Jeremias

33 Jeremias, Rakhonndarachea Angnnant azunui koidi aslo. Tednam Jehovacho sondex dusre pavtti taka mellʼllo: 2 “Ho, prithum Rochpi Jehovacho sondex zaun asa. Ho Jehovacho sondex, zannem prithum rochli ani ti thiraien stapon keli, hoi, zachem nanv Jehova, to mhunntta, 3 ‘Mhaka ulo mar ani hanv tuka zap ditolom. Hanv tuka vhodd khuxen osleo vostu sangtolom, jeo vorteo asat ani tum somzonk xokona, osleo vostu jeo tuka khobornant.’”

4 “Dusman xarachea durgam bhonvtonnim choddtti toiar korun korche asle tea akromonnak lagon ani tolvarik lagon, xarantlem jem rajmahal ani jim ghoram* moddun uddoileant tanche vixim, ho Izraelacho Dev Jehovacho sondex. 5 Ho sondex tanchea-i vixim asa je Kaldeikaram lagim zhogddonk ietat, ani hea zageam vixim pasun asa, zoim hanvem mhojea ragan ani krodhan marun uddoilʼle tea lokanchim moddim bhorlolim asat. Te lok itle vaitt asle ki hanvem hea xara thaun mhojem tondd lipoilʼlem. To sondex oso asa: 6 ‘Atam hanv hem xar sarkem korun, taka bori bholaiki diunk voitam. Hanv lokank boro kortolom ani tankam bhorpur xanti ditolom ani sot ugddapem kortolom. 7 Hanv Judachea ani Izraelachea tea soglea lokank porot haddttolom, zankam koidi korun vheleat, ani survatek kelʼlem toxem hanv tankam ghott kortolom.* 8 Tannim mhojea add kelʼlea patkank lagon, tankam bhogta tea soglea guneanvkari bhavnam thaun hanv tankam xudʼdh kortolom. Tannim mhojea add kelʼlim soglim patkam ani sogle guneanv hanv bhogxitolom. 9 Hea xarachem nanv aikon hanv khub khuxal zatolom. Hanvem tankam kitlem boreponn dakhoilam tea vixim aikon, prithume voilim soglim raxttram mhoji vakhannʼnni kortolim ani mhaka mhoima ditolim. Hanv hea xarak jem boreponn dakhoitolom ani ji xanti ditolom, tem polloun prithume voilim soglim raxttram bhietolim ani thorthortolim.’”

10 “Jehova oxem mhunntta: ‘Tumi hea zagea vixim oxem mhunnttole, ho ek padd zalʼlo zago, hanga ekui munis vo zonvar pasun ravona. Judachim xaram ani Jeruzalemantle roste osadd poddleat, hanga ekui munis vo zonvar pasun na. Punn thoim porot ek pavtt 11 khuxalkaiecho ani sontosacho avaz, toxench novro vhokle sangata monoita to khuxalkaiecho avaz aikonk ietolo. Ani lok oxem mhunnttat to avaz aikonk ietolo: “Fouzancho Dev Jehovache upkar attoiat, karonn Jehova kitlo boro, tacho visvaxi mog sasnak togta!”’

“Jehova mhunntta, ‘Te dhinvasnnecheo bhettounneo Jehovachea ghorant gheun ietole. Karonn hanv hea desantlea tea lokank porot gheun ietolom zankam koidi keleat, ani tanchi poristhiti poilim bhaxen zatoli.’”

12 Fouzancho Dev Jehova oxem mhunntta: ‘Ek munis vo zonvar pasun na toslea hea padd zalʼlea zomnir ani tachea soglea xaramnim, porot ek pavtt chorvachim mollam distolim ani thoim gonvlli aplea hinddank visov gheunk vhortole.’

13 “Jehova mhunntta, ‘Dongri vattarantlea xaramnim, sokoilea vattarantlea xaramnim, dokxinnentlea xaramnim, Benjaminachea vattarant, Jeruzalemachea bhonvtonnchea vattaramnim ani Judachea xaramnim, porot ek pavtt gonvlli aplea menddrank meztole.’”

14 “Jehova mhunntta, ‘Polloi! Te dis ietat, jednam Izraelachea ghoranneak ani Judachea ghoranneak borem kortolom mhunn hanvem dilʼli bhas hanv purnn kortolom. 15 Tea disamnim ani tea vellar hanv Davidachea sonstintlean ek nitivont kombri* upzoitolom, ani to neai-an ani nitivontponnan desacher raz choloitolo. 16 Tea disamnim Juda salvar zatolem ani Jeruzalem surokxit astolem. Ani taka hea nanvan vollkhotole: Jehova Amchem Nitivontponn.’”

17 “Jehova oxem mhunntta: ‘Izraelachea ghoranneachea xinvasonar bosonk, Davidachea sonstintlo ek munis sodanch astolo. 18 Toxench, mhojea mukhar hajir zaun hulpailʼli bhett, daneachi bhett ani bolidanam bhettounk Levit iadnik sodanch astole.’”

19 Jehovacho sondex Jeremiasak porot ek pavtt mellʼllo. Tannem Jeremiasak mhunnttlem: 20 “Jehova oxem mhunntta, ‘Tharailʼlea vellar dis zauncho ani rat zaunchi mhunn hanvem zo korar kela, to tumi moddunk xoktat 21 zalearuch, mhozo sevok Davida sangata hanvem kelʼlo korar moddttolo, ani tachea xinvasonacher bosonk tacho khoinchoch put urchona, toxench mhoje sevok, Levit iadnikam sangata pasun hanvem kelʼlo korar moddttolo. 22 Zoxi mollba voili fouz mezunk zaina ani doria voili renv mapunk zaina, toxi hanv, mhozo sevok Davidachi sonsot* ani mhoji seva korpi Levitanchi sonsot* mezunk zaina titli vaddoitolom.’”

23 Jehovacho sondex Jeremiasak porot ek pavtt mellʼllo. Tannem Jeremiasak mhunnttlem: 24 “He lok kitem mhunnttat tacher tunvem dhean dilam kai? Te mhunnttat, ‘Jea don familink Jehovan vinchun kaddloleo, tankam to nakartolo.’ Te mhojea lokancho opman kortat, ani tankam ek raxttr mhunn lekhinant.

25 “Jehova oxem mhunntta: ‘Zoso, disa vixim ani rati vixim hanvem stapon kelʼlo korar, ani mollob ani prithume pasot hanvem stapon kelʼlo kaido moddonk xokona, 26 teach bhaxen, hanv Jakobachea ani mhozo sevok Davidachea sonstik* kednanch nakarchom na, ani tachea sonstintlean* ieta tea razank hanv Abrahamachea, Izakachea ani Jakobachea sonsticher* raz cholounk nemtolom. Karonn hanv tanchea koidi kelʼlea lokank ektthaim korun porot gheun ietolom, ani tanche churchure kortolom.’”