Jeremias
46 Raxttram vixim aslolo Jehovacho ho sondex Jeremias provadeak mellʼllo: 2 Ho sondex Ejiptta pasot asa. To sondex Ejipttacho raza, Faraoh Nekochea fouje vixim asa, zaka Babilonacho Raza Nebukadnezaran,* Josiacho put, Judacho raza Jehoiakimachea razvottkechea chovthea vorsa, Eufrates Nhoim-chea deger, Karkemishant haroilʼlo:
3 “Tumcheo lhan ddhalo* ani vhoddleo ddhalo toiar korat,
Ani zhuza pasot fuddem sorat.
4 Ghoddesvaramno, ghodde toiar korun tancher choddat.
Helmett ghalun tumche zage gheiat.
Tumche bhale pazat ani zhuzak ghaltat te kott ghalat.
5 Jehova mhunntta: ‘Te itle ghaborlole kiteak distat?
Te zhuz soddun porot voitat, tanche zhuzari harleat.
Te bhieun pollon voitat, tanche zhuzari fattlean vollon pasun polloinant.
Soglea vattamnim bhirant posorlea.’
6 ‘Vegan* dhanvtat te pollon vochonk pavchenant, nhoi mhunn zhuzari salvar zaunchenant.
Utʼtore vatten Eufrates Nhoim-chea deger,
Te addkhollon poddleat.’
7 Ho konn, zo Nil Nhoim-chem udok voir sorta tea bhaxen ieta,
Ani ghos-ghoxean vhanvta tea nhoim-e bhaxen ieta?
8 Nil Nhoim-chem udok voir sorta tea bhaxen ieta to Ejiptt zaun asa,
Ghos-ghoxean vhanvta tea nhoim-e bhaxen to ieta,
Ani mhunntta, ‘Hanv voir sortolom ani akʼkhi prithum dhamptolom.
Hea xaracho ani tantunt ravtolea lokancho nas kortolom.’
9 Ghoddeamno, fuddem sorat!
Rothamno, vegan dhanvat!
Zhuzareank fuddem soronk diat,
Ddhal gheun asat tea Kushitank ani Putitank fuddem soronk diat,
Dhonu bore bhaxen uzar kortat ani toiar kortat* tea Ludimitank fuddem soronk diat.
10 “To dis, Akʼkhea Vixvacho Dhoni, fouzancho Dev Jehovacho dis. Tea disa, to aplea dusmanam koddlean sudd ghetolo, to tanchea koddlean bodlo ghetolo. Tolvar tankam khaun dhadoxi zatoli, ani tanchem rogot pieun apli tan bhagoitoli. Karonn Akʼkhea Vixvacho Dhoni, fouzancho Dev Jehovan, utʼtorechea desant, Eufrates Nhoim-chea deger ek bolidan toiar kelam.
11 Ejipttache ankvar dhuve,
Balsam* haddunk voir Gileadant voch.
Tum bexttench itle ilaz korta,
Karonn tujea duensak kainch vokhod na.
12 Tuzo kitlo opman zala to raxttramnim aikola,
Tujem roddnnem akʼkhea desant aikonk ieta.
Karonn zhuzari, zhuzareak lagon addkholltta,
Ani dogui sangata poddttat.”
13 Babilonacho Raza Nebukadnezar,* Ejiptt desacher akromonn korunk ieuncho asa tea vixim Jehovan Jeremias provadeak ho sondex dilo:
14 “Ejipttant hem sangat, Migdolant hachi kollounni korat.
Nof* ani Tafanesant hachi kollounni korat.
Oxem mhunnat, ‘Ap-aplo zago gheiat ani toiar zaiat,
Karonn tumchea bhonvtonnim aslolea sogleank ek tolvar khaun uddoitoli.
15 Tuje xoktivont munis kiteak kabar zaun gele?
Te aplea zagear ube ravonk xoklenant,
Karonn Jehovan tankam dhuklun sokol uddoile.
16 Tanchea modle zaite zann addkhollttat ani poddttat.
Te eka-mekak mhunnttat:
“Utthat! Ami amchea lokam lagim, amchea desant porot vochom-ia,
Karonn hi tolvar ekdom krur asa.”’
17 Tannim thoim kollounni kelea,
‘Ejipttacho raza Faraoh fokot boddbodd korta, punn kainch korina,
Taka mellʼlloli sondhi* tannem hogddailea.’
18 To Raza, zachem nanv fouzancho Dev Jehova, to oxem mhunntta, ‘Hanv mhojea jivacho soput gheun sangtam,
To* porvotam modlea Tabora sarko,
Ani doria deger aslolea Karmela sarko ietolo.
19 Ejipttant ravpi dhuve,
Koident vochonk tujem saman band.
Karonn Nofachi* poristhiti oxi zatoli ki polloitoleanchem kalliz thottaktolem,
Taka uzo laitole* ani thoim ravonk konnuch urchona.
20 Ejiptt eka sobit tornattea gaie* bhaxen aslem,
Punn utʼtore thaun kuns martat tosle mus tachea add ietole.
21 Tache bhaddeache soinik mottea-mottea boilam sarke asat,
Punn te pasun fatt dakhoun pollon gele.
Te aplea zagear ube ravonk xoklenant,
Karonn tancher sonkoxttacho dis aila,
Tanche koddlean hixob gheuncho vell pavla.’
22 ‘Tacho avaz sorsoron voitolea sorpa bhaxen asa,
Karonn te kuradd gheun tachea fattlean ietat,
Zhaddam marta tea munxa bhaxen* te soglea bollan tachea fattlean ietat.’
23 Jehova mhunntta, ‘Tachem ran kitlem-i datt aslear pasun, te katrun uddoitole.
Karonn tancho ankddo mezunk zaina titlo asa, te tollam poros chodd asat.
24 Ejipttache dhuvek loz bhogchi poddttoli.
Taka utʼtorechea lokanchea tabeant kortole.’
25 “Izraelacho Dev, fouzancho Dev Jehova mhunntta: ‘Atam hanv No* xarantlea Amon devacher, Faraoh-cher, Ejipttacher, tachea devancher ani tachea razancher—hoi, Faraoh-cher ani tacher visvas dovortat tea sogleancher mhojem dhean ditolom.’
26 “Jehova mhunntta, ‘Hanv tankam tancho jiv gheunk sodhtat tanchea, mhunnche, Babilonacho Raza Nebukadnezarachea* ani tachea sevokanchea tabeant ditolom. Punn uprant, Ejipttant poilim bhaxen lok ravonk lagtole.’
27 ‘Punn mhojea sevoka, Jakoba, tum bhienaka,
Izraela, tum ghabornaka.
Karonn hanv poisulʼlea desa thaun tuka salvar kortolom,
Ani tujea sonstik* koident aslolea desa thaun soddoitolom.
Jakob porot ietolo ani to xant astolo, toxench taka kosloch dhoko aschona,
Ani tankam konnuch bhieonchona.’
28 Jehova mhunntta, ‘Taka lagon mhojea sevoka, Jakoba, tum bhienaka, karonn hanv tujea sangata asam.
Hanvem tuka jea raxttramnim ximpddailʼlo, tea soglea raxttrank hanv pusun kaddttolom,
Punn hanv tuka pusun kaddchom na.
Hanv tuka favo titli xist ditolom,*
Punn hanv tuka khast dilea bogor soddchom na.’”