Ge Dõo Nu Ólò Naa Kọ Nyíéi Á Ẹẹ

1-2. Éé ní ea náa vaá Jìhóvà beè dèmii naa ní e nyíéi é ẹ́ẹ tṍó e dõò nu nè dõona gbò èlmà tṍó e túù e?

NYÍÉI ólò palàge ẹẹ tṍó e dõò nu nè dõona gbò èlmà tṍó e túù, boo béè kọọ̀ níà bé e Jìhóvà beè dèmii naa ẽ́. (Tóm 20:35) É kọ níí tõó dọ̀ kọọ̀ nyíéi náa ólò ẹẹ tṍó e nen dõo nu nèi? Ẽ́èe. Nyíéi ólò ẹẹ tṍó e nen dõo nu nèi. Sõò, nyíéi ólò palàge ẹẹ tṍó e beele ní e dõò nu nè dõona gbò e. À palàge dú lé kọ Jìhóvà beè dèmii mm̀ na sĩ́ deèí. Ló éé?

² Boo béè kọọ̀ Jìhóvà beè dèmii mm̀ na sĩ́deèí, beele é láá naa kọ nyíéi á ẹẹ. Nyíéi é palàge ẹẹ tṍó e bugì togó boo gbò sĩ́deè eé láá nvèèmà bá nè dõona gbò. À palàge dú lé kọ Jìhóvà beè dèmii mm̀ na sĩ́deèí.​—Ps. 139:14.

3. Éé ní ea náa vaá èé láá kọọ̀ Jìhóvà dú “Bàrì ẹ́ẹ́ nyíe” ẽ́?

³ Boo béè kọ Kpá Káí kọ́ọ̀ nyíè gbò e bà dõo nu ólò palàge ẹẹ, èé gbóó láá dã́ ból ló nú ea náa vaá Jìhóvà à dú “Bàrì ẹ́ẹ́ nyíe.” (1 Tím. 1:11) Jìhóvà ní ea dú túá nen ea beè dõo nu nè gbò nen ẽ́, vaá tọ́ọ̀ nen náa é láá dõo nu belí e. Neǹ tóm Pọ́ọ̀l beè kọọ̀, ‘boo kóì Bàrì ní e di dùm vaá kyã̀à ẽ.’ (Tóm 17:28) Mm̀ kà-kà, Jìhóvà ní ea beè dõo “kọ̀láá kà lé nu e kọ̀ bèl á gé ló nèi ẽ́.”​—Jém̀z 1:17.

4. Éé ní ea é nveè bá nèi kọ nyíéi á palàge ẹẹ ẹ́?

⁴ Àé léémá dénè bẹ̀ì ge ié ẹ́ẹ́-ẹẹ̀ nyíe ea aa ló gè dõo nu nè dõona gbò. Èé láá ié íb ẹ́ẹ́-ẹẹ̀ nyíeá be è nó bé e Jìhóvà ólò dõo nu taalẹ bá naa. (Ẹ́fẹ. 5:1) Mm̀ nakà togó bel ge nòí, èé nó nú eé láá naa be à tõóí ló kọ nyíè gbò e dõò nu nè náa ẹ́ẹ. Ge naa vó é nveè bá nèi kọ é kilsĩ́ gè ié ẹ́ẹ́-ẹẹ̀ nyíe tṍó e dõò nu nè gbò nen.

NÓ BÉ E JÌHÓVÀ ÓLÒ DÕO NU TAALẸ BÁ NAA

5. Éé ní e Jìhóvà ni náa nèi ẽ́?

⁵ Mósĩ́ deè ní e Jìhóvà ni zógè kọ à ólò dõonìè nu taalẹ̀ẹ̀ bá ẹ́? Nee sìgà nu dòòmà báí. Jìhóvà ólò nèi gbò nú e íè bíi ló. Àé láá dú kọọ̀ née íè dénè nú e gbĩ́ gè ié, sõò Jìhóvà ólò nèi gbò nú ea palàge dúi bíi ló. Dì belí nu dòòmà bá, Jìhóvà néi gyã́á ge dè, kọ̀là ló, nè tọ gè tõó m. (Ps. 4:8; Máát. 6:​31-33; 1 Tím. 6:​6-8) É kọ Jìhóvà ólò nèi gbò nuí boo béè kọ à dú bíi kọ àé íè ge naa vó? Ẽ́èe! Beè vó éé ní ea náa vaá Jìhóvà ólò nèi gbò nuí ẽ́?

6. Éé ní e nóò lọl ló nú ea di mm̀ kpá Máátìù 6:​25, 26 é?

⁶ Jìhóvà ólò nèi gbò nú e íè bíi ló boo béè kọ à vulèi. Bugi togó boo nú e Jíízọ̀s beè kọ́ mm̀ kpá Máátìù 6:​25, 26. (Bugi.) Jíízọ̀s beè tú gbò nú e Bàrì beè dèm nèèmà nu dòòmà bá. Tṍó ea géè ló bel ea kil ló gbò ńnóm, a beè kọọ̀: “Gbò ńnóm pẹ̀ẹ̀ náa ólò fó nu àbèè ge kọlí nu sẹlẹ́ dá.” Nvèè kpíi ló nú ea beè kpáá kọ̀, a beè kọọ̀: “Bọọ Tẹ̀ ea di káála ólò nè va gyã́á.” Tṍóá, a beè gbóó bĩiná kọọ̀: “É kọ nóo nyímàì kọ boolo palàge bọọlii ló Bàrì elii gbò ńnóm?” Éé ní e Jíízọ̀s géè kọ̀ ẹ? À géè kọọ̀ Jìhóvà ólò nvèè ka ló gbò e bà bọ́ló dẹ̀lẹ̀ nyíé boo nèe èl bé ea nveè ka ló gbò ńnóm naa. Vóà naa, beè Jìhóvà láá ẹ̀b nú ea kil ló gbò nom, èé láá agala boo kọ àé ẹb nú ea kilíí ló! Jìhóvà vulèi vaá à ólò ẹ̀b nú ea kilíí ló, belí bé e tẹ̀ ea vulè pá a nvín ólò naaá.​—Ps. 145:16; Máát. 6:32.

7. Mósĩ́ deè ní eé láá nó bé e Jìhóvà ólò dõo nu taalẹ bá naa ẽ́? (Ẹ̀b nàgé fòtó.)

⁷ Èé láá nó Jìhóvà vaá dõo nu nè gbò e bíi di ló boo béè kọ è vulè va. Dì belí nu dòòmà bá, é kọ ò nyímà ló neǹ vígà ea íe bíi ló gyã́á àbèè kọ̀là ló? Jìhóvà é láá tú ni nvèèmà bá nèe. Bà palàge nyimá ló Gbò Neǹ Ditõ̀ò Jìhòvà kọ bà ólò nvèè bá nè gbò e bà di kèbá tã̀àgã̀. Dì belí nu dòòmà bá, tṍó e pọ́lọ́ kom ea kọlà COVID-19 beè teníá, pá vígà beè dõo gyã́á, kọ̀là ló, nè dõona kà nu nè gbò e bíi di ló. Gã́bug nen beè tẹlẹ̀ kpègè mm̀ kpó lọ̀là-lọ̀là e bà ólò ẹ̀bmà nú ea kil ló sìtóm kọ̀ kpẹ̀a beeá ló bàlà booí. Ba beè tú gbò kpègèá nvèèmà bá nè pá vígà e bíi di ló. Pá vígà e bà dõo nu taalẹ báí beè tú bel ea di mm̀ kpá Híbrù 13:16 ea kọ́ọ̀: “Á gá táí nyíe gè olòó naa lé vaá nvèè bá nè ene, boo béè kọ gbò níé ní vààla gyọ́ọ ea léémá Bàrì e” siimá tóm.

8. Mósĩ́ deè ní e ólò ié bélè lọl ló kpóó e Jìhóvà néi ẽ́? (Fílipaì 2:13)

⁸ Jìhóvà ólò nèi kpóó. Kpóó e Jìhóvà íe dì dọ̀ dè-dè, vaá à ólò nè pá a gyóòlo e bà bọ́ló dẹ̀lẹ̀ nyíé boo. (Bugi Fílipaì 2:13.) É ko à íe tṍó eo beè tã̀àgã ló Bàrì kọ á nè ni kói kọbé ò láá bé èl bá ẹ̀bmà àbèè ge láá ĩ̀ìmà tàvàlà dìtõ̀ò eo géè tení bá? Àé láá du nagé kọ o beè tã̀àgã ló Bàrì kọ á nè ni kói kọbé ò láá naamá nú eo gbĩ́ gè naa. Tṍó eo monì bé e Bàrì áálá o tã̀àgã ló naa, òé gbóó láá zìgà nú e neǹ tóm Pọ́ọ̀l beè kọ̀, a beè kọọ̀: ‘Kráìst ném agẹ ló gè tõoma kè bá kọ̀láá kà dìtõ̀ò.’​—Fíl. 4:13.

9. Mósĩ́ deè ní eé láá nó bé e Jìhóvà ólò tú a kpóó siimá tóm naa ẽ́? (Ẹ̀b nàgé fòtó.)

⁹ Náa kal ló béè kọ née gbõomà, èé láá nó nu lọl ló bé e Jìhóvà ólò tú a kpóó siimá tóm naa. Née íè gã́bug kpóó belí Jìhóvà vaá née é láá nè kpóó dõona gbò belí bé e ẹlẹ ólò naa. Sõò èé láá tú bẹẹ kói siimá tóm nè dõona gbò. Dì belí nu dòòmà bá, èé láá zalí nu àbèè ge sí tóm tọ nè pá vígà e ba ni dú kànen mm̀ dee, àbèè kọ kpá ló va gé zọ. Be bẹẹ dìtõ̀ò sọ́i tọ́ deè, èé láá nè lóó gè õ̀ònà ló àbèè ge sí tóm ló Kíndòm Họ́ọ̀l. Be è tú bẹẹ kói siimá gbò tómí, èé dọ bélè nè pá vígà.

10. Mósĩ́ deè ní eé láá siè kpóó ló dõona gbò tení dú ló bel e lóò e?

¹⁰ Á gá tá ní nyíe kọ òé láá siè kpóó ló dõona gbò tení dú ló bel eo lóò. É kọ òé láá bugi togó boo nen eo é láá siè kpóó ló tení dú ló gè lèèlàẹ ló nú ea náa? É kọ ò nyímà ló nen ea íe bíi ló nvèè nyíé gbàà? Beè vó, ló bel ea é náa kọ nená á nyimá kọ ò ẹbvìè nú ea kilìèé ló. Òé láá kãa nená, kolíe boo fóòn, àbèè kọ ò émí kpá lẹ̀ẹ̀la tóm máe. Ó gá ié tã̀àgã̀ bùlà kilma ló bel eo é ló. Pọ́ì ńkem̀ bel eo lóò nè neǹ vígàá é náa kọ á nyimá kọ ò ẹbvìè nú ea kilìèé ló, vaá àé dú kọ níà kà lèlà nú ea íe bíi ló kọbé à láá kilsĩ́ gè bọ́ló dẹ̀lẹ̀ nyíé boo é.​—Pró. 12:25; Ẹ́fẹ. 4:29.

11. Mósĩ́ deè ní e Jìhóvà ólò tú a nyìmànù siimá tóm ẽ́?

¹¹ Jìhóvà ólò nèi nyìmànù. Neǹ tóm Jém̀z beè emí kọọ̀: “Sõò be nyìmànù nání enè nen ea dìí gbàà, á bàn kọ Bàrì á neèe. Bàrì ólò taalẹ bá vaá náa ólò kamí bel ló nu.” (Jém̀z 1:5.) Níí zógè kọọ̀ Jìhóvà náa ólò pĩá-pĩ́ ló a nyìmànù. Tãa vó, à ólò nè taalẹ bá. Nvèè nàgé kpíí ló kọọ̀ tṍó e Jìhóvà ne nyìmànù nen, “náa ólò kamí bel ló.” Náa ólò naa ní e kẹ́ẹ é sííi tṍó e bĩ́ìnàe nu bá. Tãa vó à gbĩ́ kọ é bĩinàèe nú bá.​—Pró. 2:​1-6.

12. Mókà nèà deè ní e íè ge noomà nuù dõona gbò e

¹² Éé ní e beele é láá naa ẽ́? Èé láá nó Jìhóvà vaá kọ́ nú e nyímà nè dõona gbò. (Ps. 32:8) Gbò gyóòlo Jìhóvà íe gã́bug nèà deè ge kọ́ nú e bà nyímá nè dõona gbò. Dì belí nu dòòmà bá, è ólò noomà gbò e bà ã́àa bã mm̀ bõ̀ònatõ̀ò bé e bà é láá kọ́ kpẹ̀a naa. Gbò kànen mm̀ bõ̀onatõ̀ò ólò kọ́ bé e gbò nvèè bá sìtóm nè gbò vígà págbálà e ba ni diia múú é láá sí tóm e bà né va mm̀ bõ̀ònatõ̀ò naa. Vaá pá vígà e bà ólò láá tìb tọ àbèè ge ẹ̀b nú ea kil ló Kíndòm Họ́ọ̀l ólò noomà dõona gbò nú e bà nyímá.

13. Tṍó e gé nóòmà nuù dõona gbò, mósĩ́ deè ní eé láá nó bé e Jìhóvà ólò dõo nyìmànù naa ẽ́?

¹³ Èé láá nó Jìhóvà tṍó e nóòmà nuù dõona gbò. Kẽ̀èa boo kọọ̀ Jìhóvà náa ólò pĩá-pĩ́ ló a nyìmànù. Mm̀ tẽ̀ènè sĩ́deèá, è gbĩ́ gè kọ́ nú e nyímà nè dõona gbò. Née é zigà kọọ̀ pọ̀ kọ be è nóòmà nuù nen, àé nyímá èlii á naa kọ é gá noomà nuù gbò nen. Sìgà gbò ólò bugi togó kọọ̀: ‘Tọ́ọ̀ nen náa beè noomàè va tóm, boo béè vó baala náa é nóòmàè tóm dõona gbò.’ Náa bọ́ló kọ nen ea gé fã Jìhóvà á bugi togó naa vó. Tãa vó, èé dí kpènà ló vaá pììgà bé e bẹẹ kpóó sim tùlà naa gè noomà nuù dõona gbò. (1 Tẹ̀s. 2:8) È ẹbmà dẽe kọọ̀ gbò e nóòmà nu é beè sìm tùlà ge “noomà nàgé dõona gbò.” (2 Tím. 2:​1, 2) Beè dénè bẹ̀ì tú nú e nyímà noomà dõona gbò, beele nè gbò e nóòmà nuá é kpáá palàge nyimá nu vaá nyíéi é ẹ́ẹ.

TṌÓ EA TÕÓÍ LÓ BELÍ KỌ NYÍÈ GBÒ NEN NÁA Ẹ́Ẹ LÓ NÚ E DÕÒ NÈ VA

14. Éé ní e gã́bug nen ólò naa tṍó e dõò nu nè va ẹ́?

¹⁴ Tṍó e náà nu àbèè ge dõo nu nè pá vígà, bà ólò õái zaa. Bà é láá õái zaa tení dú ló gè emí kpá lẹ̀ẹ̀la tóm mái àbèè kọ bà náa vó mm̀ dõona sĩ́deè. (Kọ́l. 3:15) Tṍó e bà ṍái zaa ló nú e náà nè va, nyíéi ólò palàge ẹẹ.

15. Éé ní ea bọ́ló kọ é kẽ̀èa boo tṍó e nen náa ṍái zaa ẹ́?

¹⁵ À dú kà-kà kọọ̀ níì dénè tṍó ní e gbò nen ólò õái zaa ló nú e dõò nè va ẹ́ nì. Sìgà tṍó è ólò láá tú bẹẹ kpègè, kói, tṍó, àbèè dõona kà nu nvèèmà bá nè gbò nen vaá bà náa ólò õái zaa. Be à nááá naa vó, éé ní eé láá naa kọbé nyíéi náa biilà ẹ? Kẽ̀èa boo nú ea di mm̀ kpá Tóm 20:35 e togó belí dẹẹa boo. Ge dõo nu nè dõona gbò ní e bẹẹ ẹ́ẹ́-ẹẹ̀ nyíe ólò dẹẹa boo é, níì bé e bà ṍái zaa naa nì. Èé láá beeláfùl ge dõo nu kọbé è íe ẹ́ẹ́-ẹẹ̀ nyíe bã̀àna tṍó e bà náa ṍái zaa. Mósĩ́ deè ní eé láá naamá vó é? Nee sìgà nú ea é nveè bá nèií.

16. Éé ní ea bọ́ló kọ é ká bùlà gbẹẹ́ boo tṍó e gé dõo nu nè gbò nen ẽ́?

¹⁶ Ká bùlà gbẹẹ́ boo gè nó Jìhóvà. Jìhóvà ólò dõo nu nè gbò nen, bã̀àna tṍó e bà náa ṍáe zaa. (Máát. 5:​43-48) Jìhóvà zigà kọọ̀ be è dõo nu nè gbò nen vaá née ẹb “dẽesĩ́ kọ bà á kpẽ̀,” èé íe “pọ̀b kpẽ̀ kòm.” (Lúùk 6:35) Ene kà nú e bà é láá kpẽ̀ dú gè õái zaa. Kọbèè bà ṍái zaa àbèè kọ bà náa náa vó, Jìhóvà é néi kpẽ́ be è kilsĩ́ gè ié ẹ́ẹ́-ẹẹ̀ nyíe tṍó e dõò nu nè gbò nen.​—Pró. 19:17; 2 Kọ́r. 9:7.

17. Mókà bug ní ea náa vaá à palàge dú bíi kọ é dõo nu nè gbò nen ẽ́? (Lúùk 14:​12-14)

¹⁷ Dõona kà nú eé láá naa mm̀ ge nó Jìhóvà tṍó e gé dõo nu dú gè tú nú ea di mm̀ kpá Lúùk 14:​12-14. (Bugi.) siimá tóm. À dú kà-kà kọọ̀ ge nvèè bá nè gbò e bà é láá nvèè bá nèi níì pọ́lọ́ nì. Sõò, éé ní eé láá naa be è nyímá kọ è ólò bọọgẹ̀ dõo nu boo béè kọ è ẹbmà dẽe kọ bà é beè dõo nu nèi ẽ́? Ge naa nú e Jíízọ̀s beè kọ̀ é nveè bá nèi. Èé láá nvèè bá nè gbò e palàge nyimá kọ bà náa é láá kpẽ́ nèi. Ge naa vó é náa kọ nyíéi á ẹẹ, boo béè kọ è gé nó Jìhóvà. Àé náa nagé kọọ̀ nyíéi á ẹẹ bã̀àna tṍó e gbò e dõò nu nè náa ṍái zaa.

18. Éé ní e náa bọ́ló kọ é naa ẽ́?

¹⁸ Ó gá tuumá kọọ̀ nyíè gbò nen náa ẹ́ẹ ló nú eo dõò nè va. (1 Kọ́r. 13:7) Beè gbò e dõò nu nè náa ṍái zaa, èé láá bĩiná bẹẹ bá kọọ̀: ‘É kọọ̀ nyíé va náa ẹ́ẹ ló nú em náà nè va á, sẹ̀ à tá vá nyíe gè õá m zaa ẹ́?’ Be à sẹlẹ, à íe nú ea náa vaá bà náa ṍái zaa belí bé e géè ẹ̀bmà dẽe naa. Nyíè sìgà nen é láá ẹẹ ló nu e náà nè va, sõò bà náa nyímá bé e bà gá ṍái zaa naa. Kẹ́ẹ é láá sií va tṍó e nen dõo nu nè va, bọọ èlmà tõ̀ò be ba beè olòó dõo nu nè dõona gbò tṍó ea kil nvéeá vaá bà náa láà naa na vó. Be è palàge vùlè pá vígà, née é dõogẽ bugi togó kọ bà náa mon lé, tãa vó, èé tú ẹ́ẹ́-ẹẹ̀ nyíe nèèmà va nu.​—Ẹ́fẹ. 4:2.

19-20. Éé ní ea náa vaá à bọ́ló kọ é ié ĩ̀ìmà tṍó e dõò nu nè dõona gbò e? (Ẹ̀b nàgé fòtó.)

¹⁹ Ié Ĩ̀ìmà. Kilma ló gè dõo nu, Méné Sólomòn ea beè palàge nyimá nu beè emí kọọ̀: “Tobví o gyã́á tẹlẹ sĩ́ múú, boo béè kọọ̀ tṍó e gã́bug dee ní téní, òé kpáá mòn.” (Ẹ̀klì. 11:1) Dọ̀ Kpá Káíá tẹ́lẹ bàlà kẽ kọọ̀ sìgà gbò é láá õái zaa​—“tṍó e gã́bug dee ni téní.” Níà nú ea beè naaá ló ene kà vígà pábia ẹ́.

²⁰ Gã́bug gbáá ea kil nvéeá, vaà ene kà nen ea ólò kùdẽe ló sẹ́kiùt beè emí kpá lẹ̀ẹ̀la tóm má ene kà vígà pábia ea ã́àa dììa múú. Mm̀ kpá ea beè emí máe ã́, a beè sièe kpóó ló kọ á kilsĩ́ gè bọ́ló dẹ̀lẹ̀ nyíé boo nè Jìhóvà. Tṍó e nú ea é láá dú aatáà gbáá ni téní, vígà pábiaá beè emí kpá lẹ̀ẹ̀la tóm má vaà nen ea géè kùdẽe ló sẹ́kiùta, a beè emí kọọ̀: “M̀ gbĩ́ gè naa kọ ó nyimá bé eo ni nveè bá nèm naa, gbò nú eo beè emí mm̀ kpá lẹ̀ẹ̀la tómá beè palàge tọá ḿ ló.” Vaá dọ̀ Kpá Káí eo beè emí bií lóá, náa é táḿ nyíe tọ́ọ̀ dee.”a Tṍó e vígà pábiaá ni kọ́ gbò tã̀àgã̀ ea beè tení bá lọ̀l, a beè gbóó kpáá kọọ̀: “Sìgà tṍó, gbò tã̀àgã̀ em beè tení báá beè ọọvẹ́ m ló vaá naa kọ ḿ gbĩ́ gè aa mm̀ kà-kàí. Sõò tṍó em kẽeà boo dọ̀ Kpá Káí ea beè di mm̀ kpá lẹ̀ẹ̀la tómá, à ólò siè m kpóó ló vaá naa kọ ḿ kilsĩ́ gè bọ́ló dẹ̀lẹ̀ nyíé boo nè Jìhóvà.” À kpáá kọọ̀: “Tọ́ọ̀ kà nú e nen ni náa nèm mm̀ aatáà gbááí gáà tọá ḿ ló belí kpá lẹ̀ẹ̀la tómá nè dọ̀ Kpá Káí eo beè emí má m ã́.” Zẹ́ẹ́ bugi togó boo bé e nyíè vaà nen ea ólò kùdẽe ló sẹ́kiùta é ẹ́ẹ naa, tṍó e aatáà gbáá ni téní vaá à gbóó mòn kpá lẹ̀ẹ̀la tómá! Be à sẹlẹ, gã́bug tṍó é láá tení besĩ́ nen kálá õái zaa ló nú e beè naa nèe.

21. Éé ní ea náa vaá ò beeláfùl ge dõo nu taalẹ bá belí bé e Jìhóvà ólò dõo nu naa ẽ́?

²¹ Dì belí bé e ni kọ́ naa, Jìhóvà beè dèmii mm̀ sĩ́deè ea dú kele. Náa kal ló béè kọọ̀ nyíéi ólò ẹẹ tṍó e bà dõo nu nèi, nyíéi ólò palàge ẹẹ tṍó e beele ní e dõò nu nè dõona gbò e. Nyíéi ólò ẹẹ tṍó e láà nvèè bá nè pá vígà. Vaá nyíéi ólò ẹẹ nagé tṍó e bà ṍái zaa. Sõò, kọbèè à gá náa vaá nen e dõò nu nèa náa ṍái zaa, nyíéi á ẹẹ boo béè kọ è náà nú ea dú lé. Á gá tá ní nyíe kọọ̀ kọ̀láá kà nú eo neè, “Jìhóvà é láá nè ni nú ea el boo nú eo beè nèa.” (2 Kró. 25:9) Née é láá dõo nu nè dõona gbò èlmà bé e Jìhóvà ólò dõo nu nèi naa! Vaá tọ́ọ̀ nú eé láá doolé ló kpẽ́ e Jìhóvà é néi á gé. Vóà naa, naanii èé bééláfùl ge nó bẹẹ Tẹ̀ Jìhóvà ea ólò dõo nu taalẹ bá.