Vulè Eo Íè Á Naa Kọ Ó Kilsĩ́ Gè Kọ́ Kpẹ̀a!

1. Éé ní e ba beè kọ́ gbẹá kè bila ló bel ea ólò sẹẹa buù gbáá níí 2023 e?

GBẸÁ kè bila ló bel ea ólò sẹẹa buù gbáá níí 2023,a ba beè kpáá baatẽ́ nyààa ea bã́ ló bẹẹ dã̀ból ló nu, vaá nyíéi beè ẹẹ tṍó e dã́à nègã́ ea kil ló bẹẹ sìtóm kọ̀ kpẹ̀a. Dì belí nu dòòmà bá, e beè dã́ kọọ̀ sìgà gbò é íe nèà deè ge gbaaá ló gbò níí Jìhóvà tṍó e ba ni kyọsĩ́ Gbele Bábilọ̀n lọ̀l. Ba beè kọ nagé kọọ̀ lọl November 2023, é gá lọ̀à nà sìgà bẹẹ kpẹ̀a sìtóm kọ̀ kpẹ̀a bá. É kọọ̀ gbò nyààaí zógè kọ náa dú bíi kọ é tú bẹ̀à sã́ bùlà kọọmá kpẹ̀a belí bé e beè olòó naa? Ẽ́èe!

2. Éé ní ea náa vaá buù bé e dee gé téní naa, à dú bíi kọ é kpáá tú bẹẹ sìtóm kọ̀ kpẹ̀a kolmá nu ẽ́? (Máàk 13:10)

² Buù bé e dee gé téní naa, níà bé ea dú bíi kọ é kpáá tú bẹẹ sìtóm kọ̀ kpẹ̀a kolmá nu naa ẽ́. Ló éé? Boo béè kọọ̀ tṍó ea sígá dú ńkem. Bugi togó boo nú e Jíízọ̀s beè gbẹẹ́ sĩ́ kọ́ kilma ló bé e bẹẹ sìtóm kọ̀ kpẹ̀a é meà naa mm̀ dee deè nvéè deeí. (Bugi Máàk 13:10.) Dẹ̀ẹ̀a boo nú ea di mm̀ kpá Máátìù, Jíízọ̀s beè kọọ̀ bàé vee lé kpẹ̀aí nvee dénè ketõ̀ò besĩ́ “kùbmà” kálá bã ló bàlà booí. (Máát. 24:14) Ke kùbmàá gé lóá bel nyòòmà tṍó e bàé kyọsĩ́ bàlà boò Sétàní. Jìhóvà a noo “dee nè tṍó” e gbò nuí é nááá. (Máát. 24:36; 25:13; Tóm 1:7) Bé e dee gé téní naa, níà bé e kùbmà bàlà booí gé dũunà iná kuló naa ẽ́. (Róm̀ 13:11) Vóà naa, èé kilsĩ́ gè kọ́ kpẹ̀a dọ̀ọ̀mà tṍó e kùbmà é bã́ ló bàlà booí.

3. Éé ní ea náa vaá è ólò kọ́ kpẹ̀a ẹ́?

³ Boo tṍó e gé ká bùlà gbẹẹ́ boo bẹẹ sìtóm kọ̀ kpẹ̀a, à dú bíi kọ é bĩiná bẹẹ bá kọọ̀: Éé ní ea náa vaá è ólò kọ́ kpẹ̀a ẹ́? È ólò naa vó boo béè kọ è íè vulè. Tṍó e kọ́ọ̀ kpẹ̀a è ólò zogè kọ è vulè lé kpẹ̀aí, vùlè gbò nen, vaá ní ea bọọ lọ̀l vaá à lee dú vulè e íè kilma ló Jìhóvà nè a bée. Naanii èé ló bel boo buù kà.

È ÓLÒ KỌ́ KPẸ̀A BOO BÉÈ KỌ È VULÈ LÉ KPẸ̀AÍ

4. À ólò tõó ní ló naa vàẹ tṍó eo dã́à lé kpẹ̀a ẹ́?

⁴ É kọ òé láá kẽea boo bé e nyíé ni beè ẹẹ naa tṍó e lé nu beè naaá ní ló​—be à sẹlẹ tṍó eo beè dã́ kọọ̀ nen man nvín ábèè tṍó e bà né ni tóm ea géè bií ni? Nyíé ni beè palàge ẹẹ naa ní eo kọ́ọ̀ nè pá o kóò nè pá bọọ tọ. É kọ níà bé e nyíé ni beè ẹẹ naa ẽ́ tṍó eo dã́à lé kpẹ̀a ea bọọ lọ̀l vaá à lee​—naamá lé kpẹ̀a ea kil ló Boǹ Méné Bàrì e?

5. A beè tọá ní ló naa vàẹ túá tṍó eo dã́à kà-kà bel ea di mm̀ Kpá Káí é? (Ẹ̀b nàgé fòtó.)

⁵ Bugi togó boo bé ea beè tọá ní ló naa túá tṍó eo beè dã́ kà-kà bel ea di mm̀ Kpá Káí. O beè nó kọọ̀ o Tẹ̀ ea di káála vulè ni vaá gbĩ́ kọ ó dũunà pá a tọ e bà gé fã́e, nagé à zigà kọ àé nveenìè kùbmà ló nyaa ló nè mòn tã̀àgã̀, vaá naa kọ ó ié ból dẽesĩ́ gè kpáá mòn gbò eo vulè e ba beè ù tṍó e bàé kẽeà aa kemà ú mm̀ ãa bàlà boo​—bií ló dõona kà gbò nú ea zigà. (Máàk 10:​29, 30; Jọ́ọ̀n 5:​28, 29; Róm̀ 8:​38, 39; Kùùà 21:​3, 4) Tṍó eo nóò gbò nuí, nyíé ni beè palàge ẹẹ. (Lúùk 24:32) Gbò nú eo nóòí beè palàge leemá ni naa ní eo kọ́ọ̀ nè dõona gbò!​—Doolé ló Jèrèmáíà 20:9.

6. Éé ní eo nóò lọl ló nú ea beè naaá ló Ernest nè Rose e?

⁶ Bugi togó boo nú ea beè naaá ló ene kà vígà págbálà ea bée kọlà Ernestb ea tẹ̀ beè ù tṍó ea ni tóólá òb gbáá. Vígàí kọ́ọ̀: “M beè bugi togó kọọ̀: ‘É kọ à aà kil káála? Sẹ̀ a ú dọ̀ dè-dè e?’ M̀ ólò bẹ́ nyíé ló dõona kà gbò pá nvín e ba tẹ̀ dì.” Ernest ólò àà kil kĩée e ba beè lì a tẹ̀, kumí dúnú kẽ boo a kpò lí vaá tã̀àgã ló Bàrì kọọ̀: “Sóo-sóo, e Bàrì, m̀ gbĩ́ gè nyimá kĩée e ńdáà tẹ̀ dì.” Tṍó e 17 gbáá téní aa ló tṍó ea tẹ̀ ni ú, ba beè kọ́ kpẹ̀a nè Ernest vaá a beè zìgà kọ bàá noomàèe Kpá Káí. Nyíée beè palàge ẹẹ tṍó ea nó kọọ̀ gbò e bà ú náa nyímá ná tọ́ọ̀ nu, à bélí kọọ̀ bà di dáá, vaá Bàrì zigà kọọ̀ àé kẽenìè gbò e ba beè ù lọl kemà ú dì deèsĩ́. (Ẹ̀klì. 9:​5, 10; Tóm 24:15) Dee deè nvée, Ernest beè gbóó nyimá ààlaà gbò bíb ea géè tãgẽ́e mm̀ gã́bug gbáá! Nyíée beè palàge ẹẹ ló kà-kà bel ea nó lọl mm̀ Kpá Káí. A vaà Rose beè zọ̀ẹ nó Kpá Káí vaá nyíée beè ẹẹ nagé ló gbò nú ea nó. Ba beè diia múú mm̀ gbáá 1978. Vaá ba beè tú bẹ̀à sã́ bùlà kọọmá nú e bà ziga ló nè pá ba tọ, gbò kóò, nè dõona gbò. Vó beè naa kọọ̀ Ernest nè Rose á láá nvèè bá nè nú ea sígá ló 70 nen kọ bàá nyimá ló Jìhóvà vaá dììa múú.

7. Éé ní ea ólò naaá tṍó e palàge vùlè kà-kà belí é? (Lúùk 6:45)

⁷ Mm̀ kà-kà, tṍó e vulè gbò kà-kà bel e nóò lọl mm̀ Kpá Káí, à ólò tànii gè kọ́ nè dõona gbò. (Bugi Lúùk 6:45.) Èé bélí gbò nyòòne nvéè Jíízọ̀s e ba beè kọọ̀: ‘Beele née é láá kùb ge kọ́ nu e beele beè mònmà dẽe vaá dãamà tṍ.’ (Tóm 4:20) È palàge vùlè kà-kà bel, vaá è gbĩ́ kọọ̀ kọ̀láá nen á dã̀.

È ÓLÒ KỌ́ KPẸ̀A BOO BÉÈ KỌ È VULÈ GBÒ NEN

8. Éé ní ea náa vaá è ólò kọ́ kpẹ̀a nè dõona gbò e? (Bugi ńkpó ea kọ́ọ̀ “Vùlè Gbò Nen​—Naa Kọ Bàá Nyoone Nvéè Kráìst.”) (Ẹ̀b nàgé fòtó.)

⁸ È vulè gbò nen belí Jìhóvà nè a Sã́áná. (Pró. 8:31; Jọ́ọ̀n 3:16) È ólò tó sàn gbò e bà náa ‘nyímá ló Bàrì’ vaá bà náa ié “ból dẽesĩ́.” (Ẹ́fẹ. 2:12) Bà gé mon gã́bug tã̀àgã̀, vaá beele íè nú ea é láá nvèè bá nèva​—ea dú lé kpẹ̀a ea kil ló Boǹ Méné Bàrì. Vulè nè tóè sàn e íè kìlmà vá ló ólò naa kọ é pììgà bé e bẹẹ kpóó sim tùlà naa ge kọ́ lé kpẹ̀aí nèva. Lé kpẹ̀aí é láá naa kọ bàá ié ból dẽesĩ́, tṍó dùm ea dú lé kátogóí, vaá naa kọ bàá nyimá kọọ̀ enè dee bàé ié “dùm ea dú kà-kà”​—naamá dùm e bè náa tá mm̀ ãa bàlà boo.​—1 Tím. 6:19.

9. Mókà ã̀àne ní e ólò kọ́ nè gbò nen kilma ló dì deèsĩ́ ẽ́, vaá ló éé? (Èzíkiẹ̀l 33:​7, 8)

⁹ Vulè e íè kilma ló gbò nen ólò naa kọ é ãané va kọọ̀ kùbmà nakà pọ́lọ́ bàlà booí a íná kuló. (Bugi Èzíkiẹ̀l 33:​7, 8.) È íè tóè sàn kilma ló gbò nen nè pá bẹẹ tọ e bà náa ólò fã̀ Jìhóvà. Gã́bug nen ólò tõó dùm bé ea léémá va naa boo béè kọọ̀ bà náa nyímá ló nú ea é dú sĩ́, bà náa nyímá kọọ̀ tṍó e Bàrì é kyọsĩ́ bàlà booí “tã̀àgã̀ ea é dí tṍóá é el kọ̀láá íb tã̀àgã̀ e gbò nen ni mon lọl dààmà togó bàlà booí tẹlẹ nieí, vaá tṍó e níí ni téní àà, tọ́ọ̀ kà tã̀àgã̀ ea tõò vó náa é kpáá dìnà.” (Máát. 24:21) È gbĩ́ì kọ bàá nyimá nú ea é nááá tṍó bèèla bel. Túá kà, bàé kyọsĩ́ kyáá bõ̀ònaló fã̀ vaá bé Àmágidòn é gbóó kyọ̀sĩ́ nakà pọ́lọ́ bàlà booí. (Kùùà 16:​14, 16; 17:​16, 17; 19:​11, 19, 20) À taníi kọọ̀ gã́bug nen á pãane tṍ ló ã̀àneí vaá zọ̀i fã̀ Jìhóvà kátogóí. Sõò, èé kọ́ vàẹ kilma ló gbò e bà náa pãanéi tṍ ló bíi ló pá bẹẹ tọ e bà náa ólò fã̀ Jìhóvà ẹ?

10. Éé ní ea náa vaá à dú bíi kọ é kọ́ nú ea é nááá dì deèsĩ́ nè gbò nen ẽ́?

¹⁰ Belí bé e beè baatẽ́ mm̀ togó bel e ã́àa nòa naaá, àé láá tàn Jìhóvà ge dùùlà gbò e bà ọ́gá tṍó e bà mon kọ baa kyọsĩ́ Gbele Bábilòn. Beè vó, à palàge dú bíi kọ é ãané va kátogóí. Bugi togó boo níí: Tṍóá, bàé láá bugi togó boo nú e kọ́ọ̀ nèva kátogóí. (Doolé ló Èzíkiẹ̀l 33:33.) Be à sẹlẹ, bàé láá kẽ̀èa boo gbò nú e beè kọ́ nèvaá, vaá bà zọ́i fã̀ Jìhóvà besĩ́ à kálá dú kpẹ̀ nvée. Dì belí bé e neǹ bé ea beè olòó kùdẽe ló tọọ̀ kpọ́gọ́lọ́ ea beè di Fílipaì beè nyaaá naa tṍó e “zivèkà kunukẽ̀ kĩée e tọ kpọ́gọ́lọ́á dìa beè gbóó bú ló zùgà” naaá, be à sẹlẹ níà bé e sìgà gbò e bà náa pãanéi tṍ ló kátogóí é láá nyaaá tṍó e bàé kyọsĩ́ Gbele Bábilọ̀n naa ẽ́.​—Tóm 16:​25-34.

È ÓLÒ KỌ́ KPẸ̀A BOO BÉÈ VULÈ E ÍÈ KILMA LÓ JÌHÓVÀ NÈ A BÉE

11. Mósĩ́ deè ní e ólò tú lèèlà, ka, nè kpóó nè Jìhóvà ẹ? (Kùùà Nù 4:11) (Ẹ̀b nàgé fòtó.)

¹¹ Ene kà pọ̀bkà nú ea náa vaá è ólò kọ́ lé kpẹ̀aí dú boo béè vulè e íè kilma ló Jìhóvà nè a bée ea di káí. È ólò ẹ̀b bẹẹ sìtóm kọ̀ kpẹ̀a naamá enè sĩ́deè gè lèèlà bẹẹ Bàrì e vulè. (Bugi Kùùà Nù 4:​11, NW.) È zigà kọ à bọ́ló kọọ̀ dénè gbò e bà gé fã Jìhóvà Bàrì mm̀ bọ́ló dẹ̀lẹ̀ nyíé boo á tú lèèlà, nè ka, nè kpóó nèe, boo béè kọ à bọ́ẹ ló. È ólò nèe ka nè lèèlà tṍó e kọ́ọ̀ nú ea zógè kọọ̀ ẹlẹ ní ea beè “dèm dénè nu ẽ́” vaá ẹlẹ ní ea náa kọ é di dùme nè dõona gbò. È neèe kpóó tṍó e túù bẹẹ tṍó, kói, nè gbò nú e íè nvee mm̀ bẹẹ sìtóm kọ̀ kpẹ̀a dì belí bé e bẹẹ kpóó sim tùlà naa. (Máát. 6:33; Lúùk 13:24; Kọ́l. 3:23) À ólò leemái gè kọ́ nú ea kil ló Bàrì e vulè, vaá à ólò tànii gè kọ́ a bée nè nú ea tõó dọ̀ nè gbo nen. Ló éé?

12. Mósĩ́ deè ní e ólò naa kọọ̀ béè Jìhóvà á di káí tṍó e gé kọ́ kpẹ̀a ẹ́?

¹² Vulè e íè kilma ló Jìhóvà ólò naa kọ é nvèè ka ló a bée. (Máát. 6:9) Níí tõó dọ̀ kọọ̀ èé kọ́ nè gbò nen kọọ̀ gbò bel e Sétàn ni kọ́ kilma ló Jìhóvà dú kyáá. (Jén. 3:​1-5; Jóòb 2:4; Jọ́ọ̀n 8:44) Tṍó e gé kọ́ kpẹ̀a, à ólò tànii gè kọ́ gbò kà-kà bel ea kil ló Jìhóvà nè gbò e bà pãanéi tṍ ló. È ólò gbĩ́ kọọ̀ kọ̀láá nen á nyimá kọọ̀ pọ̀bkà kpãa e Jìhóvà íe dú vulè, vaá a bẹlbẹ̀l dú lé, nè ge kọọ̀ pọ́ì ńkem̀ tṍó àla a Boǹ Méné é lọl dénè tã̀àgã̀ e gbò nen gé téní bá vaá naa kọọ̀ gbò nen á ié fẹ́ẹ́-fẹẹ̀ ló nè ẹ́ẹ́-ẹẹ̀ nyíe. (Ps. 37:​10, 11, 29; 1 Jọ́ọ̀n 4:8) Tṍó e kọ́ọ̀ gbò nú ea kil ló Jìhóvà nè gbò nen, è náà kọọ̀ a bée á di káí. Nyíéi ẹ́ẹ́ nagé boo béè kọọ̀ è gé náa nú ea bọ́ló kọ é naa dì belí Gbò Neǹ Ditõ̀ò Jìhóvà. Éé ní ea náa vaá è kọ́ vó é?

13. Éé ní ea náa vaá nyíéi à ẹẹ gè kọ̀là Gbò Neǹ Ditõ̀ò Jìhóvà ẹ? (Àìzáíà 43:​10-12)

¹³ Jìhóvà beè sài kọ é duè “pá a gbò neǹ ditõ̀ò.” (Bugi Àìzáíà 43:​10-12.) Kpá lèèla tóm e Gbò Ge Tulè Tóm beè emí sìgà gbáá ea kil nvéeá beè kọọ̀: “Pọ̀bkà ka eé láá ié lọ̀l vaá à lee dú gè kọ̀là Gbò Neǹ Ditõ̀ò Jìhóvà.”c Éé ní ea náa è kọ́ vó é? Bugi togó boo nakà nu dòòmà báí. Be ò íè bíi ló nen ea é élá neǹ ditõ̀ò nè ni gbẹá tọ bèèla, òé sa nen eo dẹlẹ̀ nyíé boo ea íe lé bée e gbò nen é láá dẹlẹ náe gé nyíé boo. Jìhóvà zógè kọ à dẹlẹ̀ẹ̀i nyíé boo tení dú ló gè sài kọ é elá Neǹ Ditõ̀ò neèe. Nyíéi palàge ẹẹ kọ è dúù pá a Gbò Neǹ Ditõ̀ò vaá è ólò tú kọ̀láá kà nèà deè e íè kọọmá nú ea kilíé ló nè gbò nen, nè ge naa kọ bàá nyimá kọọ̀ kọ̀láá kà pọ́lọ́ bel e bà kọ́ kìlmàé ló dú kyáá. Tṍó e náà vó, è gé náa nú ea bọ́ló kọ é naa dì belí Gbò Neǹ Ditõ̀ò Jìhóvà!​—Ps. 83:18; Róm̀ 10:​13-15.

ÈÉ KILSĨ́ GÈ KỌ́ KPẸ̀A DỌ̀Ọ̀MÀ TṌÓ E KÙBMÀ É BÃ́ LÓ BÀLÀ BOOÍ

14. Mókà gbò lé nú ní ea é nááá dì deèsĩ́ ẽ́?

¹⁴ Nyíéi é palàge ẹẹ gè mòn gbò nú ea é nááá dì deèsĩ́! Tení dú ló nvèè bá ea aa bá Jìhóvà, è ẹ̀b dẽesĩ́ kọọ̀ gã́bug nen é bã́ mm̀ kà-kàí besĩ́ pọ̀b kpo tã̀àgã̀ kálá dààà togó. Nyíéi ẹ́ẹ nagé kọọ̀ bã̀àna tṍó pọ̀b kpo tã̀àgã̀ e nu é palàge tàvàlà, gã́bug nen é láá íe nèà deè ge zọ̀i fã̀ Jìhóvà!​—Tóm 13:48.

15-16. Éé ní eé kilsĩ́ gè naa ẽ́, vaá dọ̀ọ̀mà mó tṍó ẽ́?

¹⁵ Sõò kátogóí, è íè nèà deè ge kọ́ kpẹ̀a ea kil ló Boǹ Méné Bàrì imá dénè ketõ̀ò, vaá níà tóm e née é beè sí ná. Èé kilsĩ́ gè ãane gbò nen kilma ló nú ea é nááá dì deèsĩ́. À dú bíi kọ gbò nen á nyimá kọọ̀ kùbmà nakà pọ́lọ́ bàlà booí a palàge dũ̀ùà iná kuló. Tṍó e Jìhóvà é béélá bel ló gbò nen, bàé gbóó nyimá kọọ̀ lẹ̀ẹ̀la tóm e géè veeá aa bá Jìhóvà.​—Èzí. 38:23.

¹⁶ Vóà naa, éé ní e béèlàfùl ge naa ẽ́? Boo béè vulè e íè kilma ló lé kpẹ̀aí, gbò nen, vaá ní ea bọọ lọ̀l vaá à lee ea dú vulè e íè kilma ló Jìhóvà nè a bée é náa kọ é kilsĩ́ gè tú bẹ̀à sã́ bùlà kọọmá kpẹ̀aí mm̀ gbala-gbala dọ̀ọ̀mà tṍó e Jìhóvà é kọ́ọ̀, “A lée!”