Ádàm Nè Íìv Beè Lọ̀l Togó Kèbá Bàrì

Enè dee, naanà beè ló bel nè Íìv tṍó e áá ẹ̀ẹ̀ di kẽ kọọ̀: ‘É kọ à dú kà-kà kọọ̀ Bàrì beè kọ ó gá dei dénè té ea di mm̀ gònòí?’ Íìv à aalá kọọ̀: ‘Èé láá dé ból ea dú bè gbò té ea di mm̀ gònòí, daalá lọl ló ene kà. Be è dé ból ea dú bè nakà té, èé ú.’ Naanàa à kọ́ nèe kọọ̀: ‘Nóo é úi. Kàsĩ́, be ò déi, ò é nyímai nu belii Bàrì.’ É kọọ̀ belá beè dú kà-kà? Ẽ́èe, aẹ̀ bèè kyáá bel. Sõò Íìv beè zìgà. Bé e Íìv gé ẹb ból súú téá naa, níà bé ea beè tànie ge dè naa ẽ́. A beè dè, vaá tú sìgà nè Ádàm. Ádàm beè nyimá kọ bà é úè be bà lọlìè togó kèbá Bàrì. Sõò a beè dè.

Jìhóvà beè ló bel nè Ádàm nè Íìv tẽ̀ènè deeá tṍó e tṍó téní. A beè bĩiná va nú ea náa bà lọlìèe togó kèbá. Íìv beè bèl naanàa, vaá Ádàm à bèl Íìv. Jìhóvà beè kpó va lọl mm̀ gònò Ídèna boo béè kọ ba lọ̀l togó kèbá. Kọbé bà náa láá òòa na kẽ bã mm̀ gònòa, a beè tú gbò nyómá tóm nè gẹ̀ bé e sã́ gé bẹ́ dáa sẹlẹ́ gã́ gònòa.

Jìhóvà beè kọ nágé kọ à é neè kpọ̀té neń ea beè kpọ́ kyáá bel nè Íìva. Níì naanà ní ea beè aa deè ló beláẹ́ nì. Jìhóvà náa beè dèm naanà naa ní ea é láá ló bel. Ene kà pọ́lọ́ nyómá tóm ní ea beè ló belá tenmá gã́ naanà ẽ. A beè naa vó kọbé à kẹlẹ Íìv. Nyómá tómá kọlà Sétàn ea dú Pọ́lọ́ Nyómá. Dì deèsĩ́, Jìhóvà é kyọsĩ́ Sétàn kọbé náa láá kẹlẹ na gbò nen kọ bàá sí pọ́lọ́.