Jeremias
25 Jeremiasak Judantlea soglea lokam vixim ek sondex mellʼllo. Taka ho sondex Josiacho put ani Judacho raza Jehoiakimachea razvottkechea chovtea vorsa mellʼllo. Tem voros, Babilonacho Raza Nebukadnezarachea* razvottkechem poilem voros aslem. 2 Provadi Jeremiasan, Judachea soglea lokam vixim ani Jeruzalemant ravtolea sogleam vixim* oxem sanglem:
3 “Amonacho put ani Judacho raza Josiachea razvottkechea 13-vea vorsa thaun aiz meren, 23 vorsam thaun Jehovacho sondex mhaka mellot ravlo. Ani hanv porot-porot to tumkam sangot ravlom, punn tumi aikon gheunk na. 4 Jehova aplea soglea sevokank, provadeank, tumchea lagim porot-porot dhaddit ravlo. Punn tumi tanchem aikonk na, vo te uloitat tacher dhean diunk na. 5 Te tumkam sangtale, ‘Upkar korun, tumi sogle tumcheo vaitt vatto ani tumchim vaitt kamam soddun porot ieiat. Tednam, Jehovan tumkam ani tumchea purvozank khub poilim dilʼlea desant, tumi zaito temp ravonk pavtole. 6 Tumi dusrea devam fattlean vochonakat, tanchi seva korinakat, tankam paim-am poddonakat ani murteo korun mhaka rag haddinakat. Na zalear, hanv tumcher odruxtt haddttolom.’
7 “‘Punn tumi mhojem aikonk na,’ oxem Jehova mhunntta. ‘Tachea bodlek, tumi murteo korun mhaka rag haddlo ani tumcheruch odruxtt haddlem.’
8 “Taka lagon, fouzancho Dev Jehova mhunntta, ‘“Tumi mhoji adnea pallunk na dekhun, 9 hanv utʼtorechea soglea familink apoun haddttam. Hanv mhozo sevok, Babilonacho Raza Nebukadnezarak* apoun haddttam. Hea desacher, tantuntlea soglea lokancher ani tachea bhonvtonnim aslolea soglea raxttrancher, hanv tankam akromonn korunk laitolom. Hanv tancho sogleancho nas kortolom ani tanchi oxi poristhiti kortolom, ki polloitat tim soglim samkinch thottaktolim, ani tim fivnneo* ghalun tanchim fokannam kortolim. Him raxttram sasnak padd zaun urtolim,” oxem Jehova mhunntta. 10 “Hanv hea sogleanchi oxi poristhiti kortolom, ki hanga zata to soglo khuxalkaiecho ani sontosacho avaz bond zatolo, toxench novro vhokle sangata khuxalkai monoita to avaz ani danteacher dano dolltta to avaz pasun bond zatolo. Toxench, hanv thoinchea diveacho uzvadd pasun paloun uddoitolom. 11 Ho akʼkho des fatranchi ras zatolo ani taka polloitat tim soglim samkinch thottaktolim. Ani hea raxttrank 70 vorsam poriant Babilonachea razachim gulamam zaunk poddttolim.”’
12 “‘Punn 70 vorsam purnn zatat tednam hanv Babilonacho raza ani tea raxttram koddlean tanchea guneanvacho hixob ghetolom,’* oxem Jehova mhunntta. ‘Ani hanv Kaldeikaranchea desacho nas korun, to sasnak padd korun uddoitolom. 13 Hea desachea nasa vixim hanvem sanglolem tem soglem hanv purnn kortolom. Jeremiasan soglea raxttram vixim kelʼleo teo bhasaunneo jeo hea pustokant boroilʼleo asat, teo hanv purnn kortolom. 14 Karonn zaitim raxttram ani vhoddle-vhoddle raza tankam aplim gulamam kortole, ani hanv tankam tanchea kornea pormonnem ani tanchea hatanchea kamam pormonnem tankam farikponn ditolom.’”
15 Karonn Izraelacho Dev, Jehovan mhaka mhunnttlem: “Mhojea hatantlean drakxanchea soreachem hem ragachem kop ghe, ani zanchea lagim hanv tuka dhaddttam tea soglea raxttrank tem pivoi. 16 Tim hem pietolim ani loktolim, ani hanv tancher tolvar dhaddttolom dekhun tim pixeam bhaxen vagtolim.”
17 Tor, hanvem Jehovachea hatantlem tem kop ghetlem ani tea soglea raxttrank pivoilem, zanchea lagim Jehovan mhaka dhaddlolo. 18 Hanvem sogleant poilim Jeruzalemak ani Judachea xarank, tachea razank ani kunvrank tem kop pivoilem. Tancho nas zauncho, tankam polloitat te sogle lok thottakche, tannim fivnneo* ghalun tanchim fokannam korchim ani tancher xirap ghalche mhunn hanvem tankam tem pivoilem. Ani toxench aiz ghoddtta. 19 Tachea uprant, hanvem tem kop Ejipttacho raza Faraoh-k, tachea sevokank, tachea kunvrank, tachea soglea lokank, 20 ani tanchea modem ravtolea pordexiank, Uz desantlea soglea razank, Filistia desantlea soglea razank, mhunnche Ashkelon, Gaza, Ekron ani Ashdodant urlolea razank pivoilem. 21 Toxench Edom, Moab, ani Amonit lokank, 22 ani Tirachea soglea razank, Sidonachea soglea razank ani doriachea zunvea voilea razank tem pivoilem. 23 Dedan, Tema, Buz ani tea sogleank, zanche tokleche saiddiche kens taslole asat, 24 Arbi lokanchea ani ranvott vattarant ravpi pordexianchea soglea razank, 25 Zimrichea, Elamachea, ani Mediachea soglea razank hanvem tem kop pivoilem. 26 Ani eka-fattlean-ek, lagim ani pois aslolea utʼtorechea soglea raxttranchea razank, ani prithume voilea soglea rajeank hanvem tem kop pivoilem. He sogle pielea uprant Sheshakacho* raza hem kop pietolo.
27 “Tum tankam sang, ‘Izraelacho Dev, fouzancho Dev Jehova mhunntta: “Hem pieiat, taitt zai meren pieiat. Pieun vonkat ani utthonk zaina toxe sokol poddat. Karonn hanv tumchea modem tolvar dhaddttam.”’ 28 Ani te tujea hatantlem kop gheun pieunk nakartat zalear tum tankam sang, ‘Fouzancho Dev Jehova oxem mhunntta: “Tumkam hem pieunchench poddttolem! 29 Karonn polloi! mhojem nanv aslolea hea xaracher hanv sogleant poilim odruxtt haddttam zalear, tumkam khast mellchina kai?”’
“‘Tumkam khast mellttolich, karonn hanv prithumer ravtolea soglea lokam add tolvar dhaddttam,’ oxem fouzancho Dev Jehova mhunntta.
30 “Tum tankam hi bhasaunni kor ani oxem sang,
‘Jehova unch zagea voilean goroztolo,
Aplea povitr zagear thaun to vhoddlea avazan uloitolo.
Tachea ravpachea zagea add to vhoddlean goroztolo.
Drakxam maddoupi khuxalkaien bob martat toxe,
Prithumer ravtolea soglea lokam add zoit mellʼllem dekhun to khuxalkaien git gaitolo.’
31 Jehova mhunntta, ‘Prithumechea konnxea-konnxea poriant vhoddlo avaz gaztolo,
Karonn raxttram koddem Jehovachi ek kes chalu asa.
To svota soglea munxanchi zhoddtti kortolo.
Ani tolvarin noxttea lokank kabar korun uddoitolo.’
32 Fouzancho Dev Jehova mhunntta:
‘Polloi! Ek-ek korun soglea raxttrancher odruxtt ietolem,
Prithumechea sogleam-von poisulʼlea vattara thaun ek bhirankull vadoll ietolem.
33 “‘Tea disa Jehovan jivexim marlole lok, prithumechea eka konnxea thaun dusrea konnxea meren poddlole astole. Tanchea pasot konn dukh korchona. Toxench, tanchim moddim konnuch ektthaim korchona vo purchona. Tim zomnir sarem koxim poddlolim astolim.’
34 Gonvlleamno, vhoddlean bob marat ani roddat!
Hinddachea mukheleamno, tumi dhulʼlint lollat,
Karonn tumkam jivexim marcho ani ximpddauncho vell pavla,
Ani eka moladik matiechea aidona bhaxen sokol poddon tumcho churo zatolo!
35 Gonvlleank pollon vochonk khoinch zago na,
Hinddache mukheli aplo jiv vanchounk xokonant.
36 Gonvlleanchi bob aikat!
Hinddachea mukheleanchem roddnnem aikat!
Karonn Jehova tanchea chorvachea mollachem nisontton korta.
37 Jehovachea zollttea krodhak lagon,
Te xantin ravtale tea tanchea ravpachea zageamnim atam konnuch ravona.
38 Xinv* aplea dholintlo bhair sorta toso to bhair sorla,
Bhirankull tolvarik lagon,
Ani tachea zollttea krodhak lagon,
Tanchea desachi oxi poristhiti zalea, ki polloitat tim soglim samkinch thottaktat.”