Mósĩ́ Deè Ní Eo É Láá Kọ́ Kpẹ̀a Ẹ́?

Tṍó eo gé nó gbò kà kà bel ea di mm̀ Kpá Káí, òó láá bugi togó kọọ̀, ‘À bọ́ló kọọ̀ kọ̀láá nen á nyimá gbò kà kà belí!’ Mm̀ kà kà, à dú bíi kọọ̀ kọ̀láá nen á nyimá! Sõò, pọ̀ é láá sií ni gè kọ́ gbò nú eo ni nó nè dõòna gbò. Èé zẹ́ẹ́ ló bel boo bé eo é láá bé èlbá síìa pọ̀á vaá tú ẹ́ẹ́ nyíe vèèmà lé kpẹ̀a ea di mm̀ Kpá Káí naa.

1. Mósĩ́ deè ní eo é láá kọ́ gbò nú eo ni nó nè gbò eo nyímà ló é?

Gbò nyòòne nvéè Jíízọ̀s beè kọọ̀: “Beele née é láá kùb ge [kọ́] nu e beele beè mònmà dẽe vaá dãamà tṍ.” (Tóm 4:20) Ba beè palàge nvèè ka ló kà kà bel ea kil ló Jìhóvà vaá gbĩ́ kọọ̀ kọ̀láá nen á dã̀. É kọọ̀ níà bé ea tõo nágé ló olo naa ẽ́? Beè vó, gbĩ́ gbò nèà deè eo é láá kọọmá gbò nú eo ni nó nè pá bọọ tọ nè pá o kóò mm̀ bá fã̀ dẽe.—Bugi Kọ́lọsì 4:6.

2. Éé ní ea náa vaá ge zọ̀ bõ̀ònatõ̀ò kọ́ kpẹ̀a à dú kà lé nu gè sẹẹ̀a sĩ́ ẽ́?

Gbò nyòòne nvéè Jíízọ̀s náa beè kọ́ kpẹ̀a nè áá gbò e bà nyímá ló. Jíízọ̀s beè “lẹ̀ẹ̀làva bàà nè bàà kọ bàá gyaàẹ̀ẹ́ sĩ́ gé bã kọ̀láá kà bon nè kọ̀láá ketõ̀ò ea beè kọ àé síè.” (Lúùk 10:1) Lé bá gè nòòmà tóm kọ̀ kpẹ̀aí beè naa kọọ̀ bàá láá kọ́ kpẹ̀a nè gã́bug nen. Ge gbá kọ́ kpẹ̀a beè naa kọọ̀ nyíè gbò nyòòne nvéè Jíízọ̀s á ẹẹ. (Lúùk 10:17) É kọọ̀ òó láá tú gè zọ̀ bõ̀ònatõ̀ò kọ́ kpẹ̀a naamá nú eo é noo sẹ̀ẹ̀a sĩ́?

KPÁÁ NÓ BỌ̀Ọ̀VẸ̀

3. Jìhóvà é dí ní ló

Pọ̀ ólò sii sìgà nen ea gbĩ́ gè kọ́ kpẹ̀a boo béè bé e gbò nen é ẹbvíe àbèè ge labví láb naa.

• É kọọ̀ pọ̀ ólò sií ni ló gè kọ́ gbò nú eo ni nó nè dõòna gbò? Be ò náà ẽei àbèè ẽ́èe, ló éé?

Bìlà VÍDIÒÍ, vaá ò gbóó aalai bíb ea nyoone.

VÍDIÒ: M Beè Bàn Jìhóvà Kọ Á Nèm Agẹló (4:05)

• Mósĩ́ deè ní e gbò nvín ãaí beè bé èlbá síìa pọ̀ ẹ?

Bugi Àìzáíà 41:10, vaá ò gbóó aalai nakà bíbví:

• Mósĩ́ deè ní e gè tã̀àgã ló Bàrì é láá nvèè bá nè ni tṍó e pọ̀ síí ni ló gè kọ́ kpẹ̀a ẹ́?

O beè nyimá gé?

Pọ̀ beè olòó sii gã́bug Gbò Neǹ Ditõ̀ò Jìhóvà kọ bà náa é láá kọẹ̀ kpẹ̀a neè dõòna gbò. Dì belí nu dòòmà bá, Sergey beè olòó ié bùlà kọ á géè ló tọ́ọ̀ nu, naa ní ea beè tàvàlàẹ́ ló gè zọ̀ dõòna gbò loá bel. Sõò tṍó ea nó Kpá Káí, à kọ́ọ̀: “Náa kal béè kọọ̀ pọ̀ beè olòó siím, m beè dààmà togó gè kọ́ nú em ni nó nè dõòna gbò. A beè palàge bọọ ḿ ló kọọ̀ ge kọ́ nú ea di mm̀ Kpá Káí nè dõòna gbò náa kọ ḿ láá dẹlẹ nyíé boo nà bá. A beè naa kọọ̀ ḿ àgala boo gbò nú em zigà ló.”

4. Ié dùm fã̀ dẽe

Tṍó eo gé vee lé kpẹ̀aí, ó gá bugi togó boo áá nú eo é kọ́, sõò bugi nagé togó boo bá gè kọọmá. Bugi 2 Tímotì 2:24 nè 1 Pítà 3:15, vaá ò gbóó aalai gbò bíbví:

• Mósĩ́ deè ní eo é láá tú gbò dọ̀ Kpá Káíí siimá tóm tṍó eo gé zọ gbò nen loá bel boo Kpá Káí é?

• Sìgà pá bọọ tọ àbèè gbò kóò náa é ziga ló nú eo kọ́ọ̀ nèva. Éé ní eo é láá naa ẽ́? Éé ní e bè nóo é náa ẽ́?

• Éé ní ea náa àé dú lé gè tú tál bĩimá bíb èlmà ge tãgĩ bá gbò nen kọ bàá ziga ló nú e kọ́ọ̀ ẹ?

5. Ge kọ́ kpẹ̀a ólò naa kọọ̀ nyíéi á ẹẹ

Jìhóvà beè tú tóm gè kọ́ kpẹ̀a nè Jíízọ̀s. Jíízọ̀s beè ẹ̀b tómá naa vàẹ? Bugi Jọ́ọ̀n 4:34, vaá ò gbóó aalai gbò bíbví:

• Ge dé gyã́á ólò sẹlẹ́í dùm vaá naa kọ nyíéi á ẹẹ. Éé ní ea náa vaá Jíízọ̀s beè tú gè naa bùlà Bàrì, ea bãàa mm̀ ge vee lé kpẹ̀aí doolé ló gè dé gyã́á ẽ́?

• É kọ ò bulà kọọ̀ ge vee lé kpẹ̀aí é náa kọọ̀ nyíé ni á ẹẹ?

NÚ E NI NÓ

Ge kọ́ kpẹ̀a nè dõòna gbò ólò naa kọọ̀ nyíéi á ẹẹ, vaá gè naa vó é láá valí èlmà bé eo géè ẹ̀bmà dẽe naa.

Ge Òòa Boo

• Éé ní ea náa vaá èé kọ́ kpẹ̀a nè dõòna gbò e?

• Mósĩ́ deè ní eo é láá zogè kọ ò íèè fã̀ dẽe tṍó eo gé kọ́ kpẹ̀a ẹ́?

• Mósĩ́ deè ní eo é láá bé èlbá síìà pọ̀ eo beè ié kilma ló gè kọ́ kpẹ̀a ẹ́?

KPÁÁ GBĨ́ TẼ́ LÓ

Bugi togó boo ténì sĩ́deè eo é láá tú jw.org kontat kaàd kọọmá kpẹ̀a.

Ńkem̀ Nu Dòòmà Bá Gè Nèèmà JW.ORG Kontat Kaàd (1:43)

Nyimá nú ea kil ló ténì kà kpãa ea é láá nvèè bá nè ni kọ ó vee lé kpẹ̀aí.

“É Kọọ̀ Ò Di Kpènà Ló Gè Kolí Gbò Nen?” (Kpá Tọ Kùdẽe Ló, September 2020)

Ẹ̀b bé e nu dòòmà bá ea di mm̀ Kpá Káí é láá nvèè bá nèi kọ é ié agẹló kọbèè è di dí ãa naa.

Jìhóvà É Náa Kọ Ó Ié Agẹló (11:59)

Nyimá bé eo é láá zọ̀ pá bọọ tọ e bà gáà nó nu ea kil ló Jìhóvà loá bel boo Kpá Káí naa.

“Reaching the Heart of Unbelieving Relatives” (Kpá Tọ Kùdẽe Ló, March 15, 2014)