Korintkarank Poili Chitt
12 Atam bhav-bhoinnimno, Deva koddlean mellʼllolea dennea vixim tumi bore bhaxen zannam zalʼlim mhaka zai. 2 Karonn tumi videxi lokam modlim* aslim tednam tumkam bhuloilolim ani ulounk xokonant toslea murteanchi bhokti korchi mhunn tumkam fuslailolim. Teo vhortat thoim tumi tanchea fattlean voitalim. 3 Atam tumi hem somzon gheunchem oxem mhaka dista, ki konnui Devachea povitr xoktechea modotin uloita zalear, “Jezu xirap poddlolo!” oxem mhunnchona. Toxench, to Devache povitr xoktechi modot nastana, “Jezu Somi!” oxem mhunnonk xokona.
4 Dennim veg-veglle torechim asat, punn povitr xokti ekuch asa. 5 Seva veg-veglle torechi asa, tori astana Somi ekuch asa. 6 Ani kamam veg-vegllim asat, toripunn Dev ekuch asa zo sogleam koddlean him kamam korun gheta. 7 Punn dor eklea modem povitr xokti kam korta tem dison ieta ani hem sogleanchea borea pasot asa. 8 Karonn povitr xokte udexim ekleak zannvaiecheo vostu sangonk dennem mellʼllam, tor dusreak teach povitr xokte udexim gineanacheo vostu* sangonk dennem mellʼllam. 9 Konnank te xokte udexim bhavarthachem dennem mellʼllam, tor konnank tech xokte udexim lokank duensantlim borim korpachem dennem mellʼllam. 10 Konnank vizmitam korpachem, konnak bhasaunni korpachem, konnank prerit kelʼlim utram somzon gheupachem, konnank veg-veglleo bhaso uloupachem, tor konnank bhaxantor korun orth somzaupachem dennem mellʼllam. 11 Punn him soglim kamam ekuch povitr xokti korta, ani dor ekleak aplea khuxe pormonnem diunk zai tim dennim dita.
12 Karonn zoxi kudd ek, punn tika veg-veglle sandhe asat, ani tea kuddik zaite sandhe asat zalearui te sogle mellon ekuch kudd asa, tosoch Kristui asa. 13 Karonn Judev zaum vo Grik, gulam zaum vo svotontr, ami sogleamnim ek kudd zaunk ekuch povitr xoktent bautizm ghetla, ani amkam sogleank ekuch povitr xokti dilea.
14 Karonn, kudd ekach sandhea udexim nhoi punn zaite sandhe mellon zata. 15 “Hanv hat nhoi, dekhun hanv hea kuddicho bhag nhoi” oxem paim mhunntta zalear, to hea kuddicho bhag nhoi kai? 16 “Hanv dollo nhoi dekhun, hanv hea kuddicho bhag nhoi” oxem kan mhunntta zalear, to hea kuddicho bhag nhoi kai? 17 Akʼkhi kudd dollo asloli zalear, amkam koxem aikonk ietolem aslem? Akʼkhi kudd kan asloli zalear amkam vas koso ietolo aslo? 18 Punn Devak borem dislem toxem tannem dor ek sandho kuddint sarkea zagear dovorla.
19 Te sogle ekuch sandho aslo zalear, taka kudd mhunnonk zata aslem? 20 Punn, atam te zaite sandhe asat, tori astana ek kudd asa. 21 Dollo hatak mhunnonk xokona, “Mhaka tuji goroz na,” vo tokli paim-ak mhunnonk xokona, “Mhaka tuji goroz na.” 22 Tachea bodlek, kuddiche sandhe je oskot koxe distat te khoreponnim chodd gorjeche astat, 23 ani je kuddiche sandhe ami unnea manache mhunn somzotat tankam ami dhampun chodd man dita. Hea toren je kuddiche sandhe title sobit nant tanchea thaim ami chodd manan vagtat. 24 Punn, amche kuddiche sandhe je sobit asat tanchi itli kallji gheupachi goroz asona. Tori astana, Devan amchi kudd oxi rochlea ki jea sandheank unno man melltta, tankam chodd man mellcho. 25 Kuddint futt poddchi nhoi, punn tichea sandheamnim eka-mekachi kallji gheunchi mhunn tannem oxem kelem. 26 Eka sandheak dukh zata zalear, tachea borabor soglea sandheank dukh zata. Vo eka sandheak man melltta zalear, tachea borabor urlole sogle sandhe khuxal zatat.
27 Tumi Kristachi kudd ani tumchea modlo dor eklo tacho sandho. 28 Karonn Devan sobhent dor ekleak ap-aplo zago nemun dila: poile apostl, dusre bhasaunni korpi provadi, tisre xikxok, uprant vizmitam korpi, uprant duensam borim korunk dennem aslole, modot korun seva korpi, magir dusreank margdorxon diunk tank aslole, ani veg-veglleo bhaso uloupi. 29 Soglech apostl kai? Soglech provadi kai? Soglech xikxok kai? Soglech vizmitam kortat kai? 30 Sogleank duensam borim korunk dennem asa? Sogleank veg-veglleo bhaso ulounk dennem asa? Soglim bhaxantor korun orth somzaunk xoktat? 31 Tumi Deva thaun vortim dennim melloun gheunk proitn* korit ravat. Punn atam hanv tumkam sogleant bori vatt dakhoitam.