Izaias
46 Bel bagovla ani Nebok loz bhogchi poddlea.
Tancheo murteo zonvarancher, vojem vhortolea zonvarancher oxeo dovorleat zoxeo,
Thoklolea zonvarancher zaitem saman dovorlam.
2 Bel ani Nebok sangata loz bhogchi poddlea,
Te aplem saman* vanchounk xokonant,
Ani te apunnuch koident voitat.
3 “Jakobachea ghorannea, Izraelachea ghoranneantlea urlolea lokamno, mhojem aikat!
Tumi kusveant aslim tednam thaun hanvem tumkam samballʼlleant, tumi zolmak ailim tednam thaun hanvem tumkam ubarleant.
4 Tumchea zanntteponnar pasun hanv bodolchom na,
Tumche kens pikle zalear pasun hanv tumkam uklun dhortolom.
Hanvem atam poriant kelam toxem, hanv tumkam gheun bhonvtolom, tumkam samballttolom ani tumkam vanchoitolom.
5 Tumi mhaka konnam sangata sor kortole, vo mhaka konnam sarko mhunnttole?
Vo konnam vixim mhunnttole ki to mhojea bhaxen asa?
6 Osle lok asat, je potientlean bhangar kaddun-kaddun ditat,
Ani tagddecher chandi meztat.
Te xettik kamank laitat ani to tea bhangrachi murti toiar korta.
Uprant te tea murtechea paim-am poddttat ani* tichi bhokti kortat.
7 Te tika khandar ubartat,
Ani vhoron tika tichea zagear ubi dovortat.
Ti thoinch ubi ravta ani aplea zagear thaun halona.
Te tichea mukhar roddttat, punn ti kainch zobab dina,
Ti konnankuch tanchea sonkoxttantlean vanchounk xokona.
8 Guneanvkaramno, teo vostu ugddas korat,
Teo tumchea kallzant dovrat ani dhir gheiat.
9 Adim* ghoddlolea vostuncho ugddas korat,
Ani hanvuch Dev mhunn zannam zaiat, mhaka soddun anik konnuch na.
Hanv Dev, mhojea sarko anik konn na.
10 Hanv survatekuch, xevottak kitem ghoddttolem tem sangtam,
Ani jeo vostu atam meren zaunk nant, teo hanv poilinch kolloitam.
Hanv mhunnttam, ‘Hanvem jem tharailam tem purnn zatolench,*
Ani mhaka zai tem hanv kortolonch.’
11 Hanv udente thaun* xikar korpi suknneak apoitam,
Hanvem tharailam tem* purnn korunk hanv poisulʼlea desa thaun eka munxak apoitam.
Hanvench hem sanglam ani hanvuch tem purnn kortolom,
Hanvench hem tharailam ani hanv tem kortolonch.
12 Hottʼtti* kallzachea lokamno, mhojem aikat!
Tumi je nitivontponna thaun khub pois asat, aikat!
13 Nitivontponn dakhouncho mhozo vell chodd pois na,
To lagim asa.
Taronn diunk hanv vell korchom na.
Hanv Sionak taronn ditolom, Izraelak mhojea sobitkaien bhortolom.”