Jeremias
5 Jeruzalemachea rosteancher bhonvat.
Bhonvtonnim nodor marat ani dhean diun polloiat.
Neai-an vagta, ani visvaxi ravonk sodhta
Toslo ekui munis melltta zalear,
Tachea nakeancher sodhun polloiat,
Ani hanv taka bhogxitolom.
2 Te mhunnttat khorem, “Jehovachea jivacho soput!”
Punn tancho soput khotto.
3 Jehova Deva, visvaxi asat tankam tuje dolle sodhinant kai?
Tunvem tankam marle, punn tancher kosloch porinnam zaunk na.*
Tunvem tankam maddoun uddoile, tori astana tannim xist manun gheunk na.
Tannim aplim tonddam khoddpa poros nibor kelim,
Ani tannim porot ieunk nakarlem.
4 Punn hanvem monantuch mhunnttlem: “He sade lok astole.
Te pixeponnan vagtat, karonn tankam Jehovachi vatt khobor na,
Tankam Devacho kaido khobor na.
5 Hanv vhoddlea-vhoddlea lokam lagim voitolom ani tanchea lagim uloitolom,
Karonn tannim Jehovachea vattecher,
Aplea Devachea kaideacher dhean dilanch astolem.
Punn tannim sogleamnim zum* moddun uddoilem,
Ani tacheo dorio toddun uddoileo.”
6 Taka lagon, ranantlo ek xinv tancher akromonn korta,
Oronnʼnneantlo ek kolo* tankam pinzun uddoita,
Ek bibtto vag tancher akromonn korunk tanchea xaram lagim boson ravta.
Tea xarantlean bhair ietolea dor ekleache to pinzun kuddkean-kuddke korun uddoita.
Karonn tannim zaite oprad keleat,
Ani te zaite pavtti ovisvaxi zaleat.
7 Haka lagon hanv tuka* koso bhogsum?
Tujea putamnim mhaka soddun dila,
Ani je Dev nhoi tanchea nanvan te soput ghetat.
Hanvem tancheo gorzo purnn keleo,
Punn te pordvar korit ravle.
Ani te zomo korun xindoll bailechea ghora gele.
8 Loingik itsa challvolʼlea ghoddeam bhaxen,
Dor eklo dusreachea baile fattlean voita.
9 Jehova mhunntta: “Oslea korneank lagon hanvem tancho hixob gheuncho nhoi kai?
Oslea raxttra koddlean hanvem sudd gheuncho nhoi kai?”
10 “Jeruzalemachea drakxanchea molleamnim vochat ani te padd korun uddoiat,
Punn tancho purnn toren nas korinakat.
Tanche posortat te fantte katrun uddoiat,
Karonn te Jehovache nhoi.
11 Izraelachea ghorannean ani Judachea ghorannean
Mhozo kitlo mhunn visvasghat kela,” oxem Jehova mhunntta.
12 “Tannim Jehovak nakarla, ani tim oxem mhunnot ravtat,
‘To kainch korchona.*
Amcher koslench odruxtt ieunchem na,
Ami zhuz* vo bhuk pollounchim nant.’
13 Provadeanchim utram pokoll,
Tanche bhitor Devachem utor na.
Tanchea pokoll utram bhaxen te-ui nanch zaun voitole!”
14 Taka lagon, fouzancho Dev Jehova oxem mhunntta:
“He lok oxem mhunnttat dekhun,
Hanv mhojim utram tujea tonddant ujea sarkim kortolom,
Ani hea lokank lakdda sarkim kortolom,
Ani ho uzo tankam lasoun uddoitolo.”
15 Jehova mhunntta, “Izraelachea ghorannea, hanv tujer akromonn korunk eka poisulʼlea raxttrak haddttam.
Tem zaitea vorsam thaun ostitvant asa.
Tem khub adlem raxttr zaun asa,
Zachi bhas tum nokllo,
Ani zachem ulovop tum somzonk xokona.
16 Tanchem bannanchem beg eka uktea fondda sarkem asa,
Te sogle zhuzari zaun asat.
17 Te tujem pik ani tuzo unddo khaun uddoitole.
Te tujea putank ani dhuvank khaun uddoitole.
Te tujea menddram-bokddeank ani gai-boilank khaun uddoitole.
Te tujeo drakxancheo vali ani anjiranchim zhaddam khaun uddoitole.
Bhonvtonnim ghott durgam aslolim tujim xaram, zancher tuka visvas asa, tancho te tolvarin nas korun uddoitole.”
18 Jehova mhunntta, “Punn tea disamnim pasun hanv tumcho purnn toren nas korchom na. 19 Ani te tuka, ‘Jehova amchea Devan amkam hem soglem kiteak kelem?’ mhunn vichartat tednam, tum tankam oxem sang, ‘Jea toren tumi mhaka soddun tumchea desant eka porkea devachi seva keli, teach toren tumi eka porkea desant vochon porkea lokanchi seva kortole.’”
20 Jakobachea ghoranneant hi porgottnni korat,
Ani Judant hi kollounni korat:
21 “Murkhamno ani okʼkol naslolea lokamno,* hem aikat:
Tankam dolle asat, punn te pollounk xokonant,
Tankam kan asat, punn te aikonk xokonant.
22 Jehova mhunntta, ‘Tumkam mhoji matxi pasun bhirant disona kai?
Tumi mhojea mukhar bhirantin koddkoddchem nhoi kai?
Hanvench renvek doriachi xim mhunn nemli,
Dorian ti xim par korchi nhoi mhunn hanvem renvek sodanch thoim ravcho kaido dilo.
Doriachim lharam kitlim-i usollʼllim zalear pasun tim zoitivont zaunchim nant.
Ti lharam kitlim-i gorozlim zalear pasun, tim xim par korunk xokchimnant.
23 Punn hea lokanchem kalliz hottʼtti* ani add voita toslem zaun asa,
Te mhaka soddun ap-aplea vatten geleat.
24 Te aplea kallzant oxem mhunnonant:
“Ieiat, ami amcho Dev Jehovachi bhirant dhorum-ia,
Zo amkam vella-vellar paus dita,
Survatecho paus* ani uprant poddtta to paus* dita.
Ani toch amchea pasot lunvnnek nemlolim sumanam rakhon dovorta.”
25 Tumcheach guneanvank lagon hem soglem tumchea thaun addaun dovorlam,
Tumcheach patkamnim tumkam borea vostum thaun pois dovorleant.
26 Mhojea lokam modem noxtte lok asat.
Suknneak dhorpi fas manddun nodor dovortat toxench, te pasun nodor dovrun astat.
Te bhirankull fas manddttat.
Te fas manddun munxank dhortat.
27 Suknneamnim bhorlolea panzrea sarkim
Tanchim ghoram dusreank fosoun ektthaim kelʼlea mhalan bhorlolim asat.
Ani taka lagon te xoktivont ani girest zaleat.
28 Te motte zaleat ani tanchi kat sullsullit zalea,
Noxtteponn tanchea bhitor bhoron votʼta.
29 Jehova mhunntta: “Oslea korneank lagon hanvem tancho hixob gheuncho nhoi kai?
Oslea raxttra koddlean hanvem sudd gheuncho nhoi kai?
30 Desant jem ghoddlam tem thottakpa sarkem ani bhirankull asa:
31 Provadi khotteo bhasaunneo kortat,
Iadnik dusreancher chukichea ritin odhikar choloitat.
Ani hem mhojea lokank khub avoddtta.
Punn xevott ietolo tednam tumi kitem kortole?”