Jeremias
23 Jehova mhunntta, “Mhojea chorvachea mollantlea menddrancho nas kortat ani tankam hevtten-tevtten ximpddaitat tea gonvlleancher hai!”
2 Taka lagon, Izraelacho Dev Jehova aplea lokanchea gonvlleank oxem mhunntta: “Tumi mhojea menddrank hanga-thoim posraileant. Tankam ximpddaileant ani tancher dhean diunk na.”
Jehova mhunntta, “Tumchea noxttea kamank lagon hanv tumkam khast ditolom.”
3 Tea uprant, hanv mhojea urlolea menddrank soglea desa thaun ektthaim kortolom, zoim hanvem tankam ximpddailolim. Hanv tankam porot tanchea chorvachea mollar haddttolom ani tim folladik zatolim ani tancho ankddo vaddot voitolo. 4 Hanv tanchea pasot osle gonvlli nemtolom, je khoreponnim tanchi kallji ghetole. Tea uprant mhojim menddram porot kednanch bhieunchimnant, tim ghaborchimnant ani tanchea modlo ekui menddro sanddchona,” oxem Jehova mhunntta.
5 Jehova mhunntta, “Polloi! Te dis ietat jednam hanv Davidachea vonxavolli thaun ek nitivont komri* upzoitolom. Ani ek raza somjikaien, neai-an ani nitivontponnan desant raj kortolo. 6 Tachea disamnim Juda salvar zatolem ani Izrael surokxit astolem. Ani tea razak hea nanvan vollkhotole: Jehova Amchem Nitivontponn.”
7 Jehova mhunntta, “Punn osle dis ietat jednam te porot kednanch oxem mhunnchenant: ‘Izraelitkarank Ejiptt desantlean bhair haddlim, tea Jehovachea jivacho soput!’ 8 Tachea bodlek te mhunnttole: ‘Izraelitkaranchea sonstik utʼtorechea desantlean ani tannem tankam ximpddailʼlim tea soglea desantlean bhair kaddun porot haddlim, tea Jehovachea jivacho soput!’ Uprant te apleach desant ravtole.”
9 Provadeam pasot ho sondex asa:
Mhojem kalliz tunttlam.
Mhojim soglim haddam koddkoddttat.
Jehova ani tachea povitr sondexak lagon
Hanv drakxancho soro pielʼlea eka munxa bhaxen zalam,
Hanv pieun ttaitt zalʼlea munxa bhaxen zalam.
10 Karonn akʼkho des pordvar korpi lokamnim bhorla,
Desacher oslo xirap poddla ki to dukh korta.
Ranvott vattarantlim chorvachim mollam sukleant.
Tancho sobhav vaitt zala, ani te aplo odhikar sarke toren uzar korinant.
11 Jehova mhunntta, “Provadi ani iadnik dogui boxttoleat.*
Mhojea ghorant pasun hanvem tankam noxttim kamam kortana polloileat.”
12 Jehova mhunntta, “Taka lagon tancho rosto nisorta toslo ani kallkhan bhorlolo astolo,
Te addkhollttole ani poddttole.
Jea vorsa hanv tanche koddlean hixob ghetolom,
Tednam hanv tancher odruxtt haddttolom.”
13 “Samariachea provadeam modem hanvem vitt haddtta toslem kitem tori polloilam.
Te Baalachea nanvan bhasaunneo kortat,
Ani mhoje Izrael porjek vankdde vatten vhortat.
14 Ani Jeruzalemache provadi vitt haddtta toslim kamam kortat tem hanvem polloilam.
Te pordvar kortat ani fottingponnan choltat,
Te noxtteank urba ditat,
Ani aplim noxttim kamam te soddun dinant.
Te sogle mhojea nodren Sodoma bhaxen asat,
Ani tantunt ravpi lok Gomora bhaxen asat.”
15 Taka lagon, fouzancho Dev Jehova provadeam add oxem mhunntta:
“Hanv tankam koddu zhadd* khaunk laitam,
Ani vik aslolem udok pieunk ditam.
Karonn Jeruzalemantlea provadeank lagonuch desantle sogle lok Devachea add geleat.”*
16 Fouzancho Dev Jehova oxem mhunntta:
“Tumi tea provadeanchim utram aikonakat, je tumkam bhasaunneo sangtat.
Te tumkam fosoitat.*
Te tumkam sangtat tim dorxonam Jehovachea tonddantlim nhoi,
Punn tancheach kallzantlim asat.
17 Mhaka man dinant tankam te porot-porot oxem mhunnttat,
‘Jehovan mhunnttlam: “Tumi xantin jietolim.”’
Ani je konn aplea hottʼtti* kallza pormonnem vagtat, tankam te oxem mhunnttat,
‘Tumcher koslench odruxtt ieunchem na.’
18 Jehovachem utor aikonk ani somzonk,
Tachea ixttanchea zomeant konn ubo ravla?
Konnem tachem utor dhean diun aikolam?
19 Polloi! Jehovacho krodh bhirankull vadolla bhaxen suttʼttolo,
Tacho krodh noxtteanchea mathear vadolla bhaxen ghunvtolo.
20 Jea meren, aplea kallzant jem tharailam tem Jehova purnn korina ani taka tantunt ies mellona,
Tea meren tacho rag xant zaunchona.
Xevottachea disamnim tumkam hem bore toren somzotolem.
21 Hanvem tea provadeank dhaddunk nasle, tori astana te dhanvon gele.
Hanv tanchea lagim ulounk naslom, tori astana tannim bhasaunni keli.
22 Punn te mhojea ixttanchea zomea modem ube asle zalear,
Te mhojea lokank mhozo sondex kolloitole asle
Ani tankam tanchi vaitt vatt ani tanchim vaitt kamam soddunk laitole asle.”
23 Jehova mhunntta, “Hanv fokot laginch astana Dev kai, pois astana hanv Dev nhoi kai?”
24 Jehova mhunntta, “Ek munis eka oslea gupit zagear liponk xokta kai, zoim hanv taka pollounk xokona?”
Jehova mhunntta, “Mollbar ani prithumer oxem kitem-i asa kai, jem hanv pollounk xokona?”
25 “Provadi mhojea nanvan khotteo bhasaunneo kortat tem hanvem aikolam. Te mhunnttat, ‘Mhaka ek sopon poddlem! Mhaka ek sopon poddlem!’ 26 Kednam poriant hea provadeanchem kalliz tankam fott sangot ravonk laitolem? Te apleach kallzantlim khotteponnam sangtat tosle provadi zaun asat. 27 Baalak lagon tanche purvoz mhojem nanv visorle toxe, mhoje lok mhojem nanv visorchem mhunn he provadi pasun eka-mekak aplim sopnam sangtat. 28 Jea provadeak sopon poddlam tannem aplem sopon sangchem, punn zaka mhozo sondex mellʼlla tannem to asa tosoch sangcho.”
Jehova mhunntta, “Tonn ani dano, hanchea modem kitem-i ek-sarkem asa kai?”
29 Jehova mhunntta, “Mhozo sondex ujea sarko na kai? Vhoddlea khoddpacho churo korun uddoita toslea eka hatodde sarko na kai?”
30 Jehova mhunntta, “Taka lagon, dusrea provadeam koddlean mhozo sondex chortat tea provadeank hanv khast laitolom.”
31 Jehova mhunntta, “Je provadi aple jiben, ‘Devan oxem kolloilam!’ mhunn sangtat, tankam hanv khast laitolom.”
32 Jehova mhunntta, “Je provadi fottkirim sopnam polloitat ani mhojea lokank tim sangtat, toxench fotteo sangon ani boddai marun mhojea lokank vankdde vatten vhortat tankam hanv khast laitolom.”
Jehova mhunntta, “Punn hanvem tankam dhaddunk nasle vo tankam adnea diunk nasli. Tor, tankam lagon lokank kainch faido zaunchona.”
33 “Hea lokamnim vo eka provadean vo eka iadnikan, ‘Jehovachem vojem* kitem zaun asa?’ mhunn tuka vicharlem zalear, tum tankam sang, ‘“Tuminch tem vojem zaun asat! Ani hanv tumkam kaddun bhair martolom,” oxem Jehova mhunntta.’ 34 Zo provadi vo iadnik vo lokam modlo konnui oxem mhunntta, ‘Hem Jehovachem vojem!’* Hanv taka ani tachea ghoranneak khast laitolom. 35 Tumchea modlo dor eklo aplea sangateak ani aplea bhavak oxem vicharta, ‘Jehovan kitem zobab dila? Jehovan kitem sanglam?’ 36 Punn tumi atam thaun Jehovachea vojea* vixim anik uloinakat. Karonn tumchea modlea dor ekleachem vojem,* tumcho svotacho sondex zaun asa. Tumi jivea Devacho ani fouzancho Dev Jehovacho sondex bodolʼla.
37 “Tum provadeank oxem vichar, ‘Jehovan kitem zobab dila? Jehovan kitem sanglam? 38 “Hem Jehovachem vojem!”* oxem tumi mhunnot ravlear, Jehova tumkam kitem sangta tem aikat: ‘“Hem Jehovachem vojem!”* oxem mhunnonakat’ mhunn hanvem tumkam sanglolem, tori astana tumi oxem mhunnttat: ‘Ho sondex Jehovachem vojem!’* 39 Taka lagon, polloi! Hanv tumkam uklun mhojea nodre mukhavoilo kaddun pois xevttitolom, tumkam ani tumchea purvozank dilʼlem tea xara borabor hanv tumkam-i xevttitolom. 40 Hanv tumkam sasnak lojek ghaltolom ani tumcho opman kortolom, ani ho opman konnuch visorchona.”’”