Mongllar, Setembr 16
Ami bhavarth dovorla ani tum Devacho Povitr Sevok mhunn amkam kollon ailam.—Juanv 6:69.
Apostl Pedru visvaxi aslo. Tannem koslea-i karonnak lagon Jezucho pattlav korop bond korunk na. Zoxem ek pavtti, Jezun oxem kitem mhunnttlem jem tachea xisank somzonk na. (Juanv 6:68) Tednam to kitem sangonk sodhtalo tem vicharchea bodlek, vo tacho orth to somzaitolo mhunn ravchea bodlek, zaitea zannamnim tacho pattlav korop soddun dilem. Punn Pedrun toxem korunk na. Karonn “sasnachea jivitachim utram” fokot Jezu lagim asat mhunn to zannam aslo. Pedru toxench her apostl apleak soddun voitole, mhunn Jezu zannam aslo. Punn Pedru aplo pattlav korop bond korcho na ani to visvaxi ravtolo, hi khatri Jezuk asli mhunn tannem mhunnttlolea utrantlean kollon ieta. (Luk. 22:31,32) Tachem “mon toiar asa, punn kudd oskot asa” mhunn Jezun somzon ghetlem. (Mk. 14:38) Tea pasot, Pedrun taka tin pavtti nakarlea uprant pasun, Jezun taka soddun diunk na. Jezu jivont zalea uprant, to chodd korun, Pedru ekloch aslo tednam taka mellonk gelo. (Mk. 16:7; Luk. 24:34; 1 Kor. 15:5) Apnnem jem kelʼlem tea vixim Pedru ekdom dukhi aslo. Punn Jezuk polloun taka kitli urba mellʼlli astoli nhoi! w23.09 22-23 ¶9-10
Budvar, Setembr 17
Zanchim vaitt kamam bhogxileant ani zanchim patkam dhampleant tim khuxal.—Rom. 4:7.
Tor apnnacher bhavarth dovortat tankam Jehova purnn toren bhogxita, ani hea toren to munis tachea bhavarthak lagon Devachea mukhar nitivont zata. (St. 32:1, 2) Abraham, David, ani her visvaxi sevokam opurnn aslear pasun Jehovan tankam nitivont mhunnttlim. Karonn tankam bhavarth aslo. Punn jea konnank bhavarth na, tim nitivont zaunk xokonant. (Ef. 2:12) Apostl Paulun Romkarank boroilʼlea chittint somzailʼlem ki Devacher bhavarth dovortat tinch tachim ixttam zaunk pavtat. Abraham ani Davidak Jehovacher bhavarth aslo dekhun te tache ixtt zaunk pavle. Tor Devache ixtt zaunk amkam-i tacher bhavarth asop gorjecho. w23.12 3 ¶6-7
Brestar, Setembr 18
Sodanch Devak vakhannʼnnecho iodn, mhunnche, tachem nanv sogleam mukhar porgott korta tem amchea vonttanchem foll bhettoum-ia.—Heb. 13:15.
Aiz soglea Kristanvank Jehovak bolidanam bhettounk ek khas sueog asa. Ami amcho vell, takot ani amchea lagim asloleo vostu uzar korun Rajeachea kamank tenko diunk zata. Ani Jehovachi seva korchea sueogacho ami valor kortat mhunn dakhounk ami Jehovak amchem boreantlem-borem diunk zata. Apostl Paulun Hebrev Kristanvank ji chitt boroilʼli tachea xevottak, Jehovachi seva kortana ami khoincheo vostu sodanch korit ravonk zai tea vixim tannem sanglem. (Heb. 10:22-25) Tantunt, Jehova lagim magnnem korop, amchea bhorvonxea vixim porgottop, mittingek ektthaim ievop ani ‘[Jehovacho] dis lagim ieta tem ami polloitat toxem eka-mekak anikui chodd urba divop’ hem soglem mellon asa. Itlench nhoi, Prokasovnni pustokachea xevottachea odheai-amnim Jehovacho devdut oxem sangta: “Devachi bhokti kor!” (Prok. 19:10, NW; 22:9, NW) Ani oxem korop kitlem mhotvachem tem dakhoun diunk to oxem don pavtti mhunntta. Tor Jehovachea otmik Devmondira vixim aslolem kholaiechem sot ani amchea Vortea Devachi bhokti korunk amkam kitlo vhoddlo sueog asa tem ami kednanch visorchim nhoi! w23.10 29 ¶17-18