Nvèè Sãa Kúm Bọọ Bõ̀ònatõ̀ò

Beeá ló bàlà booí, gã́bug gãà gbò nen gé tú ẹ́ẹ́ nyíe fã̀àmà Jìhóvà gbẹá gã́bug bõ̀ònatõ̀ò. Nyíé va ẹ́ẹ ló gbò dùùlà ba deè tṍ nè tùle e bà íe, vaá bà ólò nvèè sãa kúm ba bõ̀ònatõ̀ò mm̀ gã́bug sĩ́deè. É kọ níà bé e olo ólò naa nagé gbẹá bọọ bõ̀ònatõ̀ò ẽ?

1. Mókà gbò sĩ́deè ní eo é láá tú o tṍó nè kói nvèèmà sãa kúm bọọ bõ̀ònatõ̀ò ẽ?

Dénè bẹ̀ì é láá nvèè bá nè bẹẹ bõ̀ònatõ̀ò. Dì belí nu dòòmà bá, é kọọ̀ gbò e ba ni dú kànen mm̀ dee àbèè gbò e bo di ló di mm̀ bọọ bõ̀ònatõ̀ò? É kọ òó láá nvèè bá dàlà va siimá nònù? Sẹ̀ òó láá nvèè bá nè va naa sìgà nu, dì belí gè sì gé zalí nu àbèè ge sí tóm tọ nè va? (Bugi Jém̀z 1:27.) Èé láá nvèè nàgé bá õ̀ònà ló vaá sí tóm ló bẹẹ Kíndòm Họ́ọ̀l. Tọ́ọ̀ nen náa ólò tú bá kpóó siimái kọ é naa gbò nuí. Vulè e íè kilma ló Bàrì nè pá vígà ólò naa kó é “tú [bẹẹ] lóó nè.”—Psalm 110:3.

Gbò e ba ni diia múú é láá nvèè bá nè ba bõ̀ònatõ̀ò mm̀ dõòna kà gbò sĩ́deè. Bàé láá íbá ló gbò gbálà e bà sim tùlà vaá íe kà lé gbaa ló kilma ló Jìhóvà naamá gbò nvèè bá sìtóm, vaá íva bá ló naamá gbò kànen tṍó e tṍó ni téní. Gbò gbálà nè gbò bia é láá nvèè sãa kúm sìtóm kọ̀ kpẹ̀a tení dú ló gè dú gbò gyà deèsĩ́ tóm kọ̀ kpẹ̀a. Sìgà pá vígà é láá nvèè bá ló tóm gè tìb gbò tọ eé tõó m nè fã̀ Bàrì àbèè ge nyaaná tõ̀ò kil kiẽ́e e dõòna kà bõ̀ònatõ̀ò íe bíi ló nvèè bá.

2. Mósĩ́ deè ní eé láá tú gbò nú e íè nvèèmà bá nè bõ̀ònatõ̀ò ẽ?

Èé láá tú bẹẹ gbò “nú e ka di ló nvèèmà ka ló Jìhóvà.” (Próvẹẹ̀b 3:9) È ẹbvì naamá nèà deè ge tú bẹẹ kpègè nè gyọ́ nvèèmà sãa kúm bẹẹ bõ̀ònatõ̀ò nè sìtóm kọ̀ kpẹ̀a beeá ló bàlà booí. (Bugi 2 Kọ́rìnt 9:7.) Bà ólò tú bẹẹ gbò lọ̀là-lọ̀là nvèèmà nàgé bá nè gbò e nu kyọa ló. Gã́bug nen ólò ‘kùbmà sìgà kpègè’ naa ní e bàé láá olòó nèèmà lọ̀là-lọ̀là. (Bugi 1 Kọ́rìnt 16:2.) Èé láá tú bẹẹ lọ̀là-lọ̀là tẹlẹ mm̀ gbò kpó ea di kiẽ́e e ólò tõo nè fã̀ Bàrì, àbèè è ne tenmá boo bẹẹ website ea kọlà donate.jw.org. Jìhóvà néi nèà deè ge zogè bé e vulèe naa tení dú ló bé e túù gbò nú e íè siimá tóm naa.

KPÁÁ NÓ BỌ̀Ọ̀VẸ̀

3. Èé láá tú nú e íè nèèmà lọ̀là-lọ̀là

Jìhóvà nè Jíízọ̀s vulè nen ea tú ẹ́ẹ́ nyíe nèèmà nu. Dì belí nu dòòmà bá, Jíízọ̀s beè lèèlà ene kà sàn vaà tãa ea beè tú ńkem̀ kpègè ea dìé bá nèèmà lọ̀là-lọ̀là. Bugi Lúùk 21:1-4, vaá ò gbóó aalai gbò bíbví:

• É kọọ̀ à dú bíi kọ é zẹ́ẹ́ tú gã́bug kpègè nèèmà lọ̀là-lọ̀là besĩ́ nyíè Jìhóvà kálá ẹẹ?

• À ólò tõó ló Jìhóvà nè Jíízọ̀s naa vàẹ tṍó e bẹẹ lọ̀là-lọ̀là ààí nyíe ẽ́?

Kọbé ò nyímá bé e bà ólò tú bẹẹ lọ̀là-lọ̀là siimá tóm naa, bìlà VÍDIÒÍ, vaá ò gbóó aalai bíb ea nyoone.

VÍDIÒ: ‘Nú Eo Noò Ge Nè Jìhóvà’ (4:47)

• Mósĩ́ deè ní e bà ólò tú bẹẹ gbò lọ̀là-lọ̀là nvèèmà bá nè gbò bõ̀ònatõ̀ò ea dì beeá ló bàlà booí é?

4. Èé láá tú lóó nè ge nvèè bá

Deè kéléá, gbò níí Jìhóvà beè tú bẹ̀à sã́ bùlà siimá tóm mm̀ ge ẹ̀b nú ea kil ló gbò kiẽ́e e bà ólò tõo fã̀ Bàrì. Sõò níí náa bãàa mm̀ áá gè tú kpègè nèèmà lọ̀là-lọ̀là. Bugi 2 Krónikòl 34:9-11, vaá ò gbóó aalai nakà bíbví:

• Mósĩ́ deè ní e kọ̀láá nen ea dú Ízràẹ̀l beè nvèè bá mm̀ ge ẹ̀b nú ea kil ló tọọ̀ Jìhóvà, àbèè kiẽ́e e bà ólò tõo fã̀e ẽ́?

Ge nyimá bé e Gbò Neǹ Ditõ̀ò Jìhóvà gé nó nu dòòmà bá pá Ízràẹ̀l e ba beè di deè kéléá naa, bìlà VÍDIÒÍ, vaá ò gbóó aalai gbò bíb ea nyoone.

VÍDIÒ: Ge Ẹ̀b Nú Ea Kil Ló Bẹẹ Ketõ̀ò Ge Tõo Nè Fã̀ (3:31)

• Éé ní ea náa vaá à bọ́ló kọ é sí tóm ló bẹẹ Kíndòm Họ́ọ̀l vaá naa kọ á di boo kúu é?

• Mókà gbò sĩ́deè ní eo é láá nvèè bá ẹ́?

5. Gbò gbálà é láá sìm tùlà ge sí gã́bug tóm mm̀ bõ̀ònatõ̀ò

Kpá Káí síè kpóó ló gbò gbálà kọ bàá pììgà bé e ba kpóó sim tùlà naa gè nvèè sãa kúm bõ̀ònatõ̀ò. Ge ẹ̀b ene kà nu dòòmà bá ea zógè naa vó, bìlà VÍDIÒÍ, vaá ò gbóó aalai bíb ea nyoone.

VÍDIÒ: Gbò Vígà Págbálà—Iei Tàn Nyoomai Gè Sii Lé Tóm (5:19)

• Mm̀ vídiòá, mósĩ́ deè ní e Ryan beè sìm tùlà ge kpáá palàge nvèè sãa kúm bõ̀ònatõ̀ò ẽ?

Kpá Káí kọ́ gbò kpãa e gbò vígà págbálà é sim tùlà besĩ́ bà kálá dú gbò nvèè bá sìtóm nè gbò kànen mm̀ bõ̀ònatõ̀ò. Bugi 1 Tímotì 3:1-13, vaá ò gbóó aalai gbò bíbví:

• Éé ní ea dú gè ẹ̀bmà dẽe lọl bá gbò vígà págbálà e bà gbĩ́ gè sìm tùlà ge dú gbò nvèè bá sìtóm nè gbò kànen mm̀ bõ̀ònatõ̀ò ẽ?

• Éé ní ea dú gè ẹ̀bmà dẽe lọl bá pá ba tọ ẹ́?—Ẹ̀b 4 nè 11 gã́bel.

• Tṍó e gbò vígà págbálà piiga boo gè sìm tùlà gbo kpãaí, mósĩ́ deè ní ea ólò dọ̀ bélè nè kọ̀láá nen ea di mm̀ bõ̀ònatõ̀ò ẽ?

NÚ E NI NÓ

Jìhóvà ólò palàge nvèè ka ló bẹẹ pììgà ge tú bẹẹ tṍó, kói, nè nú e íè nvèèmà sãa kúm bõ̀ònatõ̀ò.

Ge Òòa Boo

• Mósĩ́ deè ní e beéle é láá tú bẹẹ tṍó nè kói nvèèmà sãa kúm bõ̀ònatõ̀ò ẽ?

• Mósĩ́ deè ní eé láá tú bẹẹ gyọ́ nvèèmà sãa kúm bõ̀ònatõ̀ò ẽ?

• Mósĩ́ deè ní ea é léémá ni ge nvèè sãa kúm bõ̀ònatõ̀ò ẽ?

KPÁÁ GBĨ́ TẼ́ LÓ

Nyimá nú ea náa vaá Bàrì náa kọ́ ná kọọ̀ pá a gyóòlo á kpená ené boo òb.

“What Does the Bible Say About Tithing?” (Web article)

Kpá Káí kọ́ sìgà tóm e gbò gbálà e ba ni diìa múú é sí. Sõò èé kọ́ vàẹ beè vígà pábia gbĩ́ gè sí sìgà gbò tómí ẽ́?

“Ge Dã́ Ból Ló Lẹ̀ẹ̀là Bel E Gbò Kànen ĺe Mm̀ Bõ̀ònatõ̀ò” (Kpá Tọ Kùdẽe Ló, February 2021)

Ẹ̀b bé e pá vígà e bà íe agẹ ló beè tú lóó vaamá gyọ́ọ kọbé bà láá tú kpá má pá vígà e bà di dõòna ketõ̀ò naa.

Ge Nè Gàgì Kpá E Ba Beè Emí Dẹ̀ẹ̀a Boo Kpá Káí Gbẹá Congo (4:25)

Nyimá bé e bá e Gbò Neǹ Ditõ̀ò Jìhóvà ólò ié kpègè e bàé síímá tóm dú kele ló bá e dõòna kà gbò bõ̀ònaló fã̀ ólò ié ba kpègè naa.

“How Is the Work of Jehovah’s Witnesses Financed?” (Web article)