Jeremias
51 Jehova oxem mhunntta:
“Hanv Babilon ani Lebkamaiant* ravtoleam add,
Nisontton korta toslem varem haddttam.
2 Hanv Babilonant varem divpeank dhaddttolom,
Te taka varem ditole ani taka ritem kortole.
Odruxttachea disa te soglea vatten tachea add ietole.
3 Bann marpean aplo dhonu toiar korcho* nhoi.
Ani zhuzak ghaltat to kott ghalun konnench ubo ravcho nhoi.
Tachea tornattea cheddeanchi matxi pasun doia korinakat.
Tachea akʼkhea foujecho nas korun uddoiat.
4 Ani tachea tornatteank Kaldeikaranchea desant jivexim martole,
Tachea rosteancher tankam ar-par toptole.
5 Karonn Izraelak ani Judak, tancho Dev, fouzancho Dev Jehovan tankam soddunk nant, te vidvam sarke nant.
Punn Izraelachea Povitr Devachea nodren tancho des* guneanvamnim bhorlolo asa.
6 Babilona thaun pollon vochat,
Tumcho jiv vanchounk pollon vochat.
Tachea guneanvak lagon tumi moronakat.
Karonn ho, Jehova sudd gheta to vell zaun asa,
To taka tachea kamanchem farikponn dita.
7 Babilon Jehovachea hatant ek bhangrachem kop aslem,
Tannem akʼkhe prithumek ttaitt keli.
Raxttram tacho drakxancho soro pieleant,
Taka lagon tim pixim zaleant.
8 Babilon okosmat sokol poddlam ani moddlam.
Tachea pasot vhoddlean bob marun roddat!
Tachea dukhik lagon balsam haddat,
Tem ghoddie borem zait.”
9 “Ami Babilonak borem korcho proitn kelo, punn tem borem zaunk xoklem na.
Taka sodd, ani ami soglim ap-aplea desant vochom-ia.
Taka khast favo, karonn tacho guneanv mollba meren pavla,
Kupam itlo unch pavla.
10 Jehovan amchea pasot neai kela.
Ieiat, amcho Dev Jehovachea kamam vixim ami Sionant sangom-ia.”
11 “Tumche bann pazat, hatant gol ddhalo gheiat.*
Jehovan Mediachea razanchem kalliz uksailam,
Karonn tannem Babilon padd korun uddounk tharailam.
Jehova sudd gheta, aplea mondirak lagon sudd gheta.
12 Babilonachea durgancher akromonn korunk khunna mhunn khambo ubo korat.
Anik bore toren nodor dovrat, rakhonndarank tanchea zagear ube korat.
Lipon akromonn kortoleank toiar dovrat.
Karonn Jehovan ek manddni kaddlea,
Babilonant ravtoleam add tannem jem kitem bhasailam tem to purnn kortolo.”
13 “Age baile, tum ji zaitea udkancher ravta,
Jichea lagim bhorpur theve asat,
Tuzo xevott lagim pavla, tunvem zo faido zoddun ghetla tacho xevott lagim pavla.
14 Fouzancho Dev Jehova aplea jivacho soput gheun sangta,
‘Hanv tuka tollam bhaxen mezunk zaina titlea soinikamnim bhortolom,
Te tuka haroun khuxalkaien bob martole.’
15 Tannench aple xokten prithum rochli,*
Aplea zannvaien borem pik dita tosli zomin toiar keli,
Ani aplea somjikaien mollob posrailem.
16 To avaz korta tednam
Mollba voilem udok uchamboll zata,
Ani to prithumechea konnxea-konnxeam thaun kupam voir choddom-xim korta.*
To pausa pasot zoglam marum-xim korta,*
Ani tachea gudanvantlean vadoll bhair haddtta.
17 Dor ek munis somjikai ani ginean naslolea porim vagta.
Dhatucher kam korpi dor eka munxak apnnem kantoun kelʼlea murtek lagon loz bhogchi poddttoli.
Karonn tachi dhatuchi murti* ek fott zaun asa,
Ani tankam jiv* na.
18 Teo kainch upeog nasloleo,* fokot fokannam kori-sarkeo asat.
Tanche koddlean hixob gheuncho dis ietolo tednam, tancho nas zatolo.
19 Jakobacho Vantto hea vostum bhaxen nhoi,
Karonn tannench dor ek vost ghoddlea,
Ani to tachea daizacho danddo zaun asa.*
Tachem nanv fouzancho Dev Jehova.”
20 “Tum mhojea pasot ek zhuzachem hotʼtear zaun asa, ek danddo zaun asa,
Karonn hanv tujea udexim raxttrancho churo kortolom.
Tujea udexim rajeanchem nisontton korun uddoitolom.
21 Tuka uzar korun hanv ghoddeacho ani tachea ghoddesvaracho churo kortolom,
Zhuzachem roth ani tem choloitoleacho churo korun uddoitolom.
22 Tuka uzar korun hanv dadleacho ani bailecho churo kortolom,
Zannttea dadleacho ani cheddeacho churo korun uddoitolom,
Tornattea cheddeacho ani tornattea cheddvacho churo kortolom.
23 Tuka uzar korun hanv gonvlleacho ani tachea hinddacho churo kortolom,
Xetkaracho ani tachea zonvaranchea zoddiecho churo kortolom,
Razpalancho ani odhikareancho churo kortolom.
24 Hanv Babilonak, ani Kaldeiant ravtolea sogleank tanchea vaitt kamanchem farikponn ditolom,
Karonn tannim Sionant tumchea dolleam mukhar zaitim vaitt kamam keleant,” oxem Jehova mhunntta.
25 Jehova mhunntta, “O nas korpi porvota,
Tum, zo akʼkhe prithumecho nas korta,
Hanv tujea add mhozo hat fuddem kaddttolom ani tuka khoddpam voilean sokol dhuklun uddoitolom,
Ani tuka ek zollon gelʼlo porvot korun soddttolom.”
26 Jehova mhunntta, “Lok tujea thaun konnxeacho fator vo buniadicho fator kaddchenant,
Karonn tum sasnak padd zaun urtolem.”
27 “Desant khunna mhunn khambo ubo kor.
Raxttram modem ek xing* vazoi.
Tachea add zhogddonk raxttrank nem.
Ararat, Mini ani Ashkenaz, hea rajeank tachea add apoi.
Tachea add zhogddonk soinikanchi bhorti korta toslo odhikari nem.
Datt kens aslole toll akromonn kortat tea toren, ghoddeank tancher akromonn korunk dhadd.
28 Tachea add zhogddonk raxttrank nem,
Mediachea razank, tachea razpalank ani tachea soglea odhikareank,
Ani tea soglea desank tachea add nem zancher te raz choloitat.
29 Prithum haltoli ani thorthortoli,
Karonn Jehovan Babilona sangata jem korunk tharailam tem purnn zatolench.
To Babilonachi oxi poristhiti kortolo, ki polloitat tim soglim samkinch thottaktolim, ani thoim ekui munis urchona.
30 Babilonachea zhuzareamnim zhuz korop soddun dilam,
Te aplea ghott kilʼleamnim vochon lipleat.
Tancho dhir unno zala.
Tanchi poristhiti bailam bhaxen zalea.
Babilonachea ghorank uzo laila.
Tachea darvontteanche lokhnnache dandde moddun uddoileat.
31 Ek kolloupi dhanvon vochon dusrea kolloupeak melltta,
Ek sondexkar dhanvon vochon dusrea sondexkarak melltta,
Te Babilonachea razak sangonk dhanvtat ki tachea xaracher soglea vatten kobzo kela,
32 Vhanvtea udkacher kobzo kela,
Papyrus-achim vhoddim lasoun uddoileant,
Ani soinik khub bhieleat mhunn sangonk te dhanvtat.”
33 Karonn Izraelacho Dev, fouzancho Dev Jehova oxem mhunntta:
“Babilonachi dhuv mollnnechea kholla* bhaxen asa.
Tika maddoun ghott korpacho vell aila.
Beginuch ticho lunvnnecho vell pavtolo.”
34 “Babilonacho Raza Nebukadnezaran* mhaka gillun uddoila.
Tannem mhaka ghuspa-gondhollant ghatla.
Tannem mhaka ritea aidona sarko kela.
Eka vhoddlea sorpa bhaxen tannem mhaka gillun uddoila.
Mhojeo boreo-boreo vostu khaun tannem aplem pott bhorlam.
Tannem mhaka bhair uddoila.*
35 ‘Mhojer ani mhojea kuddicher zo zulum kela, to Babilonacherui zaum!’ oxem Sionant ravpi mhunntta.
‘Ani Kaldeiant ravpi lok mhojea rogtache zobabdar zaum!’ oxem Jeruzalem mhunntta.”
36 Taka lagon Jehova mhunntta:
“Atam hanv tujea vatten kes zhogoddttolom,
Ani hanv tujea pasot sudd ghetolom.
Hanv tacho doria ani tacheo baim-o sukoitolom.
37 Babilon fatranchi ras,
Ani koleanchi* dhol zatoli,
Tachi oxi poristhiti zatoli, ki polloitat tim soglim samkinch thottaktolim ani tim fivnneo* ghalun tachim fokannam kortolim,
Thoim ekui munis urchona.
38 Te sogle mellon tornattea xinva bhaxen goroztole.
Xinvanchea poram bhaxen gurgurtole.”
39 Jehova mhunntta, “Tancheo vondovnneo challvotat tednam, hanv tanchea pasot jevonn dovortolom ani tankam khub pieun ttaitt kortolom,
Jea vorvim te khuxalkai monoitole.
Uprant te sasnak nhidtole,
Ani tea nhidentlean te porot kednanch utthchenant.”
40 “Hanv tankam menddurleam bhaxen,
Bokddeam sangata marunk vhelʼlea menddream bhaxen vhortolom.”
41 “Polloi! Sheshakacher* koso mhunn kobzo kela,
Zachi akʼkhi prithum vakhannʼnni kortali, ti bond zalea!
Raxttram modem Babilonachi oxi poristhiti zalea, ki polloitat tim soglim samkinch thottaktat!
42 Babilonacher doria choddla.
Mezunk zaina titlea lharank lagon tem buddlam.
43 Tachea xaranchi oxi poristhiti zalea, ki polloitat tim soglim samkinch thottaktat. Tem ek suko vattar ani oronnʼnnem zalam.
Ek oslo des, zoim konnuch ravchona ani thoim thaun konnuch pasar zaunchona.
44 Hanv Babilonachea Bel devacher dhean ditolom.
Ani tannem gillʼllam tem soglem hanv tachea tonddantlean bhair kaddttolom.
Tachea lagim raxttram anik kednanch voichimnant,
Ani Babilonachem durig moddon poddttolem.
45 Mhojea lokamno, tachea modlim bhair sorat!
Jehovachea zollttea raga thaun tumcho jiv vanchounk pollon vochat!
46 Desant ji khobor mellchi asa taka lagon tumchem kalliz oskot zaunk dinakat ani bhienakat.
Desant maramari zata ani ek raz choloupi dusrea raz choloupea add ubo ravta mhunn
Eka vorsa ek khobor mellttoli,
Ani dusrea vorsa dusri khobor mellttoli.
47 Taka lagon polloi! te dis ietat,
Jednam hanv Babilonachea kantoilʼlea murteancher dhean ditolom.
Tachea akʼkhea desak loz bhogchi poddttoli,
Ani tachea modem tache jivexim marlole lok poddlole astole.
48 Mollob, prithum ani tantunt asa tem soglem, Babilon poddlam tem polloun,
Khuxalkaien bob martolem.
Karonn utʼtore thaun tache nas korpi ietole,” oxem Jehova mhunntta.
49 “Babilonan fokot Izraelachea lokankuch jivexim marunk nant,
Punn aplea modem ravpi prithume voilea soglea lokank marun uddoile.
50 Tumi je tolvari thaun vanchleat, fuddem vochot ravat, thambonakat!
Tumi je pois asat, Jehovacho ugddas korat,
Ani tumchea kallzant Jeruzalema vixim chintat.”
51 “Amkam lojek ghatleat, karonn amkam tomnne marleat te ami aikoleat.
Opmanak lagon amchim tonddam dhampleant,
Karonn pordexi* Jehovachea ghorachea* povitr zageam add aileat.”
52 Jehova mhunntta, “Taka lagon polloi! te dis ietat,
Jednam hanv tachea kantoilʼlea murteancher mhojem dhean ditolom,
Ani zokhmi zaleat te, akʼkhea desant pirgotole.”
53 Jehova mhunntta, “Babilon mollba poriant pavlem zalear pasun,
Ani tannem aple unch kilʼle anikui ghott kele zalear pasun,
Hanv tacho nas kortoleank dhaddttolom.”
54 “Aikat! Babilona thaun roddnneancho avaz aikonk ieta,
Kaldeikaranchea desa thaun vhodd odruxttacho avaz aikonk ieta.
55 Karonn Jehova Babilonacho nas korta,
To tacho vhoddlo avaz bond kortolo.
Tache dusman doriachea lharam bhaxen goroztole,
Ani tancho avaz aikonk ietolo.
56 Nas korpi Babilonacher akromonn kortolo.
Tache zhuzari koidi zaun voitole,
Tachea dhonunche kuddkean-kuddke zatole,
Karonn Jehova ek sudd gheupi Dev zaun asa.
To tankam farikponn ditoloch.
57 Hanv tachea kunvrank ani zannarank,
Tachea razpalank, odhikareank ani zhuzareank ttaitt kortolom,
Ani uprant te sasnak nhidtole,
Jea nhidentlean te porot kednanch utthchenant,” oxem to Raza mhunntta, zachem nanv fouzancho Dev Jehova.
58 Fouzancho Dev Jehova oxem mhunntta:
“Babilonachem durig rund aslear pasun tem purnn toren nas zaun voitolem,
Ani tache darvontte unch aslear pasun taka uzo laitole.
Veg-vegllea desantle lok vavr kortole, punn tea vavracho kainch faido zaunchona.
Raxttrank zachea pasot kam korun puro zalem, tem ujeant lason kabar zatolem.”
59 Jeremias provadean, Neriacho put ani Mahseiacho natu Seraiak ek adnea dili. Jeremiasan Seraiak hi adnea tednam diloli, jednam Seraia Judacho Raza Zedekia sangata, tachea razvottkechea chovthea vorsa Babilonant gelʼlo. Seraia razachea vostunchi dekhrekh korpi aslo. 60 Babilonacher ieunchim aslim tea soglea odruxttam vixim, mhunnche Babilona add boroilʼlim him soglim utram, Jeremias provadean eka pustokant boroun kaddlim. 61 Jeremiasan Seraiak mhunnttlem: “Tum Babilonant pavta ani taka polloita tednam, tunvem him soglim utram vhoddlean vachunk zai. 62 Magir oxem sang, ‘Jehova Deva tunvem hea zagea vixim sanglolem, ki hanga konnuch urchona, ek munis vo zonvar pasun urchem na, ani ho zago sasnak padd zaun urta tea toren tum tacho nas kortolo.’ 63 Hem pustok vachun zalea uprant, taka ek fator band ani tem Eufrates Nhoim-chea modem uddoi. 64 Magir oxem mhunn, ‘Heach toren Babilon buddttolem ani porot kednanch voir sorchem na, karonn hanv tacher odruxtt haddchom asa, ani thoim ravtat tankam puro zatolem.’”
Jeremiasachim utram hanga somptat.