Jeremias
17 “Judachem patok lokhnnachea pen-an* boroilam.
Hireachea tonkan tanchea kallzachea pattiecher
Ani tanchea vedinchea xingancher kantoilam,
2 Tanche put pasun tanchea vedincho ani murti-pujechea khambeancho* ugddas kortat,
Je unch dongrancher aslolea hirvea panamnim bhorlolea eka vhoddlea zhadda lagim asle,
3 Ani xaram thaun pois aslolea porvotancher asle.
Tuji girestkai ani tuje sogle theve hanv lutticho mhal mhunn ditolom
—Hoi, hanv tuje unch-unch zage lutticho mhal mhunn ditolom, karonn tunvem tujea soglea vattaramnim patok kelam.
4 Tum tujeach patkak lagon hanvem dilʼlem daiz hogddaitolo.
Hanv tuka eka onvollkhi desant tujea dusmananchi chakri korunk dhaddttolom,
Karonn tunvem ujea bhaxen mhozo rag pettoila.*
To soglo vell zollot ravtolo.”
5 Jehova oxem mhunntta:
“Zo munxacher visvas dovorta, tacher* xirap poddom,
Zo munxachea xoktecher patieta,
Ani zachem kalliz Jehova thaun pois voita, tacher xirap poddom.
6 Oronnʼnneant eksurem aslolea zhadda bhaxen to zatolo.
To boreponn pollounchona,
Punn konnuch ravonk xokona toslea ranvott vattarant suklolea zageancher to ravtolo,
Mittachea desant to ravtolo.
7 Zo Jehovacher visvas dovorta, ani zo Jehovacher bhorvonso dovorta,
Taka* Dev besanvamnim bhortolo.
8 To tea zhadda bhaxen zatolo zaka udka lagim roilam,
Jem aplim mullam vhallantlea udka meren posraita.
Taka suriachea votacho dhog lagchona.
Tachim panam sodanch hirvim astolim,
Ani dukollachea vorsa taka usko zaunchona,
Toxench tem foll divop kednanch bond korchem na.
9 Kalliz sogleam-von chodd ghatki,* ani dhokeachem zaun asa.*
Taka konn vollkhonk xokta?
10 Hanv Jehova, hanv kalliz parkhitam,
Monantlim kholaiechim chintnam* topastam,
Jea vorvim, hanv dor ekleak tachea vagnnuke pormonnem
Ani kamam pormonnem foll ditam.
11 Zo munis fottingponnan girestkai ektthaim korta,
To oslea eka ranvotti suknnea bhaxen asa jem apnnem ghalunk na tim tantiam gheun rovannek bosta,
Tachi girestkai taka modle piraieruch soddun ditoli,
Ani xevottak to okʼkol naslolo mhunn kollon ietolem.”
12 Survatek thaun jem mhoimebhorit xinvason unch ubarlam,
Tench amcho povitr zago zaun asa.
13 Jehova Deva, Izraelachea bhorvonxea,
Tuka soddun voitat tea sogleank loz bhogchi poddttoli.
Tujea* add voitat tanchim nanvam dhulʼlicher boroilʼlim astolim,
Karonn tannim Jehovak, zo jivea udkachi zhor zaun asa, taka soddun dila.
14 Jehova Deva, mhaka boro kor, ani hanv boro zatolom.
Mhaka salvar kor, ani hanv salvar zatolom,
Karonn hanv tujich vakhannʼnni kortam.
15 Polloi! Te mhaka mhunnttat:
“Jehovachea utrachem kitem zalem?
Tem azun purnn kiteak zaunk na?”
16 Punn hanv zalear, ek gonvlli zalʼlean, tujea fattlean cholop soddun diun, pollon vochonk na,
Ani hanv odruxttachea disa pasot axeun ravonk na.
Mhojea vonttamnim hanv kitem uloilom tem soglem tum zannam,
Hem soglem tujea mukharuch ghoddlam!
17 Mhojer akant ieunk, tum karonn zainaka.
Odruxttachea disa tum mhozo asro zaun asa.
18 Mhaka dhumallo ditat tankam loz bhogchi poddom,
Punn mhaka loz bhogonk dinaka.
Tancher akant ieum,
Punn mhaka akantak sampddonk dinaka.
Tancher odruxttacho dis hadd,
Ani tankam mostun, tancho purnn toren* nas kor.
19 Jehovan mhaka oxem mhunnttlem: “Voch, ani hea lokanchea putanchea darvonttea lagim, zoim thaun Judache raza ieta-voitat thoim ubo rav, ani Jeruzalemachea soglea darvontteam lagim ubo rav. 20 Tum tankam sang, ‘Judachea razamno, Judantlea soglea lokamno ani Jeruzalemant ravtolea sogleamno, tumi je hea darvontteantlean bhitor sortat, Jehovacho sondex aikat. 21 Jehova oxem mhunntta, “Hacher dhean diat: Sabathachea disa tumi vojem ukolchem nhoi, vo koslench vojem Jeruzalemachea darvontteantlean bhitor haddchem nhoi. 22 Sabathachea disa tumi tumchea ghorantlean koslench vojem bhair haddchem nhoi, ani tumi koslench kam korchem nhoi. Hanvem tumchea purvozank adnea dilʼli toxi, tumi Sabathacho dis povitr lekhcho. 23 Punn tannim mhojem aikonk na vo mhaka kan diunk na. Tannim hottʼtti* zaun mhoji adnea pallunk ani mhoji xist manun gheunk nakarlem.”’
24 “‘Jehova mhunntta, “Punn tumi dhean diun mhoji adnea pallun, Sabathachea disa koslench vojem uklun hea xarachea darvontteantlean bhitor gheun ienant, toxench Sabathachea disa koslench kam korinastana tumi to dis povitr mhunn lekhtat, 25 zalear Davidachea xinvasonacher bostat te raza ani kunvor pasun, rothancher ani ghoddeancher boson hea xarachea darvontteantlean bhitor ieunk pavtole. Te ani tanche kunvor, Judache lok ani Jeruzalemant ravpi lok bhitor ieunk pavtole ani hem xar sodankal lokamnim bhorlolem astolem. 26 Judachea xarantlean, Jeruzalem xarachea bhonvtonnchea vattarantlean, Benjaminachea desantlean, sokoilea vattarantlean, dongri vattarantlean ani Negebantlean* lok ietole. Te aplea sangata hulpailʼleo bhetto, bolidanam, daneacheo bhetto, dhovo dhump ani dhinvasnneche iodn gheun Jehovachea ghorant ietole.
27 “‘“Punn Sabathacho dis povitr mhunn lekhinastana, Sabathachea disa vojem uklun ani tem Jeruzalemachea darvontteantlean bhitor haddun tumi mhoji adnea moddli zalear, hanv tumchea darvontteank uzo laitolom, ani ho uzo Jeruzalemache vhoddle gopur kabar korun uddoitoloch ani to kednanch palvochona.”’”