Jeremias
15 Uprant Jehovan mhaka mhunnttlem: “Moizes ani Samuel pasun mhojea mukhar ube asle zalear, hanv hea lokank doia dakhounchom naslom. Hea lokank mhojea mukhavoile dhanvddai. Tankam vochom-di. 2 Ani tannim tuka, ‘Ami khoim vochom?’ mhunn vicharlear, tum tankam sang, ‘Jehova oxem mhunntta:
“Zanchea pasot jiv gheta tosli pidda nemlea, tannim tea jiv gheupi pidde lagim voichem!
Zanchea pasot tolvar nemlea, tannim tolvari lagim voichem!
Zanchea pasot bhuk nemlea, tannim bhuke lagim voichem!
Zanchea pasot gulamponn nemlam, tannim gulamponnant voichem!”’
3 “Jehova mhunntta, ‘Hanv tancher char odruxttam* dhaddttolom: jivexim marunk tolvar, moddim voddun vhoronk sunnim, toxench tankam khaunk ani tancho nas korunk mollba voilim suknnim ani zomni voilim zonvaram. 4 Hezekiacho put, Judacho raza Manasen, Jeruzalemant jim kamam kelʼlim taka lagon hanv hea lokanchi oxi poristhiti kortolom, ki prithume voilim soglim raxttram samkinch thottaktolim.
5 Jeruzalema, konn tuka doia-maia dakhoitolo?
Konn tuka somzon ghetolo?
Ani konn tuji khobor gheunk ravtolo?’
6 Jehova mhunntta: ‘Tunvem mhaka soddun dila.
Tum porot-porot mhaka fatt korta.*
Taka lagon, hanv mhozo hat fuddem kaddttolom ani tuzo nas kortolom.
Tuje churchure korun-korun* hanv thoklam.
7 Hanv tankam desachea darvontteancher daneam bhaxen usllaitolom ani pola bhaxen ximpddaitolom.*
Hanv tanchea bhurgeank marun uddoitolom.
Hanv mhojea lokancho nas kortolom,
Karonn tannim apleo vatto bodlunk nakarlam.
8 Mhojea mukhar, tanchea vidvancho ankddo doriachea renve poros chodd zatolo.
Donparchea vellar, hanv tanchea add eka nas korpeak dhaddttolom,
To tanchea avoincher ani tornatteancher akromonn kortolo.
Hanv okosmat tankam ghuspa-gondhollant ghaltolom ani tancher bhirant posraitolom.
9 Jea bailen sat bhurgeank zolm dila ti oskot zalea,
Tika suskar gheunk pasun kotthin zata.
Ticho suria dis astanach buddla,
Zaka lagon, tika* loz zalea ani opman bhogcho poddla.’
Jehova mhunntta, ‘Tanchea modle je urleat,
Tankam hanv dusmananchea tolvarichea tabeant kortolom.’”
10 Age mhoje mai, mhojer hai! Tunvem mhaka kiteak mhunn zolm dilo,
Akʼkhea desache lok mhojea lagim vad-vivad kortat ani mhojea lagim zhogoddttat.
Hanvem konnank rinn diunk na, toxench konnam koddlean rinn gheunkui na,
Tori astana sogle mhojer xirap ghaltat.
11 Jehova mhunntta: “Hanv dubhav nastana tujea sangata borem kortolom,
Odruxttachea vellar, hanv tujea pasot uloitolom,
Sonkoxttachea vellar, hanv dusmana add uloitolom.
12 Konnui lokhnnache kuddkean-kuddke korunk xokta kai?
Utʼtorechea lokhnnache ani tambeache kuddkean-kuddke korunk xokta kai?
13 Tumi* soglea vattaramnim kelʼlea tumchea soglea patkank lagon,
Hanv kainch poixe ghenastana tumchi girestkai ani theve, lutticho mhal mhunn ditolom.
14 Tumkam khoborna tea desant tem soglem vhorchem mhunn,
Hanv tem tumchea dusmanank ditolom.
Mhojea krodhacho uzo pettla,
Ani to tumchea add zolltta.”
15 Jehova Deva, tuka mhoji poristhiti khobor asa,
Mhozo ugddas kor ani mhojer dhean di.
Mhaka dhumallo ditoleam koddlean, tum mhojea pasot sudd ghe.
Tum rokddoch ragar zaina, taka lagon mhozo nas zaunk dinaka.
Ho opman hanv tujea pasot sostam mhunn zannam zav.
16 Tuzo sondex mhaka mellʼllo ani hanvem to khailo,
Tuzo sondex mhojea pasot khuxal zaunk ek karonn zalem ani mhojem kalliz sontosbhorit zalem,
Karonn fouzanchea Deva Jehova, mhaka tujea nanvan vollkhotat.
17 Hanv mouza-mosti kortoleam sangata boson khuxalkai monoina.
Tuzo hat mhojer asa dekhun hanv ekloch bostam,
Karonn tunvem mhaka krodhan* bhorla.
18 Mhojem dukh kabar kiteak zaina ani mhozo ghavo kiteak pekona?
To boro zaupachem nanvuch ghena.
Tum mhojea pasot eka fosoita toslea zhori sarko zatolo kai,
Zacher patieunk zaina?
19 Taka lagon Jehova mhunntta:
“Tum mhojea lagim porot ailo zalear, hanv porot tuka doia dakhoitolom,
Ani tum mhojea mukhar ubo ravtolo.
Valor naslolea vostum thaun tunvem moladik vostu kuxin kaddleo zalear,
Tum mhojea tondda sarko* zatolo.
Tankam portun tuje lagim ieunk poddttolem,
Punn tum tanche lagim voichona.”
20 Jehova mhunntta, “Hanv tuka hea lokam pasot tambeachea eka ghott vontti sarko kortam.
Te tujea add zhuz kortolech,
Punn tankam zoit mellchem na,*
Karonn tuka salvar korunk ani tuka vanchounk hanv tujea sangata asam.”
21 “Ani hanv tuka noxtteanchea hatantlean vanchoitolom,
Ani zulum korpeanchea chopkeantlean soddoitolom.”