LECCIÓN 23
O bautismo, unha meta que vale a pena
Xesús ensinou que o bautismo é un requisito para os cristiáns (le Mateo 28:19, 20). Pero, que é o bautismo? E que ten que facer unha persoa para alcanzar ese obxectivo?
1. Que é o bautismo?
A palabra bautizar vén dun termo grego que significa “mergullar”, é dicir, meter por completo debaixo da auga. Cando Xesús se bautizou foi mergullado no río Xordán e despois saíu da auga (Marcos 1:9, 10). Do mesmo xeito, os cristiáns verdadeiros que se bautizan teñen que ser mergullados por completo na auga.
2. Que demostra o bautismo?
Cando unha persoa se bautiza, demostra que se dedicou a Xehová. Como se fai esa dedicación? Antes de bautizarse, a persoa óralle a Deus en privado dicíndolle que o quere servir para sempre. Promételle que só o vai adorar a El e que facer a Súa vontade vai ser o máis importante da súa vida. Decide renunciar a si mesmo e seguir as ensinanzas e o exemplo de Xesús (Mateo 16:24). Grazas á súa dedicación e bautismo, agora pode ter unha amizade estreita con Xehová e con outras persoas que tamén o adoran.
3. Que ten que facer unha persoa antes de poder bautizarse?
Para prepararte para o bautismo tes que aprender sobre Xehová e fortalecer a túa fe nel (le Hebreos 11:6). Canto máis medren o teu coñecemento e a túa fe, máis quererás a Xehová. E seguro que tamén quererás falar acerca del e vivir de acordo coas súas normas (2 Timoteo 4:2; 1 Xoán 5:3). Cando unha persoa vive como se debe vivir “para contenta-lo Señor”, poida que decida dedicar a súa vida a Deus e bautizarse (1 Tesalonicenses 4:1).a
AFONDA MÁIS
Mira que podemos aprender do bautismo de Xesús e como pode alguén prepararse para este importante paso.
4. Que podemos aprender do bautismo de Xesús
Lede Mateo 3:13-17 para aprender máis sobre o bautismo de Xesús. Logo comentade estas preguntas:
Era Xesús un bebé cando foi bautizado?
Como foi bautizado? Botáronlle só unha pouca auga por riba?
Despois de bautizarse, Xesús comezou na Terra a obra especial que Deus lle encargara. Lede Lucas 3:21-23 e Xoán 6:38 e logo comentade esta pregunta:
A que lle deu Xesús prioridade na súa vida despois de bautizarse?
5. O bautismo, unha meta ó teu alcance
Ó principio poida que non te sintas preparado para dedicarte e bautizarte. Pero podes seguir dando pasos ata que chegues a estar seguro de tomar esa decisión tan importante. Para ver como conseguiron facer isto algunhas persoas, poñede o VÍDEO.
Lede Xoán 17:3 e Santiago 1:5 e logo comentade esta pregunta:
Que lle pode axudar a unha persoa a prepararse para o bautismo?
A dedicación é unha oración que lle facemos a Xehová na que lle prometemos que queremos servilo para sempre
Cando nos bautizamos mostramos diante doutras persoas que xa nos dedicamos a Deus
6. O bautismo implica chegar a ser parte da familia de Xehová
Cando nos bautizamos chegamos a ser parte dunha familia mundial unida. Aínda que vimos de diferentes lugares e culturas, todos temos as mesmas crenzas e vivimos de acordo coas mesmas normas morais. Lede Proverbios 3:32 e 1 Pedro 2:17 e logo comentade esta pregunta:
Que efecto ten o bautismo na relación que unha persoa ten con Xehová e con outras persoas que tamén o adoran?
HAI QUEN DI: “Non estou preparado para bautizarme”.
Se é o teu caso, pensas que aínda así vale a pena esforzarse por alcanzar esa meta?
RESUMO
Xesús ensinou que os cristiáns teñen que bautizarse. Para alcanzar esa meta, unha persoa ten que fortalecer a súa fe en Xehová, vivir segundo as Súas normas e dedicarse a El.
Repaso
Que é o bautismo e por que é importante?
Que relación hai entre a dedicación e o bautismo?
Que pasos levan á dedicación e ó bautismo?
INVESTIGA
Aprende que é o bautismo e descubre algunhas ideas equivocadas sobre este tema.
Analiza que cousas poden axudar a unha persoa a chegar ó bautismo.
“O amor e o agradecemento a Xehová levan ó bautismo” (La Atalaya, marzo 2020)
Le como un home baseou a súa decisión de bautizarse en algo máis que nas emocións.
“Querían que descubrise a verdade por min mesmo” (La Atalaya, 1 febreiro 2013)
Descubre por que o bautismo é un obxectivo que vale a pena e como te podes preparar para alcanzalo.
“Debería bautizarme xa?” (Lo que los jóvenes preguntan. Respuestas prácticas, volume 2, capítulo 37)
a Se alguén foi bautizado antes noutra relixión, tería que volver a bautizarse. Por que? Porque esa relixión non ensina a verdade da Biblia (ver Feitos 19:1-5 e a lección 13).