Ge Zọ̀ Pá Vígà Tõ̀òa Mm̀ Gbaa Ló Léémái!

1-2. Éé ní ea palàge bọọ ló Jìhóvà ẹ, vaá éé ní ea gbĩ́ kọ é naa ẽ́?

BÁ E sẹẹmà gbò nen ólò palàge bọọ ló Jìhóvà. Jíízọ̀s beè noomài kọọ̀ é vùlè bẹẹ neǹ kègyṍó belí bé e vulè bẹẹ bá naa. (Máát. 22:​37-39) Níí tõó dọ̀ kọ èé íe lé nyíe kilma ló bã̀àna gbò e bà náa ólò fã̀ Jìhóvà. Tṍó e íè lé nyíe kilma ló dõona gbò, è nóò Jìhóvà bẹẹ Bàrì ea ólò naa “kọ gbei á mo boo gbò pọ́lọ́ nè gbò lé, vaá naa kọ boo á dọọ boo gbò e bà gé náa lèlà nu nè gbò e bà gé náa lọ̀ nù.”​—Máát. 5:45.

² Náa kal ló béè kọ Jìhóvà vulè dénè nen, à ólò palàge vùlè gbò e bà náa nú ea dú lé. (Jọ́ọ̀n 14:21) À gbĩ́ kọ é noè ẽ. À kọ́ nèi kọ é ‘vùlè pá vígà mm̀ agẹbá’ vaá ié “tọa ló” kìlmà vá ló. (1 Pít. 4:8; Róm̀ 12:​10, nw) Na íb vulèí dú íb ní e ólò ié kilma ló bẹẹ kóò àbèè bẹẹ dúà ló e palàge vùlè.

3. Éé ní ea dú bíi kọ é kẽea boo kilma ló vulà ẹ?

³ Vulà bélí nú e fóò ea ólò dú bíi kọ é palàge ẹ̀b nú ea kil ló kọbé à dum leevè. Neǹ tóm Pọ́ọ̀l beè siè kpóó ló gbò e bà géè nyoone nvéè Kráìst kọ bàá: ‘Kilsĩ́ gè vulè ene dì belí gbò vígà mm̀ Kráìst.’ (Híb. 13:1) Jìhóvà gbĩ́ kọ é kilsĩ́ gè vùlè ene. Mm̀ nakà togó bel ge nòí, èé ló bel boo nú ea náa vaá à dú bíi kọ é palàge dũ̀ùà bã kpàn pá vígà, nè bé eé láá kilsĩ́ gè naa vó naa.

NÚ EA NÁA VAÁ À DÚ BÍI KỌ É PALÀGE TÕO BÃ LÓ ENE

4. Dẹ̀ẹ̀a boo nú ea di mm̀ kpá Psalm 133:​1, mósĩ́ deè ní eé láá kilsĩ́ gè nvèè ka ló gbaa ló ea di zẹ̀ẹ̀ pá vígà nè bẹ̀ì e? (Ẹ̀b nàgé fòtó.)

⁴ Bugi Psalm 133:1. È zọọ̀ neǹ ọ́lì sọ́l zìgà kọọ̀ ge bã̀àà kóò gbò e bà vulè Jìhóvà palàge “dú lé vaá kpe ló.” Sõò dì belí bé e nen náa ólò nvèè ka ló nú ea mon kọ̀láá dee naaá, níà bé e bè née ọ́ẹ̀ dẽe èé láá ẹ̀b vulà nè gbaa ló ea di zẹ̀ẹ̀ pá vígà nè bẹ̀ì tẹlẹ kẽ naaé. Tã́gíní bé e ólò mòn pá vígà gã́bug tṍó buù sèa, éé ní eé láá naa kọbé è kilsĩ́ gè nvèè va ka ló é? Vulè e íè kilma ló pá vígà é kpáá palàge bọọ dọ ló be è ólòó bugi togó boo bé e buù nen ea di mm̀ bõ̀ònatõ̀ò palàge dú bíi naa.

5. Mósĩ́ deè ní e vulè e íè kilma ló ene é láá tọá ló dõona gbò e?

⁵ Vulà e íè kilma ló ene ólò palàge leemá gbò e níà túá tṍó e bà gé sí bẹẹ gbò nònù ẽ. Vó ólò naa kọ bàá agala boo kọọ̀ baa monìè kà-kà bõ̀ònaló fã̀. Jíízọ̀s beè kọọ̀: “Bé eo vulèì ene naa, ní ea é náa kọ dénè nen á nyimá kọọ̀ ò gé nyooném mi nvée ẽ́.” (Jọ́ọ̀n 13:35) Bugi togó boo nú ea beè naaá ló Chaithra, ea beè di pọ̀b tọọ̀ kpá tṍó ea géè zọ̀ Gbò Neǹ Ditõ̀ò Jìhóvà noá nu. A beè zìgà kọ àé sí kẽè pọ̀bkà bõ̀ònaló Gbò Neǹ Ditõ̀ò Jìhóvà. Túá dee ea sí kẽè pọ̀bkà bõ̀ònalóá, a beè kọ́ nè nen ea ólò noomàe Kpá Káí kọọ̀: “Ńdáà tẹ̀ nè ńdáà kà gáà pììlàm bá ló tọ́ọ̀ dee. Sõò kóló tẽ̀ènè dee em síì kẽè bọọ pọ̀bkà bõ̀ònaló, 52 nen a piilàm bá ló. M̀ gbĩ́ì ge dú enè Nèn Ditõ̀ò Jìhóvà.” Chaithra beè sìm kilsĩ́ vaà dììa múú mm̀ gbáá 2024. Mm̀ kà-kà, tṍó e ãa nen mon bẹẹ lé tóm nè vulè e íè kilma ló ene, à ólò tàn va gè dù gé fã̀ Jìhóvà.​—Máát. 5:16.

6. Mósĩ́ deè ní e gè tõo bã ló pá vígà é láá naa kọ é ié kpènà ẽ?

⁶ Ge tõo bã ló pá vígà é láá naa kọ é ié kpènà. Neǹ tóm Pọ́ọ̀l beè kọ́ nè pá vígà e bà géè nyoone nvéè Kráìst kọọ̀: “Nveenii kpóó ló ene kọ̀láá dee . . . kọbé pọ́lọ́ lab dògò náa kẹlẹ tọ́ọ̀ bọ̀ì vaá naa kọ ó iei agẹ togó.” (Híb. 3:13) Be lóói ọọ naa ní ea tàvàlàí ló gè naa nú ea dú lé, Jìhóvà é láá tú pá vígà nvèèmà bá nèi. (Ps. 73:​2, 17, 23) Bel sìà kpóó ló ea aa gã́ pá vígà é palàge nvèè bá nèi.

7. Mókà bèla ní ea di zẹ̀ẹ̀ vulà nè gbaa ló é? (Kọ́lọsì 3:​13, 14)

⁷ È dṹùnà gbò níí Jìhóvà e bà ólò pììga boo gè vùlè ene, vó ólò naa kọọ̀ é dé kpéè ló gã́bug tã́áná dee bá. (1 Jọ́ọ̀n 4:11) Dì belí nu dòòmà bá, vulà ólò naa kọ é ‘ĩ̀ìmà ene,’ vaá vó ólò naa kọ gbaa ló ea dìí zẹ̀ẹ̀ á kpáá palàge aga ló. (Bugi Kọ́lọsì 3:​13, 14; Ẹ́fẹ. 4:​2-6) Vóà naa, gbẹá nònù è ólò ié dĩ̀ìnè ló e née é láá ié gbẹá tọ́ọ̀ ketõ̀ò.

NVEENII KA LÓ ENE

8. Mósĩ́ deè ní e Jìhóvà ni nveè bá nèi kọbé gbaa ló láá di zẹ̀ẹ̀ pá vígà nè bẹ̀ì e?

⁸ Jìhóvà ní ea náa kọ pá vígà beeá ló bàlà booí á di mm̀ gbaa ló é. Ẹlẹ ní ea náa kọ níí á valí, náa kal ló béè kọ née gbõomà ẽ. (1 Kọ́r. 12:25) Kpá Káí kọ́ọ̀, ‘Bàrì beè noomài kọ é vùlè ene.’ (1 Tẹ̀s. 4:9) Tení dú ló Kpá Káí, Jìhóvà a kọ́ nú ea dú bíi kọ é naa kọbé è láá palàge tõo bã ló ene. Èé láá sọ̀tọ́ deè kọ Jìhóvà á “noomài” nu tení dú ló gè tú ọ̀ẹ̀ dẽe bùgmà Kpá Káí vaá tú gbò nú e bugì siimá tóm. (Híb. 4:12; Jém̀z 1:25) Vaá níà kà lèlà nú e Gbò Neǹ Ditõ̀ò Jìhóvà ólò pììga boo gè naa ẽ́.

9. Éé ní e nóò lọl ló nú ea di mm̀ kpà Róm̀ 12:​9-13 ea kil ló gè nvèè ka ló ene ẽ́?

⁹ Mósĩ́ deè ní e Kpá Káí ni nóòmài kọ é láá tõo bã ló ene ẽ́? Bugi togó boo nú e Pọ́ọ̀l beè kọ̀ ea di mm̀ kpá Róm̀ 12:​9-13. (Bugi.) À bọ́ló kọ é palàge nvèè kpíí ló gbò moǹ bel ea di mm̀ dọ̀ Kpá Káíá ea kọ́ọ̀ “nveenii ka ló ene èlmà bé eo nveenìì ka ló bọọ bá naa.” Éé ní ea tõó dọ̀ ẹ? À tõó dọ̀ kọọ̀ “vulè” e íè kilma ló pá vígà á naa kọ é di kpènà ló gè ia ló nè va tṍó e bà síi pọ́lọ́, kolí va kyáà, vaá dõo nu nè va. (Ẹ́fẹ. 4:32) Náa dú bíi kọ ó zẹ́ẹ́ elá bànà pá vígà kọ bàá tõo bã̀ ní ló, tãa vó ò zẹ́ẹ́ gyàsĩ́ bã ló pá vígà. Tṍó eo náà vó, bel e Jíízọ̀s beè lò ea kọ́ọ̀: “Tã́áná dee bá di ló nen ea ne èlmà nen ea tú” é ḿḿ-má kìlmà ní ló​—Tóm 20:35.

10. Mósĩ́ deè ní eé láá zogè kọ ‘lóói náa ọọ’ ló gè nvèè bá nè ene ẽ́? (Ẹ̀b nàgé fòtó.)

¹⁰ À bọ́ló kọ é nvèè kpíí ló kọọ̀ tṍó e Pọ́ọ̀l kọ́ é nvèè ka ló ene lọ̀l, a beè gbóó gbẹá boo kọọ̀ “lóói á gá ọọ e a kil ló gè sí tóm.” Nen e lóóe náa ọọ ólò tú bẹ̀à sã́ bùlà siimá tóm agẹlẹ bá. Tṍó e bà née tóm kọ á sì, à òlò tú ọ̀ẹ̀ dẽe siimá. Kpá Próvẹẹ̀b 3:​27, 28 kọ́ọ̀: é ‘gá òòmà bá lọl ló gè tú lé nu nè gbò ea bọ́ló kọ é nè, be à gá náa vaá è ié kpóó gè nvèèmà bá nè va.’ Vóà naa tṍó e monì nen ea íe bíi ló nvèè bá, à dú bíi kọ é nvèè bá nèe. Née é pee tṍó ló gè nvèè bá nèe àbèè ge tuumá kọọ̀ dõona nèn é nveè bá nèe.​—1 Jọ́ọ̀n 3:​17, 18.

11. Éé ní ea é láá nvèè bá nèi kọ é tõo bã ló ene ẽ́?

¹¹ Dõona sĩ́deè eé láá zogè kọ è nveè ka ló dõona gbò dú gè vàlẹ̀bá ia ló nè va tṍó e bà náa nú ea kyẽ́i. Kpá Ẹ́fẹsọs 4:26 kọ́ọ̀: “Ó gá nveenii súng bilmai dee.” Ló éé? A 27 gã́bel kọ́ọ̀ be è náa vó, è neè “deè Pọ́lọ́ Nyómá.” Tení dú ló Kpá Káí, Jìhóvà ãanéi gã́bug tṍó kọ é ia ló nè gbò e bà síi pọ́lọ́. Kpá Kọ́lọsì 3:13 kọ́ é kilsĩ́ gè ‘ia ló pọ́lọ́ nè ene.’ Tṍó e ià ló nè nen ea síi pọ́lọ́, à ólò naa kọ é kpáá palàge tõo bã ló nená. Ge naa vó é náa kọọ̀ ‘fẹ́ẹ́-fẹẹ̀ ló á bọvíi naamá tẽ̀ènè kà.’ (Ẹ́fẹ 4:3) Kàsĩ́, ge ia ló nè gbò e bà síi pọ́lọ́ ólò naa kọ gbaa ló nè fẹ́ẹ́-fẹẹ̀ ló á dìí zẹ̀ẹ̀.

12. Mósĩ́ deè ní e Jìhóvà ólò nvèè bá nèi kọ é láá ia ló nè gbò e bà síi pọ́lọ́ ẹ́?

¹² À dú kà-kà kọ àé láá tàvàlàí ló gè ia ló nè gbò e bà náa nú ea kyẽ́i, sõò nyómá káí Bàrì é láá nvèè bá nèi kọ é naa vó. Tṍó e Pọ́ọ̀l ni síèi kpóó ló kọ é “vùlè ene” vaá “lóói á gá ọọ ea kil ló gè sí tóm” lọ̀l, a beè gbóó kpáá kọọ̀: “Tui dénè bọọ nyíe siimai tóm nèi [Bàrì].” Nen ea tú ‘dénè a nyíe siimá tóm nè Bàrì’ ólò ié bẹ̀à sã́ bùlà boo béè kọ nyómá káí Bàrì gé lẹẹlàẹ bel ló. Nyómá káí Bàrì é láá nvèè bá nèi kọ é vùlè ene vaá di kpènà ló gè ia ló nè gbò e bà síi pọ́lọ́. Vóà naa, à dú bíi kọ é olòó bàn Jìhóvà kọ á nvèè bá nèi.​—Lúùk 11:13.

‘PÒÒÀ Á GÁ DÌÍ ZẸ̀Ẹ̀’

13. Éé ní ea é láá naa kọ pòòà á dìí zẹ̀ẹ̀ ẹ?

¹³ “Dénè nen” ea di mm̀ bõ̀ònatõ̀ò aa kele-kele ketõ̀ò. (1 Tím. 2:​3, 4) Boo béè vó, buù bẹ̀ì é láá nè kele-kele béèlàfùl ea kil ló kólì kyáà, kọ̀là ló gè nvèà, bá gè sẹ̀ẹ̀mà gyáa, àbèè íb bóa eé tú. Be née ọ́ẹ̀ dẽe, gbò nuí é láá làb gbaa ló ea dìí zẹ̀ẹ̀. (Róm̀ 14:4; 1 Kọ́r. 1:10) Sõò boo béè kọ ‘Bàrì beè noomài kọ é vùlè ene,’ èé ọ́ẹ̀ dẽe kọbé née ẹbvì kọọ̀ gbò nú e saà léè èl níí dõona gbò.​—Fíl. 2:3.

14. Éé ní eé piigà ge naa ẽ́, vaá ló éé?

¹⁴ Èé láá naa nagé kọọ̀ gbaa ló á dìí zẹ̀ẹ̀ tení dú ló gè olòó siè kpóó ló ene. (1 Tẹ̀s. 5:11) Kátogóí gã́bug gbò e bà náa beè olòó si ná nònù nè gbò e ba beè kpòòlà lọl mm̀ bõ̀ònatõ̀ò a ooa kẽ dù gé fã̀ Jìhóvà. Èé palàge zààva ló íb gbò e bà dì naa vó! (2 Kọ́r. 2:8) Nvèè kpíí ló nú e ene kà vígà pábia e náa beè si ná nònù mm̀ òb gbáá kọ́ túá dee ea kpáá sí nònù. À kọ́ọ̀, “Ba beè palàge zààvà ḿ ló vaá túm kpáí bá.” (Tóm 3:19) Mósĩ́ deè ní e bá e pá vígà túúmáe beè tọáẹ́ ló é? À kọ́ọ̀, “Bá e pá vígà beè tuumám beè naa kọ ḿ mòn kọọ̀ Jìhóvà gbĩ́ kọ ḿ òòà kẽ dù gé bã mm̀ bõ̀ònatõ̀ò kọbé m̀ láá kpáá ié ẹ́ẹ́-ẹẹ̀ nyíe.” Be è di kpènà ló gè siè kpóó ló dõona gbò, Kráìst é láá túi nvèèmà bá nè gbò e ‘tóm ni ḿ-má va vaá tò a kómí va men.’​—Máát. 11:​28, 29.

15. Mósĩ́ deè ní eé láá naa kọọ̀ gbaa ló á di mm̀ bõ̀ònatõ̀ò ẽ? (Ẹ̀b nàgé fòtó.)

¹⁵ Dõona sĩ́deè eé láá naa kọ gbaa ló á di zẹ̀ẹ̀ pá vígà nè bẹ̀ì dú bá é lóòmà bel. Kpá Jóòb 12:11 kọ́ọ̀: “É kọọ̀ tṍ náa ólò dò gbò bel ea dã́ ẹ̀b belí bé e dém ólò nyimá bé e gã́ gyã́á dì naa?” Dì belí bé e nen ea ólò láá palàge bùl nu ólò daa gã́ ló a gyã́á ẹ̀b be nu a kpṍ ló besĩ́ à kálá nè gbò nen naaá, níà bé ea dú bíi kọ é palàge bugi togó boo bel eé ló besĩ́ è kálá ló naa ẽ́. (Ps. 141:3) Èé piigà boo gè mòn kọọ̀ bel eé ló á dú ní ea é síè kpóó ló, dĩine ló, vaá “dọ bélè nè gbò e bà gé pãane tṍ.”​—Ẹ́fẹ. 4:​29, nw.

16. Bà mée ní ea palàge bọ́ló kọọ̀ ba bel á siè kpóó ló gbò nen ẽ́?

¹⁶ Gbò dóm nè gbò tẹ̀ ne kà á mòn kọọ̀ bel e bà é ló á dú ní ea é síè kpóó ló nen. (Kọ́l. 3:​19, 21; Táítọ̀s 2:4) Gbò kànen á dú ketõ̀ò dĩ̀ìnè ló vaá dú gbò kùdẽe ló e bà é nveè nyíé gbàà gbò naanà ból Jìhóvà. (Àìz. 32:​1, 2; Gàl. 6:1) Ene kà kìna bel ea di mm̀ Kpá Káí kẽeí nyíe kọọ̀: “Bel e nen ló tṍó ea bọ́ló, palàge dú lé!”​—Pró. 15:23.

‘KÀ-KÀ VULÀ Á DỌ BÀLÀ KẼ MM̀ BẸẸ LAB DÒGÒ’

17. Mósĩ́ deè ní eé láá naa kọọ̀ vulè e íè kilma ló pá vígà á ààí nyíe ẽ́?

¹⁷ Neǹ tóm Jọ́ọ̀n síèi kpóó ló kọ é gá ié “vulà ea é gbẹ́aí boo kpá bẹ́lẹ́ bũunu nè mm̀ gã́.” (1 Jọ́ọ̀n 3:18) È gbĩ́ì kọọ̀ vulè e íè kilma ló pá vígà á ààí nyíe. Mósĩ́ deè ní eé láá naa vó é? Bé e íè tṍó nè pá vígà vaá tõo bã̀ vá ló naa, níà bé e vulè e íè kilma ló ene é palàge agaló naa ẽ́. Vóà naa, gbĩ́ gbò nèà deè ea é náa kọ ò láá ié tṍó nè pá vígà vaá ò zọ́ va loá bel gbẹá nònù nè tṍó eo gé kọ́i kpẹ̀a. Noo tṍó eo é kãamà pá vígà. Tṍó e náà gbò nuí, è zógè kọ ‘Bàrì beè noomài kọ é vùlè ene.’ (1 Tẹ̀s. 4:9) Vaá eé kilsĩ́ gè mòn ‘bé ea dú lé vaá kpe ló kọọ̀ pá vígà gbá tõoa mm̀ gbaa ló naa!’​—Ps. 133:1.