Jeremias

52 Zedekia raza zalo tednam to 21 vorsancho aslo, ani tannem Jeruzalemant 11 vorsam razvottki choloili. Tachea avoichem nanv Hamutal aslem, Libnant ravpi Jeremiasachi ti dhuv asli. 2 Jehoiakima bhaxen, Zedekia Jehovachea nodren jem vaitt aslem tem soglem korit ravlo. 3 Jehovachea ragak lagon Jeruzalem ani Judak hem vaitt ghoddlem, ani xevottak tannem tankam aplea nodre mukhavoilim kaddun uddoilim. Magir Zedekia, Babilonachea raza add gelo. 4 Zedekiachea razvottkechea nnovʼvea vorsachea dhavea mhoineachea dhavea disa, Babilonacho Raza Nebukadnezar* apli akʼkhi fouz gheun Jeruzalemacher akromonn korunk ailo. Tannim Jeruzalema bhair veddo ghatlo ani tachea bhonvtonnim vonott* bandli. 5 Ho veddo, Zedekiachea razvottkechea 11-vea vorsa meren urlo.

6 Chovthea mhoineachea nnovʼvea disa, xarant bhuk borich vaddli ani lokank khaunk kainch naslem. 7 Xevottak, xarachea durgacho thoddo bhag Kaldeikaramnim foddlo. Tannim xarak veddo ghatlolo astananch, Jeruzalemant aslole sogle soinik ratchea vellar, razachea bage lagim don vonttim modem aslolea darvontteantlean pollon gele, ani Arabachea vattentlean fuddem vochot ravle. 8 Punn Kaldeikaranchi fouz Zedekiachea fattik lagli ani tannim taka Jerikochea oronnʼnneant dhorlo. Tednam, razache sogle soinik taka soddun hanga-thoim ximpoddle. 9 Uprant tannim taka koidi kelo, ani Babilonachea raza lagim Hamath desachea Riblant gheun gele, zoim Babilonachea razan tacher formonn marlem. 10 Tannem Zedekiachea dolleam mukhar tachea putank jivexim marun uddoile, ani Riblant, Judachea soglea kunvrank pasun marun uddoile. 11 Uprant Babilonachea razan tache dolle kaddun taka kuddʼddo kelo. Magir tannem taka tambeacheo beddio ghalun Babilonant haddlo. Tannem Zedekiak moro poriant koident dovorlo.

12 Uprant, panchvea mhoineachea dhavea disa, mhunnche, Babilonacho Raza Nebukadnezarachea* razvottkechea 19-avea vorsa, rakhonndaracho mukheli Nebuzaradan zo Babilonachea razacho sevok aslo, to Jeruzalemant ailo. 13 Nebuzaradanan Jehovachem ghor,* rajmahal,* ani Jeruzalemantlim soglim ghoram lasoun uddoilim. Tannem soglim vhoddlim-vhoddlim ghoram pasun lasoun uddoilim. 14 Rakhonndarachea mukhelea sangata ailolea Kaldeikaranchea akʼkhe foujen Jeruzalemachim durgam moddun uddoilim.

15 Rakhonndaracho mukheli Nebuzaradananan thoddea goribank ani xarant urlolea lokank koidi korun vhele. Toxench tannem, Judachea razacho sangat soddun Babilonachea raza vatten zalʼle tankam ani xarant kola aslolea urlolea kamdarank pasun koidi korun vhele. 16 Punn rakhonndaracho mukheli Nebuzaradanan, desant khub gorib aslole tea thoddea lokank drakxanchea molleant kam korunk ani tanche koddlean zobordosten kam korun gheunk thoinch soddle.

17 Kaldeikaramnim Jehovachea ghorant aslolea tambeachea khambeanche kuddkean-kuddke kele, ani Jehovachea ghorant aslolea hat-gaddienche ani tambeachea Doriache pasun kuddkean-kuddke kele ani soglem tambem Babilonant gheun gele. 18 Tannim mondirant uzar zatat tim gobor ghalpachim aidonam, khorim, vat palovpacheo katri, kanxe, pele ani soglim tambeachim aidonam pasun vhelim. 19 Rakhonndarachea mukhelean xudʼdh bhangrachim ani chandichim tostam, dhumpelam, kanxe, gobor ghalpachim aidonam, diveanchim sttenddam,* pele, ani bolidanank uzar zatale te kanxe gheun gelo. 20 Solomon Razan, Jehovachea ghora pasot kelʼlea don khambeank, tambeachea Doriak, tachea sokol aslolea tambeachea 12 boilank ani hat-gaddienk itlem tambem aslem, ki tem zokhunk zainaslem.

21 Donui khambea modlea dor eka khambeachi unchai 18 hat* asli ani bhonvtonn 12 hat asli, ani tachi dattai char bottam* asli ani to bhitorlean pokoll aslo. 22 Donui khambeancher voir tambeacho ek-ek kollos aslo. Donui kollosanchi unchai panch hat asli. Dor eka kollosachea charui vatten zall ani dallim kaddlolim, jim tambeachim aslim. 23 Dor eka kollosachea charui vatten 96 dallima aslim. Zallie bhonvtonnim soglim mellon 100 dallima aslim.

24 Rakhonndarachea mukhelean, mukhel iadnik Seraiak, dusro iadnik Zefaniak ani darar astat tea tin rakhonndarank dhorle. 25 Toxench, tannem soinikancher odhikar aslolea dorbarantlea odhikareak ani xarant mellʼllolea razachea sat laginchea sangateank vhele. Tea bhair, tannem senapotichea xastreak pasun vhelo zo desantlea lokank foujent bhorti zaunk ektthaim kortalo. Ani xarant atam poriant sade lok urlole tanchea modlea 60 munxank dhorun to gheun gelo. 26 Rakhonndaracho mukheli Nebuzaradan, tankam sogleank Babilonachea raza lagim Ribla gheun gelo. 27 Babilonachea razan Hamathachea Riblant tankam sogleank jivexim marun uddoile. Hea toren Judachea lokank tanchea desantlean koident gheun gele.

28 Nebukadnezaran* aplea razvottkechea satvea vorsa 3,023 Judevank koidi korun vhele.

29 Nebukadnezarachea* razvottkechea 18-vea vorsa, Jeruzalemantlean 832 lokank koidi korun vhele.

30 Nebukadnezarachea* razvottkechea 23-avea vorsa, rakhonndaracho mukheli Nebuzaradanan 745 Judevank koidi korun vhele. Sogle mellon, tannem 4,600 lokank koidi korun vhelʼle.

31 Uprant, Judacho Raza Jehoiakinak koidi korun 37-avea vorsachea 12-vea mhoineachea 25-avea disa, Babilonacho Raza Evilmerodakan Jehoiakinak soddoilo ani bondkhonnintlean bhair haddlo. Evilmerodak teach vorsa raza zalʼlo. 32 To Jehoiakina sangata doiall toren uloilo, ani tannem taka Babilonant tachea vangdda aslolea dusream razam poros chodd man dilo.* 33 Jehoiakinan aple bondkhonniche kopdde kaddle ani aplem akʼkhem jivit to Evilmerodaka sangata tachea mezar boson jevlo. 34 Jehoiakin jivo aslo tednam poriant taka Babilonachea raza koddlean dor disa jevonn mellot ravlem. To melo tea disa poriant taka razachem jevonn mellot ravlem.