2 NU GÈ NÒ

Bá Ge Zọ̀ọ̀mà Nen Loá Sọ́l

2 Kọ́rìnt 2:17

GE KỌ́ MM̀ ŃKPULU BÁ: Ló bel belí bé eo ólò ló naa mm̀ sĩ́deè ea zógè bé eo ẹbvì togó bel eo gé ló bel boo nè gbò e bà gé pãane tṍ ló o bel naa.

BÉ EO É NÁA NAA:

Tã̀àgã ló Bàrì vaá ò kpoogá dee ló leevè. Bàn kọ Bàrì á nvèè bá nè ni kọ ó gá ká bùlà gbẹẹ́ boo o bá, sõò boo o lẹ̀ẹ̀la tóm. Palàge dã́tẽ́ ló gá ea bĩ́íná kọ ó baatẽ́ leevè. Ló bel mm̀ bá eo ólò loomá bel; ó gá dõogẽ bugi tení boo gbò belá dì belí bé e bà émí dẽè kpá naa.

Be ò noò ge bugi lọl mm̀ Kpá Káí àbèè mm̀ dõòna kà kpá, palàge tení boo leevè kọbé ò láá bugi õ̀òna dẽe. Be à gá náa vaá bà emí bel e nen beè lò, bugí nvèè kà m, vaá ó gá naa zelmá kẽ.
Ló bel lọa mm̀ o nyíe. Bugi togó boo nú ea náa vaá gbò e bà gé pãané ni tṍ ló à ié bíi ló gè dã́ lẹ̀ẹ̀la tómá. Olòó ẹ̀b va sĩ́. Vó é náa kọọ̀ bé eo elá èla naa, bé eo túù bá loomá bel naa, nè sĩ́ ni é zógè kà kà bel ea di mm̀ bel eo gé ló nè bé e nu tọ́a ní ló naa.

Ó gá dòòmà kọọ̀ ge ló bel dì belí bé eo ólò ló bel naa dú tẽ̀ènè kà ló tṍó eo lóò bel lọ̀à dẽe ló. Tú kà ea di mm̀ o bel tẹlẹ bàlà kẽ tení dú ló gè ló õ̀òa dẽe bel e gbò nen é dã́tẽ́ ló.
Ẹ̀b sĩ́ gbò e bà gé pãané ni tṍ ló. Olòó ẹ̀b sĩ́ gbò e bà gé pãané ni tṍ ló é be à dú kiẽ́e e gbò nen náa ẹb naamá pọ́lọ́ nu. Tṍó eo gé ló bel gbẹa kèsĩ́ gbò nen, ẹ̀b sĩ́ buù nen ea di kẽ, tãa vó eo dõogẽ ẹ̀b àbèè ge dàlà dẽe lọl kẽ ẹ̀bmà dénè gbòa.