èbràhàm, Nóà, nè Ádàm. Dénè bée e pálàa kà kpáí kọ́ nú ea kil lóá dú kà lèlà sĩ́ gbò nen e ba beè dì, vaá Ádàm e pálàa kà kpáí kol béeí beè dú kà làlà sĩ́ nen ea beè dì.
w08 6/1 3 ¶4
Tù Múú Deè Nóàa Dú Kà Lèlà Nú Ea Beè Naaá, Níì Pọ́ì Nú E Nen Doomà Dẽe Ló Kọ̀ Nì
Bàà kà nòòtẽ́ ea di mm̀ Kpá Káí ea kil ló kúúlí gbò nen náa kọ é àgala boo kọọ̀ Nóà beè dú kà lèlà sĩ́ nen ea beè dì. (1 Krónikòl 1:4; Lúùk 3:36) Ẹ́zrà nè Lúùk, e ba beè emí nú ea kil ló gbò kúúlíí beè palàge tú ọ̀ẹ̀ dẽe gbĩimá tẽ́ ló nu. Lúùk beè gbĩ́tẽ́ ló mòn kọọ̀ Jíízọ̀s Kráìst beè aa mm̀ mana-mana Nóà.
w09 9/1 14-15
É Kọọ̀ Ádàm Nè Íìv Beè Dú Lèlà Sĩ́ Gbò Nen E Ba Beè Dì?
Nu dòòmà bá, bugi togó boo nu ààaá, ea dú ene kà nòòmànù Kpá Káí ea ólò palàge leemá gã́bug gbò tọbàrì. Nakà nòòmànùí kọ́ọ̀, Jíízọ̀s beè tú a dùm ea gbõomaá nè naamá nu ààa ge dùùmà gbò nen lọl bá náàkyọ̀. (Máátìù 20:28; Jọ́ọ̀n 3:16) Dì belí bé e nyímà naa, nu ààa dú nú e nen kpẽ́ ea tulà dẽè ge aamá àbèè ge zalmá nú ea beè pè àbèè nú e ba beè sọ̀bá. Níà nú ea náa vaá Kpá Káí à baatẽ́ Jíízọ̀s kọ “a beè tú a dùm nè boo béè ge aalá” gbò nen ẽ́. (1 Tímotì 2:6) Òó láá bĩiná kọọ̀ ge aalá éé? Kpá Káí áálá kọọ̀: “Dì belí bé e ú tulà dénè nen tení dú ló gè kọ bà aa m miì Ádàma naaá, vóá bé e kẽ̀èà aa ke mà ú é tulà nàgé dénè nen tení dú ló gè gbaá ló Kráìst naa ẽ́.” (1 Kọ́rìnt 15:22) Dùm ea gbõoma e Jíízọ̀s né boo gè aamá gbò e bà gban tṍ ló tulà dẽè dùm e Ádàm beè pee boo béè pọ́lọ́ ea beè sí gbẹá mm̀ gònò Ídèna. (Róm̀ 5:12) Mm̀ kà kà, beè Ádàm náa beè dì, ge kọọ̀ Kráìst tú a dùm vaamá gyọ́ọ náa gáẹ̀ dọ̀ tọ́ọ̀ kà bélè.
Gbò Lé Nu Ea Di Mm̀ Kpá Káí
it-1 911 ¶3-4
Gbò mana-mana
Béè gbò pábia. Sìgà tṍó, bà ólò kolí béè gbò bia gbàà gbò mana-mana tṍó ea dú bíi gè naa vó mm̀ nòòtẽ́. Mm̀ kpá Jénesìs 11:29, 30, bà kólí béè Sèráì (Sérà), níí dú boo béè kọọ̀ ból súú e ba beè kọ́ nú ea kil lóá bee mèà aa gbàà ẹlẹ, níì gbàà dõòna kà vaà Ébràhàm nì. Àé láá dú kọọ̀ ba beè kolí béè Mílkà boo béè kọọ̀ ẹlẹ ní ea dú nómá kà Rìbékà ea dú vaà Áízìk e, ea zógè kọọ̀ Rìbékà beè mèà aa mm̀ mana-mana ea dṹùnà Ébràhàm, boo béè kọọ̀ bà náa beè zìgà kọọ̀ Áízìk á ilá va lọl dõòna kà dó. (Jén. 22:20-23; 24:2-4) Mm̀ kpá Jénesìs 25:1, bà kólí béè Kètúrà ea égè bàà kà vaà Ébràhàm. Níí zógè kọọ̀ Ébràhàm beè ilí dõòna kà va tṍó e Sérà ni ú, vaá a beè láá kpáá bòn nvín mm̀ nú ea é sígá ló 40 gbáá aa ló tṍó e Jìhóvà beè sí tóm dũ̀ùnè ea náa kọ á láá bòn nvín mm̀ a deè áná. (Róm̀ 4:19; Jén. 24:67; 25:20) Nòòtẽ́í tẹ́lẹ̀ nàgé bàlà kẽ gbaa ló e pá Ízràẹ̀l íe kilma kiẽ́e e pá Mídìà nè Áràb dì.
Bà kólí nágé béè, Líà, Réchẹẹ̀l, nè gbò gã̀ Jékọ̀b, bií ló gbò nvín e ba beè màn nèe. (Jén. 35:21-26) Níí nvèè bá nèi kọ é dã́ ból ló bé e Bàrì beè zọ̀ gbò nvíní naaá nu tṍó e tṍó téní naa. Gbò bug ea bélí níí ní ea náa bà emí nágé béè dõònà kà gbò pábia nvee gbàà gbò mana-mana ẽ́. Bà ólò kòl va bée tṍó e bà dõo gyọ́ nè va. (Nóm. 26:33) Sõò níí Témà, Réhàb, nè Rúùt dú kele. À íe nu gè nvèè kpíí ló ea kil ló buù ọ̀và ea náa kọ bàá dú mana-mana e Jíízọ̀s Kráìst ea dú Mèsáíà meà aa m. (Jén. 38; Rúùt 1:3-5; 4:13-15; Máát. 1:1-5) Sìgà ketõ̀ò e bà kólí béè gbò pábia bií gbàà gbò mana-mana dú mm̀ 1 Krónikòl 2:35, 48, 49; 3:1-3, 5.
JANUARY 23-29
GBÒ GYỌ́ EA DI MM̀ MOǸ BEL BÀRÌ | 1 KRÓNIKÒL 4-6
“Éé Ní E Gbò Nà Tã̀àgã Ló Tẹ́lẹ Bàlà Kẽ Ea Kilím Ló É?”
w10 10/1 23 ¶3-7
Nen “Ea Ólò Dã́ Tã̀àgã Ló”
Jébẹ̀z beè dú nen ea ólò palàge tã̀àgã ló Bàrì. A beè dààmà togó a tã̀àgã ló tení dú ló gè bàn tã́áná dee bá ea aa bá Bàrì. A beè kpáá bàn taà kà nú ea zógè kọọ̀ a beè ié agẹ zìgà.
Túá kà, Jébẹ̀z beè bàn Bàrì kọọ̀: “Bọ̀ọ̀vẹ̀ gbàà na bon.” (10 gã́bel) Nakà gbálà e ka di lóí náa géè bé boo kunukẽ̀, àbèè ge bẹ́ nyíé ló nuù dõòna nèn. Àé láá dú gè kọọ̀ à géè bàn nú ea kil ló gbò nen, e níì kunukẽ̀ nì. Àé láá dú gè kọọ̀ à géè bàn kọọ̀ fẹ́ẹ́-fẹẹ̀ ló á kpáá palàge diè mm̀ a bon kọbéè gbò e bà gé fã kà kà Bàrì láá tõó m.
Ní ea égè bàà kà, Jébẹ̀z beè bàn kọọ̀ “bá” Bàrì á dièé boo. Bá Bàrìí tõó dọ̀ a kpóó ea ólò nvèèmà bá nè gbò e bà gé fã́e. (1 Krónikòl 29:12) Kọbé Jébẹ̀z íe gbò nú ea gé biíeí, a beè ból dẽe sĩ́ Bàrì e báẹ náa ólò dú ńkpulu kilma ló gbò e bà dẹlẹ́ẹ nyíé booá.—Àìzáíà 59:1.
Ní ea égè taà kà, Jébẹ̀z beè bàn Bàrì kọọ̀: “Kpènàm lọl bá tã̀àgã̀, kọbé pọ́lọ́ nu náa náa ḿ ló.” Tã́á bel ea kọ́ọ̀: “kọbé pọ́lọ́ nu náa náa ḿ ló” é láá tõó dọ̀ kọọ̀ Jébẹ̀z géè bàn kọọ̀ Bàrì á kpenàèe lọl bá tã̀àgã̀ àbèè ge naa kọ á láá beè elìè bá pọ́lọ́, sõò níì gè kọọ̀ tọ́ọ̀ kà tã̀àgã̀ á gá tulàèẹ nì.
Tã̀àgã ló Bàrì Jébẹ̀z tẹ́lẹ bàlà kẽ bé ea beè ié lèèma nyòòmà kà kà fã̀ naa, nè bé ea beè ié zìgà vaá dẹlẹ nyíé boo nen ea ólò dã́ tã̀àgã ló naa. Mósĩ́ deè ní e Jìhóvà beè aalá ẹ́? Nakà nòòtẽ́í íná kùbmà tení dú ló moǹ bel ea kọ́ọ̀: “Bàrì beè naa kọọ̀ nú ea beè bĩiná á naaá.”
Gbò Lé Nu Ea Di Mm̀ Kpá Káí
w05 10/1 9 ¶7
Ge Kọ́ Kà Ea Di Mm̀ Túá Kà Kpá Krónikòl
5:10, 18-22. Mm̀ tṍó e Méné Sọ́ọ̀l géè bẹ̀l, gbò tẽ́gã ea di deè kiẽ́e e nàànì ólò baa àà ea di ló Jọ́dàn beè bé èlbá gbò e bà aa mm̀ mana-mana Hágà, náa kal ló béè kọọ̀ gbòí beè dõ̀òà va bàà tóm gbò. Gbò gbálà e kói di lóí e bà aa tẽ́gã ea di deè kiẽ́e nàànì ólò baa àà ea di ló Jọ́dàn beè bé va èlbá, boo béè kọọ̀ ba beè dẹlẹ nyíé boo Jìhóvà vaá gbĩ́ nvèè bá lọ̀líé bá. Naanii mè é palàge dẹlẹ nyíé boo Jìhóvà boo tṍó e gé bé bẹẹ gbò ọ́b e bà íe kpóó, vaá è kpenà bẹẹ gbaa ló kilma ló Jìhóvà.—Ẹ́fẹsọ̀s 6:10-17.
JANUARY 30–FEBRUARY 5
GBÒ GYỌ́ EA DI MM̀ MOǸ BEL BÀRÌ | 1 KRÓNIKÒL 7-9
“Òé Láá Sí Gbò Tóm Ea Tavàlà Tení Dú Ló Nvèè Bá Ea Aa Bá Jìhóvà”
w05 10/1 9 ¶8
Ge Kọ́ Kà Ea Di Mm̀ Túá Kà Kpá Krónikòl
9:26, 27. Pá gãà Lívaì e bà géè kùdẽe ló gbò gbànsĩ́ ea téní bã tọọ̀ káíá, beè ié tóm ea palàge boo vaá bĩiná ba bọ́ọ̀ló dẹ̀lẹ̀ nyíé boo. Baala ní e ba beè tú ííla gè bã̀àma gbò ketõ̀ò káí ea di ló tọọ̀ káíá nvee báẹ́. Ba beè bọ́ló dẹ̀lẹ̀ nyíé boo kọ̀láá dee tení dú ló gè olòó kùùlà gbò nùtọí. Ba beè nèi tóm gè gbĩ́ gbò e bà di kiẽ́e e ólò kọ́ kpẹ̀a nè ge nvèè bá nè va kọ bàá dù ge fã̀ Jìhóvà. É kọọ̀ náa é bọ́ló kọ é tú bẹẹ tóm kolmá nu vaá bọ́ló dẹ̀lẹ̀ nyíé boo belí pá gãà Lívaì e ba beè olòó kùdẽe ló gbò gbànsĩ́ ea téní bã tọọ̀ káíá?
w11 9/15 32 ¶7
È Kọọ̀ Òó Láá Belí Fínihàs Tṍó Eo Kpeè Sĩ́ Ló Gbò Nu Ànà-ànà?
Tóm e Fínihàs beè sí gbẹá Ízràẹ̀l deè kéléá beè palàge bọọ; sõò a beè láá síe leevè tení dú ló gè ié agẹ ló, tàvẹ̀nù, nè gé dẹ̀ẹ̀a boo Bàrì. Vaá Jìhóvà beè tenmà Fínihàs boo beè kọọ̀ a beè tú ọ̀ẹ̀ dẽe ẹ̀bmà nú ea kil ló bõ̀ònatõ̀ò Bàrì. 1,000 gbáá aa ló tṍóá, nyómá Bàrì beè tú Ẹ́zrà emá kọọ̀: “Fínihàs ea dú nvín Èlíezà ní ea beè dú ba neǹ tùle tṍó ea kil nvéeá ẽ́, vaá Jìhóvà beè dìé ló.” (1 Kró. 9:20) È ẹbmà dẽe kọ á mèà nàgé naa vó ló kọ̀láá gbò e bà gé túlè gbò níí Bàrì deè nieí, nè dénè gbò nyòòne nvéè Kráìst e bà sí tóm nèe mm̀ bọ́ọ̀ló dẹ̀lẹ̀ nyíé boo.
Gbò Lé Nu Ea Di Mm̀ Kpá Káí
w10 12/15 21 ¶6
Ọ́lí Sọ́l Nè Jìhóvà!
6 À palàge dú kà kà kọọ̀, Jìhóvà beè kọ́ tenmá gã́ pá a gbò kọ́ọ̀ bùlà Bàrì kọọ̀ pá a gyóòló á ọlí sọ́l leemàè ẽ. Kàsĩ́, à íe gbò tóm e ba beè lọl bá gbò ọ́lì sọ́l e bà aa tẽgãà gbò vààla gyọ́ọ kọbé bà láá ié gã́bug tṍó gè emá sọ́l nè ge nó tení boo.—1 Kró. 9:33.
FEBRUARY 6-12
GBÒ GYỌ́ EA DI MM̀ MOǸ BEL BÀRÌ | 1 KRÓNIKÒL 10-12
“Siè Kpóó Ló O Tàn Ge Naa Nú Ea Léémá Bàrì”
w12 11/15 6 ¶12-13
“Noòmàm Kọ Ḿ Naa O Bùlà”
12 À bọ́ló kọ é no nágé íb lèèma e Dévìd beè ié nyòomà gbò nòòkúu ea di mm̀ Log Bàrì, nè a tàn ge gbàntṍ ló. Bugi togó boo nú ea beè naaá tṍó e Dévìd beè zogè kọ à tanìèe “gè ọẹ̀ múú ea aa mm̀ bànà múú Bẹ́tlẹ̀hẹ̀m.” Taà kà gbò bé Dévìd beè gũá bã boná, ea dú kiẽ́e pá Fìlístìà beè dìa vaá ivi múú má Dévìd. Sõò, “Dévìd náa beè zìgà ge õ̀, tãa vó a beè èèla kẽ nè Jìhóvà.” Ló éé? Dévìd baatẽ́ kọ́ọ̀: “À dú nú e nyìmànù á gé m kèsĩ́ nà Bàrì, kọ ḿ naa níí! É kọ m̀ḿ ṍ míì gbò gbálàí? Boo beè kọọ̀ ba beè tú ba dùm nvee mm̀ gẹẹ-gẹẹ ló boo beè ge ivi múúá.”—1 Kró. 11:15-19.
13 Dévìd beè nyimá kọọ̀ Log beè tenmá kọọ̀ bàá gá õ̀ àbèè ge bà mii, sõò á dú gè èèla kẽ nè Jìhóvà. A beè dã nágé tẽ́ ló nú ea náa à bọ́ló kọ níí á naaá. Dévìd beè nyimá kọọ̀ “dùm nú ea di dùm di mm̀ a mii.” Náa kal ló béè kọọ̀ níáè bèè múú, níì mii ni. Éé ní ea beè naa kọọ̀ Dévìd á gá õ̀e? A beè dã́tẽ́ ló nòòkúu ea beè di nvéè logá. Dévìd beè ẹ̀b kọọ̀, miì táàa neni téní ból múúá. Vóà naa, náa beè dú nú e nyìmànù di m kọ á õ̀. Tãa vó ea ṍ, a beè beeláfùl gè èèla kẽ.—Lìv. 17:11; Dìt. 12:23, 24.
w18.06 17 ¶5-6
Sọ̀tọ́ Dẽe Kọọ̀ Gbò Log Bàrì Nè Gbò A Nòòkúu Á Bumá O Kpóó Bug
5 Kọbéè gbò log Bàrì láá dọ̀ bélè nèi, àé bọ́ló kọ é naa èlmà aa gè bugi àbèè ge nyimá nú ea kọ́. Èé íè ge vùlè vaá fã̀ dẽè gbò a log. Moǹ Bel Bàrì kọ́ọ̀: “Ọbví nú ea dú pọ́lọ́, vaá ò vulè nú ea dú lé.” (Émòs 5:15) Sõò èé láá naa níá naa vàẹ? Ene kà pọ̀b sĩ́deè dú gè nó gè ẹ̀b nu belí bé e Jìhóvà ẹb naa. Ge doolé ló: Ni doomà dẽe ló kọọ̀ nóo ólò láá palàge daa leevè. O neǹ dóm biè à gbóó kọ́ nè ni íb gyã́á eo é dé, íb bìlà bil gànè ló eo é bilà, nè bé eo é nyááná bá ló o sĩ́deè tõò dùm naa. Tṍó eo doò ge naa gbò nuí, ò gbóó mòn kọ à nveè bá nè ni! Nyíé ni é palàge ẹẹ́ ló o neǹ dóm biè kọ à nvèè bá naa kọọ̀ lóó ni á kpáá valí.
6 Mm̀ tẽ̀ènè sĩ́deèá, bẹẹ Neǹ dèmnù a néi gbò log ea é láá kpènài lọl bá gbò nú e náàkyọ̀ ni tẹ́lẹ̀í boo, vaá naa kọọ̀ bẹẹ dùm á kpáá dú lé. Bugi togó boo bélè e ólò ié lọl ló gè gbàntṍ ló gbò log Bàrì ea kil ló gè kpọ́ kyáá bel, ge kẹlẹ nen, ge zìb nu, ge kuná gã̀, ge tõó dùm gboo-gboo ló, nè ge fã̀ zọ. (Bugi Próvẹẹ̀b 6:16-19; Kùùà 21:8) Tṍó e íè gbò tã́áná dee bá ea aa ló gè naa nú mm̀ sĩ́deè ea léémá Jìhóvà, à ólò naa kọ é kpáá palàge vùlè Jìhóvà vaá ié lèèmà kilma ló gbò a log.
Gbò Lé Nu Ea Di Mm̀ Kpá Káí
it-1 1058 ¶5-6
Nyíe
Ge Tú “Dénè O Nyíe” Siimá Tóm. Nyíè nen é íè ge tõ̀ò bé ea ólò dì naa besĩ́ à kálá láá siá tóm leevè, sõò nú ea doà bá nyíè nen é láá pòòà. Dévìd beè tã̀àgã ló Bàrì kọọ̀: “Naa kọ ḿ ié tẽ̀ènè ból nyíe gè siiá pọ̀ ló o bée. (Ps. 86:11) Íb nen ea dì naa vó é láá ié “bàà-bàà bùlà,”vaá dú gbẹ̀ẹ̀lì-gbẹ̀ẹ̀lì mm̀ a fã̀ Bàrì. (Ps. 119:113; Kùùà 3:16) Nen é láá ié “bàà-bàà bùlà” (naamá gè ié bàà kà nyíe), vaá gbĩ́ gè sí tóm nè bàà kà tẹ̀ tọ, àbèè ge tú kẹ̀lẹ̀-kẹ̀lẹ̀ kọọmá nú ea dú kele ló nú ea gé bugi togó boo. (1 Kró. 12:33; Ps. 12:2, ekk) Jíízọ̀s beè palàge tú íb nakà dùm bàà sĩ́í ẹẹ́ dẹ̀i.—Máát. 15:7, 8.
Nen ea gbĩ́ gè fã̀ Bàrì náa é íè ge tú bàà-bàà bùlà àbèè bàà kà nyíe fã̀àmàe, tãa vó àé tú tẽ̀ènè ból nyíe fã̀àmàe. (1 Kró. 28:9) Níí palàge bĩiná sìà kpóó ló tã́gíní bé e bẹẹ nyíe ólò kẹlẹ́í vaá naa kọ é ié tàn ge sí pọ́lọ́á. (Jèr. 17:9, 10; Jén. 8:21) Gbò nú ea é láá nvèè bá nèi kọ é ié tẽ̀ènè ból nyíe dú: tã̀àgã ló Bàrì (Ps. 119:145; Làm. 3:41), gè olòó nó Kpá Káí lee (Ẹ́zrà 7:10; Prọ́. 15:28), gè olòó tú bẹ̀à sã́ bùlà kọọmá kpẹ̀a (doolé ló Jèr. 20:9), nè ge zọ̀ gbò e bà gé tú tẽ̀ènè ból nyíe fã̀àmà Jìhóvà naaá nu.—Doolé ló 2 Kíǹ. 10:15, 16.
FEBRUARY 13-19
GBÒ GYỌ́ EA DI MM̀ MOǸ BEL BÀRÌ | 1 KRÓNIKÒL 13-16
“Ge Gbàntṍ Ló Tùle Ólò Naa Kọọ̀ Nu Á Lèla Sĩ́”
w03 5/1 10-11
É Kọ Ò Ólò Bĩiná Kọọ̀, “Ãàẽ Ní E Jìhóvà Dìe?”
12 Tṍó e ba ni oomà kpó zílá kilma Ízràẹ̀l vaá a tõó Kìrìàt-jéirìm mm̀ gã́bug gbáá, Méné Dévìd beè gbóó gbĩ́ gè tú kilma Jèrúsalẹ̀m. A beè gbóó kọ́ nè gbò e ba beè dú togó boo gbò nená kọọ̀ àé fáàlàẹ̀ kpó zílá aamàẹ̀ ‘be àé léémá va nè be àé léémá Jìhóvà naa vó.’ Sõò náa beè aa deè gbĩ́ gè nyimá nú ea dú bùlà Jìhóvà kilma ló belí. Be a beè náa vó, náa gáẹ̀ beè tú Kpó Zílá nvee boo nom̀ tò. Bàrì beè kọọ̀ pá nvín Lívaì e bà dú gãà Kóhàt ní e bàá bẹ̀ẹ̀là kpó zílá boo gànàgĩ̀e. Náa kal ló béè kọọ̀ Dévìd beè olòó bĩiná nú ea é náa lọl bá Jìhóvà, sõò náa beè naa vó boo bá ea bọ́ló boo nakà dìtõ̀òí. Kà pọ́lọ́ nu beè sìlà aa m. Tṍó e tṍó téní, Dévìd beè zìgà kọ bà lọẹ̀ tṍó ea kọ́ọ̀: “Jìhóvà beélè Bàrì beè nvèèi súng ló, boo béè kọọ̀ née beè zẹ́ẹ́ bĩiná a bùlà belí bé e ólò naa.”—1 Krónikòl 13:1-3; 15:11-13; Nómbà 4:4-6, 15; 7:1-9.
w03 5/1 11 ¶13
É Kọ Ò Ólò Bĩiná Kọọ̀, “Ãàẽ Ní E Jìhóvà Dìe?”
13 Ba beè ọlí sọ́l e Dévìd beè emí tṍó e pá Lívaì gbóó dàlà Kpó Zílá lọl tọọ̀ Obed-edom kilma Jèrúsalẹ̀m. Gbò moǹ bel ge kẽ̀èa boo ea beè di mm̀ sọ́lá kọ́ọ̀: “Gbĩ́ Jìhóvà nè a kói, gbĩe dénè tṍó. Kẽ̀èa boo gbò a lé tóm ea beè sì, gbò a tóm dũ̀ùnè nè gbò a lé bèèla ea aàẹ́ gã́.”—1 Krónikòl 16:11, 12.
Gbò Lé Nu Ea Di Mm̀ Kpá Káí
w14 1/15 10 ¶14
Fã̀ Jìhóvà, Ea Dú Méné Ea Dì Dọ̀ Dè-dè
14 Dévìd beè tú kpó zíl ea di káíá kilma Jèrúsalẹ̀m. Kèbá nakà dìtõ̀ò ẹ́ẹ́-ẹẹ̀ nyíéí, pá Lívaì beè ọlí ene kà sọ́l lèèlà e gbò moǹ bel ea di m bọ́ló gè nvèè kpíí ló, ea ẽ́á mm̀ 1 Krónikòl 16:31 ea kọ́ọ̀: “Kọ́ nè dénè dó àla kọọ̀: ‘Jìhóvà a dú Méné!’ ” Nen é láá bĩiná kọọ̀, ‘Tã́gíní bé e Jìhóvà dú Méné ea dì leeá, à náà và bà kọ à dú Méné tṍóá ẽ́?’ Jìhóvà ólò dú Méné tṍó ea tú a kpóó gè bẹ̀l tẹlẹ bàlà kẽ àbèè tṍó ea náa vó tení dú ló nú ea tõó dọ̀ ẹlẹ tṍó ea gé náa enè íb nu. Na gá ea di ló gè dú Méné e Jìhóvà dúí palàge bọọ. Besĩ́ì Dévìd à kálá ù, Jìhóvà beè zìgà nèe kọọ̀ a gè dú méné é di dọ̀ dè-dè, tṍó ea kọ́ọ̀: “Nda é tú o nvín naamá méné tṍó e olo ni ú àà, nda é náa kọọ̀ a boǹ méné á palàge aga ló.” (2 Sam. 7:12, 13) A beè naaá kọọ̀ “nvín” Dévìd á mèà tṍó e nú ea é sígá ló 1,000 gbáá ni téní. Mée ní ea beè dú a nvíní ẽ́, vaá mó tṍó ní ea beè dú Méné ẽ́?
FEBRUARY 20-26
GBÒ GYỌ́ EA DI MM̀ MOǸ BEL BÀRÌ | 1 KRÓNIKÒL 17-19
“Kilsĩ́ Gè Ié Zààvà Bã̀àna Tṍó E Nú Eo Géè Ẹ̀bmà Dẽe Náa Nááá”
w06 7/15 19 ¶1
Kà Bùlà Gbẹẹ́ Boo Bé E Bõ̀ònatõ̀ò Jìhóvà Dú Lé Naa
DÉVÌD dú enè nen e Kpá Káí e ba beè emí mm̀ dém bel Híbrù palàge ló bel ea kilíé ló. Nakà neǹ kùdẽe ló, neǹ ọ́lì sọ́l, neǹ kọ́ọ̀ bùlà Bàrì, nè ménéi beè palàge dẹlẹ nyíé boo Jìhóvà Bàrì. Bé e Dévìd beè ié lèèmà kilma ló Jìhóvà naa beè naa kọ á gbĩ́ gè tìb tọ nèe. Íb tọ àbèè tọọ̀ káí ea géè gbĩ́ gè tìbví ní ea gáẹ̀ beè dú kiẽ́e e pá Ízràẹ̀l é tõo fã̀ Bàrì e. Dévìd beè nyimá kọọ̀ nòònù ge tìb tọọ̀ káíí é man zààvà nè tã́áná deè bá nèà gbò nvín Bàrì. Vó beè naa kọọ̀ Dévìd á ọlí kọọ̀: “Ẹ́ẹ́-ẹẹ̀ nyíe á di ló nen e [Jìhóvà] sa vaá túe nvea ló, kọbé à láá tõó mm̀ o gba be. Gbò lé nu ea di o tọ é dĩinéi ló, kiẽ́e ea di káí ea di ló o tọọ̀ káí.”—Psalm 65:4.
Gbò Nèà Deè Eo Íè Á Zaavẹ́ Ni Ló
11 Mm̀ tẽ̀ènè sĩ́ deèá, èé láá kpáá palàge ié zààvà be è piigà bé e bẹẹ kpóó sim tùlà naa gè sí tóm nè Jìhóvà. Tú “dénè [o] tṍó” kọọmá kpẹ̀a, vaá sí gbò tóm ea di mm̀ bõ̀ònatõ̀ò. (Tóm 18:5; Híb. 10:24, 25) Kpoogá dee ló nònù kọbé ò láá aalá bel mm̀ sĩ́deè ea é síè kpóó ló nen. Tú gbò nu gè naa e bà né ni mm̀ nònù èèlè nyíè zẹ̀ẹ̀ sè kolmá nu. Tṍó e bà kọ́ ó nvèè bá sí enè íb tóm, vàlẹ̀ bá sì, vaá ò síe mm̀ sĩ́deè e bàé dẹlẹ́ ni nyíé boo. Ó gá ẹ̀b tọ́ọ̀ kà tóm e bà né ni belí kọ bà dómá boo tṍó e náa bọ́ló. Pììgà ge sìm kilsĩ́ mm̀ o kalì. (Pró. 22:29) Bé eo piigà ge sí gbò tóm ea di mm̀ bõ̀ònatõ̀ò naa, níà bé eo é sim kilsĩ́ vaá kpáá palàge ié zààvà naa ẽ́. (Gàl. 6:4) Àé náa kọ ó láá zọ̀ dõòna gbò ié ẹ́ẹ́-ẹẹ̀ nyíe tṍó e bà íe gbò dọ̀ tóm ea géè tàn ni gè ié.—Róm̀ 12:15; Gàl. 5:26.
Gbò Lé Nu Ea Di Mm̀ Kpá Káí
w20.02 12, ńkpó
Beele Palàge Vùlè Bẹẹ Tẹ̀, Jìhóvà
É Kọọ̀ Jìhóvà Bulà Nú Ea Kil Ló Nda?
É kọ o beè láá bĩìà o bá kọọ̀: ‘Éé ní ea náa vaá Jìhóvà à nvèè kpíí ló nda lọl zẹ̀ẹ̀ gã́bug gã gbò nen e bà di boo kunukẽ̀í ẽ́?’ Be à dì naa vó, níì áá ọ̀ọ̀ nì. Méné Dévìd beè emí kọọ̀: “Ááà Jìhóvà, éé ní e nen dú eo bulà nú ea kilíé ló é, éé ní e nvín nen dúé eo bugì togó kìlmàé ló é?” (Ps. 144:3) Dévìd beè àgala boo kọọ̀ Jìhóvà palàge nyimàèe ló. (1 Kró. 17:16-18) Vaá tení dú ló a Moǹ Bel nè a bõ̀ònatõ̀ò, Jìhóvà náa kọ ó àgala boo kọọ̀ ẹlẹ nveenìè kpíí ló vulè eo íè kilmàèé ló. Bugi togó boo sìgà gbò moǹ bel ea di mm̀ Kpá Káí ea é nveè bá nè ni kọ ó àgala boo kọọ̀ Jìhóvà nveenìè ni kpíí ló:
• Jìhóvà beè nyimá ni ló besĩ́ ò kálá mèà.—Ps. 139:16.
• Jìhóvà nyímá nu ea dì ní nyíe, nè gbò o tóm̀ bùlà.—1 Kró. 28:9.
• Jìhóvà ólò pãane tṍ ló buù kà o tã̀àgã ló.—Ps. 65:2.
• Gbò o láb ólò tọá ló Jìhóvà.—Pró. 27:11.
• Jìhóvà bee dùùlà ni nvea ló.—Jọ́ọ̀n 6:44.
• Be ò ú, Jìhóvà palàge nyimá ni ló naa ní ea é láá kẽeé ni lọl kemà ú. Àé kpáá òòmà o nom̀ kpá ló sẹlẹ bé ea beè dì naa vaá òòmà o bug naa ní eo é láá kpáá kẽ̀èa boo gbò nú eo beè nyimá vaá dú íb nen eo beè dù.—Jọ́ọ̀n 11:21-26, 39-44; Tóm 24:15.
FEBRUARY 27–MARCH 5
GBÒ GYỌ́ EA DI MM̀ MOǸ BEL BÀRÌ | 1 KRÓNIKÒL 20-22
“Nvèè Bá Nè Gbò Nvín Ãa Kọ Bàá Láá Fã̀ Jìhóvà”
w17.01 29 ¶8
Tú Gbò Nuí “Nè Gbò E Nen É Láá Dẹlẹ Nyíé Boo”
8 Bugi 1 Krónikòl 22:5. Dévìd beè láá tuumá kọọ̀ Sólomòn náa sim tùlà ge ẹ̀b nú ea kil ló íb tóm ea bọọ́ kẽ́é naaí. Boo béè kọọ̀ tọọ̀ káíá é “palàge bọọ́ kẽ́é,” vaá tṍóá Sólomòn beè “di dí ãa e togóe gáà bọ̀ọ̀gẹ̀ tùlà nu.” Sõò Dévìd beè nyimá kọọ̀ Jìhóvà é nveè bá nè Sólomòn kọ á láá sí tóm ea née. Vó beè naa kọọ̀ Dévìd á ká bùlà gbẹẹ́ boo nú ea é láá naa mm̀ ge nvèèmà bá nèe, tení dú gè kpoogè dee ló gã́bug nu ge tìbmà tọá.
w17.01 29 ¶7
Tú Gbò Nuí “Nè Gbò E Nen É Láá Dẹlẹ Nyíé Boo”
7 Dévìd náa beè òòà aa ló gè nvèè bá nèe, boo béè kọọ̀ bà náa é tú ka ea dú ló tóm gè tìb tọọ̀ káíá neè ẹlẹ. Kàsĩ́, ba beè nyimá ló tọọ̀ káíá naamá tọọ̀ káí Sólomòn, níì níí Dévìd nì. Náa kal ló béè kọọ̀ àé láá dú kọọ̀ nyíè Dévìd náa beè ẹẹ, boo béè kọọ̀ náa beè láá naa nú ea beè dìé bùlà, a beè nvèè sãa kúm tómí. A beè tú bẹ̀à sã́ bùlà nòòmà kele-kele gbò e bàé sí tóm vaá bõonè ló pololoò, ẹ́ẹ́ kpé, nè nóò kpé, bií ló gbò báà té sídà. Gbá ló vó, a beè siè kpóó ló Sólomòn vaá kọọ̀: “Kátogóí, ńdáà nvín, Jìhóvà á tõó ní ló, naa ní eo é kilsĩ́ vaá tìb tọ nè Jìhóvà o Bàrì, dì belí bé ea beè kọ́ kìlmà ní ló naaá.”—1 Kró. 22:11, 14-16.
w18.03 11-12 ¶14-15
Gbò Tẹ̀ Nè Kà, É Kọ Ò Gé Nveenii Bá Nei Bọọ Nvín Kọ Á Sìm Kilsĩ́ Vaá Dììa Múú?
14 Dì belí gbò e Bàrì beè nè tóm gè kùdẽe ló, gbò kànen mm̀ bõ̀ònatõ̀ò é láá siè kpóó ló gbò tẹ̀ nè kà, tení dú ló gè ló gbò bel ea é náa kọọ̀ ba gbò nvín á láá tú gè fã̀ Bàrì naamá ba nu sẹ̀ẹ̀a sĩ́. Ene kà vígà pábia ea ni tú nú ea é sígá ló 70 gbáá siimá tóm gyàdeè sĩ́ tóm kẽèa boo bélè ea beè ièè lọlìe ló loa sọ́l ea beè zọẹ̀ Vígà Charles T. Russell loàè tṍó ea beè toolàẹ̀ ọ̀ọ̀lẹ̀ gbáá. Vígà pábiaá kọọ̀, “A beè tú 15 mínìt zọ̀m loomá bel boo nà gbò nu sẹ̀ẹ̀a sĩ́ mm̀ ge fã̀ Bàrì.” Mm̀ kà kà, gbò bel ea dú lé nè gbò moǹ bel sìà kpóó ló é láá ié kà pọ̀b kà nú ea é náa ló dùm nen. (Pró. 25:11) Gbò kànen é láá kolí nágé gbò tẹ̀ nè kà nè ba gbò nvín ló tóm Kíndòm Họ́ọ̀l, vaá nè tóm ba gbò nvín dẹ̀ẹ̀a boo ba gbáá nè ba kói.
15 Dénè nen ea di mm̀ bõ̀ònatõ̀ò é láá nvèè bá tení dú ló gè ié lèèmá ea bọ́ló mm̀ gbò nvín ãa. Níí bãàa mm̀ ge di zìle nyòòmà ge gbĩ́ gè nyimá bé e bà gé sim kilsĩ́ mm̀ ge fã̀ Bàrì naa. É kọọ̀ à íe nvín ãa ea ólò nè kà lé ààla bel gbẹá nònù àbèè ge ié nu gè naa gbẹá nònù èèlè nyíè zẹ̀ẹ̀ sè? É kọọ̀ à íe nvín ãa ea ni láá bé èlbá dò ẹ̀b ge bọ́ló dẹ̀lẹ̀ nyíé boo, àbèè ge láá tú nèà deè ea íe kọọmá kpẹ̀a gbẹá tọọ̀ kpá? Di kpènà ló gè lèèlà va tṍó ea bọ́ló. Òó láá naamá nu sẹ̀ẹ̀a sĩ́ gè olòó zọ̀ ene kà nvín ãa loá bel besĩ́ bà kálá bã̀ nònù nè tṍó e ba ni zaalà, naamá ge zogè bé eo íèèe kàà lèèmá m naa. Na sĩ́deèí nè gbò ńdõòna kà é láá naa kọọ̀ gbò nvín ãa á nyimá kọọ̀ bà dṹùnàè “bõ̀ònatõ̀ò.”—Ps. 35:18.
Gbò Lé Nu Ea Di Mm̀ Kpá Káí
w05 10/1 11 ¶6
Ge Kọ́ Kà Ea Di Mm̀ Túá Kà Kpá Krónikòl
21:13-15. Jìhóvà beè nè log nyómá tómá kọ á zẹ́ẹ́ elá ló gè domà kpọ̀té boo béè kọọ̀ mòn tã̀àgã̀ pá A gbò tọ́aẹ́ ló. Mm̀ kà kà, “a sàn nyíe bọọ́ kẽ́é.”