Mósĩ́ Deè Ní E Kpá Káí É Láá Nvèè Bá Nè Ni Ẽ́?

Gã́bug bẹ̀ì ólò gbĩ́ gè nyimá nú ea kil ló dùm, mòn tã̀àgã̀, ú, nè nú ea é nááá dì deèsĩ́. È ólò ié nágé bíi ló nvèè bá ea kil ló bé eé láá kpoogè dee ló gbò tã̀àgã̀ e kpeè sĩ́ ló buù dee naa. Dì belí bé eé náa vaá láá ié kpègè ge ẹ̀bmà nú ea kil ló bẹẹ bá, àbèè bé eé náa vaá pá bẹẹ tọ íe ẹ́ẹ́ nyíe. Gã́bug nen a mon kọọ̀ Kpá Káí áálá gbò bíb ea palàge dú bíi mm̀ dùm, vaá faalá gbò dùùlà bá deè tṍ ea é dọ bélè nèi buù dee. É kọọ̀ à íe nen eo nyímà ló e Kpá Káí é láá nvèè bá nèe?

1. Mókà sìgà gbò bíb ní e Kpá Káí áálá ẹ́?

Kpá Káí áálá gbò bíb ea palàge dú bíi ea kọ́ọ̀: Dùm beè dààà togó naa vàẹ? Éé ní ea dú bùlà ea di nvéè dùm ẽ? Éé ní ea náa vaá gbò nen à mòn tã̀àgã̀ ẽ? Éé ní ea ólò naaá tṍó e nen ú é? Tã́gíní bé e fẹ́ẹ́-fẹẹ̀ ló ólò leemá dénè nená, éé ní ea náa vaá bé gím à dì e? Éé ní ea é nááá ló boo kunukẽ̀í dì deèsĩ́ ẽ́? Kpá Káí síèi kpóó ló kọ é gbĩ́ ààla gbò bíbví, vaá gã́bug gãà gbò nen a íe ààla ea dĩiné va ló.

2. Mósĩ́ deè ní e Kpá Káí é láá nvèè bá nèi kọ é dé kpéè ló dùm buù dee é?

Kpá Káí néi lé dùùlà bá deè tṍ. Dì belí nu dòòmà bá, à kọ́ bé e pá tọ é láá ié kàà ẹ́ẹ́ nyíe naa. À kọ́ gbò nú eé láá naa tṍó e di kèbá tã̀àgã̀ nè bé eé láá dé kpéè ló bẹẹ tóm naa. Òé nyímá nú e Kpá Káí nóòmà ea kil ló gbò togó belí nè gbò ńdõòna kà tṍó e gé nó kpáí kilma sĩ́. Òé gbóó láá mòn kọọ̀ “kọ̀láá kà nu e ba è emí mm̀ Kpá Káí . . . dú lé.”—2 Tímotì 3:16.

KPÁÁ NÓ BỌ̀Ọ̀VẸ̀

Bugi togó boo bé e Kpá Káí ni nveè bá nè gbò nen naa, bé eo é láá dé kpéè ló gè bugi naa, nè nú ea náa vaá à dú lé gè gbĩ́ nvèè bá kọbé ò láá dã́ ból ló Kpá Káí.

3. Kpá Káí é láá leléi dee bá

Kpá Káí dì belí sã́ ea palàge ẹẹlẹ̀ kẽ. Kpá Káí é láá nvèè bá nèi kọ é láá nè lé béèlàfùl vaá kọ́ nú ea é nááá dì deèsĩ́ nèi.

Bugi Psalm 119:105, vaá ò gbóó aalai gbò bíbví:

• Móbá ní e nen ea beè emí kpá psalmí beè ẹ̀bmà Kpá Káí é?

• Olo ẹbvì Kpá Káí naa vàẹ?

4. Kpá Káí é láá aalá bẹẹ gbò bíb

VÍDIÒ: Lóó Ni Á Gá Ọọ Ló Gè Ié Ból Dẽe Sĩ́! (1:42)

• Mm̀ vídiòá, mókà gbò bíb ní e ńnvááá beè bĩiná ẽ́?

• Mósĩ́ deè ní e gè nó Kpá Káí beè nvèè bá nèe ẽ́?

Kpá Káí síèi kpóó ló kọ é bĩiná bíb. Bugi Máátìù 7:7, vaá ò gbóó loi sọ́l boo nakà bíbví:

• Mókà gbò bíb ní eo íè e Kpá Káí é láá aalá ẹ́?

5. Òó láá dé kpéè ló gè bugi Kpá Káí

VÍDIÒ: Bugì Kpá Káí (2:05)

• Mm̀ vídiòá, móbá ní e gbò nvín ãaá beè ẹ̀bmà ge bugi kpá ẹ́?

• Náa kal ló béè kọọ̀ náa ólò leemá va gè bugi kpá, éé ní ea náa à leemá va gè bugi Kpá Káí é?

Kpá Káí é láá nèi dùùlà bá deè tṍ ea é nveèi nyíé gbàà vaá nèi ból dẽesĩ́. Bugi Róm̀ 15:4, vaá ò gbóó aalai nakà bíbví:

• É kọọ̀ àé léémá ni gè dã́ nú ea kil ló gbò zìgànù ea kil ló nvèè nyíé gbàà nè ból dẽesĩ́ ea di mm̀ Kpá Káí?

6. Dõòna gbò é láá nvèè bá nèi kọ é dã́ ból ló Kpá Káí

Gbáló gè bugi Kpá Káí boo ba lóó, gã́bug nen a mon kọọ̀ ge zọ̀ dõòna gbò loá sọ́l boo Kpá Káí a nveenìè bá neè va. Bugi Tóm 8:26-31, vaá ò gbóó aalai nakà bíbví:

• Éé ní eé náa kọbé è láá dã́ ból ló Kpá Káí é?—Ẹ̀b 30 nè 31 gã́bel.

NÚ E NI NÓ

Kpá Káí néi dùùlà bá deè tṍ eé láá siimá tóm buù dee, à áálá gbò bíb ea palàge dú bíi, vaá naa kọọ̀ gbò nen á ié nvèè nyíé gbàà nè ból dẽesĩ́.

Ge Òòa Boo

• Mókà gbò dùùlà bá deè tṍ ní eé láá mon mm̀ Kpá Káí é?

• Mókà gbò bíb ní e Kpá Káí áálá ẹ́?

• Éé ní ea di mm̀ Kpá Káí ea é léémá ni gè nò ẽ?

KPÁÁ GBĨ́ TẼ́ LÓ

Bugi togó boo bé e Kpá Káí fáálá gbò dùùlà bá deè tṍ ea dọ bélè nèí deè nieí naa.

“Bible Teachings—Timeless Wisdom” (Kpá Tọ Kùdẽe Ló No. 1 2018)

Ẹ̀b bé e Kpá Káí beè nvèè bá nè ene kà gbálà ea beè olòó bọọgẹ̀ nvèè súng lọl tṍó ea beè di pá nvín naa.

Bé E Nà Dùm Ea Náa Kọ Ḿ Ié Ẹ́ẹ-ẹẹ̀ Nyíe Beè Dààmà Togó Naa (2:53)

Bugi gbò dùùlà bá deè tṍ ea di mm̀ Kpá Káí ea é dọ bélè nè pá tọ.

“12 Secrets of Successful Families” (Awake! No. 2 2018)

Nyimá bé e Kpá Káí baatẽ́ lọ̀ bùlà e gbò nen ólò ié ea kil ló nen ea gé lẹẹlà bel ló bàlà booí naa.

Éé Ní Ea Náa Vaá È Nó Kpá Káí É?—Zivè Kpò (3:14)